خاص مقصد اور نظریہ کو فروغ دینے میں میڈیا کا اہم کردار

پھلواری شریف (شیث احمد):المعہدالعالی امارت شرعیہ میں ’’ ملکی وبین الاقوامی میڈیامثبت ومنفی کردار‘‘کے عنوان پرایک اہم پروگرام منعقد ہوا،پروگرام کاآغاز المعہدالعالی کے طالب علم مولوی عزیزالحق کی تلاوت کلام پاک سے ہوا ،اس کے بعد المعہدالعالی کے سکریٹری مولاناعبدالباسط ندوی نے مقالہ نگارکاتعارف فرمایااورفرمایاکہ اس وقت عالمی پیمانے پر یہ کوشش ہورہی ہے کہ بے حیائی اورعریانیت پرمبنی اشتہارات اورایڈورٹائز کے ذریعہ ایمان والوں کے ایمان پرڈاکہ ڈالاجائے اوراس کے ایمان کوکمزورکیاجائے ۔

المعہد العالی امارت شرعیہ میں ’ملکی وبین الاقوامی میڈیا مثبت ومنفی کردار‘کے موضوع پر جناب مفتی محمد ثناء الہدی قاسمی اور ڈاکٹر ریحان غنی کا خطاب

پروگرام میں مارت شرعیہ پھلواری شریف کے نائب ناظم اورہفت روزہ نقیب کے چیف ایڈیٹر حضرت مولانامفتی محمد ثناء الہدی قاسمی صاحب نے اپنامقالہ پیش فرمایا ، انہوں نے میڈیا کے لغوی واصطلاحی معنی بتائے، پھر اس کی قسمیںبتائیںکہ میڈیادوطرح کے ہیں ملکی میڈیا ،بین الاقوامی میڈیا ،ہم دونوں سے فائدہ اٹھاتے ہیں ،اس سے بے نیازنہیں ہوسکتے،مفتی صاحب نے ملکی وبین الاقوامی میڈیاکی تین قسمیں بتائیں (۱)پرنٹ میڈیا جیسے اخبارات ،رسائل ،مجلہ اورکتابیں ،اس کی اہمیت شروع سے اب تک برقرارہے ،(۲)الکٹرونک میڈیا،اس میں عام طورسے تین چیزیں آتی ہیں (الف)ریڈیو(ب)ٹی وی (ج)فلم یہ تینوں بھی ابلاغ کاایک ذریعہ ہیں (۳)سوشل میڈیا۔ریڈیواورٹی وی پر ہم اسی وقت خبرجان سکتے ہیں جب کہ اسے نشر کیاجائے اورجووقت نشر کاہے اس وقت ریڈیویاٹی وی کھول کربیٹھیںوقت نکل جانے پرگنجائش نہیں ہے جبکہ سوشل میڈیاعام ہے جب چاہیں اس کااستعمال کرسکتے ہیں ،مفتی صاحب نے مزیدبتایاکہ ای میل ذرائع ابلاغ کابڑاذریعہ ہے اس میں آٹوجواب کی بھی سہولت موجود ہے، مفتی صاحب نے فرمایاکہ اخبارات ورسائل دوقسموں میں بٹ گئے (الف)جانبدار(ب)غیر جانبدار۔خاص مقصداورخاص نظریہ کوفروغ دینے کے لئے جسے استعمال کیاجائے وہ جانبدارہے اورجوکسی خاص مقصد یانظریہ کوفروغ کے لئے استعمال نہ ہووہ غیر جانبدارہے ۔مفتی صاحب نے بتایاکہ میڈیاجانبداری کیوں کرتاہے ؟اس کی دووجہیں ہیں ایک حکومت سے گٹھ جوڑکرلینے یاسیاسی لوگوں کی تائیدکی وجہ سے ان کی طرفداری کرتاہے ،یہ سیاسی جانبداری ہوئی۔دوسری مذہبی جانبداری یعنی سیاست سے تومتاثرنہیں ہے لیکن مذہب سے متاثر ہے شیعہ ہے تواسکی ،سنی ہے تو اس کی ،حنفی ہے تواس کی جانبداری کرتاہے ،ساتھ ہی یہ بھی فرمایاکہ حق کی طرفداری کرنایہ بھی جانبداری ہے لیکن یہ پسندیدہ ہے ۔مفتی صاحب نے گفتگوکے اخیر میں فرمایاکہ مثبت اورمنفی یہ پیش کرنے کے اندازسے ہوتاہے اورمثال سے بتایاکہ ایک بادشاہ نے خواب دیکھاکہ اس کے سارے دانت ٹوٹ گئے نجومیوں سے اس کی تعبیر پوچھی تو ایک نے بتایاکہ آپ کے سارے خاندان کے لوگ آپ کی موجودگی میں مرجائیں گے بادشاہ کوغصہ آیااوراس نے تعبیر بتانے والے کوسزادی ،دوسرے نجومی نے اس کی تعبیر یہ بتائی کہ اللہ تعالی آپ کی عمر پورے خاندان کے لوگوں می سب سے دراز کریں گے بادشاہ بہت خوش ہوااوراسے انعام سے نوازا۔بات ایک ہی ہے انداز بیاں الگ الگ ہے ایک کوسزاملی دوسرے کوانعام ۔اس وقت پوری میڈیاپر مغربی میڈیاکاقبضہ ہے اوروہ اپنے طریقہ سے جھوٹ پھیلاتاہے اب ہماری اورآپ کی ذمہ داری ہے سچائی تک رسائی کی ۔

