نامور صحافی، ملّی قائد اور کئی اْردو اور انگریزی کتابوں کے مصنف خورشید انوار عارفی کا لندن میں انتقال

پٹنہ: نامور صحافی، ملّی قائد اور کئی اْردو اور انگریزی کتابوں کے مصنف خورشید انوار عارفی کا مختصر علالت کے بعد کل رات لندن میں انتقال ہو گیا۔ مرحوم علاج ومعالجہ کے سلسلے میں چندماہ قبل اپنی اہلیہ کے ساتھ لندن میں اپنے صاحبزدگان کے پاس تھے۔ان کی عمر تقریباً 88سال تھی۔اس مہینے فروری کے آخری ہفتہ میں انکا پٹنہ واپسی کا ارادہ تھا۔22فروری کو اچانک طبیعت زیادہ خراب ہوگئی اوراللہ کے پیارے ہوگئے۔لندن وقت کے مطابق 23فروری کوبعد نماز ظہرتدفین عمل میں آئے گی مرحوم سادہ لوح اور ملنسار شخصیت کے حامل تھے۔ ملّت کی فکر اور اْنکے مسائل کے حل پر ہمیشہ عمل پیرا رہنا اْنکی شخصیت کا ایک اہم جزو تھا۔ملک کے معروف صحافی اوردانشور جناب خورشید انوار عارفی کے انتقال کی خبر نے شہر عظیم آباد اورپٹنہ کی علمی فضا کو سوگوار کردیا،خورشید انوار عارفی اردو وانگریزی زبان وادب اور صحافت کے بنیادی ستونوں میں تھے۔ مرحوم بحیثیت مصنّف اْردو اور انگریزی دونوں زبانوں میں دس سے زائد تصنیفات کو منظر عام پر لائے۔ اْردو کتابوں میں "سفر و سیلہ ظفر”، "میرے شب و روز”، "مومن تحریک اور مومن انصار برادری” بہت مقبول ہوئے۔ انگریزی میں اْنکی کتاب میں "ڈاکٹر جگن ناتھ مشرا (Dr Jagannath Mishra)”، "گجرات – قوم پر ایک دھبہ (Gujarat,- Blot on the Nation)” اور "انڈیا – آ نیشن ان ترموئل (India – A Nation in Turmoil) ") ” بہت مقبول ہوئے ۔

ا ے نیشن ان ٹرموائل (India – A Nation in Turmoil) ” کا اردو ترجمہ معروف افسانہ نگار ذکیہ مشہدی نے”ہندوستان – انتشار کے بھنور میں ” کی شکل میں کیا تھا ۔ انکی ایک اور کتاب سبھی مرحلوں سے گزر کر اسی ماہ اجراء ہونا تھا۔ان کی وفات نہ صرف زبان وادب کا بڑا خسارہ ہے؛بلکہ ملت کا بھی ایک بڑا نقصان ہے۔مسٹر عارفی ملی کاموں میں ہمیشہ پیش پیش رہنے والوں میں تھے،تمام ملی تنظیموں اوراداروں سے ان کا قلبی تعلق اورگہرا ربط رہاہے۔ امارت شرعیہ، جمعیت علماء، جماعت اسلامی کے ساتھ بھی انکا لگاؤ رہا۔ بطور خاص ملی کونسل سے گہرا تعلق رکھتے تھے،وہ ملی کونسل سے حضرت قاضی مجاہدالاسلام قاسمی کے زمانہ سے بھی وابستہ رہے۔۔مرحوم کی پیدائش 1934 میں ہوئی۔ انہوں نے صحافت کا آغاز پٹنہ کے ایک اْردو روزنامہ سے 1957 میں کیا۔ ایک ہفت روزہ اخبار "صدائے ہند” کا اجراء1963 میں اپنی ادارت میں کیا۔ ساتھ ہی مومن کانفرنس کے ترجمان پندرہ روزہ "المؤمن” کی ادارت کی ذمہ داری بھی سنبھالی۔ دہلی کے مقبول ہفت روزہ "عوام” کے مستقل کالم نویس رہے۔

مولانا وحید صدیقی کی ذاتی خواہش پر انکے ہفت روزہ "نئی دنیا” میں بھی مستقل مضامین لکھتے رہے۔ پاکستان کے مقبول روزنامہ "مشرق” لاہور میں مسلّسل دو برسوں تک "مکتوب بھارت” کالم لکھتے رہے۔ لندن سے شائع کردہ جریدہ "مساوات” ہفتہ روزہ کے دہلی کے نامہ نگا ر رہے۔ 1980 سے دہلی سے پندرہ روزہ با تصویر نیوز میگزین "معاملات” اپنی ادارت میں نکا لتے رہے۔وہ پسماندہ مسلمانوں کی پسماندگی کو دور کرنے کیلئے آخری وقتوں تک پیش پیش رہے۔ ہارون نگر پٹنہ واقع ڈاکٹر عثمان غنی گرلز انسٹی ٹیوٹ کے بانیوں میں مرحوم بھی شاملِ تھے اور وہ بحیثیت چیئرمین انسٹی ٹیوٹ کی خدمت انجام دیتے رہے۔ عثمان غنی گرلز انسٹی ٹیوٹ میں مرحوم کے لیے تعزیتی نشست میں امارت شرعیہ کے ناظم مولانا شبلی قاسمی صاحب، انسٹی ٹیوٹ کے سیکرٹری انعام خان، وائس چیئرمین محمد نوشاد انصاری، عرفان اور اساتذہ میں روپا شرما، نزہت صاحبہ، روبی نشاط صاحبہ اور نْور صاحب نے مرحوم کے خدمات کو نم آنکھوں کے ساتھ یاد کیا اور مرحوم کے ایصال ثواب کے لئے خصوصی دعا کا اہتمام کیا گیا۔ مرحوم کے پسماندگان میں انکے بھائی ہارون انور عارفی، ریٹائرڈ آئی ایایس، نہال انور عارفی، دو صاحبزادے، ضیاء عارفی (لندن)، عمران عارفی (لندن)، بیٹی فرح عرفی (کلکتہ) اور حنا عارفی (امریکہ) شامل ہیں۔ وہ بالکشن گنج گھیرا عالم گنج میں رہتے تھے۔ مگر حال کے دنوں میں وہ منہاج نگر واقع ایک اپارٹمنٹ میں شفٹ کر گئے گئے تھے۔

