دو سال بعد اعظم خان کی جیل سے رہائی، شیوپال یادو نے کیا ریسیو

سیتا پور: سماج وادی پارٹی (ایس پی) کے سینئر لیڈر اور مختلف فوجداری مقدمات میں 26 ماہ، 24 دن کی جیل میں بند اعظم خان کو جمعہ کو ضمانت پر رہا کر دیا گیا۔
جیل انتظامیہ کے ذرائع نے بتایا کہ جمعرات کو سپریم کورٹ کی طرف سے اعظم کو عبوری ضمانت ملنے کے بعد جیل حکام کو کل دیر رات گئے ان کی رہائی کے احکامات موصول ہوئے تھے۔ اسی بنا پر آج صبح انہیں رہا کر دیا گیا۔ابھی تک یہ واضح نہیں ہے کہ اعظم سیتا پور جیل سے رہا ہونے کے بعد رام پور گئے ہیں یا دہلی۔
ایس پی کے رام پور شہر کے ایم ایل اے اور سابق کابینہ وزیر اعظم خان کی سیتا پور جیل سے رہائی کا راستہ کل صاف ہو گیا تھا۔ اعظم خان کی رہائی کے دو آرڈر سیتا پور جیل پہنچنے کے بعدجیسے ہی کچھ کاغذی کارروائی مکمل ہوئی، انہیں آج رہا کر دیا گیا۔اعظم کے وکیل زبیر احمد خان نے بتایا کہ یہ بھی راحت کی بات ہے کہ دشمن کی جائیداد اور تین اسکولوں کی مبینہ جعلی شناخت کے معاملے میں اعظم خان کی ضمانت کا حکم رام پور کی عدالت نے کل ہی جاری کر دیاتھا اور یہ حکم کل دیر رات سیتا پورجیل پہنچ بھی گیا۔
سماج وادی پارٹی کے صدر اکھلیش یادو نے ٹویٹ کیا اور کہاکہ سینئر ایس پی لیڈر اور ایم ایل اے مسٹر اعظم خان جی کی ضمانت پر رہائی پر ان کا تہہ دل سے خیرمقدم۔ ضمانت کے اس فیصلے سے سپریم کورٹ نے انصاف کو نیا معیار دے دیا ہے۔ پوری امید ہے کہ وہ باقی تمام جھوٹے مقدمات اور معاملات سے بری ہوجائیں گے۔

شیوپال یادو نے جیل کے باہر اعظم خان کا استقبال کیا

حالیہ اسمبلی انتخابات کے نتائج کے بعد اپنے بھتیجے اور سماج وادی پارٹی (ایس پی) کے صدر اکھلیش یادو سے ایک بار پھر دوری بنانے والے پرگتیشیل سماج وادی پارٹی (پی آر ایس پی) کے صدراورایس پی رکن اسمبلی شیو پال سنگھ یادو نےجمعہ کے روز ایس پی کے سینئر لیڈر محمد اعظم خان کی رہائی کے وقت سیتا پور جیل پہنچ کراتر پردیش کی سیاست میں نئی صف بندی کی طرف اشارہ دیا ۔
شیوپال جمعہ کی صبح ہی اعظم کو جیل سے لینے کے لئے سیتا پور جیل پہنچے گئے تھے اور جیل سے نکلتے ہی انہوں نے ہاتھ ملا کر ایس پی کے قدآورلیڈر کا استقبال کیا اور وہاں موجود پریس فوٹوگرافروں کی طرف دیکھ کر اس لمحے کو کیمروں قید کرنے کی خاموش دعوت دی ۔
اعظم کی رہائی کے سلسلے میں گزشتہ کچھ دنوں سے کافی متجسس نظر آرہے شیو پال نےجمعرات کو ہی سوشل میڈیا پلیٹ فارم پر اس معاملے میں اپنی موجودگی درج کرائی تھی ۔ سپریم کورٹ سے جمعرات کو اعظم کو عبوری ضمانت ملنے کے بعد انہوں نے ٹویٹ کر کے اسے انصاف کی جیت قراردیا اورٹویٹ کیا ’ستہ میو جیتے‘ لکھا ۔ طویل انتظار سے انصاف کی جس گھڑی کی انتظار تھا ، وہ آج پوری ہوئی ۔ اعظم خان صاحب کو سپریم کورٹ نے عبوری ضمانت دے دی ہے۔ انہیں نظام کے استحصال سے انصاف ملا ہے۔ ہندوستان کا عدالتی نظام امید کی کرن ہے۔
شیو پال نےآج بھی جیل کے لئے نکلنے سے پہلے ٹویٹ کر کہا’’ریاست کے لوگوں کے لیے خوشی کی بات ہے کہ اعظم خان صاحب آج ان کے چاہنے والوں کے بیچ میں ہوں گے ۔ میں سیتا پور کے لیے روانہ ہو چکا ہوں ، اتر پردیش کے افق پر ایک نیا سورج طلوع ہو رہا ہے ۔ آؤ اعظم خان صاحب کا استقبال کریں‘‘ ۔ بعد میں انہوں نے اعظم کے ساتھ اپنی ملاقات کی تصویر شیئر کرتے ہوئےمختصراً ٹویٹ کیا ’’خوش آمدید اور نیک خواہشات‘‘۔

