پٹنہ: بہار اسمبلی میں پیر کے روز اسپیکر وجئے کمار سنہا اور وزیر اعلیٰ نتیش کمار کے درمیان جھگڑے کے سلسلے میں اپوزیشن کے اراکین نے بدھ کے روزبھی ہنگامہ آرائی کی ، جس کی وجہ سے لنچ بریک سے قبل ایوان میں کوئی کام کاج نہیں ہہوسکا اورایوان کی کارروائی دوبجے تک ملتوی کر دی گئی۔
بدھ کے روز ایوان کی کارروائی شروع ہونے پر اسپیکر وجئے کمار سنہا تو ایوان میں آئے لیکن وزیراعلیٰ موجود نہیں تھے۔ جیسے ہی سپیکر نے ایوان کی کارروائی شروع کرنے کا اعلان کیا ، اپوزیشن کے ارکان نے ایوان میں پیرکےروزہنگامہ آرائی شروع کردی ۔
راشٹریہ جنتا دل (آر جے ڈی) کے للت یادو نے کہا کہ پیر کے روزایوان کے لیڈر وزیراعلیٰ مسٹر کمار نے جس طرح سے پوڈئم( اسپیکر کی کرسی) کی توہیں کی اس سے پورا ایوان دلبرداشتہ ہے ۔ پوڈیم سے بتایا جائے کہ اس معاملے میں کیا ہوا۔ کیا وزیر اعلیٰ اس کا جواب دیں گے؟ اس کے بعد ہی ایوان میں کام کاج ہو سکے گا ۔

اس کے بعد اسپیکر نے اراکین کو اپنی نشستوں پر جانے کی تلقین کی اور کہا کہ وہ اس معاملے پر اپنی بات کہنا چاہتے ہیں۔ ان کی درخواست پر اپوزیشن ارکان اپنی نشستوں پر واپس آگئے۔
اسپیکر نے کہا کہ یہ 17ویں بہار قانون ساز اسمبلی کا پانچواں اجلاس ہے اور اب تک کے تمام اجلاسوں میں آپ سب کے تعاون سے ایوان صد فیصد چلا اور سوالات کے جوابات بھی صدفیصد آئے۔ یہ آپ سب کی اجتماعی کامیابی ہے، پچھلے دو تین دنوں میں سیشن کے آغاز سے لے کر اب تک جو کچھ ہو رہا ہے اس سے ہم سب واقف ہیں۔ ۔ ہم سب کو سوال کرناہے، حکومت کو جواب دینا ہے، چیئر کو آپ تمام کو تحفظ فراہم کرتے ہوئے ایوان کو چلانا یہی پارلیمانی روایت رہی ہے اور میں نے بھی اسی روایت پر عمل کیا ہے، اب جب میں اس نشست پر ہوں تو کسی معاملے میں حزب مخالف کی شدید مخالفت دیکھتاہوں اور کبھی حکومت کا جواب دیتے وقت آپا کھوتے ہوئے بھی دیکھتاہوںلیکن یہ اس نشست کی مجبوری ہے کہ اس ایوان کے ذریعے عوام کے دکھ درد کا مداوا کیا جا سکے، جو کچھ بھی ناخوشگوار باتیں ہوئی ہیں، ان پر مجھے ، ایوان کے لیڈر، قائد حزب اختلاف اور کچھ سینئر وزراءکو سنجیدگی سے سوچنا ہوگا، وزیر پارلیمانی امور نے اس تناظر میں ایوان میں اپنا بیان دیا ہے، میری آپ سب سے گزارش ہے کہ ہمیںعوامی نمائندے کے طور پر مقننہ کو مضبوط بنا کر اور انتظامی انارکی کو روک کر فرائض سرانجام دینے ہیں۔”
