بہار میں پرشانت کشور کی3000 کلو میٹر کی ‘پد یاترا’ 2 اکتوبر سے

پٹنہ: انتخابی حکمت عملی ساز پرشانت کشور بہار میں ‘’جن سوراج ‘کے تصور کے ساتھ عوام کے ساتھ براہ راست مکالمہ کرکے اور ان کے مسائل، خواہشات اور امنگوں کو سمجھ کر ایک ٹھوس سیاسی فیصلہ تک پہنچنے کے مقصد سے اس سال 2 اکتوبر سے ریاست میں 3000 کلومیٹر کی ’پد یاترا‘شروع کریں گے۔
پیر کو ’جن سوراج‘ کے ذریعہ نئی سیاسی پارٹی بنانے کا اشارہ دینے کے بعد جمعرات کو یہاں ایک پریس کانفرنس میں اپنی حکمت عملی کا انکشاف کرتے ہوئے مسٹر کشور نے کہا کہ فی الحال وہ کوئی سیاسی پارٹی نہیں بنانے والے ہیں۔ وہ اس سال 2 اکتوبر سے مشرقی چمپارن میں گاندھی آشرم سے ریاست میں 3000 کلومیٹر کی پد یاترا شروع کریں گے۔ اس دوران وہ ‘’جن سوراج‘ کے تصور کے ساتھ گاؤں گاؤں جائیں گے اور ہر ایک سے ملیں گے اور ان کی پریشانی، خواہش، امید اور آرزو کو سمجھنے کی کوشش کریں گے۔ اس کے بعد وہ اور ان کے ساتھ کھڑے تقریباً 18 ہزار لوگ مل کر فیصلہ کریں گے کہ ’جن سوراج‘ کو سیاسی پارٹی کی شکل دی جائے یا نہیں۔
انتخابی حکمت عملی ساز نے کہا کہ گزشتہ تیس سالوں میں دو بڑے لیڈروں کے دور حکومت میں بہار ترقی کے تمام پہلوؤں میں پیچھے رہ گیا ہے۔ انہوں نے نیتی آیوگ کی رپورٹ پر بہار کے وزیر اعلی نتیش کمار کے تبصرے ’ ‘ارے انہیں کچھ پتا بھی ہے‘ پر طنز کرتے ہوئے کہا کہ سچ میں کسی کو پتا نہیں ہے لیکن ریاست کا تعلیمی نظام پوری طرح مفلوج ہوچکا ہے، روزگارکے مواقع پیدا نہیں ہورہےاور یہاں کے لوگ دوسری ریاستوں میں ہجرت کرنے اور نامساعد حالات میں کام کرنے پر مجبور ہیں۔ ایسے میں وہ پد یاترا کے دوران زیادہ سے زیادہ لوگوں سے ملنے اور ان کے مسائل کو سمجھنے کی کوشش کریں گے۔ انہوں نے کہا کہ جب تک عوام تک ذاتی طور پر نہیں پہنچیں گے ان کے مسائل حل نہیں ہوں گے۔

انتخابی حکمت عملی ساز سے جب آنے والے وقت میں سیاسی پارٹی بنا کر الیکشن لڑنے کی حکمت عملی کے بارے میں پوچھا گیا تو انہوں نے کہا کہ پہلی بات تو یہ کہ بہار میں ابھی کوئی الیکشن نہیں ہے اور اگر انہیں الیکشن لڑنا ہی ہوتا تووہ چھ ماہ قبل پارٹی بنا کر الیکشن لڑتے۔ لیکن ایسا نہیں کیا گیا۔ اس کے باوجود اگر پارٹی بن بھی جاتی ہے تو یہ پرشانت کی پارٹی نہیں ہوگی اور نہ ہی وہ وزیر اعلیٰ کا چہرہ ہوں گے۔ پارٹی میں ان کا کردار صرف ایک رکن کا ہو گا۔
جب ان سے کانگریس میں شامل ہونے کی بات چیت کے بارے میں پوچھا گیا تو مسٹر کشور نے کہا کہ کانگریس نے ان کی تجویز پر سنجیدگی کا مظاہرہ کیا۔ اس حوالے سے اعلیٰ قیادت کی میٹنگ بھی ہوئی۔ انہوں نے جو کہا اس پرسبھی متفق بھی ہوئے لیکن جب اس پر عمل درآمد کی بات آئی تو انہوں نے ایک بااختیار کمیٹی بنانے کا فیصلہ کیا۔ کانگریس کے لوگ چاہتے تھے کہ وہ اس کمیٹی میں شامل ہوں اور پارٹی کے لیے کام کریں، لیکن ایگزیکٹو اختیارات کے ساتھ تشکیل دی گئی کمیٹی کے پاس پارٹی میں بنیادی تبدیلی لانے کا اختیار نہیں ہوتا ہے۔ اس لیے انہوں نے اس کمیٹی میں شامل ہونا مناسب نہیں سمجھا۔
جب انتخابی حکمت عملی ساز سے پوچھا گیا کہ آپ کی باتوں پر کتنا بھروسہ کیا جائے کہ جو آپ کرنے جارہے ہیں وہ وزیر اعلیٰ نتیش کمار کے لیے ہے، تو انھوں نے کہا کہ میں نے گزشتہ دس سالوں میں مختلف رہنماؤں کے ساتھ کام کیا ہے لیکن ان حکومتوں میںکچھ بہتر نہیں ہوپایا تو میری کوشش ہے کہ کچھ اچھا کرپاؤں۔جن کو شک ہے کہ میں کر سکوں گا یا نہیں وہ مجھے کام کرنے کا موقع دیں۔
میں نے نتیش جی کے ساتھ سال 2015 میں عظیم اتحاد کے لیے کام کیا، پھر ان کی پارٹی جنتا دل یونائیٹڈ (جے ڈی یو) میں شامل بھی ہوگیا۔ میرا ان کے ساتھ باپ بیٹے کا رشتہ ہے لیکن این آر سی اور سی اے اے پر اختلافات کے بعد انہوںنے مجھے پارٹی سے نکال دیا۔ لہذا ذاتی تعلق رکھنا اور ساتھ کام کرنا دو مختلف چیزیں ہیں۔

