قربانی کے احکام قرآن و سنت کی روشنی میں

(1) قائم ہو جاؤ اپنے باپ ابراہیم کی ملت پر۔ اللہ نے پہلے بھی تمہارا نام مسلم رکھا تھا اور اس قرآن میں بھی تمہارا یہی نام ہے، تاکہ رسول تم پر گواہ ہوں اور تم لوگوں پر گواہ بنو…۔(الحج:۷۸) اس آیت میںاللہ تعالیٰ نبیﷺ کو حکم دے رہا ہے کہ اپنے باپ ابراہیم کے طریقے کو اپنا لو۔یعنی مسلم(اللہ کے فرماںبردار اور تابع دار بن جاؤ)اللہ نے پہلے بھی اپنے نیک اور صالح بندوں کا نام مسلم رکھا تھا اور اب قیامت تک اُس کے نیک اور صالح بندے خود کو مسلم کے نام سے ہی پہچانے جائیں گے۔دوسری بات یہ کہ ابراہیم علیہ السلام نے اللہ کی خوشنودی کی خاطر ہر طرح کی قربانیاں دی تھیں، اس لئے اب ہر مسلم کی ذمہ داری اور فرض ہے کہ اللہ کی خوشنودی کی خاطر زندگی میں ہر طرح کی قربانی دینے کے لئے تیار ہو جائے۔جو ایسا نہیں کرتا وہ مسلم نہیں بن سکتا ہے۔ دنیا جانتی ہے کہ قربانی کے بغیر کوئی فرد یا قوم دنیا میں ترقی نہیں کر سکتا ہے۔اس قربانی کے حکم میں جان کی قربانی بھی شامل ہے۔ابراہیم علیہ السلام نے اپنے بیٹے کی قربانی دی تھی،اللہ نے بیٹے کو بچا لیا اور مینڈھے کی قربانی دے دی۔یعنی اب ہر مسلمان ابراہیم علیہ السلام کے طریقے پر چلتے ہوے عید اضحی میں جانور کی قربانی دے۔

(2) نہ ان کے گوشت اللہ کو پہنچتے ہیں نہ خون،مگر اُسے تمہارا تقویٰ پہنچتا ہے۔اُس نے ان کو تمہارے لئے اس طرح مسخر کیا ہے تاکہ اُس کی بخشی ہوئی ہدایت پر تم اُس کی تکبیر کرو اور اے نبی ﷺ بشارت دے دو نیکو کار لوگوں کو ۔(الحج:۳۷)اس آیت میں بتایا گیا کہ تم جس جانور کی قربانی کرتے ہو وہ جانور اللہ تک نہیں پہنچتا ہے بلکہ تمہارے تقویٰ یعنی اللہ کا جو ڈر ہے وہ پہنچتا ہے۔جس آدمی کے اندر اللہ کا ڈر نہیں ہے، اُس کی قربانی ایک رسم تو بنتی ہے لیکن اللہ جس قربانی کو پسند کرتا ہے وہ نہیں ہوتی ہے۔ہر قربانی کرنے والے کو اپنے اندر پہلے تقویٰ پیدا کرنا چاہئے۔
(3) نبی کریم ﷺنے فرمایا کہ جس شخص کو (قربانی کی) وسعت ہو او ر وہ قربانی نہ کرے تو وہ ہماری عید گاہ کے قریب نہ پھٹکے۔(ابو داؤد)کہا جا رہا ہے کہ جو آدمی قربانی کرنے کی طاقت رکھتا ہو وہ عید اضحی میں قربانی ضرور کرے۔ اگر وہ ایسا نہیں کرتا ہے تو اُس کو عید اضحی کی نماز پڑھنے کی بھی ضرورت نہیں ہے، کیونکہ وہ نبیﷺ کا نافرمان ہے اور نبیﷺ کا نافرمان مسلم ہو ہی نہیں سکتا ہے۔