مسٹر سنہا نے کہا، "قائد ایوان اور قائد حزب اختلاف جمہوریت کی دو آنکھیں ہیں اور دونوں کی آنکھیں صحتمند رہیں، قابل رہیںتاکہ ہماری مقننہ مضبوطی کے ساتھ جمہوریت کے سب سے بڑے مندر میں ایمانداری سے اپنا فرض ادا کرتی رہے۔یہ ہم تمام کی خواہش ہے اور کہا بھی جاتا ہے کہ موت سے نہیں بلکہ بدنامی سے ڈرنا چاہیے، میں نے اپنی سماجی اور ذاتی زندگی اس بنیادی منتر کے ساتھ گزاری ہے، ہمیشہ سر جھکا کر لوگوں کی طرف سے ملنے والی محبت اور عزت کو قبول کیا اور کھلے دل کے ساتھ چیلنجز کو ہنسی خوشی قبول کیاہے ، جس میں آپ سب کا پیار اور آشیرواد حاصل ہوا ہے، مجھے پختہ یقین ہے کہ ہم سے پہلے یہ ملک اور ملک کا جمہوری نظام ہے، لوگ آئیں گے اور جائیں گے لیکن یہ ملک قائم رہے گا۔ میرے قول و فعل سے اس عظیم ملک کا وقار زرہ برابر بھی مجروح نہیں ہونا چاہیے۔

اسمبلی سپیکر نے کہا کہ ماضی میں جو کچھ ہوا اسے اس مقدس ایوان کے وقار کے لحاظ سے بالکل مناسب نہیں کہا جا سکتاہے، ہمارا آج کل کی تاریخ ہے اور تاریخ کا نقطہ نظر بہت تیز اور باریک ہوتاہے۔ ہمارا آج کا طرز عمل جب تاریخ کا حصہ بن جاتا ہے، تب اسے صحیح اور غلط ثابت کرنے کیلئے ہم اور آپ موجود نہیں ہوںگے ، لہٰذا اگر ہم نے موجودہ طرز عمل کو اصول و ضوابط اور وقار کی حدود میں رکھا تو آنے والا وقت ہمیں یاد رکھے لیکن ہم سے نظر چرانے کیلئے مجبور نہ ہونا پڑے۔“
مسٹرسنہا نے کہا، "سیاست ایک ایسا میدان ہے جہاں آپس کی لڑائی ہو سکتی ہے۔ مخالفین کو دوست بنانے کی کوشش کی جاتی ہے لیکن یہاں کوئی دشمن نہیں ہوتا ہے۔ سیاست کی راہوں میں پھول بھی ہیں، کانٹے بھی ہیں۔ دھول بھی ہے گلاب بھی ہے کیچڑ بھی ہے صندل بھی ہے خوبصورتی بھی ہے بدصورتی بھی ہے اس میں کوئی بھی اپنا دامن بچا کر باہر نہیں نکل سکتا ۔ یہ کاجل کی کھوٹھری ہے دامن بچا کر نکل جانا اس جمہوریت کے مندر سے ایک بڑی بات ہوگی ۔ ہمیں برائی کے کیچڑ پر پیر جما کر پھول کی طرح کھلنا ہوتا ہے ۔ ہمیں پھول کی طرح جدوجہد کا دھوپ جھیل کر اپنے علاقے کو خوبصورت بنانے کی کوشش کرنی پڑتی ہے ۔ میں نے آج تک اپنی عوامی زندگی اسی سادگی، آسانی اور صفائی کے ساتھ گزارنے کی کوشش کی ہے۔
اسمبلی اسپیکر نے کہا کہ ماضی میں جو ہوا وہ دوبارہ نہیں ہونا چاہیے، ہمیں اس عزم کو لے کر آگے بڑھنا ہے، جب ہم اور آپ نہیں ہوں گے تو ہمارے نشاںہوںگے، تب نام اور وقار کے بجائے ہماری آپ کی پہنچان ہوگی، ہم جس عظیم ایوان ہیںیہاں کی روایت بتاتی ہے کہ اگر ہم میں قبول کرنے کی ہمت اور بہتر کرنے کا عزم ہو تو انسان بہت کچھ سیکھ سکتا ہے۔ ہمارے ملک میں جمہوریت کی جڑیں اتنی گہری ہیں کہ اسے ہوا کے ہلکے پھلکے جھونکے ہلا نہیں سکتے ہیں یہ نظام ہمیں سکھاتا ہے کہ نفرت کے بغیر احتجاج ہو سکتا ہے اور تشدد کے بغیر معاشرہ بہتر ہو سکتا ہے، لہٰذا ہمیں اپنی جمہوری روایت اور آئینی نظام کو برقرار رکھتے ہوئے، ناخوشگوار واقعات سے منہ موڑ کر آگے بڑھنا ہے۔ فلاح و بہبود کے راستے پر ہم سب کو مل کر چلنا ہے۔

اخیرمیں مسٹر سنہا نے سابق وزیر اعظم اٹل بہاری واجپائی کی نظم کی سطریں سنائیں، ‘روشنی میں، اندھیرے میں، کل کچھار میں، بیچ دھار میں، شدید نفرت میں، پوت پیار میں، لمحاتی جیت میں، لمبی ہار میں، زندگی کی صد فیصد کشش ، خواہشات کو کچلنا پڑے گا۔ قدم ملا کر چلنا ہوگا۔ ۔ انہوں نے کہا کہ ان کی وزیر اعلیٰ سے بھی بات ہوئی ہے اور انہوں نے انہیں یقین دلایا ہے کہ وہ ہر حال میں مقننہ کی طاقت کو مضبوطی فراہم کریںگے ، ایم ایل اے کی ساکھ اور جمہوریت کے مندر کو گرنے نہیں دیں گے۔
اسمبلی کے اسپیکر نے کہا کہ "ہولی تہوار ہے اور ہولی کے اس تہوار پر ہم اپنے رویے کو بھول کر گلے لگ جاتے ہیں، اس کو مانتے ہوئے ہم درخواست کریں گے کہ ایوان چلے۔ ہولی کے بعد25 تاریخ کو استحقاق کمیٹی کا اجلاس ہوگا۔ اور جمہوریت کے مندر، مقننہ کو کسی قیمت پر کمزور نہیں ہونے دیں گے۔ یہ ہمارا آپ سے وعدہ ہے۔ آپ ہم پر اعتماد کرکے ایوان کو چلنے دیں۔”
آر جے ڈی کے للت یادو نے کہا کہ وزیر اعلیٰ نے چیئر اور ایوان کو داغدار کیا ہے۔ اس سے نہ صرف ملک اور دنیا ہم سب کو شدید دکھ ہوا ہے۔ سب کی خواہش ہے کہ ایوان میں اس پر بحث ہو۔ اس پر اسپیکر نے کہا کہ وزیر اعلیٰ نے ان سے کہاہیکہ ان کا ایسا جذبہ نہیں تھا ، کچھ غلط فہمی ہو گئی ۔

اپوزیشن کے ارکان اس پر بھی مطمئن نہ ہوئے اور شور مچاتے رہے۔ آر جے ڈی کے للت یادو نے کہا کہ ایوان میں اصولوں کو توڑا گیا ہے اور حکومت گول مال جواب دے رہی ہے۔ چیئر کی عزت و احترام سب سے مقدم ہے۔
اس پرا سپیکر نے کہا کہ یہ جمہوریت کا حسن ہے کہ جب بھی مقننہ کی عزت بچانے کی بات ہوتی ہے تو ہم سب متحد ہو جاتے ہیں لیکن جب کوئی تعطل آتا ہے تو مل بیٹھ کر حل کر لیتے ہیں۔ ارکان کی جانب سے بڑی محنت سے سوال آتا ہے لہٰذا اس تعطل کو بھی دور کیا جائے اور ایوان کو چلنے دیا جائے۔
