انقرہ: قاہرامان ماراش میں 7٫7اور 7٫6 کی شدت کے زلزلوں کے بعد مملکتوں کے سربراہان کی جانب سے صدر رجب طیب ایردوان کو اظہارِ ہمدردی کے پیغامات کا سلسلہ جاری ہے ۔
الجزائر کے صدر عبدالمجید طبون نے بھی صدر ایردوان کو فون کیا اور زلزلے کے حوالے سے اپنے افسوس کا اظہار کرتے ہوئے نیک تمناؤں اور تعاون کی پیشکش کی
کرغزستان کے صدر صدر جاپاروف نے صدر ایردان سے فون پر رابطہ کرتے ہوئے زلزلے میں جاں بحق ہونے والوں کے لیے تعزیت کا اظہار کیا، ان کے لواحقین کے لیے صبر اور زخمیوں کی صحت یابی کی دعا کی۔
الجزائر کے صدر عبدالمجید طبون نے بھی صدر ایردوان کو فون کیا اور زلزلے کے حوالے سے اپنے افسوس کا اظہار کرتے ہوئے نیک تمناؤں اور تعاون کی پیشکش کی۔طبون نے زور دیتے ہوئے کہا کہ الجزائر ،ترک عوام کے سر پر پڑنے والی اس آفت پر قابو پانے کے لیے "برادر ملک ترکیہ” کے ساتھ کھڑا ہے، اور اس بات پر زور دیا کہ ان کا ملک ترکیہ کے ساتھ مکمل یکجہتی کے لیے ہر قسم کی مدد فراہم کرنے کے لیے تیار ہے۔
صدارتی محکمہ اطلاعات کی طرف سے جاری کردہ بیان کے مطابق جرمن چانسلر اولاف شولز، برطانوی وزیر اعظم رشی سوناک، ڈچ وزیر اعظم مارک روٹ اور آرمینیا کے وزیر اعظم نکول پاشنیان نے بھی زلزلے میں جان بحق ہونے والوں کے لیے تعزیت کا اظہار کیا اور زخمیوں کے لیے صحت یابی کی دعا کی۔
افریقہ ممالک سے بھی زلزلہ زدگان سے متعلق تعزیتی اور تعاون کے پیغامات موصول ہو رہے ہیں:
سوڈانی خودمختار کونسل کے صدر اور فوج کے کمانڈر جنرل عبدالفتاح البرہان، چاڈ کے صدر محمد ادریس دیبی اتنو، یوگنڈا کے صدر یوویری میوزیوینی، جمہوریہ کانگو کے صدر ڈینس ساسو این گیسو، جنوبی سوڈان کے وزیر خارجہ میئک آئی ڈینگ، چاڈ کے وزیر خارجہ محمود علی یوسف اور موریطانیہ کی وزارت خارجہ نے بھی زلزلے میں جاں بحق ہونے والوں کے ساتھ تعزیت کا اظہار کیا اور زخمیوں کی جلد صحت یابی کی تمناوں کا اظہار کیا ہے۔

صدر ایردوان زلزلوں سے متاثرہ اضلاع کا دورہ کریں گے

ترکیہ کے صدر رجب طیب ایردوان، 6 فروری کو 7،7 اور 7،6 کی شدت سے آنے والے زلزلوں سے، متاثرہ اضلاع کا دورہ کریں گے ۔
اطلاع کے مطابق صدر ایردوان زلزلہ زدہ اضلاع میں حالات کا اور امدادی کاروائیوں کا موقع پر جائزہ لیں گے۔
توقع ہے کہ صدر ایردوان سب سے پہلے زلزلے کے مرکز قاہرمان ماراش کی تحصیل پازارجک کا دورہ کریں گے اور اس کے بعد ضلع حطائے میں متاثرہ علاقوں کا جائزہ لیں گے۔

