مسلمانوں کے وہ سنگین گناہ جن کے سبب یہ رسوا اور ذلیل کر کے باطل کے غلام بنا دیے گئے ہیں

اللہ تعالیٰ بے انتہا رحمن اور رحیم ہے۔وہ اپنے بندوں سے نہ غافل ہوتا ہے، نہ ان کو بے سہارا چھوڑتا ہے، نہ ان پر ظلم کرتا ہے اور نہ ہی بلا وجہ اُن پر عذاب نازل کرتا ہے۔لیکن ٹھیک اسی کے خلاف جب اس کے بندے اللہ سے غافل ہو کر شیطان کی پیروی کرنے لگتے ہیںتو وہ ان سے ناراض ہوجاتا ہے، اپنی رحمت سے انہیں محروم کر دیتا ہے۔ اور جب وہ حد سے آگے بڑھ کر بغاوت پر آمادہ ہو جاتے ہیںتو پھرخود ہی اپنے آپ کو اللہ کے عذاب کا حقدار بنا لیتے ہیں۔ اللہ تعالیٰ ان کو عذاب میں مبتلا نہیں کرتا ہے۔یہ سب باتیں قرآن اور احادیث رسولﷺ میں تفصیل سے لکھی ہوئی ہیں۔
(01) اور یہ کچھ ضروری نہ تھا کہ اہل ایمان سارے کے سارے ہی نکل کھڑے ہوتے، مگر ایسا کیوں نہ ہوا کہ ان کی آبادی کے ہر حصے میں سے کچھ لوگ نکل کر آتے اور دین کی سمجھ پیدا کرتے اور واپس جاکر اپنے علاقے کے باشندوں کو خبردار کرتے تا کہ وہ (غیر مسلم جیسی زندگی گزارنے سے) پرہیز کرتے(توبہ:آیت ۱۲۲)
(ان سے کہا جائے گا) نعمت ایمان پانے کے بعد بھی تم نے کافرانہ رویہ اختیار کیا؟ اچھا تو اب اس کفران نعمت کے صلہ میں عذاب کا مزہ چکھو۔ (آل عمران: ۱۰۶)

ان آیتوں میں کہاجارہا ہے کہ ایمان کا دعویٰ کرنے والوں پر فرض تھا کہ وہ علم کے مرکز مدینہ آتے اور دین کی تعلیم سیکھ کر اپنے قبیلے اور بستی کے لوگوں کو دین کی تعلیم دیتے تاکہ وہ غیر مسلموں کی طرح زندگی بسر کرنے سے بچتے۔یہ بات صرف عرب والوں کو نہیں کہی جارہی ہے بلکہ دنیا میں جہاں بھی مسلمان نام کے لوگ ہیں ان سے یہ بات کہی جارہی ہے۔آج دنیا میں جو لوگ بھی خود کو مسلمان کہتے ہیں اور دین و شریعت سے غافل اور ناواقف ہیں وہ غیر مسلموں جیسی زندگی گزار رہے ہیں۔یہ ان کا اتنا سنگین جرم ہے کہ اس کی سزا وہ دنیا میں بھی ذلیل و رسوا ہو کر اور اہل باطل کے غلام بن کر پائیں گے اور آخرت میں جہنم کی آگ ان کا ٹھکانہ ہو گی۔
(02) اب اس سے بڑھ کر ظالم کون ہوگا جو اللہ کی آیات کو جھٹلائے اور ان سے منہ موڑے،جو لوگ ہماری آیات سے منہ موڑتے ہیں انہیں ان کی اس روگردانی کی پاداش میں ہم بد ترین سزا دے کر رہیں گے۔(انعام:۱۵۷)
یقین جانو جن لوگوں نے ہماری آیات کو جھٹلایا ہے اور ان کے مقابلے میں سرکشی کی ہے ان کے لئے آسمان کے دروازے ہرگز نہ کھولے جائیں گے،ان کا جنت میں جانا اتنا ہی ناممکن ہے جتنا سوئی کے ناکے سے اونٹ کا گزرنا، مجرموں کو ہمارقرآن سے غفلت برتنے والے ۔(السجدہ: ۲۲)
جو لوگ اللہ کے نازل کردہ قانون کے مطابق فیصلہ نہ کریں وہی کافر ہیں۔ (المائدہ:آیت۴۴) جو لوگ اللہ کے نازل کردہ قانون کے مطابق فیصلہ نہ کریں وہی ظالم ہیں۔(المائدہ:آیت۴۵ )جو لوگ اللہ کے نازل کردہ قانون کے مطابق فیصلہ نہ کریں وہی فاسق ہیں۔(المائدہ: ۴۷)
اورجو میرے ذکر(قرآن)سے منہ موڑے گا اس کے لئے دنیا میں تنگ زندگی ہوگی اور قیامت کے روز ہم اسے اندھا اٹھائیں گے۔ (طٰہٰ : ۱۲۴)
اور رسول کہے گا کہ اے میرے رب! میری قوم کے لوگوں نے اس قرآن کو نشانۂ تضحیک بنا لیا تھا۔(فرقان:۳۰)