(4) نبی کریم ﷺنے فرمایا کہ قربانی کے دن اللہ کے نزدیک آدمی کا سب سے محبوب عمل خون بہانا ہے۔قیامت کے دن قربانی کے جانور اپنی سینگوں، بالوں اور کھروں کے ساتھ آئیں گے۔ قربانی کا خون زمین پر گرنے سے پہلے قبولیت کا درجہ حاصل کر لیتا ہے، اس لئے خوش دلی کے ساتھ قربانی کرو۔(ترمذی)کہا جارہا ہے کہ عید اضحی کے دن جانور کی قربانی کرنے سے زیادہ اللہ کے نزدیک کوئی محبوب عمل ہے ہی نہیں۔رسول اللہﷺ دس سال مدینہ میں رہے اور ہر سال قربانی کرتے رہے۔
(5) نبی کریم ﷺنے فرمایا کہ قربانی کرنے والے کو قربانی کے جانور کے ہر بال کے بدلے نیکی ملے گی۔ (ترمذی) اس حدیث سے معلوم ہو رہا ہے کہ قربانی کتنا عظیم عمل ہے۔
(6) نبی کریمﷺ نے فرمایا کہ جس نے نماز عید سے پہلے قربانی کر لی تو اُس نے اپنی ذات کے لیے جانور ذبح کیا اور جس نے نماز کے بعد قربانی کی اُس کی قربانی پوری ہوئی ۔ اُس نے مسلمانوں کی سنت کو پا لیا۔(بخاری)
(7) نبی کریمﷺ نے فرمایا کہ جس نے نماز عید سے پہلے قربانی کر لی ، و ہ دوبارہ قربانی کرے۔(بخاری)
ان حدیثوں میں کہا جارہا ہے کہ قربانی نماز کے بعد کرنی ہے۔اگر کسی نے جان بوجھ کر یا غلطی سے نما ز سے پہلے قربنی کر لی تو اُس کی قربانی نہیں ہوئی۔اُسے پھر سے قربانی کرنی ہوگی۔رسول اللہﷺ کے زمانے میں پوری بات نہیں جاننے کی وجہ سے کچھ لوگوںنے ایسا کیا تھا، لیکن اب کوئی بھی سچا مسلم نماز سے پہلے قربانی نہیں کرتا ہے۔اگر کوئی ایسا کرے تو وہ قربانی کی نیت سے نہیں گوشت کھانے کی غرض سے قربانی کر رہاہے۔
(8) نبی کریم ﷺ نے فرمایا کہ قربانی کا گوشت تین ن سے زیادہ نہ کھایا کرو۔(یہ حکم اُس وقت کے لئے تھا جب مسلمان مفلس تھے)(بخاری)
(9) جب اگلے سال (قربانی کا دن آیا تو) صحابہ نے عرض کیا کہ کیا ہم لوگ پچھلے سال کی طرح کریں؟ نبی کریمﷺ نے فرمایا ؛نہیں وہ ایسا سال تھا جب لوگ سخت ضرورت مند تھے تو میں نے چاہاکہ (قربانی کا گوشت )اُن میں پھیل جائے۔ (مسلم)
شروع میں مسلمان تنگی کا شکار تھے اور مفلس تھے اس لئے حکم دیا گیا کہ قربانی کا گوشت کھانے کے ساتھ بانٹو بھی جمع کر کے مت رکھو۔آگے کی حدیث بتا رہی ہے کہ جب خوش حالی آ گئی تو پھر یہ پابندی ختم کر دی گئی۔اس زمانے میں دولت مند مسلمان یہ کرتے ہیں کہ کھانا ہو تو بکرا ذبح کریں گے اور بانٹنا ہوتو بڑا جانور کریں گے۔یہ نیت کی خرابی اور اللہ کی راہ میںاُس کے ضرورت مند بندوں پر خرچ کرنے میں بخیلی ہے۔اللہ تعالیٰ بخیل بندے کو پسند نہیں کرتاہے۔
(10) نبی کریم ﷺ نے فرمایا کہ صرف دو دانت والی (یعنی ایک سال والی)بکری کی قربانی کرو۔ (بخاری)
قربانی کے لے دتا ہوا یعنی ایک سال کا جانور ہونا ضروری ہے۔اگر جانور کا ایک سال نہ ہوا ہو اور وہ دیکھنے میں ایک سال کا لگ رہا ہو تو اُس کی قربانی بھی ہو جائے گی۔شریعت اس کی اجازت دیتی ہے۔