انتخابی حکمت عملی ساز سے جب اس مہم کو چلانے کے لیے فنڈز کے انتظامات اور آنے والے وقت میں پارٹی کی تشکیل کے بارے میں پوچھا گیا تو انھوں نے کہا کہ جن کو عوام کی حمایت حاصل ہوتی ہے ان کے لیے پیسوں کا انتظام ہوجاتا ہے اور اگر آئندہ ضرورت پڑی تو اس سلسلے میں وہ عوام سے ہی مدد طلب کریں گے۔ان کا کہنا تھا کہ ان کے رابطے میں تقریباً 18 ہزار ایسے لوگ ہیں، جو یا تو ان سے ملے ہیں یا انہیں ڈھونڈ رہے ہیں۔ آنے والے وقتوں میں ریاست کے سماجی و سیاسی شعبے سے وابستہ افراد جنہیں یہاں کے مسائل کی سمجھ بوجھ ہے اور یہاں کے مسائل کو حل کرنے کی خواہش رکھتے ہیں، وہ بھی یقینی طور پر ‘’جن سوراج‘ کے تصور میں شامل ہوں گے۔
’جن سوراج‘ کے بارے میں ان پر ہونے والے تبصروں کے بارے میں پوچھے جانے پرمسٹر کشور نے کہاکہ راشٹریہ جنتا دل (آر جے ڈی) کے صدر لالو پرساد یادو اور وزیر اعلیٰ نتیش کمار نہ صرف ریاست کے بلکہ ملک کے بڑے لیڈر ہیں۔ ان کے بہت سے ایم ایل اے اور ایم پی ہیں اور میں ٹھہرااکیلا ۔ وہ میری طرف کیوں دھیان دیں گے اور جو تبصرہ کر رہے ہیں وہ بلا ضرورت ایسا کر رہے ہیں۔میں اس حیثیت کا نہیں کہ وہ مجھ پر تبصرے کریں۔
ان کے سیاست میں سرگرم ہونے سے آر جے ڈی کے سینئر لیڈر تیجسوی پرساد یادو کوملنے والے چیلنج پر کہا کہ وہ لالو جی کے بیٹے ہیں۔ ان کے والدین نے 15 سال بہار میں حکومت چلائی ہے۔ تیجسوی خود اپوزیشن لیڈر ہیں۔ میںتو ایک مبتدی ہوں۔ ابھی میں لوگوں کے پاس جا کر سیکھنا چاہتا ہوں۔
انتخابی حکمت عملی ساز نے کہا کہ بہار میں جے پی تحریک کے بعد کوئی سیاسی سماجی تحریک نہیں چلی ریاست میںجولوگ حکومت چلا رہے ہیں وہ بھی اسی تحریک کے پروردہ ہیں، اس لیے ہماری کوششوں کوسابقہ تحریک کے ساتھ جوڑنا درست نہیں ہے۔ ہم لوگ بہت چھوٹے ہیں۔ہوسکتاہے کہ میں ہار جاؤں، لیکن ہماری کوششوں میں کوئی کمی نہیں آئے گی۔
انہوں نے کہا کہ ریاست میں پچھلی دو حکومتوں کے دور میں جو تبدیلیاں آنی چاہیے تھیں وہ نہیں آئیں۔ ان کی کوشش ہے کہ بہار کو سرفہرست ریاستوں میں شامل کیا جائے۔