ٹیگور نے ادب کے ہر صنف و شعبہ میں طبع آزمائی کی:ڈاکٹر ریحان غنی

پٹنہ:وزارت فن وثقافت، حکومت ہند کی اسپانسر شپ اور مولانا آزاد ہیومینیٹرین ریسرچ فائونڈیشن کی کو اسپانسرشپ میں مشہور سماجی و ادبی ادارہ ’سالویشن‘ کے زیراہتمام اتوار کو اے این سنہا انسٹی چیوٹ، پٹنہ میں ’’ہندوستانی فن و ثقافت میں ربیندرناتھ ٹیگور کی خدمات‘‘ کے موضوع پر یک روزہ قومی سیمینار کا انعقاد کیا گیاجس میں ملک بھر سے دانشوران و مفکرین نے اپنے خیالات اظہارکیا۔

‘سالویشن’ کے زیراہتمام منعقد یک روزہ قومی سیمینار سے ملک بھر کے دانشوران و مفکرین کا اظہار خیال

افتتاحی اجلاس کی صدارت سابق پٹنہ یونیورسٹی کی سابق صدر شعبہ بنگلہ پروفیسر ممتا داس شرما نے کی۔ انہوں نے اپنے صدارتی خطاب میں کہا کہ ربیندر ناتھ ٹیگورکے اعلی افکار و نظریات کی معنویت موجودہ دور میں زیادہ بڑھ گئی ہے۔ وہ امن و انسانیت کے مضبوط علمبردار تھے۔ محبت اور انسانیت ہی ان کا اصل مذہب تھا۔ جنہوںنے اپنے نظریہ سے ملک کو تعمیر و ترقی نئی راہ دکھائی۔ انہوںنے کہا کہ بنگال کے باہر ٹیگور کو سب سے پہلے بہار ریاست میں اعزاز ملا۔ جب وہ مظفرپور اپنی بیٹی سے ملنے کے لئے پہنچے تو یہاں کے لوگوں نے پرجوش استقبا ل کیا تھا۔ وہ کئی مرتبہ بودھ بھی آئے کیونکہ وہ گوتم بودھ سے بہت متاثر تھے۔ انہوں نے کہا کہ شانتی نیکیتن کے قیام کے سلسلے میں اپنی ٹیم کے ساتاھ ٹیگور مارچ1936 میں پہلی مرتبہ پٹنہ آئے اور ایک دن میں تیار الفنسٹن سنیما ہال میں اپنے مشہور ڈرامہ کی نمائش کی۔ انہوںنے اپنی شاعری کے حوالے سے ہندوستان کی تہذیب کو ثقافت کو نئی جہت عطا کی۔

ٹیگور ہماری وراثت کا وہ اہم حصہ ہیں جن پر پورے ملک کو ناز ہے:امتیازکریمی

اس موقع پر اپنے خیالات کا اظہار کرتے ہوئے بہار پبلک سروس کمیشن کے رکن امتیاز احمد کریمی نے کہا کہ ٹیگور ہماری وراثت کا وہ اہم حصہ ہیں جن پر پورے ملک کو ناز ہے۔ وہ ایشیا میں واحد شخص تھے جنہیں ادب کے نوبل انعام سے نوازا گیا۔ انہوں نے ہندوستانی ادب کی عظمت کا لوہا پوری دنیا میں منوایا جو ہمارے لئے باعث فخر ہے۔ ٹیگورکی عظمت کا اندازہ اس سے لگایا جاسکتا ہے کہ نہ صرف ہندوستان بلکہ بنگلہ دیش اور سری لنکا نے بھی ان کی تحریر کردہ نظم کو اپنا قومی ترانہ بنایا۔گھر کے لوگ انہوں بیرسٹر بنایا چاہتے تھے اور اس کے لئے انہیں لندن بھیج دیا لیکن انہوں نے قانون کی پڑھائی نا پسند کرکے ادب و ثقافت کو ترجیح دی اور اس کے لئے ان روح تڑپتی رہی۔

