عراق کے الحسین ہسپتال میں آتشزدگی سے ہلاکتوں کی تعداد 92 ہوگئی

بغداد:عراق کے شہر ناصریہ کے ہسپتال میں کورونا وائرس کے وارڈ میں آتشزدگی سے ہونے والی ہلاکتوں کی تعداد بڑھ کر 92 ہوگئی ہے جبکہ لواحقین اور ہسپتال میں کام کرنے والے ڈاکٹروں کی جانب سے انتظامیہ کو غفلت کے الزامات کا سامنا ہے۔
ڈان کی رپورٹ کے مطابق حکام نے کہا ہے کہ پیر کی رات ناصریہ میں واقع ہسپتال میں آتشزدگی کے باعث 100 سے زائد افراد جھلس کر زخمی ہوگئے تھے۔پولیس اور سول ڈیفنس حکام نے کہا کہ تفتیش سے ظاہر ہوتا ہے کہ ناقص وائرنگ میں لگنے والی آگے آکسیجن ٹینک تک پھیل گئی جس کے بعد دھماکہ ہوا۔
رپورٹ کے مطابق یہ واقعہ عراق میں تین ماہ میں یہ دوسرا واقعہ ہے، منگل کو صدر مملکت نے دونوں واقعات پر کرپشن کا الزام دیا، وزیر اعظم کی جانب سے جاری بیان میں سوگ کا اعلان کیا گیا ہے۔
امدادی ٹیمیں الحسین ہسپتال میں آتشزدگی کے بعد ملبہ ہٹانے کے لیے کرین کا استعمال کر رہی ہیں یہاں کورونا وائرس کے مریضوں کا علاج کیا جارہا تھا جبکہ ان کے رشتہ دار بھی قریب جمع تھے۔
آگ لگنے سے چند گھنٹے قبل ڈیوٹی مکمل کرنے والے ڈاکٹر نے شناخت ظاہر کیے بغیر بتایا کہ ہسپتال میں بنیادی حفاظتی اقدامات کے فقدان کے باعث حادثہ پیش آیا۔انہوں نے خبر ایجنسی کو بتایا کہ ہسپتال میں آگ بجھانے کا کوئی نظام ہے اور نہ ہی سادہ فائر الارم سسٹم ہے۔انہوں نے کہا کہ وہ تین ماہ سے کئی بار محکمہ صحت کو شکایت کر چکے ہیں کہ کسی بھی وقت سگریٹ کے ایک ٹکرے سے بھی حادثہ پیش آسکتا ہے مگر ہمیں ہمیشہ ایک ہی جواب دیا گیا کہ ‘ہمارے پاس اتنی رقم نہیں ہے’.
انتظامیہ نے چند میتوں کو تدفین کے لیے لے جایا گیا جہاں لواحقین میتیں کے ساتھ بین اور دعا کر رہے تھے جبکہ حادثے میں بری طرح جھلسی ہوئی 20 لاشوں کی شناخت کے لیے ان کے ڈی این اے ٹیسٹ درکار ہیں۔
اپریل میں بغداد کے کورونا وائرس ہسپتال میں ایسا ہی ایک واقعہ پیش آیا تھا، جہاں 82 افراد ہلاک اور 110 زخمی ہوئے تھے۔
عراقی انسانی حقوق کمیشن کے سربراہ نے کہا ہے کہ پیر کو ہونے والا دھماکہ محکمہ صحت میں جنگ کے باعث کمزوریوں اور پابندیوں کی وجہ سے غیر مؤثر اقدامات کو ظاہر کرتا ہے۔علی بیاتی نے کہا کہ چند ماہ بعد دوبارہ حادثہ ہونے کا مطلب یہ ہے کہ حادثات سے بچنے کے لیے اب تک کوئی اقدامات نہیں کیے گئے۔
یو این آئی۔ ع ا۔
امید کبھی ختم نہیں ہوتی،چین میں 24 سال قبل اغوا ہونے والا بیٹا باپ سے مل گیا
بیجنگ، 14 جولائی (یو این آئی) امید کبھی ختم نہیں ہوتی اور ایک نہ ایک دن امید کامیابی کی منزل سے ہمکنار کرتی ہے۔ چین میں 24 سال قبل اغوا ہونے والا بیٹا باپ سے مل گیا، باپ نے بیٹے کو تلاش کرنے کے لیے چین میں موٹر سائیکل پر پانچ لاکھ کلو میٹر سفر کیا اور ہر جگہ اسے تلاش کیا جہاں انہیں اپنے بیٹے کی موجودگی کی اطلاع ملی۔
غیر ملکی خبر رساں ادارے کی رپورٹ کے مطابق گو گینگ تانگ کے بیٹے کو 1997 میں صوبہ شینڈوک کے مشرق میں واقع ان کے گھر کے سامنے سے اغوا کیا گیا، جب ان کی عمر صرف 2 سال 5 ماہ تھی۔
بچہ گھر کے باہر تنہا کھیل رہا تھا، اسمگلرز نے بچے کو اٹھایا اور اسے وسطی چین میں ایک خاندان کو فروخت کردیا۔
کئی سالوں کی تلاش کے بعد پولیس نے گو کو بتایا کہ وسطی ہنان صوبے میں ایک 26 سالہ استاد کا ڈی این اے ان سے میچ ہو رہا ہے، جو کہ گو کا کھویا ہوا بیٹا ہے۔