(11) عبد الرحمن ؓبن عوف نے کہا:نبی کریم ﷺ نے فرمایا کہ جب عشرہ ذو الحجہ شروع ہو جائے اور تم میں سے کوئی شخص قربانی کرنے کا ارادہ کرے تو وہ اپنے بالوں اور ناخنوں کونہ کاٹے۔(مسلم)
کہا جارہا ہے کہ عید کا چاند نکل جانے کے بعد قربانی کرنے والا اپنی داڑھی اور ناخن نہ بنائے۔بظاہر معلوم ہوتا ہے کہ یہ شرط قربانی کرنے والے کے لئے ہے۔قربانی نہیں کرنے والے کے لئے نہیں۔موجودہ حالات میں جو لوگ اس شرط کو ادا کرنے کی ہمت نہیں رکھتے وہ اس رعایت سے فائدہ اٹھا سکتے ہیں۔
(12) ایک صحابی دو مینڈھوں کی قربانی کرتے تھے۔ ایک نبیﷺ کی طرف سے اور دوسرا اپنی طرف سے۔ اُن سے پوچھا گیا تو اُنہوں نے بتایا کہ مجھے اسی کا حکم نبی اکرمﷺنے دیا ہے اس لئے میں اس کو کبھی نہیں چھوڑوں گا۔ (ترمذی)
یہ حدیث بتا رہی ہے کہ جب نبی ﷺ دنیا سے رخصت ہو گئے تب بھی اُن کی محبت میں اُن کے صحابی اُن کی طرف سے قربانی کیا کرتے تھے۔اس سے دو باتیں ثابت ہوتی ہیں۔ایک یہ کہ مرحوم کی طرف قربانی کی جاسکتی ہے ، دوسرے یہ کہ محبت رسولﷺ کی نشانی ہے کہ اُن کی طر ف سے قربانی کی جائے۔لیکن یہ عمل مالدار لوگ کر سکتے ہیں۔ غریب اور نادار لوگ ایسا نہیں کر سکتے ہیں۔محبت رسول کے دوسرے طریقے بھی ہیں۔
(13) بعض اہل علم نے میت کی طرف سے قربانی کی رخصت دی ہے اور بعض لوگ میت کی طرف سے قربانی کو درست نہیں سمجھتے ہیں۔ کچھ کہتے ہیں کہ یہ بات زیادہ پسندیدہ ہے کہ میت کی طرف سے قربانی نہ کر کے رقم صدقہ کر دی جائے۔اگر قربانی کی جائے تو اس میں سے کچھ بھی خود نہ کھائے۔(ترمذی)
(14) نبیﷺ نے ایک مینڈھے کی قربانی کی اور فرمایایہ میری امت کے اُن لوگوں کی طر ف سے ہے جنہوںنے قربانی نہیں کی ہے۔(ترمذی) عبد اللہ بن مبارک اور دوسرے اہل علم کا کہنا ہے کہ ایک بکری کی قربانی ایک ہی آدمی کی طرف سے کفایت کرے گی۔اس حدیث میں آگے یہ بھی کہا گیا ہے کہ شروع میں جب مفلسی کا دور تھا تو قربانی ایسے ہی ہوتی تھی۔ پھر جب خوش حالی آ گئی تو نام و نمود کے لئے قربانی زیادہ کی جانے لگی۔ابھی بھی غریب آدمی گھر میں ایک قربانی کر لے تو اللہ تعالیٰ سارے گھر والوں کو اُس کا اجر دے گا۔لیکن مالداروں کو ایسا نہیں کرنا چاہئے۔نادار لوگوں کو بکرے کا گوشت کھانے کو نہیں ملتاہے۔مالدار لوگوں کو زیادہ سے زیادہ بکرے کی قربانی کر کے مفلس ضرورت مندوں کو گوشت بانٹنا چاہئے۔ہر گھر کو اتنا گوشت بھیجنا چاہئے کہ وہ کم سے کم ایک وقت بکرے کے گوشت کا کھانا کھالے۔
(15) نبی کریم ﷺنے فرمایا کہ جو جانور کا لنگڑا ہو، اندھا ہو،بیمار ہو یا لاغر اور کمزورہو اُس کی قربانی نہ کرو۔ (ترمذی)
قربانی کا جانور دراصل اللہ کے حضور ایک تحفہ ہے۔تحفہ اچھی چیز دی جاتی ہے۔گھٹیا اور عید دار چیز تحفہ نہیں دی جاتی ہے۔ اس لئے کہا جارہا ہے کہ قربانی کا جانور ہر طرح سے صحت مند اوراچھا ہونا چاہئے۔