سماجوادی پارٹی کارکنوں نے خوشی میں تقسیم کئے لڈو

امیٹھی میں سماج وادی پارٹی (ایس پی) کے رکن اسمبلی محمد اعظم خان کی سیتا پور جیل سے رہائی کی خوشی میں پارٹی کارکنوں نے یہاں لڈو کھلا کرایک دوسرے کا منہ میٹھا کرایا ۔
ایس پی لیڈر جئے سنگھ پرتاپ یادو نے کہا کہ اعظم خان نے ہمیشہ غریبوں ،کسانوں، مظلوموں کے ساتھ نوجوانوں کی آواز بلند کی ہے۔ وہ سوشلسٹ نظریہ اور تحریک کے سلسلے میں کارکنوں کے لیے ہمیشہ تحریک کا سرچمشہ رہے ہیں ۔ انتقام کے جذبے کے تحت ایس پی لیڈر محمد اعظم خان پرایک ایک کرکے 89 مقدمات درج ہونے کی وجہ سے تقریباً 27 ماہ تک سلاخوں کے پیچھے رہنا قبول کیا ، لیکن اپنے اصولوں سےکبھی سمجھوتہ نہیں کیا ۔ آخرمیں سچ کی جیت ہوئی ۔ اعظم کے جیل سے باہر آنے پرایس پی کومزید طاقت ملے گی۔

جھوٹ کے لمحات ہوتے ہیں، صدیاں نہیں: اکھلیش یادو

سماج وادی پارٹی (ایس پی) کے صدر اکھلیش یادو نے پارٹی کے سینئر لیڈر اور ایم ایل اے محمد اعظم خان کی رہائی کا خیر مقدم کرتے ہوئے جمعہ کو کہا کہ جھوٹ کے لمحات ہوتے ہیں، صدیاں نہیں۔
مسٹر خان کو سپریم کورٹ سے عبوری ضمانت ملنے کے بعد آج صبح سیتا پور ضلع سے رہا کر دیا گیا۔ مسٹر یادو نے اعظم کی رہائی کے بعد ٹویٹ کرکے اپنی خوشی کا اظہار کیا۔
انہوں نے لکھا، ’’ایس پی کے سینئر لیڈر اور ایم ایل اے مسٹر اعظم خان کی ضمانت پر رہائی پر ان کا تہہ دل سے خیرمقدم ہے۔ ضمانت کے اس فیصلے سے سپریم کورٹ نے انصاف کو نیا معیار دے دیا ہے۔ پوری امید ہے کہ وہ تمام جھوٹے مقدمات اور معاملات سے بری ہو جائیں گے۔ جھوٹ کے لمحات ہوتے ہیں، صدیاں نہیں۔
غور طلب ہے کہ ایس پی صدر پر اعظم خان سے جیل میں ملاقات نہ کرنے اور ان کے لیے پیروی نہ کرنے کا الزام ہے۔ حال ہی میں مسٹر یادو کے حکم پر ایس پی کا ایک وفد مسٹر خان سے ملنے سیتا پور جیل پہنچا تھا لیکن مسٹر خان نے ایس پی لیڈروں سے ملنے سے انکار کر دیا تھا۔ دوسری طرف باغی ایس پی لیڈر شیو پال سنگھ یادو اور اعظم کی سیتا پور جیل میں ملاقات کے اثرات مرتب ہونے لگے ہیں۔ آج بھی رہائی کے دن شیو پال اعظم کو لینے سیتا پور جیل پہنچے تھے۔