اوراے نبی! ان کے سامنے اس شخص کا حال بیان کرو جس کو ہم نے اپنی آیات کا علم عطا کیا تھا مگر وہ ان کی پابندی سے نکل بھاگا۔آخر کار شیطان اس کے پیچھے پڑ گیا یہاں تک کہ وہ بھٹکنے والوں میں شامل ہو کر رہا۔ اگر ہم چاہتے تواسے ان آیتوں کے ذریعہ سے بلندی عطا کرتے، مگر وہ تو زمین ہی کی طرف جھک کر رہ گیا اور اپنی خواہش نفس ہی کے پیچھے پڑا رہا،لہذا اس کی حالت کتے کی سی ہو گئی کہ تم اس پر حملہ کرو تب بھی زبان لٹکائے رہے اور اسے چھوڑ دو تب بھی زبان لٹکائے رہے۔ یہی مثال ہے ان لوگوں کی جوہماری آیات کو جھٹلاتے ہیں۔تم یہ حکایات ان کو سناتے رہو شاید کہ یہ کچھ غو روفکر کریں۔ (اعراف:آیات۱۷۵/۱۷۶)
دین کی تعلیم حاصل کرنے کے لئے قرآن کا سمجھ کر پڑھنا اور اس کے احکام پر عمل کرنافرض اور لازم ہے۔جو لوگ قرآن کو سمجھ کر پڑھنا اور اس پر عمل کرنے کا ارادہ نہیں رکھتے ہیں ان کو کافر کہا جارہا ہے۔دنیا اور آخرت میں ان کی رسوائی اور عذاب کی خبر دی جارہی ہے اور یہ بھی بتایا جارہا ہے کہ رسول ان لوگوں کے خلاف مقدمہ کریں گے کہ ان کے دنیا سے رخصت ہونے کے بعد ان لوگوں نے قرآن سے کنارہ کشی اختیار کر لی تھی۔رسول جس کے خلاف مقدمہ کریں گے اس کی شفاعت کیسے کریں گے او ر اللہ ان لوگوں کے اس سنگین گناہ کو معاف کیسے کرے گا۔کیا آج دنیا بھر کے مسلمان یہ سنگین گناہ نہیں کر رہے ہیں ؟
جو لوگ حافظ اور عالم بنتے ہیں اور نہ تو خود قرآن کے احکام پر عمل کرتے ہیں اورنہ امت کو قرآن کا علم دیتے ہیں بلکہ امامت کر کے مؤذن بن کے ، تراویح پڑھانے کی اجرت لے کر اور ناظرہ قرآن بچوں کو پڑھا کے صرف دولت کمانے کی دھن میں لگے ہوئے ہیں ان کو اللہ تعالیٰ کتا کہہ رہا ہے۔کتنے افسوس کا مقام ہے کہ جو خود گمرا ہ ہو وہ امت کی رہنمائی اور رہبری کیا کرے گا ؟
(03) اورتم لوگ نہ تو،آپس میں ایک دوسرے کے مال ناروا طریقے سے کھاؤ اور نہ حاکموںکے آگے ان کو اس غرض کے لئے پیش کروکہ تمہیں دوسروں کے مال کاکوئی حصہ قصداً ظالمانہ طریقے سے کھانے کا موقع مل جائے۔ (البقرہ:۱۸۸)
اے لوگو جو ایمان لائے ہو،آپس میں ایک دوسرے کے مال باطل طریقے سے نہ کھاؤ،لین دین ہونا چاہئے آپس کی رضامندی سے۔اور اپنے آپ کو قتل نہ کرو۔ یقین مانوکہ اللہ تمہارے اوپر مہربان ہے۔(النساء:۲۹)
دردناک سزا کی خوش خبری دو ان کو جو سونے اور چاندی جمع کر کے رکھتے ہیںاور انہیںخدا کی راہ میں خرچ نہیں کرتے۔ایک دن آئے گا کہ اسی سونے اور چاندی پر جہنم کی آگ دہکائی جائے گی اور پھر اس سے ان لوگوں کی پیشانیوں ، پہلوؤں اور پیٹھوں کو داغا جائے گا۔یہ ہے وہ خزانہ جو تم نے اپنے لئے جمع کیا تھا،لو اب اپنی سمیٹی ہوئی دولت کا مزہ چکھو۔(التوبہ : ۳۴)
