اسکولوں میں اردو کی درس و تدریس ہو یقینی

  اردو تحریک کو سیمینار و جلسوں کے ذریعہ سے تیز کی جا رہی ہے۔ ملک کے تمام اضلاع میں قومی و ملی تنظیموں کے ذریعہ سرسید ڈے، اقبال و غالب کے نام پر اردو کی ترویج و اشاعت کی سعی کی جا رہی ہے۔ مگر اردو کو خود اردو والے ہی نے بد سے بدتر حالت میں پہنچا دیا ہے۔ حکومت نے ریاستی اسکولوں میں اردو اساتذہ کی بحالی تو کی مگر اردو کی تعلیم ناگفتہ ہے۔ اس کے ذمہ دار کون؟  کلیجہ پر ہاتھ رکھ لیں جواب خود بہ خود مل جائے گا۔

 اسکولوں میں بحال اردو اساتذہ سے اردو نہیں پڑھواکر دوسرے مضامین پڑھوائی جائے گی تو اس پر آفیشیل کارروائی ہوگی۔ مگر کیا صرف بیان ہی کافی ہے یا اس پر عمل کے لئے ریاستی محکمہ تعلیم سے لیٹر نکلنی چاہئے؟ لیٹر نکلنے کے ساتھ ہی اسکولوں کے معائنہ کے دوران افسران بھی اسے عملی جامہ پہنانے پر پوری توجہ دیں گے تبھی اردو کی تعلیم کو یقینی بنایا جا سکتا ہے

محمد رفیع

بہار کے مظفر پور ضلع میں اردو کی ترویج و اشاعت، اس کی بقاء کے لئے پوری توانائی کے ساتھ ایک تنظیم، قومی اساتذہ تنظیم، مظفر پور، بہار کمر بستہ ہے۔ تنظیم کے ریاستی صدر جناب تاج العارفین نے انتظامیہ سے بارہاں یہ مانگ کی ہے کہ ہندی اسکولوں کے انتظامیہ ہمارے اردو اساتذہ کو اردو پڑھانے نہیں دیتے ہیں، ان سے دوسرا مضمون پڑھواتے ہیں یا پھر آفس کے کاموں میں انہیں مصروف رکھتے ہیں۔ وہیں تاج العارفین اپنے ایک تجربہ کا ذکر بھی کرتے ہیں کہ ہمارے اردو اساتذہ میں کچھ ایسے کمزرف بھی ہیں کہ انہیں اردو پڑھانے کا موقع بھی دیا جاتا ہے تو وہ اردو نہیں پڑھاتے۔ ایک مثال وہ دیتے ہیں کہ جب وہ سنکول کوآرڈینیٹر تھے ایک ہندی اسکول میں انہوں نے ایک اردو معلمہ سے جب اردو پڑھانے کی بات کی تو اس نے پہلے تو یوہیں بہانا بنایا، آخر کوئی راستہ نہ دیکھا تو پھر روزہ کا بہانا بناکر بیٹھ گئی، تاج العارفین نے روزہ میں بچوں کو پڑھاکر روزہ کو قوی کرنے کی ترکیب بھی بتائی مگر ان کی لاکھ کوششوں کے بعد بھی وہ اردو پڑھانے کو تیار نہیں ہوئیں۔  قومی اساتذہ تنظیم بہار نے انتظامیہ سے ہمیشہ ایک سوال اٹھایا ہے کہ جہاں اردو کے بچے ہیں وہاں اردو کے ٹیچر نہیں اور جہاں اردو کے اساتذہ ہیں وہاں انہیں پڑھانے نہیں دیا جاتا۔ اسی سوال کو جب قومی اساتذہ تنظیم بہار نے مولانا ابوالکلام آزاد کے یوم پیدائش و قومی یومِ تعلیم کے موقع پر منعقد سیمینار میں اٹھایا تو ضلع تعلیمی افسر مظفر پور عبدالسلام انصاری نے صاف لفظوں میں کہا اسکولوں میں بحال اردو اساتذہ سے اردو نہیں پڑھواکر دوسرے مضامین پڑھوائی جائے گی تو اس پر آفیشیل کارروائی ہوگی۔ مگر کیا صرف بیان ہی کافی ہے یا اس پر عمل کے لئے ریاستی محکمہ تعلیم سے لیٹر نکلنی چاہئے؟ لیٹر نکلنے کے ساتھ ہی اسکولوں کے معائنہ کے دوران افسران بھی اسے عملی جامہ پہنانے پر پوری توجہ دیں گے تبھی اردو کی تعلیم کو یقینی بنایا جا سکتا ہے۔ 

