موجودہ حالات میں مسلمان کیا کریں؟

یہ سوال سب سے اہم ہے کہ مسلمانوں کو موجودہ حالات میں کیا کرنا چاہئے..!
میں سمجھتا ہوں کہ موجودہ حالات کے دو پہلو ہیں۔ایک یہ کہ دشمنانِ اسلام اپنی پوری طاقت سے پوری دنیا میں امت مسلمہ کے خلاف متحد ہو چکےہیں۔ لہٰذا ہمیں بھی تمام داخلی اختلافات کو کنارے رکھ کر اور متحد ہو کر پوری طاقت کے ساتھ دشمن کا مقابلہ کرنا ہوگا ورنہ یہ وہ آگ ہے جسے ابھی نہیں بجھایا گیا تو کسی نہ کسی دن سبھوں کے گھر پہنچ جَائے گی اور ہم ہاتھ ملتے رہ جائیں گے۔ہم ابھی بھی اپنے گھروں تک آگ پہنچنے کا انتظار کر رہے ہیں۔ ہماری آنے والی نسلیں ہماری بزدلی پر لعنت بھیجیں گی۔ اللہ تعالیٰ جس طرح سے دنیا بھر میں حق اور باطل کی خیمہ بندی کررہا ہےاس سے لگتا ہے کہ موجودہ مسلمانوں کا بڑا طبقہ مستقبل میں باطل کے آگے ہارنے والوں کے نام پر یاد کیا جائے گا۔
اسلام کے دشمن ہمیشہ رہے ہیں لیکن اپنے دشمنوں سے مسلمان اتنا خوفزدہ کبھی نہیں ہوا ہے۔ موجودہ بحران شاید اس حدیث کا نقشہ پیش کررہا جس میں کہا گیا ہے کہ مسلمان سمندر کے جھاگ کی طرح ہو جائیں گے۔ مسلمانوں کی تعداد بہت ہوگی لیکن دنیا میں ان کا رعب ختم ہوجائے گا۔ اس کی وجہ بھی ظاہر ہو چکی ہے کہ ہمارے اندر ” وہن” پیدا ہو جائے گا یعنی ” دنیا کی ہوس اور موت کا ڈر” –

ان دنوں خوف پیدا کرکے ہمیں کمزور کیا جا رہا ہے۔خوف کی سب سے بڑی وجہ جہاں ہماری کمزور قیادت ہے وہیں ہم سے دنیا چھن جانے کا ڈر بھی ہے۔ شاید کوئی ادارہ نہیں ہے جو اپنی قیادت کو عمارت سے باہر نکل کر چلا رہا ہو یا عوام کے بیچ پایا جاتا ہو ۔ ان دنوں سیاسی قائدین ہوں یا مذہبی رہنما لگ بھگ سبھی ” وہن” کے شکار ہوچکے ہیں ۔
سیاستدانوں کی طرح ہمارے علماء اور عوام کے بیچ بھی ایک گہری کھائی قائم ہوچکی ہے۔ سیاستدانوں کی طرح تقریر سے باہر نکل کر عوام کی سننے والا کوئی اب کوئی نہیں ہے۔ ملی اور مذہبی رہنما کی کوتاہیوں سے ہمارے نوجوانوں پر برا اثر پڑا ہے۔ان کی کمزور قیادت سے چہار جانب بے راہروی چھا گئی ہے۔ نئی نسل ہندوستان میں اپنے مستقبل کو لے کر مایوس نظر آتی ہے۔امت کے تمام رہنما و قائدین جس دن اپنے ائرکنڈیشن کمرے سے باہر نکل کر گلی محلوں میں خلفائے راشدین کی طرح عوام کے مسائل کو سمجھنا شروع کر دیں گے اس دن سے ان شاءاللہ حالات میں تبدیلی آنے لگے گی۔ عوام کے جذبات آج بھی زندہ ہونے کو تیار ہیں اور قائدین کی آواز پر لبیک کہنے کو تیار بیٹھے ہیں۔