چیف سکریٹری رینگ سے سبکدوش آئی اے ایس آفیسر ڈاکٹر ایم اے ابراہیمی نے اپنے تعزیتی پیغام میں کہا کہ خورشید انوار عارفی سے کافی قریب تھا۔ میں ان کے بھائی جناب ہارون عارفی، IAS (ریٹائرڈ/AGMUT) کے بھی قریب ہوں۔ ان کے بچے خاندان میں شادی شدہ ہیں اور لندن اور امریکہ میں آباد ہیں۔ خورشید عارفی صاحب مرحوم ہمیشہ سماجی خدمات میں مصروف رہتے تھے۔ اللہ تعالیٰ سے دعا ہے کہ وہ انہیں جنت الفردوس عطا فرمائے اور لواحقین کو ناقابل تلافی نقصان برداشت کرنے کی توفیق عطا فرمائے اردو مشاورتی کمیٹی کے سابق چیرمین شفیع مشہدی نے اپنے تعزیتی پیغام میں کہا کہ ملت نے ایک اھم شخصیت کھو دی اورایک بھتر ین انسان سے ھم محروم ھو گئے۔میرے ان کے ذاتی گہرے تعلقات تھے۔اللہ ان کے درجات بلند کرے۔ آمین۔ انجمن تحفظ اردو، گیا کے صدر فیاض حالی ایڈووکیٹ نے کہا کہ مرحوم عارفی نہایت نفیس انسان تھے اور اخلاقی قدروں اور سماجی تقاضوں کا خیال رکھتے تھے۔ ان کے انتقال سے ملت نے ایک اہم ترین شخصیت کھودیا ہے۔ آل انڈیا مسلم مجلس مشاورت(بہار چیپٹر) کے صدر و سابق وزیر شمائل نبی نے کہا کہ مرحوم خورشید انور عارفی صاحب مشاورت کے فعال رکن تھے اور ملّی مسائل پر سرپرستی ہمیشہ حاصل رہتی تھی۔میرے ان سے گہرے تعلقات تھے۔ ہم لوگوں نے ساتھ مل کر کئی اہم ملی کام بھی کئے ہیں۔

انسٹی ٹیوٹ آف آبجیکٹیو اسٹڈیز پٹنہ چیپٹر کے اعزازی ڈائریکٹر سید فضل رب نے بھی اپنے تعزیتی پیغام میں کہا کہ مرحوم عارفی پٹنہ کے ملی دانشوروں میں اپنی ممتاز اور منفرد حیثیت رکھتے تھے۔ انکی کتاب آئی او ایس کے بینر سے بھی چھپی ہے۔ میرے ساتھ انکے گہرے مراسم تھے۔ اللہ انکو کروٹ کروٹ جنت نصیب کرے۔ جمعیت علماء بہا ر کے ناظم نشر واشاعت ڈاکٹر انوارالہدیٰ نے کہاکہ مرحوم عارفی ہمیشہ ملی کاموں میں آگے آگے رہتے اور جب کبھی کوئی پروگرام ہوتا وہ بہ نفس نفیس موجود ہوتے۔ جمعیت کے کاز سے بھی اتفاق رکھتے تھے۔ جمعیت کے بڑے جلسوں میں انکی حاضری ہوتی تھی۔ وہ مجھ کو بہت عزیز رکھتے تھے۔ اللہ تعالیٰ انکو غریق رحمت کرے۔ انکے انتقال پر تعزیت کرنے والوں میں مظہر عالم مخدومی، ساجد پرویز، جاوید محمود، آفتاب نبی، اشرف استھانوی، حقانی القاسمی، معروف صحافی معصوم مرادآبادی، سید احمد قادری، محفوظ رشید، منصور احمد اعجازی، محمد نور عالم، مرغوب اثر فاطمی، عبد الواحد ندوی، عمران صغیر، ڈاکٹر ارشد ایس حق، حبیب مرشد خاں، ڈاکٹر ابو بکر رضوی، کانگریسی لیڈر انتخاب عالم، شکیل الرحمان، پرویز احمد، مولانا عالم قاسمی، سید محمد جلیل، شریف قریشی، اقبال شیرازی، وغیرہ کے نام شامل ہیں۔