نتیش کمار نے میٹھا پور علاقہ کی ترقی اور ری ڈیولپمنٹ آف پٹنہ جنکشن منصوبے کا لیا زمینی جائزہ

پٹنہ:وزیر اعلی نتیش کمار نے آج اسمارٹ سٹی پٹنہ کے تحت پٹنہ کے میٹھا پورعلاقہ کی ترقی اورا سمارٹ سٹی پٹنہ کے تحت ری ڈیولپمنٹ آف پٹنہ جنکشن ریلوے اسٹیشن منصوبوں کا زمینی جائزہ لیا۔اس دوران انہوں نے حکام کو تعمیراتی کاموں اور ترقیاتی کاموں کے حوالے سے کئی ضروری ہدایات دیں۔
وزیر اعلی نے آریہ بھٹ نالج یونیورسٹی کیمپس پہنچ کر مٹھاپور علاقے میں قائم تعلیمی اداروں کی صورتحال کے بارے میں دریافت کیا۔ انہوں نے کیمپس میں چلائے جانے والے ویکسی نیشن سینٹر کا دورہ کرکے وہاں بھی ویکسینیشن کے بارے میں معلومات حاصل کیں۔ آریہ بھٹ نالج یونیورسٹی کی ایڈمنسٹریٹیو عمارت میں شہری ترقیات و رہائش کے پرنسپل سکریٹری مسٹر آنند کشور اور بی ایس ای آئی ڈی سی کے منیجنگ ڈائریکٹر مسٹر سنجے کمار سنگھ نے ایک پریزنٹیشن کے ذریعہ میٹھا پور کے علاقے کی ترقی اور مجوزہ فسلیٹی آف میٹھا پور انسٹی ٹیوشن کے بارے میں تفصیلی جانکاری دی۔
معائنہ کے دوران ہدایات دیتے ہوئے وزیر اعلی نے کہا کہ پورے انسٹیٹیوشن کیمپس کی چاردیواری کرائیں۔ انہوں نے کہا کہ میٹھا پور تالاب پروجیکٹ کا تصور بہتر ہے۔ تالاب کے آس پاس درخت لگائیں تاکہ سارا علاقہ سرسبز ہو۔ اس کیمپس میں تمام اداروں کے لئے مشترکہ لنک روڈ بنائیں تاکہ تالاب تک آسانی سے رسائی حاصل ہو لوگ یہاں آسانی سے آسکیں۔ اگر تالاب میں پانی زیادہ ہو تو اس کے نکاسی کا مناسب انتظام کریں۔ انہوں نے کہا کہ جو بسیں اس وقت میٹھا پور بس اسٹینڈ سے سفر کررہی ہیں انہیں بھی جلد ہی نئے بس اسٹینڈ میں منتقل کریں۔ یہاں واقع پاور سب اسٹیشن کو بھی شفٹ کریں۔

وزیراعلیٰ نے اسمارٹ سٹی پٹنہ کے تحت ری ڈیولپمنٹ آف پٹنہ جنکشن ریلوے اسٹیشن منصوبہ کا زمینی جائزہ لیا۔ جہاں انہیں پرنسپل سکریٹری شہری ترقیات ورہائش محکمہ مسٹر آنند کشور ، عمارت تعمیرات محکمہ سکریٹری روی کمار ، بہار ریاستی پل تعمیر کارپوریشن لمیٹڈ کے چیئرمین مسٹر پنکج کمار پال نے ملٹی ماڈل ہب مجوزہ سب ۔ وے ٹو پٹنہ جنکشن وایا ملٹی لیول پارکنگ وغیرہ سے متعلق ترقیاتی کاموں کے بارے میں جانکاری دی۔
دورے کے دوران نائب وزیر اعلی تارکیشور پرساد ، وزیر اعلی کے مشیرمسٹر انجنی کمار سنگھ ، وزیر اعلی کے پرنسپل سکریٹری مسٹر دیپک کمار ، چیف سکریٹری مسٹر تریپوراری شرن ، ڈویلپمنٹ کمشنر مسٹر عامر سبحانی ، ایڈیشنل چیف سکریٹری محکمہ سڑک تعمیرات مسٹر امرت لال مینا ، محکمہ تعلیم کے ایڈیشنل چیف سکریٹری مسٹر سنجے کمار ،وزیر اعلی کے پرنسپل سکریٹری مسٹر چنچل کمار ، پرنسپل سکریٹری شہری ترقیات ورہائش مسٹر آنند کشور ، سکریٹری ، محکمہ توانائی مسٹر سنجیو ہنس۔ ، ڈویڑنل کمشنر مسٹر سنجے کمار اگروال ، بہار اسٹیٹ پل کنسٹرکشن کارپوریشن لمیٹڈ کے چیئرمین مسٹر پنکج کمار پال ، عمارت تعمیرات محکمہ کے سیکریٹری مسٹر کمار روی ، بی ایس ای آئی ڈی سی کے منیجنگ ڈائریکٹر سنجے کمار سنگھ ، وزیر اعلی کے او ایس ڈی مسٹر گوپال سنگھ ،ڈی ایم مسٹرچندر شیکھر سنگھ ، ایس ایس پی اپیندر شرما کے ساتھ دیگر سینئر افسران بھی موجود تھے۔