بے شک علماء انبیاء کے وارث ہیں لیکن صرف اس حیثیت سے نہیں ہیں کہ وہ اپنی مسند پر قائم رہیں بلکہ اس لئے ہیں کہ انہیں عوامی مسائل کے حل کے لئے ہروقت آگے رہنا ہوگا۔ کیا کوئی ملی یا مذہبی ادارہ اپنا ایسا کوئی ڈیٹا دے سکتا ہے کہ ایک سال میں وہ کن کن محلوں میں عوام کے بیچ سادگی کے ساتھ ان کے مسائل پر غوروفکر کرنے کے لئے آئے ہونگے؟ کیا ان اداروں کے سالانہ کاموں کی فہرست میں آس پاس کے محلے کا دورہ طئے ہے؟کیا کسی ادارے کے پاس کسی محلے کا کوئی تعلیمی، غریبی اور بیماری وغیرہ کا کوئی سروے رپورٹ ہے؟ صرف کسی موقع سے تقریر اور پھر اخباروں کی سرخیاں نظر آتی ہیں۔ سیلاب اور زلزلہ وغیرہ میں کچھ سرگرمیاں بڑھانی پڑتی ہے تاکہ سرکار اور عوام کا بھروسہ بنا رہے، واللہ اعلم۔ میں خود پٹنہ کے عالم گنج میں گزشتہ 35 سالوں سے رہ رہا ہوں لیکن مجھے یاد نہیں ہے کہ کوئی بڑا ملی و مذہبی رہنما عوام کے مسائل کو سمجھنے کے لئے کبھی آیا ہوگا۔
اب ہمیں طئے کرنا ہے کہ موجودہ مصنوعی خوف کے ماحول میں ہمارے دلوں میں اللہ کا خوف رہے گا یا غیراللہ کا۔ مومن کی مثال ایک جسم کی ہے جس کے کسی بھی حصے کو تکلیف پہنچے تو پورے جسم کو اس کا احساس ہونا چاہئے۔ بلڈوزر اتر پردیش میں کسی مسلمان کے گھر پر چلے اسے اپنے گھر پر چلتا محسوس کریں اور جس حد تک ہو سکے اس کا مقابلہ کریں ۔نوجوانوں کو چاہیے کہ پہلی فرصت میں محلے کی سطح پر سمجھدار دوستوں کی چھوٹی چھوٹی ٹولی بنائیں اور ہر وقت کسی بھی مسئلے سے نمٹنے کے لئے حکمت و دانائی کے ساتھ تیار رہنا چاہئے۔اگر کوئی بڑا قائد نہ ملے تو خود میں سے ہی کسی ہوشمند انسان کو اپنا سرپرست بنالیں۔
دوسری بات یہ کہ اللہ کی مشیت کے بغیر انسانوں پر کبھی کوئی آزمائش نہیں آتی ہے اس لئے ہمیں اپنے اندر کی کمزوریوں کو سمجھ کر اسے دور کرنا ہوگا۔ مال و دولت اور منصب کا لالچ چھوڑنا ہوگا. دنیا کی ہوس کو تیاگ کر اجتماعی طور پر حالات کا مقابلہ کرنا ہوگا تبھی اللہ کی مدد آئے گی۔ہمیں یاد رکھنا چاہئے کہ اللہ اس قوم کی حالت کبھی نہیں بدلتا جو اپنی حالت خود نہ بدلے۔دوسری قوم اپنے افراد پر پڑنے والی مصیبت کے وقت مدد کرنے کے لئے ٹوٹ پڑتی ہے جبکہ ہم صرف افسوس کا اظہار کرکےمطمئن ہو جاتے ہیں۔اس سوچ سے باہر نکلیں تو اللہ تعالیٰ آج بھی ہماری حالت بدلنے کو تیار بیٹھا ہے۔اللہ تعالیٰ وہی ہے ہم اس کی بندگی سے دور ہو چکے ہیں جس کا نتیجہ آج ہمارے سامنے ہیں۔اللہ ہمیں صحیح سمجھ دے اور متحد ہو کر حالات کا سامنا کرنے کی توفیق عطا فرمائے آمین ۔