سیمینار میں ابتدائی کلمات پیش کرتے ہوئے سالویشن کے جنرل سکریٹری ڈاکٹر محمد انظار عام نے تمام مہمانوں کا استقبال کیا اور سیمینار کے اغراض ومقاصد پر تفصیل سے روشنی ڈالتے ہوئے کہا کہ 2005 میں رجسٹرڈ یہ ادارہ سالویشن نے تعلیم و تحقیق کو اپنا بنیادی موضوع بنا کر گراس روٹ سطح پر منظم طریقے سے کام شروع کیا جس کے تحت کوچنگ سنٹرکے قیام کے ساتھ عملی اقدامات شروع ہوئے۔ کارواں جب آگے بڑھا تو ادارہ نے تعلیم و تجارت کو فروغ دینے کے لئے موثر اقدامات کئے اور طلباء و طالبات کی صحیح وقت پر صحیح رہنمائی کا اہم کردار اداکیا۔ انہوں نے کہا کہ غربت و ناخواندگی وراثت نہیں بلکہ غفلت کا معاملہ ہے اور اس جمود کو توڑنا سالویشن کا مشن ہے۔ نوبل انعام یافتہ پروفیسر امرتیہ سین نے بھی کہا ہے کہ عدم بیداری کے سبب غربت و ناخواندگی کا غلبہ ہے۔ ڈاکٹر انظار عالم نے کہا کہ صرف نوکری پر انحصار کرنا قطعی درست نہیں بلکہ تعلیم کے بعد تجارت کی طرف توجہ دینا اور اسے فوقیت دینا زیادہ مفید ہے۔ مرکزی حکومت کی جانب سے کئی بڑے منصوبے چلائے جارہے ہیں جس کے تحت ایم ایس ایم ای اور این ایس ڈی سی کی جانب سے انٹرپرینیورشپ کے لئے صرف دوہفتے کا کورس کرواکر تربیت دی جاتی ہے اور ان کی اسناد کی بنیاد پر دو کروڑ روپئے تک کا قرض اپنی تجارت کے لئے دیا جاتا ہے جس میں 25 لاکھ روپئے تک تک قرض کوئی اشیاء گروی رکھے بغیر دیا جاتا ہے اس کے لئے ضلع صنعتی مرکز میں درخواست دے کر رجسٹریشن کروانا ہوتا ہے۔ گجرات اور ہریانہ ریاست میں مرکزی کے ان منصوبوں خاص کر وزیراعظم خودروزگار منصوبہ سے سبھی طلباء و نوجوان بڑے پیمانے پر فائدہ اٹھا رہے ہیں اور تجارت سے منسلک ہوکر نہ صرف اپنی مالی تنگی دورکررہے ہیں بلکہ تیز رفتار ترقی کی راہ پر گامزن ہیں۔ مگر بہار میں ان منصوبوں سے استفادہ نہیں کیا جارہا ہے۔ جس کی اصل وجہ بیداری کا فقدان ہے۔ اصول و ضابطے کی پابندی اور تجارت کا معیار بھی لازم ہے۔ بنیادی تعلیم پر توجہ دی جانی چاہئے خاص طور سے زبان پر توجہ پہلی ضرورت ہے۔

سینئر صحافی ڈاکٹر ریحان غنی نے سیمینار سے خطاب کرتے ہوئے کہا کہ ٹیگور نے ادب کے ہر صنف و شعبہ میں طبع آزمائی کی۔ ان کے تمام مجموعہ اور کتابوں کے ترجمے اردو زبان میں بھی ہوئے۔ ان کی تخلیقات میں کمزور و محروم اور محنت کش طبقہ کا درد و غم نمایاں تھا۔ وہ ایک زمیندار خاندان میں پیدا ہوئے لیکن اس کے باوجود زمینداروں کے خلاف اس قدر علم بغاوت بلند کیا جس کی ادبی دنیا میں کوئی نظیر نہیں ملتی۔

