توانائی کے شعبہ میں بہار میں ہورہا ہے بہت کام:نتیش

پٹنہ:وزیر اعلیٰ نتیش کمار نے آج بی ایس پی ایچ سی ایل کالونی واقع بجلی آڈیٹوریم میں توانائی شعبہ کے 3452.11 کروڑ کے متعدد منصوبوں کا سنگ بنیاد ، افتتاح کیا ۔ اس کے ساتھ ہی وزیر اعلیٰ نے 12,657 کروڑ روپے لاگت کے اسمارٹ پری پیڈ میٹر کے پوری ریاست کے منصوبے پر عمل درآمد کی شروعات کی ۔

وزیر اعلیٰ نے بجلی کے شعبہ کے 3452.11کروڑ روپے کے متعدد منصوبوں کا افتتاح اور سنگ بنیاد رکھا

اس موقع پر منعقد پروگرام کو خطاب کر تے ہوئے وزیر اعلیٰ نے کہا کہ آج کے اس پروگرام کے انعقاد کے لیے بجلی محکمہ کا شکریہ اداکرتا ہوں ۔ آج بجلی کے شعبہ کے مجموعی طور پر 3452.11 کروڑ روپے کے متعدد منصوبوں کا افتتاح اورسنگ بنیاد رکھا گیا ہے ۔اس میں 725.26کروڑ روپے کا منصوبہ کا افتتاح کیا گیا ہے ،جبکہ 2726.85کروڑ روپے کی متعدد منصوبوں کا سنگ بنیاد رکھا گیا ہے ۔ آ ج سپلائی کمپنیوں کے زیر اثر کل 325کروڑ روپے لاگت کے 48ا لیکٹرک پاور سب اسٹیشن کا افتتاح کیا گیا ہے ۔874کروڑ روپے کی لاگت سے کل 7گر یڈ سب اسٹیشن سے سپلائی نظام تک ٹرانسمیشن لائن اور 817.35کروڑ لاگٹ کی بکسر تھرمل پاور انسٹالیشن سے بجلی نکاسی کے لیے اسٹرکچر لائن کی تعمیر کے کام کا سنگ بنیاد رکھا گیا ہے ۔
وزیر اعلیٰ نے کہا کہ آج بجلی آڈیٹوریم کا افتتاح کیا گیا ہے یہ بہت بہتر بنا ہے ۔ اس کے لیے میں آپ تمام لوگوں کو مبارکباد دیتا ہوں ۔بجلی محکمہ کے اتفاق سے اس آڈیٹوریم کا استعمال دوسرے لوگ بھی کر سکیں گے ۔ انہو ں نے کہا کہ بجلی کے شعبہ میں بہت کام ہو رہا ہے ۔پہلے بہار میں بجلی کی کیا حالت تھی ؟سال 2005 میں بہار میں صرف 700 میگا واٹ بجلی کی فراہمی ہو تی تھی ۔ آج بہار میں 6,627 میگا واٹ بجلی کی کھپت ہو رہی ہے ۔ ہم نے ہر گھر بجلی پہنچادی ہے ۔ ہر گھر تک بجلی پہنچانے کا نشانہ ستمبر 2018تک متعین کیا گیا تھا ،جسے دو ماہ قبل اکتوبر 2018 میں ہی مکمل کر لیا گیا۔ انہوں نے کہا کہ بہار میں بجلی کی ضرورت اور زیادہ بڑھ رہی ہے ۔ اس کے لیے ہم لوگ بجلی کی فراہمی کا سارا انتظام کر تے ہیں ۔ پاور پلانٹ سے لوگوں کے گھر تک بجلی پہنچانے کے لیے کئی مراحل میں کام کر نا پڑتا ہے ۔ بہار پہلی ریاست ہے جہاں تمام شہری اور دیہی علاقوں کے 19کیلو واٹ صلاحیت تک کے بجلی کنکشن ، ’سویدھا ایپ‘ کے توسط سے لگانے کو آن لائن بجلی کا کنکشن دیاجا رہا ہے۔
