دیوالی کا تہوار جوش و خروش سے منایا گیا

نئی دہلی: تاریکی پر روشنی کی جیت اوربدی پر نیکی یعنی ادھرم پر دھرم کی فتح کی علامت چراغوں کا تہواردیوالی پیر کو پورے ملک میں جوش و خروش اور روایتی جوش و خروش کے ساتھ منایا گیا اس موقع پر صدر دروپدی مرمو، نائب صدر جگدیپ دھنکھڑ، وزیر اعظم نریندر مودی، وزیر دفاع راجناتھ سنگھ اور کانگریس کے سابق صدر راہل گاندھی سمیت مختلف سیاسی جماعتوں ، سماجی اور کاروباری تنظیموں کے سربراہان اور معززین نے بھی لوگوں کو دیوالی کی مبارکباد دی اورنیک خواہشات کا اظہارکیا۔

وزیر اعظم بننے کے بعد سے جوانوں کے درمیان دیپاولی منانے کی اپنی روایت کے تحت پیر کو کارگل پہنچے مسٹرمودی نے دشمن کو بھی سخت پیغام دیا۔ انہوں نے کہا، ’’ہندوستان پر بری نظر ڈالنے والوں کو ان کی ہمت کا اسی زبان میں منہ توڑ جواب دیا جائے گا۔۔ قربانی اور فتح کی سرزمین کارگل میں بہادر سپاہیوں سے خطاب کرتے ہوئے مسٹرمودی نے کہا کہ دیوالی دہشت گردی کے خاتمے کا جشن ہے اور فوج نے کارگل میں دہشت گردی کا پھن کچلتے ہوئے فتح کا پرچم لہرایا تھا۔

دیوالی کے موقع پر اس بار زیادہ تر لوگوں نے سبز پٹاخوں کو ترجیح دی جسے بچوں نے جلایا۔ لوگوں نے ایک دوسرے کو گلے لگا کر دیوالی کی مبارکباد دی اور مٹھائیاں تقسیم کرتے ہوئے ایک دوسرے کی خوشحالی اور ترقی کی خواہش کی۔ اس موقع پر لوگوں نے اپنے گھروں کو رنگ برنگے دیوں اور رنگ برنگے بجلی کے بلبوں سے سجایا ہے۔

محترمہ مرمو نے ٹویٹ کیا، ’’تمام ہم وطنوں کو دیوالی کی دلی مبارکباد۔ روشنی اور خوشی کے اس مقدس تہوار پر آئیے علم اور توانائی کے دیئے جلا کر ضرورت مندوں کی زندگیوں میں خوشیاں لانے کی کوشش کریں۔ میں اس تہوار پر تمام ہم وطنوں کی زندگیوں میں خوشی اور خوشحالی کے لئے دعا گوہوں۔

مسٹردھنکھڑ نے ٹویٹ کرتے ہوئے لکھا، ’’دیوالی کی دلی مبارکباد دی! روشنی کا یہ تہوار ہماری زندگیوں میں حکمت، نیکی اور خوشحالی لائے۔ جگمگاتے ہوئے دیوں کی چمک ہمارے ملک کو امید، خوشی، صحت اور ہم آہنگی سے روشن کرے۔