دورے کے بعد میڈیا اہلکاروں سے بات کرتے ہوئے وزیر اعلی نے کہا کہ آپ لوگ جانتے ہیں کہ اس علاقے میں بھیڑ رہتی ہے۔یہاں قریب ہی میں ریلوے اسٹیشن ہے ، لوگ آتے اور جاتے ہیں۔ ریلوے اسٹیشن آنے والی گاڑیوں کے لئے پارکنگ کا مسئلہ ہے۔ اس خالی احاطہ میں ایک عمارت بنانے کا منصوبہ ہے۔ یہاں آنے اور جانے والے لوگوں کی سہولت کے لئے پارکنگ کا انتظام ہونا چاہئے ، اس کے لئے بغل میں پہلے سے ہی ملٹی لیول پارکنگ کا انتظام کیاگیا ہے لوگ اسے استعمال نہیں کررہے ہیں۔ ہم نے کہا ہے کہ ملٹی لیول پارکنگ کے اوپری حصے میں کھانے وغیرہ کا انتظام رکھیں۔ انہوں نے کہا کہ اس علاقے کے ترقیاتی منصوبے کے حوالے سے ہم نے جائزہ میٹنگ کی تھی، جس میں تمام چیزوں پر تفصیلی تبادلہ خیال کیا گیا۔ اس دوران ، یہ تبادلہ خیال ہوا کہ ہم سائٹ پر چل کر ان چیزوں کو دیکھیں گے۔پہلے بھی ہم نے کہا تھا کہ اوپر سے اور نیچے سے بھی ریلوے اسٹیشن تک ٹریفک کا انتظام یقینی بنائیں۔ جو ڈیزائن دکھایا گیا ہے اسی کی بنیاد پرکام کیا جائے گا۔ یہاں ایک عمدہ عمارت تعمیر کی جائے گی ، ادارے تعمیر ہوں گے ، کاروبار کرنے والوں کو سہولت ملے گی ، ان تمام چیزوں پر کام کیا جائے گا۔

وزیراعلیٰ نے کہا کہ کل ہم نے داناپور سمیت کچھ علاقوں کا دورہ کیا تھا ، اس دوران ہم نے دیکھا کہ وہاں زیادہ ہجوم نہیں تھا لیکن کچھ لوگ ماسک نہیں پہنے ہوئے تھے۔ ہم نے لوگوں کو ماسک پہننے کی ترغیب دینے کے لئے کہا ہے۔ لوگوں کے لئے ماسک پہننا بہت ضروری ہے۔ اب لاک ڈاو ¿ن ختم ہوگیا ، نائٹ کرفیو جاری ہے۔ کچھ پابندیاں عائد کردی گئی ہیں۔ عوام کو سہولیات فراہم کی جارہی ہیں۔ اگر لوگ گائیڈ لائن پر عمل کرتے ہوئے ماسک پہنتے ہیں ، تو یہ ان کے مفاد میں ہے۔ انہوں نے کہا کہ کسی اور دن وہ دوسرے علاقوں کا بھی دورہ کریں گے۔ ہم ہر جگہ کے لوگوں کے ساتھ بات چیت کرتے ہیں۔ تمام اضلاع کے ڈی ایم سے بات ہوتی ہے۔ اور وہ اپنا فیڈ بیک دیتے ہیں۔ اس کی بنیاد پر ، یہ طے کیا جاتا ہے کہ آگے کیا فیصلہ کرنا چاہئے۔ انہوں نے کہا کہ لاک ڈاو ن سے بہت فائدہ ہوا ہے۔ ہم نے آج صبح ان علاقوں کا زمینی معائنہ کیا کیونکہ یہاں تعمیراتی کام شروع ہونا ہے۔ کورونا سے حفاظت کے لئے کام کیے جارہے ہیں ، لیکن اس کے ساتھ ساتھ ترقیاتی کام بھی ہو رہے ہیں۔ لوگوں کو کام کا موقع ملنا چاہئے۔ ہم تمام لوگوں سے درخواست کرتے ہیں کہ ماسک کا استعمال کریں۔ اگر آپ ماسک کا استعمال کریں گے تواس سے کورونا کا اثر کم ہوگا.کل ہم نے پٹنہ دورہ کے دوران یہ جاننے کی کوشش کی تھی کہ لوگ چھوٹ کی خلاف ورزی تو نہیں کررہے ہیں کورونا انفیکشن کے تئیں سب لوگ محتاط رہیں۔ انہوں نے سابق وزیر اعلی جناب لالو پرساد یادوکے یوم پیدائش کے موقع پر انہیں یوم پیدائش کی مبارکباد پیش کی ۔