وزیر اعلیٰ نے کہا کہ سولرپاور کے شعبہ میں بھی بہت کام ہو رہا ہے ۔ 200 میگا واٹ کا سولر پاور پلانٹ بہار میں لگنے جا رہا ہے ۔ جموئی اور بانکا میں 100-100 میگا واٹ کا سولر پاور پلانٹ پر کام شروع ہو گا ۔ ستلج جل ودھت کارپوریشن لمیٹیڈ یہ پلانٹ لگانے جا رہا ہے ۔ اس پر 1000کروڑ روپے کی رقم خرچ کی جائے گی ۔ اس پر تیزی سے کام چل رہا ہے ۔ملک میں بہار ایسی پہلی ریاست ہے جہاں اسمارٹ پری پیڈ میٹر لگا یا جا رہا ہے ۔سال 2019سے بہار میں اسمارٹ پری پیڈمیٹر لگنا شروع ہو چکا ہے ۔ بہار میں پہلی بار ایسا ہورہا ہے یہ ہم لوگوں کا کانسپٹ ہے ۔ ہم چاہتے ہیں کہ ریاستی حکومت کے پیسے سے ہی اس کام کو مکمل کیا جائے ۔ بہار میں ہرگھر میں اسمارٹ پری پیڈ میٹر لگا یا جائے گا ۔ بجلی محکمہ نے نشانہ متعین کیا ہے کہ پانچ مراحل میں مارچ 2025 تک ہر گھر تک اسمارٹ پری پیڈ میٹر لگا دیا جائے گا ۔ میری خواہش ہے کہ اس متعین وقت سے پہلے پور ا کیا جائے ۔
وزیر اعلیٰ نے کہا کہ پہلے بجلی بل کے تعلق سے بہت زیادہ شکایتیں آتی تھیں۔ہم نے اس کو ’شکایت حل حق ایکٹ‘میں شامل کیا تاکہ لوگوں کی شکایتوں کا حل ہو سکے ۔ اسمارٹ پری پیڈ میٹر سے بجلی کا بیجا استعمال نہیں ہو سکے گا ۔ بجلی کے صارفین کو بھی اس سے فائدہ ہو گا ۔لوگ جتنی بجلی استعمال کریں گے انہیں اتنے کا ہی بجلی بل دینا پڑے گا ۔ بجلی کے صارفین کا ریاستی حکومت اپنی طرف سے سبسڈی دیتی ہے ۔ خرید سے کم شرح پر صارفین کو بجلی مہیا کرائی جارہی ہے ۔ کچھ لوگ مفت میں بجلی دینے کی مانگ کر تے رہتے ہیں ۔ مفت میں بجلی دینے کا جزبہ غلط ہے ۔
وزیر اعلیٰ نے کہا کہ ایک پسماند ہ ریاست ہو کر بھی لوگوں کے مفاد میں سڑک کی تعمیر سے لے کرہر گھر بجلی پہنچانے کے ساتھ ساتھ دیگر ترقیاتی کام بھی تیزی سے کیے جارے ہیں ۔ بہار میں سڑک اور بجلی کے شعبہ میں بہت کام ہوا ہے ۔ بہار کو اب پرائیویٹ سیکٹر سے بجلی خریدنی نہیں پڑے گی ۔ اب بہار کو جتنی بجلی کی ضرورت ہو گی وہ مرکزی حکومت کے توسط سے ہی مل جائے گی ۔ اس کے لیے میں مرکزی حکومت کا شکریہ اداکرتا ہوں ۔ انہوں نے کہا کہ بہار میں بجلی کے خستہ حال کیبل کو بدل دیا گیا ہے ۔ لوگوں کی بجلی کی ضرورت کو پور ا کر نا ہمارا عز م ہے ۔بجلی محکمہ کے انجینئروں کو ہم مبارکباد دیتے ہیں ۔ آپ لوگوں کے بہتر کا م سے ہمیں خوشی ہو تی ہے ۔
وزیر اعلیٰ سے اظہار تشکر کرتے ہوئے وزیر توانائی بیجندر پرساد یادو نے کہا کہ وزیر اعلیٰ نے ریاست میں بجلی کی اصلاح کے ناقابل فراموش سفر میں اپنا مسلسل تعاون اور رہنمائی فراہم کی ہے۔ وزیر نے پاور کمپنیوں کے افسران اور ملازمین کو ان کی کامیابیوں پر مبارکباد دی اور مستقبل میں نئے اہداف حاصل کرنے کے لیے ان کے حوصلے بلند کیے۔ بہار کے اسمارٹ میٹر کو لے کر ملک میں کافی چرچا ہے۔ ہم مقررہ وقت سے پہلے اسمارٹ میٹر لگانے کا کام کر لیں گے۔ اسمارٹ پری پیڈ میٹر متعارف کرانے والی بہار پہلی ریاست ہے۔ اربن ایریا کی منصوبہ بندی آج سے صرف ڈھائی سال قبل شروع کی گئی تھی۔ اسے اکتوبر 2021 میں دیہی صارفین کے لیے بھی منظور کیا گیا تھا۔پروگرام کے دوران ریاست گیر اسمارٹ پری پیڈ میٹر کی تنصیب کے منصوبے پر ایک مختصر فلم دکھائی گئی۔

