پٹنہ: بہار اسمبلی کے اسپیکر کے ساتھ لکھی سرائے میں ڈپٹی سپرنٹنڈنٹ سمیت تین پولس اہلکاروں کی بدسلوکی پرحکومت کے موقف سے ناراض اپوزیشن جماعتوں کے آج اسپیکر اور اراکین کے وقار کے معاملے پر زبردست ہنگامہ آرائی کے بعد ایوان کی کاروائی ملتوی کردی گئی ۔
اسمبلی میں پیر کےروز وقفہ سوالات کے دوران اپوزیشن پارٹی کے اراکین نے اس معاملے پر زبردست ہنگامہ آرائی کی ۔ دریں اثنا اہم اپوزیشن راشٹریہ جنتا دل (آر جے ڈی) کے چیف وہپ للت یادو نے اس معاملے پر بحث کرانے کا مطالبہ کیا۔ انہوں نے کہا کہ سپیکر ایوان کا محافظ ہوتا ہے اور جب ان کا وقار برقرار نہیں رکھا جا سکتا تو ایوان کے دیگر اراکین کا وقار بھی خطرے میں ہے۔ انہوں نے اس معاملے پر حکومت سے جواب دینے کا مطالبہ کیا۔
اس پر بھارتیہ جنتا پارٹی (بی جے پی) کے رکن اسمبلی سنجے سراوگی نے بھی تشویش کا اظہار کرتے ہوئے کہا کہ استحقاق نوٹس پر اپنا موقف رکھنے کرنے کے لیے بلائی گئی میٹنگ میں شرکت کے بعد میڈیا میں چیف سکریٹری اور پولیس کے ڈائریکٹر جنرل (ڈی جی پی) کا رویہ انتہائی قابل اعتراض رہا ۔ انہوں نے کہا کہ کسی بھی رکن کے جذبات کو ٹھیس پہنچنے کے بعد انہیں استحقاق نوٹس بھیجنے کا حق ہے ۔
اسپیکروجئے کمار سنہا نے اراکین سے مسائل کے منطقی حل کے لیے ایوان میں امن و امان برقرار رکھنے کی درخواست کی اور کہا کہ سب کے وقار کا تحفظ کیا جانا چاہیے۔ انہوں نے اراکین سے اس معاملے پر بھی حکومت کے جواب کو پرامن طریقے سے سننے کی اپیل کی ۔

آر جے ڈی کے رکن للت یادو نے اس مسئلہ پر پارلیمانی امور کے وزیر وجئے کمار چودھری کے جواب کے دوران مداخلت کرتے ہوئے حکومت کے جواب سے قبل ایوان کی بزنس ایڈوائزری کمیٹی کی فوری طور پرمیٹنگ بلانے کا مطالبہ کیا۔ انہوں نے کہا کہ یہ معاملہ ایوان اور پوری قوم کے وقار سے وابستہ ہے۔
دریں اثنا مسٹر چودھری نے کہا کہ یہ معاملہ اسمبلی کے اسپیکر اور ان کے ضلع لکھی سرائے کا ہے۔ انہوں نے واضح طور پر کہا کہ اس معاملہ کو اسپیکر خود دیکھ رہے ہیں اور وہ خود بھی اس کی نگرانی کر رہے ہیں ۔ انہوں نے کہا’’ اراکین کو اسپیکر پراعتماد کرنا چاہیے لیکن ہم اسے دکھا نہیں کر رہے ہیں‘‘ ۔ اس پر پوری اپوزیشن نے کہا کہ افسراسپیکر اور کرسی کی توہین کررہے ہیں۔
وزیرپارلیمانی امور نے اس بات کا اعادہ کیا کہ اراکین سپیکرکے وقارسےمتعلق معاملہ اجاگرکررہے ہیں لیکن عہدے پر اپنا بھروسہ نہیں دکھا رہے ۔ وزیر کے بیان پر برہم سپیکر نے اراکین سے کہا کہ اراکین کرسی کے تیئں بھروسہ رکھتے ہیں اور جو لوگ پارلیمانی کارروائی میں تاریخ رقم کرنا چاہتے ہیں وہ اپنی سیٹوں پر کھڑے ہو جائیں ۔ اس پر ایوان کے تمام اراکین اسپیکر اور کرسی کے تیئں اپنے اعتماد کا اظہار کرنے کے لئے اپنی اپنی جگہوں پر کھڑے ہو گئے ۔