خاندان کے دوبارہ ملنے کی تصویر وزارت عوامی تحفظ کے دفتر نے اپنے ٹوئٹر اکاؤنٹ پر جاری کی جس میں گو کو طویل عرصے بعد اپنے بیٹے گو زیہن سے ملاقات کے وقت سسکتے ہوئے دیکھا گیا جبکہ ان کی بیوی اپنے بچے کو گلے لگاتی ہوئی نظر آئیں۔ویڈیو بیان میں گو اشک بار نظر آئے اور انہوں نے کہا کہ اب میرا بیٹا مل گیا ہے، اب سے میرے لیے ہر چیز خوشی کا باعث ہوگی۔
بیٹے کے اغوا کے وقت گو کی عمر 27 سال تھی اور انہوں نے اس وقت ملازمت چھوڑ کر موٹر سائیکل پر ایک بڑے جھنڈے پر ان کے بیٹے کی تصویر لگا کر پورے ملک میں ان کو تلاش کرنا شروع کردیا تھا۔
یو این آئی۔ ع ا۔
پاکستان اور تاجکستان کا علاقائی امن پر یکساں موقف۔ جنرل باجوہ
راولپنڈی 14 جولائی (یو این آئی) پاکستان آرمی کے سربراہ چیف جنرل قمر جاوید باجوہ نے کہا ہے کہ پاکستان اور تاجکستان کا علاقائی امن پر یکساں موقف ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سے تاجک وزیر دفاع نے ملاقات کی جس میں باہمی دلچسپی، مجموعی علاقائی صورت حال پر تبادلہ خیال کیا گیا۔
آئی ایس پی آر کا کہنا ہے کہ ملاقات میں افغانستان کی تازہ صورت حال، تاجک افغان بارڈر کی صورت حال بھی زیر غور آئے، دونوں ممالک میں دفاعی تعاون کو مزید فروغ دینے پر بھی گفتگو کی گئی۔
آرمی چیف نے کہا کہ پاکستان تاجکستان کے درمیان قریبی مذہبی اور ثقافتی تعلقات ہیں، دونوں ملکوں کا علاقائی امن، سیکیورٹی سے متعلقہ مور پر یکساں موقف ہے۔
ترجمان پاک فوج کے مطابق آرمی چیف نے علاقائی روابط کے فروغ کے لیے تاجکستان کی کوششوں کو سراہا، تاجک وزیر کی امن و استحکام، افغان امن عمل پر پاکستان کے کردار کی تعریف کی۔
یو این آئی۔ ع ا۔
امریکہ میں خاتون صحافی کے اغوا کی سازش پر 4 ایرانی ملزم قرار
واشنگٹن، 14 جولائی (یو این آئی) امریکہ میں مقیم ایک ایرانی نژاد امریکی خاتون صحافی کے اغوا کی سازش کے الزام میں ’ایرانی انٹیلی جنس کے چار ایجنٹوں‘ کو ملزم ٹھہرایا گیا ہے۔ یہ بات امریکی عدلیہ نے منگل کے روز بتائی۔ مذکورہ خاتون صحافی ایران میں ’انسانی حقوق کی خلاف ورزی ے کے اسکینڈل‘ کے حوالے سے سرگرم ہے۔
میڈیا رپورٹ کے مطابق امریکی عدلیہ نے خاتون صحافی کے نام کا انکشاف نہیں کیا تاہم نیویارک میں مقیم ایرانی خاتون صحافی اور سماجی کارکن مسیح علی نجاد نے اپنی ایک ٹویٹ میں ایسا اظہار کیا ہے گویا وہ اس بات کی تصدیق کر رہی ہوں کہ اغوا کی سازش کا نشانہ وہ خود تھیں۔
امریکی وزارت انصاف نے ایک بیان میں کہا ہے کہ چاروں ملزمان مرد ہیں، وہ جون 2020ء سے ایک خاتون صحافی اور لکھاری کو اغوا کرنے کی کوشش میں رہے۔ اس خاتون صحافی نے ایرانی حکومت کی جانب سے مرتکب انسانی حقوق کی خلاف ورزیوں کے شرم ناک اسکینڈل کو بے نقاب کیا تھا۔
امریکی پبلک پراسیکیوٹر کے بیان کے مطابق چاروں ملزمان نے بزور طاقت اپنے شکار کو ایران منتقل کرنے کی منصوبہ بندی کی تھی۔ وہاں پہنچ کر خاتون صحافی کو لا پتہ ہی ہو جانا تھا۔
منگل کے روز مسیح علی نجاد سے ٹیلی فون پر رابطہ کیا گیا تو انہوں نے ملزمان کے حوالے سے تبصرہ کرتے ہوئے بتایا کہ انہیں سازش کے بارے میں جان کر دھچکا پہنچا ہے۔خاتون صحافی نے بتایا امریکہ میں ایف بی آئی کے افسران نے دوران تحقیق انہیں اور ان کے شوہر کو سیکورٹی وجوہات کی بنا پر سلسلہ وار مختلف گھروں میں منتقل کیا۔ مسیح علی نجاد کے مطابق ”انہیں یقین نہیں آتا کہ وہ امریکہ میں بھی محفوظ نہیں ہیں ”۔
پبلک پراسیکیوٹر کے بیان کے مطابق چار ملزمان کے علاوہ ایک پانچویں ایرانی خاتون نیلوفر بہادر بھی ہے۔ کیلی فورنیا میں مقیم اس خاتون پر اغوا کی سازش کی فنڈنگ میں شریک ہونے کا الزام عائد کیا گیا ہے۔

سورس: یواین آئی