مسٹر مودی نے ٹویٹ کے ذریعہ کہا، "تمام باشندگان وطن کو دیوالی کی نیک خواہشات۔ دیوالی روشنیوں کا تہوار ہے۔ دعا ہے کہ یہ مقدس تہوار ہر ایک کی زندگی میں خوشیاں، خوشحالی اور اچھی صحت لائے۔ مجھے امید ہے کہ آپ کی دیوالی فیملی اور دوستوں کے ساتھ شاندار گزرے گی۔”
وزیر دفاع راج ناتھ سنگھ نے دیوالی کے موقع پر ہم وطنوں کو نیک خواہشات کا اظہار کیا ہے۔ مسٹر سنگھ نے ٹویٹ کیا، "آپ سب کو دیوالی کی نیک خواہشات۔ خداسے دعا ہے کہ یہ مقدس تہوار آپ کی زندگی میں خوشیاں، خوشحالی اور صحت لائے۔ دیوالی مبارک۔
کانگریس کے سابق صدر راہل گاندھی نے ایک فیس بک پوسٹ میں جاری اپنے پیغام میں کہا، "تمام ہم وطنوں کو دیوالی کی بہت بہت مبارکباد۔ یہ مقدس تہوار تاریکی پر روشنی کی فتح اور ادھرم پر دھرم کی جیت کی علامت ہے۔ انہوں نے کہا کہ کیا آپ نے کبھی سوچا ہے کہ ہم دیوالی کے چراغ ایک قطار میں جلاتے ہیں اور ہماری کوشش یہی ہوتی ہے کہ اس قطار کا ایک بھی دیا بجھنے نہ پائے۔ ہمارا ہندوستان بھی ان چراغوں کی کڑی کی طرح ہے۔ ہمیں یہ دیکھنا ہے کہ ایک بھی لو بجھنے نہ پائے۔ تب ہی توملک روشن ہوگا۔ اس دیوالی پراپنے خاندان سے باہر بھی، کسی اور برادری، کسی دیگر علاقے یا زبان بولنے والے کسی دوسرے معاشی یا سماجی طبقے کے بھائی بہن کے ساتھ بھی یہ تہوارضرورمنائیں، خوشیاں بانٹیں، دیا جلائیں اور مسکراہٹ پھیلائیں۔
اتر پردیش کے وزیر اعلیٰ یوگی آدتیہ ناتھ نے پیر کو دیوالی کے مبارک تہوار پر ریاست کے لوگوں کومبارکباد پیش کرتے ہوئے عوامی نمائندوں، ریاستی سرکاری افسران اور ملازمین سے اپیل کی ہے کہ وہ دیوالی کسی محروم خاندان کے ساتھ بھی منائیں۔ یوگی نے دیوالی کی مبارکباد دیتے ہوئے ٹویٹ کیا اور کہا، "ریاست کے تمام لوگوں کو دیوالی کی مبارکباد۔

یوگی نے اتوار کو ایودھیا میں منائے جانے والے عظیم الشان دیپوتسو کے انعقاد کے لیے ریاست کے تمام لوگوں کا شکریہ ادا کیا۔ انہوں نے کہا، “میں نے دیپوتسو کے کامیاب انعقاد کے بعد آج ایودھیا میں سنتوں کا آشیرواد لیا۔ اب میں یہاں سے گورکھپور جا رہا ہوں، جہاں میں قبائلی برادری کے رہائشی ونٹانگیا اور مسہر قبائلیوں کے ساتھ دیپاولی کی تقریب میں شرکت کروں گا۔
اتر پردیش کی سابق وزیر اعلیٰ اور بہوجن سماج پارٹی (بی ایس پی) کی صدر مایاوتی نے ٹویٹ کر کے اپنے مبارکبادی پیغام میں کہا، "اترپردیش سمیت ریاست کے تمام لوگوں اور بھائی بہنوں کو دیوالی، گووردھن پوجا اور بھیا دوج تہوارکی دل کی گہرائیوں سے مبارکباد اور بہت سی نیک خواہشات۔ سب کی زندگی میں خوشیاں، سکون اور خوشحالی آئے۔ تاہم روحانیت کے لیے ضروری ہے کہ تہواروں کو اس کی اصل روح اور سادگی کے ساتھ منایا جائے۔
مدھیہ پردیش کے وزیر اعلیٰ شیوراج سنگھ چوہان نے اپنے مبارکبادی پیغام میں کہا کہ روشنی کا یہ تہوار ہر کسی کی زندگی میں خوشیاں، خوشحالی لائے، خداسے یہی دعاہے۔
مدھیہ پردیش کے گورنر منگو بھائی پٹیل نے خوشی اور روشنی کے تہوار دیوالی کے موقع پر ریاست کے تمام لوگوں کو دل کی گہرائیوں سے نیک خواہشات کا اظہار کیا اور خدا سے دعا کی کہ سب کے لیے امن اور خوشی ہو۔
راجستھان کے وزیر اعلی اشوک گہلوت نے کہا کہ دیوالی خوشی اور روشنی کا تہوار ہے۔ دعا ہے کہ یہ مقدس تہوار ہر ایک کی زندگی میں خوشیاں، خوشحالی لائے۔ وزیراعلیٰ نے اس موقع پر 21 اکتوبر کو وزیر اعلیٰ رہائش گاہ پر کووڈ کے باعث اپنے والدین کو کھودینے والوں بچوں کے ساتھ دیوالی منانے کی جھلکیاں سوشل میڈیا پر شیئرکیں اور کہا، "میں ان بچوں سے مل کر بہت خوش ہوں۔