(16) نبیﷺنے عید الاضحیٰ کے دن دو مینڈھوں کی قربانی کی اور جس وقت ان کا منہ قبلے کی طرف کیا تو اُس وقت فرمایا:’’میں اپنا رخ اُس ذات کی طرف کرتا ہوں جس نے آسمانوں اور زمین کو پیدا کیا، اور میں شرک کرنے والوں میں سے نہیں ہوں۔ بیشک میری نماز، میری قربانی، میرا جینا اور میرا مرنا سب اللہ ہی کے لیے ہے جو سارے جہان کا رب ہے، جس کا کوئی شریک نہیں ہے۔اور مجھے اسی کا حکم دیا گیا ہے، اور میں سب سے پہلے اس کے تابعداروں میں سے ہوں۔ اے اللہ یہ قربانی تیری ہی طرف سے ہے اور تیرے ہی لئے ہے، محمد اور اس کی امت کی طرف سے اسے قبول فرما۔‘‘(ابن ماجہ)یہ ابراہیم علیہ السلام کی وہ دعا ہے جب اُنہوں نے سورج چاند اور تارے کو دیکھ کر اللہ کو پا لیا تھا اور اللہ کی مکمل فرماں برداری کا عہد اور اعلان کیا تھا۔نبی ﷺ نے اسی دعا کو قربانی کی دعا اور نماز کی نیت بنانے کا حکم دیا ہے۔یہ دعا صرف زبان سے نہیں کرنی ہے بلکہ جو کچھ اس میں کہا جارہا ہے قربانی کرتے ہوئے ایسی نیت اور پکا ارادہ بھی ہونا چاہئے
(17) صحابہ روایت کرتے ہیں کہ حدیبیہ کے موقع پر اونٹ اور گائے کو سات آدمیوں کی طرف سے نحر(ذبح) کیا گیا۔اسحاق بن راہویہ کہتے ہیں کہ اونٹ دس آدمیوں کی طرف سے بھی کفایت کر جائے گا۔(ترمذی)
اس حدیث سے یہ مسئلہ سامنے آتا ہے کہ بکرے یا مینڈھے کی قربانی صرف ایک آدمی کی طرف سے کی جائے گی لیکن گائے اور اونٹ کی قربانی سات آدمیوں کی طرف سے اور اونٹ کی قربانی د س آدمیوں کی طرف سے بھی ہوسکتی ہے۔
(18) علی ؓنے کہا کہ گائے کی قربانی سات آدمیوں کی طر ف سے کرو۔حجیہ نے پوچھا اگر اُس کے پیٹ سے بچہ نکلے تب ؟ اُنہوںنے کہا گائے کے ساتھ اُس کو بھی ذبح کر دو۔(ترمذی)
(19) نبیﷺ نے فرمایا اگر بکری یا گائے کی قربانی کے بعد اُس کے پیٹ سے مردہ بچہ نکلے تو چاہو تو اُسے کھالو۔ جانور کی قربانی کرنے میں اُس بچہ کی قربانی بھی شامل ہے۔(ابو داؤد)
خریدے ہوئے مادہ جانور کے متعلق اندازہ نہیں ہوتا ہے کہ اُس کے پیٹ میں بچہ ہے یا نہیں۔اگر قربانی کے بعد بچہ نکل جائے تو کہا جارہا ہے کہ اُس کا کھانا حلال ہے۔جیسے جانور کی کلیجی ،پھیپھڑا اور دوسری چیزیں بڑے شوق سے کھائی جاتی ہیں۔ لیکن کسی کی طبیعت مانوس نہ ہواوروہ نہ کھائے تو اس پر کوئی گناہ بھی نہیں ہے۔صارمؔ قربانی کے متعلق کہتے ہیں:

قربانیوں کے بعد ہی آتی بہار ہے
قوموں کی زندگی کا یہی کارو بار ہے
بے جان بے وقار ہے انساں کی زندگی
قربانیوں کے دم سے ہی نقش و نگار ہے
قربانیوں سے اپنے سلف نامور بنے
محرومیوں کے ساتھ خلف بے وقار ہے