توانائی کے سکریٹری سنجیو ہنس نے کہا کہ محکمہ توانائی وزیر اعلیٰ کی ہدایت پر نئی بلندیوں کو چھو رہا ہے۔ توانائی کے میدان میں بہار سرفہرست ہے۔ ہر گھر کی بجلی کے خستہ حال تار کو تبدیل کرنے کا کام کیا گیا ہے۔ بی ایس پی ایچ سی ایل نے بہار میں ٹرانسمیشن اور ڈسٹری بیوشن سسٹم کو بہتر کیا ہے اور ساتھ ہی انفراسٹرکچر کو بھی بہتر کیا ہے۔ سوویدھا ایپ کے ذریعے بجلی کے صارفین نے بہت فائدہ اٹھایا ہے۔ کمپنی کسان بھائیوں کے لیے زرعی کام کے لیے علیحدہ ایگریکلچر فیڈرز قائم کر رہی ہے۔ بہار نے قابل تجدید توانائی کے میدان میں بھی قابل ذکر کام کیا ہے۔ سیکرٹری توانائی نے وزیر اعلیٰ کا شکریہ ادا کرتے ہوئے کہا کہ محکمہ توانائی وقتاً فوقتاً موصول ہونے والی ہدایات کے مطابق کام کر رہا ہے۔ ریاست میں ٹرانسمیشن اور ڈسٹری بیوشن سسٹم میں، وزیر اعلیٰ کے مقرر کردہ ہدف کے مطابق، مقررہ مدت کے اندر معیار اور بنیادی ڈھانچے میں بے مثال ترقی ہوئی۔ اس کے علاوہ پیداوار کے شعبے میں کیے گئے پالیسی فیصلے کے بعد ہولڈنگ کمپنی اب اپنے نقصانات کو کم کرنے اور صارفین کو بہتر سہولیات فراہم کرنے پر کام کر رہی ہے۔ہر گھر میں بجلی اور ری کنڈکٹرنگ کے کام کے ساتھ زرعی فیڈرز کو الگ کرنے کا کام کیا جا رہا ہے۔
اس موقع پر ممبر اسمبلی مسٹر للن پاسوان ، وزیر اعلیٰ کے پرنسپل سیکریٹری دیپک کمار ، ڈیولپمنٹ کمشنر مسٹر عامر سبحانی ، جنرل ایڈمنسٹریشن محکم کے پرنسپل سیکریٹری مسٹر چنچل کمار ، این بی پی ڈی سی ایل کے پرنسپل سیکریٹری مسٹر سندیپ کما پڈل کلکٹی ، ایس بی پی ڈی سی ایل کے پرمینجنگ ڈائریکٹر مسٹر سنجیو سنہا ، بریڈا کے مینیجنگ ڈائریکٹر مسٹر آلوک کمار سمیت دیگر سینئر افسرا ن موجودتھے اوی ایس ڈی خواجہ جمال بھی موجود تھے ۔ جبکہ ویڈیو کانفرنسنگ کے توسط سے ممبران پارلیمنٹ ، ممبران اسمبلی ، ممبران قانون ساز کونسل ، دیگر عوامی نمائندگان ، ڈی ایم ، سینئر انجینئر دیگر اہم شخصیات موجودتھیں ۔
پروگرام کے بعد وزیراعلیٰ نے ’ویدھت بھون‘ جاکر آرٹ گیلری کا افتتاح کیا ۔ افتتاح کے بعد وزیر اعلیٰ نے آرٹ گیلری میں لگائے گئے متعدد فن کاروں کے فن پارے دیکھے ۔ وزیر اعلیٰ نے اسٹیل آرٹ ، کرافٹ آرٹ ، مدھوبنی پینٹنگ ، بلاک پرنٹنگ ، کلے ماڈلنگ ، اسکرین پرنٹنگ کا بھی معائنہ کیا ۔