دوسرے محاضرتھے، امارت شرعیہ کے پہلے مفتی اورناظم حضرت مولاناسیدعثمان غنی کے نبیرہ جناب ڈاکٹرسید ریحان غنی صاحب جوروزنامہ پندارکے نیوزایڈیٹرہیں انہوں نے اپنی گفتگوکاآغازیہاں سے فرمایامجھے خوشی ہے کہ علماء کے درمیان اس موضوع پر محاضرہ ہے کیونکہ سچے قائد علماء ہی ہیں، علماء جوبات دس، پندرہ سال قبل سوچتے ہیں عام لوگوں کووہاں تک پہنچنے میں ۱۰ سے ۱۵ برس لگ جاتاہے ،کیونکہ قرآن کریم اورحدیث شریف سے ان کاتعلق ہے ،یہ بھی حقیقت ہے کہ جتنے بھی سائنسی ایجادات ہوئے ہیں وہ سب قرآن کریم کے نزول کے بعدہی ہوئے ہیں۔سائنسدانوں نے بتایاکہ سورج کی اپنی روشنی ہے اورچاندکی اپنی جبکہ قرآن کریم نے پہلے ہی یہ بتاچکاہے ،ڈاکٹرصاحب نے میڈیاپر بات کرتے ہوئے کہاکہ میڈیاایک طاقتورذریعہ ہے جونوجوانوں پر مثبت ومنفی اثرمرتب کرتاہے ،ڈاکٹرصاحب نے کہاکہ بین الاقوامی سطح پرانگریزی کی دوایجنسیاں ہیں ایک اے ٹی اورایک رائٹراسے کے علاوہ بین الاقوامی سطح کی نہیں ہے یہ ادارے اپنی ذہنیت کے اعتبار سےخبریں بناتے ہیں جیسی ذہنیت ہوتی ہے ویسی خبریں ۔بھارت میں دوایجنسی ہے بھاشااوروارتا،اس کاانگریزی یواین آئی اورپی ٹی آئی ہے اردوکی ایک ایجنسی یواین آئی ہے ۔ڈاکٹرصاحب نے بتایاکہ اردو صحافت دوسویںسال میں داخل ہے اس کی ابتداء ۱۹۲۲ء میں ہوئی اس کے پہلے ایڈیٹرہری ہرکت رائے ہیں اردوصحافت ہندی سے چارسال پرانی ہے ہندی صحافت کی ابتداء ۱۹۲۶ء میں ہوئی اس کے پہلے ایڈیٹراُودِت مارتندہیں ،آگے فرمایاکہ خبرکامنظرنامہ خبر رساں بدلتاہے پھر مثال دیتے ہوئے انہوں نے شاہ بانوکیس کے وقت پٹنہ میں نکلنے والے ایک جلوس کی تفصیل بتائی جس میں وہ خود موجود تھے اورانہوں نے قومی آواز میں وہ سب کچھ لکھاجواس جگہ موجودرہ کراپنی آنکھوں سے دیکھاجبکہ ہندی اورانگریزی اخباروں می جوخبریں شائع ہوئیں وہ پوری طرح حقیقت سے الگ پولیس اورحکومت کی طرفداری پرمبنی تھی ۔آگے فرماکہ صحافت جتناآگے بڑھ رہی ہے اتنامنفی ہوتی جارہی ہے ،اخیر میں ڈاکٹرصاحب نے میڈیاکے منفی اثرات کے بارے میں بتایاکہ یونسکوکی رپورٹ کے مطابق پچاس فیصدلوگوں کے عام معمول میں تبدیلی آئی ہے ،کھانے پینے ،سونے اٹھنے کے اوقات میں تبدیلی آئی ہے قوت فیصلہ کمزورہورہاہے ،بچے متاثرہورہے ہیں ،مذہب ثقافت اورتہذیب سے ناآشناہورہے ہیں اس سے نکلنااسی وقت ممکن ہے جب ہماراایک بین الاقوامی میڈیاہو ۔

مجلس میں دیگر شرکاء میں حضرت مولانابدر احمد مجیبی صاحبصدرالمدرسین المعہدالعالی ،حضرت مولاناامتیازعالم قاسمی صاحب،مولانایارعلی نعمانی مولانامطہرعالم، مولانامحبوب رحمانی کے علاوہ المعہدالعالی کے طلبہ اورمارت شرعیہ میں زیرتربیت طلبہ موجودتھے ،مجلس کااختتام صدرمجلس اور المعہدالعالی کے سینئر استاذحضرت مولانانورالحق رحمانی صاحب کی دعاپرہوا۔