ترکیہ شام زلزلہ: اموات کی تعداد ساڑھے 9 ہزار سے متجاوز

زلزلے کے ملبے تلے سے نوزائیدہ بچی کا زندہ نکل آنا اور ایک والد کا اپنی مردہ بیٹی کا ہاتھ تھامے رکھنے جیسے مناظر ترکیہ اور شام میں آنے والے بدترین زلزلے کے نتیجے میں جنم لینے والے انسانی المیے کی عکاسی کرتے ہیں۔
فرانسیسی خبررساں ادارے ’اے ایف پی‘ کی رپورٹ کے مطابق زلزلے کے نتیجے میں اب تک مجموعی طور پر ساڑھے 9 ہزار سے زائد افراد لقمہ اجل بن چکے ہیں۔ریسکیو ورکرز تیسرے روز بھی ملبے تلے دبنے والوں تک پہنچنے کی کوششوں میں لگے رہے جبکہ سرکاری اعداد و شمار ظاہر کرتے ہیں کہ اب تک ترکیہ میں ہلاک ہونے والوں کی تعداد 6 ہزار 957 جبکہ شام میں مرنے والوں کی تعداد 2 ہزار 547 ہوچکی ہے۔جب سے 7.8 شدت کے زلزلے نے تباہی کی داستان رقم کی ہے تب سے مسلسل 2 دن اور 2 راتوں سے منجمد کردینے والے موسم میں غیر منظم ریسکیو ورکرز کی ایک فوج ان کھنڈرات میں دبنے والوں کو تلاش کررہے ہیں۔
عالمی ادارہ صحت کے سربراہ ایڈھانوم گیبریئیسس نے خبردار کیا کہ ہزاروں زخمیوں اور ملبے تلے دبے زندہ افراد کے لیے وقت تیزی سے کم ہوتا جارہا ہے۔زلزلے کے مرکز کے قریب واقع ترکیہ کے شہر قہر مان مرعش کے رہائشی نے کہا کہ پہلے ہی بہت دیر ہوچکی ہے، وہ اس ملبے کے ڈھیر پر بیٹھے تھے جہاں ان کی 15 سالہ بیٹی کی لاش کنکریٹ کے ٹکروں کے درمیان پھنسی ہوئی تھی اور انہوں نے اس کا ہاتھ تھام رکھا تھا۔حتیٰ کے زلزلے میں بچ جانے والوں کے لیے بھی مستقبل انتہائی تاریک نظر آتا ہے۔
بہت سے متاثرین نے مسلسل آنے والے آفر شاکس، سرد بارش اور برف باری سے بچنے کے لیے مساجد، اسکولوں اور بس شیلٹرز تک میں پناہ لی ہوئی ہے اورحرارت کے لیے کچرا جلا رہے ہیں۔
تاہم امداد آنے میں سست روی سے لوگوں کا غم و غصہ بڑھ رہا ہے۔
علی صغیروگلو نامی ایک شخص کا کہنا تھا کہ ’میں کھنڈر سے اپنے بھائی اور بھتیجے کو واپس نہیں لاسکتا، آپ یہاں آس پاس دیکھیں، کوئی بھی ریاستی عہدیدار موجود نہیں ہے۔ان کا کہنا تھا کہ ’دو روز سے ہم نے یہاں کسی سرکاری اہلکار کو نہیں دیکھا بچے ٹھنڈ میں جم رہے ہیں‘۔قریبی علاقے غازی انتیپ میں دکانیں بند ہیں اور حرارت کا کوئی انتظام نہیں کیوں کہ دھماکوں سے بچنے کے لیے گیس لائنیں منقطع کردی گئی ہیں جبکہ پیٹرول ملنا بھی انتہائی مشکل ہوگیا ہے۔ایک اور شہری نے بتایا کہ ریسکیو ٹیموں کے منتظر بے چین ہجوم نے بغاوت کردی جس پر پولیس کو مداخلت کرنی پڑی۔
کمبلوں میں لپٹے تقریباً 100 دیگر افراد نے ایئرپورٹ ٹرمینل کے لاؤنج میں رات گزار جہاں سے عمومی طور پر ترک سیاستدان اور اہم شخصیات آیا کرتے تھے۔
شمالی شام میں سرحد کے اس پار، ایک دہائی کی خانہ جنگی اور شامی-روسی فضائی بمباری نے پہلے ہی ہسپتالوں اور معیشت کو تباہ کر اور بجلی، ایندھن اور پانی کی قلت پیدا کردی تھی۔باغیوں کے زیر قبضہ علاقے جندیرس میں ایک نوزائیدہ بچی کو بچانے کی خوشی بھی ماند پڑ گئی، بچی نال کے ذریعے اپنی ماں سے جڑی ہوئی تھی جو اس آفت کے نتیجے میں جاں بحق ہوگئی۔بچی کے رشتہ دار خلیل السوادی نے اے ایف پی کو بتایا کہ جب ہم کھدائی کررہے تھے تو ہم نے ایک آواز سنی، ہم نے مٹی ہٹائی تو ایک نال سے جڑی بچی دیکھی جسے ہم نے کاٹا اور میرے کزن اسے ہسپتال لے گئے۔
بچی کا پورا قریبی خاندان زلزلے کے نتیجے میں ہلاک ہوچکا ہے جس کی تدفین منگل کے روز اجتماعی قبر میں کردی گئی تھی۔