سیمینار میں اردو کی حالت پر بھی مقررین نے فکر مندی کا اظہار کیا۔ مہمان خصوصی کی حیثیت سے سنی وقف بورڈ کے چیئرمین محمد ارشاداللہ نے کہا کہ اردو ہماری مادری زبان ہے، لیکن ہم اردو سے محروم ہوتے جا رہے ہیں۔ اسکول و کالج کے طالبات بھی اردو کو مضمون کی شکل میں نہیں لیتے۔ اس لئے طالب علموں کو مادری زبان کے ساتھ ہی اردو کو مضمون کی شکل میں جوڑنے کی ضرورت ہے، اس سلسلے میں تعلیمی افسران کا اہم رول ہوگا اس لئے انہیں آگے آنے کی ضرورت ہے۔ موقع پر بی پی ایس سی کے رکن امتیاز احمد کریمی نے بھی تعلیم کی افادیت پر روشنی ڈالتے ہوئے کہا کہ تعلیم ہی ترقی کی شاہ کلید اور محنت ہی کامیابی کا راستہ ہے۔ انہوں نے یہ بھی کہا کہ آج مدرسہ کی وجہ سے ہی اردو زندہ ہے۔ 

 بہار اسٹیٹ اردو ٹیچرس ایسوسیشن کے ایک اجلاس سے بہار ریاستی اقلیتی کمیشن کے چیئرمین پروفیسر محمد یونس حسین حکیم نے اردو کی ترویج و اشاعت پر  پرمغز باتوں سے روشناس کراتے ہوئے کہا کہ اردو کے ترویج و ترقی کی ذمہ داری ہر شخص پر عائد ہوتی ہے اور ساتھ ہی اس زبان کی جانکاری کے لئے ہمیں دوسری زبان کا بھی علم ہونا ضروری ہے، کیونکہ ہماری مادری زبان پر عبور حاصل کرنے کی کوشش میں دوسری زبان سے واقفیت ضروری ہے۔ اجلاس میں موجود اساتذہ کو خطاب کرتے ہوئے انہوں نے کہا کہ آپ سب ہوشمند ٹیچرس ہیں اور آپ پر اردو کے ترقی کی بڑی ذمہ داری عائد ہوتی ہے۔ اپنے اسکولوں میں اردو کی ترقی کے لئے جو بھی اقدامات حکومت کی طرف سے جاری ہے اس میں اپنا تعاون دیں۔ آخر میں انہوں نے یہ بھی کہا کہ اس موقع پر ہمیں اپنی تہذیب، اپنی زبان کی بقاء کے لئے عزم لینا چاہئے اس لئے کہ جس قوم نے اپنی زبان تہذیب کو بھلا دیا ایسی قوم کو دنیا نے فراموش کر دیا۔ 

سیمینار و اجلاس سے باتیں تو بڑی قیمتی ہوئیں مگر ایک بات میں صاف لفظوں میں بیان کردوں وہ یہ ہے کہ اردو کی تحریک کو ماشاء اللہ تعاون تو تمام لوگوں، تمام شعبوں اور تمام حلقوں کا ملتا ہے مگر ایک سچائی جو تلخ ہے، سبھی اپنی اپنی ذمہ داریوں کو دوسروں پر تھوپ کر نکل لینا چاہتے ہیں، جس طریقے سے گھر میں ہر فرد ایمانداری سے اپنے حصے کا کام کر لے تو اس گھر کی ترقی کو کوئی روک نہیں سکتا ٹھیک ویسے ہی ہمارے سیاسی، سماجی، ملی رہنما اور ادبی دانشوران اپنی ذمہ داریوں کو حق سمجھ کر ادا کر دیں تو جو رونا ہم اردو کا روتے ہیں وہ رونا نہ ہوگا۔ محمد ارشاد اللہ صاحب نے قومی اساتذہ تنظیم بہار کے ذریعہ منعقد سیمینار میں عوام سے ہر گھر میں اردو اخبار لینے کی اپیل کی اس کے پیچھے اردو کی تحریک اور زبان سے محبت کا اظہار ہوتا ہے۔ اردو کا اخبار ہندی و انگریزی سے سستا ہے۔ آپ پڑھیں نہ پڑھیں مگر یہ بات سچ ہے کہ آپ اردو کا اخبار ضرور خریدیں، کیونکہ اس سے جہاں ایک طرف اردو کی تحریک کو مضبوطی حاصل ہوگی وہیں معاشرے پر اس کے بہتر نتائج بھی مرتب ہوں گے۔