شور شرابے کے درمیان نائب وزیر اعلیٰ تارکیشور پرساد نے آر جے ڈی ممبر پر طنز کرتے ہوئے کہا کہ جس طرح سے آج ہمارے ساتھی ایوان میں پریشان ہیں، لگتا ہے کہ وہ 23 مارچ 2021 کا دن بھول گئے ہیں جب اپوزیشن کے ساتھیوں نے چیئرکوکس طرح سے کو روند دیا تھا۔ وہ سیاہ دن تھا۔ اس کے باوجود ایوان چلا کیونکہ بہار کے لوگ سب سے مقدم ہیں۔ انہوں نے کہا کہ کارروائی کی اجازت دی جائے، یہ بجٹ سیشن ہے۔ حکومت چیئر کو مکمل تعاون دینے کو تیار ہے۔
ایک بار پھر آر جے ڈی کے للت یادو نے کہا کہ وزیر اعلیٰ ایوان میں آکر اس معاملے پر وضاحت پیش کریں اور ایوان سے معافی مانگیں۔ یہ چیئر اور ہاﺅس کی بھی توہین ہے۔ا سپیکر کے بار بار کہنے کے باوجود ایوان کی کارروائی نہ سنبھلنے پرا سپیکر نے 11 بجکر 24 منٹ پر ایوان کی کارروائی دوپہر 2 بجے تک ملتوی کر دی۔
وقفہ طعام کے بعد جیسے ہی اسمبلی کی کارروائی شروع ہوئی تو اپوزیشن ارکان نے شور مچانا شروع کر دیا اور اس تنازعہ پر وزیر اعلیٰ نتیش کمار سے معافی مانگنے کا مطالبہ کیا۔ اسپیکر نے مشتعل اپوزیشن ارکان سے اپنی نشستوں پر واپس آنے کی درخواست کی لیکن وہ نہیں مانے اور حکومت مخالف نعرے لگاتے رہے۔ پارلیمانی امور کے وزیر وجے کمار چودھری نے کہا کہ حکومت پہلے ہی واضح کر چکی ہے کہ ا سپیکر کا اختیار اعلیٰ ہے، کوئی بھی اسے کمزور نہیں کر سکتا۔
اپوزیشن اراکین کے ہنگامے کے درمیان، اسپیکر نے وزیر توانائی بیجندر پرساد یادو سے کہا کہ وہ اپنے محکمے کے مالی سال 2022-23 کے بجٹ ڈیمانڈ پیش کریں۔ اسپیکر کے کہنے پر وزیر توانائی مسٹر یادو نے شور شرابے کے درمیان اپنے محکمے کے 11475.97 کروڑ روپے کی بجٹ ڈیمانڈ کو ایوان میں رکھا۔
راشٹریہ جنتا دل (آر جے ڈی) کے رکن للت یادو نے کٹوتی کی تجویز پیش کی لیکن کانگریس، کمیونسٹ پارٹی آف انڈیا مارکسسٹ لیننسٹ (سی پی آئی-ایم ایل) اور دیگر اپوزیشن ارکان نے شور مچانا جاری رکھا۔ دیہی ترقیات کے وزیر شراون کمار نے کہا کہ اپوزیشن نے پہلے ہی ایوان کی وقفہ طعام سے پہلے کی کارروائی میں خلل ڈالا ہے اور اب انہیں ایوان کی طے شدہ کارروائی کو آسانی سے چلنے دینا چاہئے۔
پارلیمانی امور کے وزیر مسٹر چودھری نے کہا کہ وزیر توانائی مسٹر یادو نے اپنے محکمے کا بجٹ ڈیمانڈ پیش کیا اور آر جے ڈی کے رکن للت یادو نے کٹوتی کی تجویز پیش کی۔ انہوں نے کہا کہ دیگر اپوزیشن جماعتوں کے ارکان ایوان کی کارروائی کو خوش اسلوبی سے چلانے میں غیر ضروری طور پر رکاوٹیں پیدا کر رہے ہیں۔ا سپیکر کے بار بار کہنے کے باوجود اپوزیشن ارکان نہیں مانے اور شور مچاتے رہے۔ ایوان میں افراتفری کو دیکھتے ہوئے انہوں نے کارروائی 4:50بجے تک ملتوی کر دی۔