آر جے ڈی کے اودھ بہاری چودھری نے اسپیکر کے وقار کو مجروح کرنے والے واقعہ کو افسوسناک قرار دیتے ہوئے ایوان کی بزنس ایڈوائزری کمیٹی میں اس پر بحث کرانے کا مطالبہ کیا ۔ پارلیمانی امور کے وزیر وجئے کمار چودھری نے اس مسئلہ پر تعاون کا یقین دلایا اوراراکین کو اسپیکر سے متعلق معاملے میں بھروسہ رکھنے کا مشورہ دیا۔
وہیں پوری اپوزیشن نے اس معاملے پر سخت ناراضگی کا اظہار کرتے ہوئے کہا کہ جب اسپیکر کا وقار داؤ پرہے تو دیگر اراکین کی حالت کا بخوبی اندازہ لگایا جاسکتا ہے۔ حکومت کے بیان سے ناراض اسپیکر نے ایوان کی کارروائی 11:30 بجے بزنس ایڈوائزری کمیٹی میں اس معاملے پربحث کرانے کے لئے ایوان کی کاروائی ملتوی کردی۔
قبل ازیں جیسے ہی ایوان کی کارروائی شروع ہوئی، کمیونسٹ پارٹی آف انڈیا (سی پی آئی-ایم ایل) کے اراکین نے مسلمانوں کے حق رائے دہی کی معطلی کے متعلق ایک رکن کے بیان سمیت مختلف مسائل پر احتجاج کرتے ہوئے ایوان کے وسط میں آکر نعرے بازی شروع کردی ۔ اس کے بعد آر جے ڈی کے اراکین نے وقفہ سوالات کی کارروائی کے دوران اسپیکر کے وقار کے مسئلہ پرہنگامہ آرائی کی۔

اس دوران اسپیکر نے نعرے بازی کرنے والے اراکین سے درخواست کی کہ وہ اپنی سیٹ پر واپس جائیں اورایوان کو منظم طریقے سے چلانے کے لئے تعاون کریں ۔ بعد ازاں سپیکرنےاراکین کوان کی طرف سے اٹھائے جانے والے مختلف مسائل پراپنے خیالات کا اظہار کرنے کی اجازت دی ۔ آر جے ڈی کے للت یادو نے ایوان کے ایک رکن کی طرف سے اقلیتوں کے خلاف دیئے گئے متنازعہ بیان اور اسپیکر کے وقار کو ٹھیس پہنچانے کا معاملہ اٹھایا۔ اس پر سپیکر نے کہا کہ عزت و وقار کے حوالے سے جو بھی ابہام ہے اس کا حل بات چیت سے ہی ہوگا ۔
کانگریس قانون ساز پارٹی کے لیڈر اجیت شرما نے کہا کہ بی جے پی کے ایک رکن کا مسلمانوں کے حق رائے دہی کوضبط کرنے کا بیان انتہائی قابل اعتراض ہے۔ انہوں نے کہا کہ ہندو، مسلمان، سکھ اور عیسائی سمیت ہر مذہب کے لوگ برابر ہیں لیکن موجودہ دور حکومت میں مسلمانوں کے ساتھ امتیازی سلوک کیا جا رہا ہے ۔ اس پر پارلیمانی امور کے وزیر وجئے کمار چودھری نے ایوان کو یقین دلایا کہ موجودہ حکومت میں رائے دہی کے حقوق اور شہریت کو کوئی خطرہ نہیں ہے۔