کلیدی خطبہ پیش کرتے ہوئے بہار یونیورسٹی مظفرپور کے شعبہ ہندی کے پروفیسر پرمود کمار نے کہا کہ ٹیگور عالمی امن و بھائی چارہ کے عظیم علمبردار تھے جنہوں نے 1870 میں پہلی مرتبہ ہندوستانی تہذیب پر اس اقدر توجہ دی کہ ان کے نتیجے میں ایک مضبوط تحریک پیداہوئی۔ انہوںنے کہا کہ ٹیگور قومیت کے حامی تو ضرور تھے مگر انسانیت کے حدود سے تجاوز کرنے والی قومیت کے شدید مخالف تھے۔ امریکہ اور جاپان میں بھی انہوں نے اس موضوع پر بہت موثر انداز میں پوری دنیا کو اپنا پیغام دیا۔ ٹیگور کا ماننا تھا کہ جہاں محبت ختم ہوجائے وہاں سے ہندوستانی سماج تباہی کی راہ پر چلا جائے گا۔ گیتانجلی میں انہوںنے محبت کا انسانیت کا جو پیغام دیا ہے وہ آفاقی ہے۔ انہوںنے اپنی تخلیقات کے توسط سے ملک و دنیا کی بہترین رہنمائی کی اور دھرم نہیں کرم کی بنیاد پر ہندوستانی تہذیب و ثقافت کے لئے پوری زندگی جدوجہد جاری رکھی۔

مولانا مظہرالحق عربی و فارسی یونیورسٹی کے سابق پرووائس چانسلر پروفیسر توقیر عالم نے کہا کہ اپنی تمام تخلیقات کا مرکز ٹیگور نے عوامی زندگی کو بنائے رکھا اور یہی ان کی بڑی خوبی تھی۔ ٹیگور اپنے آپ میں آندولن تھے۔ اپنی خوبصورت نظم تاج محل اور شاہ جہاں کے حوالے سے ٹیگور نے موت کی شکست فن کی فتح کا بہترین نقشہ کھینچا ہے۔

امارت شرعیہ بہار، جھارکھنڈ و اڑیسہ کے قائم مقام ناظم مولانا شبلی القاسمی نے کہا کہ ٹیگور کے افکار و نظریات کی معنویت پہلے سے زیادہ آج بڑھ گئی ہے جہاں سسکتی انسانیت کو ٹیگور کے نظریہ کی شدید ضروت ہے۔ ملک کے حالات کو بہتر بنانے اور نئی نسل کی رہنمائی کرنے میں ٹیگور کی فکریں معاون ثابت ہوںگی۔

سینئر صحافی احمد جاوید نے سیمینار سے خطاب کرتے ہوئے ٹیگور کو معلم الہند قرار دیا اور کہا کہ ان کے افکار و نظریات پر بڑی تحقیق کی ضرورت ہے اور اس سے استفادہ موجودہ دور میں بے حد ضروری ہے۔ ٹیگور نے جدید ہندوستان کی دریافت وتشکیل میں بنیادی کردار اداکیا۔ انہوںنے اتحادفکروعمل کا بڑا پیغام دیا۔

مشہور اسکالرپروفیسر شکیل احمد قاسمی نے کہا کہ ٹیگور نے اپنی عمدہ ومعیاری تخلیقات سے پوری دنیا کو متاثر کیا۔ 1913 میں نوبل انعام ملنے کے بعد ان کی شخصیت و خدمات کے اعتراف کا سلسلہ شروع ہوا۔ اگر آج ٹیگور موجود ہوتے تو تریپورہ واقعہ کے احتجاج میں حکومت کو اپناایوار ڈ واپس کردیتے جس طرح 1919 میں انہوںنے انگریزی حکومت کو’سر‘ کا خطاب واپس کردیا تھا۔

سیمینار سے خطاب کرنے والوں میں پروفیسر حامد علی خان،پروفیسر صفدرامام قادری، ڈاکٹر محمد مظہرحسین، ڈاکٹر محمد اجمل،ڈاکٹر ساگر سرکار،ریسرچ اسکالرسبحان عثمانی، ڈاکٹر محمد مرتضی کے نام قابل ذکر ہیں۔

اس موقع پر موجود لوگوں میں پروفیسر آفتاب عالم، اثر فریدی، شکیل سہسرامی، محمد نوشاد انصاری، ڈاکٹر انوارالہدی کے نام قابل ذکر ہیں۔

اس پروگرام آغاز حافظ و قاری محمد حسنین کی تلاوت کلام پاک سے ہوا۔ جبکہ نظامت کے فرائض یعقوف اشرفی نے انجام دیئے۔