شریعت حلال روزی کمانے اور کھانے کا حکم دیتی ہے اور حرام سے سخت پرہیز کرنے کی تاکید کرتی ہے۔لیکن اس دور میں چراغ لے کر ڈھونڈنے سے ایسے مسلمان نہیں ملیں گے جن کی آمدنی مکمل طور پر حلال ہو۔مسلمانوں کو عام طور پر حرام خوری کی عادت پڑ چکی ہے۔دولت کی ہوس حد سے زیادہ بڑھ گئی ہے۔اللہ نے جن لوگوں ضرورت سے زیادہ دولت دے رکھی ہے ان کا فرض ہے کہ اپنی زیادہ دولت محتاجوں اور مجبوروں میں بانٹیں۔ لیکن وہ ایسا نہیں کرتے۔قارون بن کے دولت پر ناجائز قبضہ کئے بیٹھے ہیں۔ ایسے بخیل مسلمانوں کا کیا حشر ہونے والا ہے اوپر کی آیتوں میں اس کی وضاحت کر دی گئی ہے۔کیا اس تحریر کو پڑھ کر بھی کسی ایسے آدمی کا ضمیر جاگے گا جو مسلمان ہونے کا دعویٰ کرتا ہے ؟
(04) پھر تباہی ہے ان نماز پڑھنے والوں کے لئے جو اپنی نماز سے غفلت برتتے ہیں۔ جو ریاکاری کرتے ہیں۔اور معمولی ضرورت کی چیزیں لوگوں کو نہیں دیتے۔(الماعون:۴تا۷)
بیت اللہ کے پاس ان کی نماز کیا ہوتی ہے،بس سیٹیاں بجاتے اور تالیاں پیٹتے ہیں۔پس لو اس عذاب کا مزہ چکھو اپنے اس انکار حق کے بدلے میںجو تم کرتے رہے ہو۔( انفال:۳۵)
نیاز دین کی بنیاد ہے۔ قرآن میں نماز قائم کرنے کا حکم دیا گیا ہے۔ نماز اہل ایمان کو جوڑ کر سیسہ پلائی ہوئی دیوار بناتی ہے۔ نماز ایمان والوں کو ہر برائی سے روکتی اور مثالی مسلمان بناتی ہے۔لیکن اس دور کے مسلمان ایسی نماز نہیں پڑھتے ہیں۔ان کی نماز دکھاوے اور تماشے کی نماز ہے۔ان کی نماز اتحاد اور بھائی چارا پیدا کرنے کی جگہ تفرقہ بازی اور نفرت و عداوت پیداکرنے کا ذریعہ بن گئی ہے۔ظالموں نے اللہ کے گھر مسجد تک کا بٹوارہ کر لیا۔مسجدیںاب اللہ کا گھر نہیںرہیںبلکہ فرقہ پرست مذہبی پہلوانوں کا اکھاڑا بن گئی ہیں۔اور یہ کام عام مسلمان نہیں بلکہ عالم اور فاضل ،پیر،سجادہ نشین اور مذہبی پیشوا کر رہے ہیں۔
(05) میں اپنی نشانیوں سے ان لوگوں کی نگاہیں پھیر دوں گاجو بغیر کسی حق کے زمین میں بڑے بنتے ہیں۔(اعراف:۱۴۶ )
اور لوگوں سے منہ پھیر کر بات نہ کر، نہ زمین میں اکڑ کر چل،اللہ کسی خود پسند اور فخر جتانے والے آدمی کو پسند نہیںکرتا ہے۔(لقمان:۱۸)
غرور اور تکبر اتنا سنگین گناہ ہے جس نے شیطان کو ملعون بنا دیا تھا۔مسلمانوں نے شریعت کے خلاف مسلم سماج کو اونچی اور نیچی ذات میں بانٹ کر فخر و غرورکا سنگین گناہ شروع کر دیا۔ اس گناہ میں ہر طبقہ کے مذہبی اورغیر مذہبی مسلمان شامل ہیں۔مسلمانوں کا اس سنگین گناہ کی بھر پور سزا مل رہی ہے مگر پھر بھی ان کو ہوش نہیں آ رہا ہے۔
شریعت کی تعلیم سے انجان، قرآن کی اہمیت اور علم سے محروم،حرام خوری کے عادی، کافر و مشرک کی طرح دولت کے پجاری،نماز ی ہو کے بھی نماز کی برکتوں سے محروم اورشیطانی مزاج یعنی گھمنڈ، فخر وغرور اور اپنے آپ کو ناحق بڑا سمجھنے والے بد عقل، ناعاقبت اندیش، احمق اور دنیا پرست مسلمان اپنے گناہوں پر دھیان نہیں دیتے اور یہ نہیں سمجھتے کہ جب تک یہ گناہوں سے توبہ کر کے نیک اور صالح مسلمان نہیں بنیں گے نہ یہ اللہ کی رحمت کے حقدار ہوں گے اور نہ ہی دنیا اور آخرت میں ان کوعزت و نجات ملے گی بلکہ الٹا دنیا میں ذلت و رسوا ئی اور غلامی ان کا مقدر بن چکی ہے اور آخرت میں اس سے بھی زیادہ خطرناک اور بھیانک انجام ہونے والا ہے۔

جسے احساس ہی اپنی خطاؤں کا نہیں صارمؔ
کوئی کس طرح اُس ناداں کو سیدھی راہ دکھلائے
جسے جنت کی خواہش ہی نہیں دوزخ سے غافل ہے
نصیحت ایسے بد قسمت کو اب کس طرح کی جائے