نتیش کمار: کچھ تو ہے جس کی پردہ داری ہے  (تحریر: ساجد پرویز)

گذشتہ روز وزیراعظم نریندر مودی کے پٹنہ میں روڈ شو کے دوران وزیراعلی نتیش کمار کے باڈی لینگوئج کو دیکھنے کے بعد نہ صرف سیاسی گلیاروں میں بلکہ عوام کے درمیان قیاس آرائیاں شروع ہوگئی ہیں۔ کچھ لوگ جہاں ایک طرف وزیراعلی کی حالت کو دیکھ کر افسوس کا اظہار کررہے ہیں تو کچھ لوگ یہ کہہ رہے ہیں کہ وہ ایک مرتبہ پھر ادھر سے ادھر ہونےوالے ہیں۔

ہمیشہ سے تندروست و توانا نظر آنے والے وزیراعلی نتیش کمار وزیراعظم کے روڈ شو کے دوران کافی مایوس نظر آرہے تھے۔اس دوران وزیراعلی کے ہاتھ میں بھارتیہ جنتاپارٹی کا انتخابی نشان دیکھ کر بھی لوگ  حیرت زدہ ہیں اور کہنے لگے ہیں کہ جنتادل یو کا قومی صدر ہونے کی۔حیثیت سے انہیں اپنی پارٹی کا انتخابی نشان یا پھر اتحاد کے پیش نظر انہیں اپنے ہاتھ میں دونوں انتخابی نشان لینا چاہئے تھا۔ کہا تو یہ بھی جارہا ہے کہ روڈ شو کےد وران وزیراعلی کے قد کو بھی کم کرنے کی کوشش کی گئی۔ بتایا جاتا ہے کہ وزیراعلی کے ہاتھوں میں جیسے ہی بی جے پی کا انتخابی نشان دیا گیا انہوں نے ایک نظر اسے دیکھا اور پھر اس کی چند سکنڈ ہی نمائش کی۔

اس روڈ شو کے دوران انہیں دیکھ کرایسا محسوس ہورہا تھا کہ یا تو وہ کھوئے کھوئے سے ہیں یا پھر ان کے ذہن  و دماغ میں کچھ کھچڑی پک رہی ہے۔

اس روڈ شو کے اگلے ہی دن بہار کے نائب وزیراعلی اور نتیش کمار کے انتہائی قریبی رفیق سوشیل کمار مودی کے انتقال کی خبر آتی ہے۔ اس دوران وزیراعلی سکریٹریٹ سے مختصر سا  پریس نوٹ  جاری کیا جاتا ہے کہ وزیراعلی کی طبیعت ناساز ہے۔ اس لئے ان کے تمام پروگرام منسوخ کردئیے گئے ہیں۔ گذشتہ 15 مئی کو وزیراعلی کی  اہلیہ کی برسی بھی تھی۔ اس موقع پر بھی پروگرام کو  منسوخ کردیا گیا۔ اسی دن سوشیل کمار مودی کی آخری رسم ادا کی جانی تھی اور وزیراعظم نریندر مودی وارانسی میں پرچہ نامزدگی داخل کرنے والے تھے جہاں اتحاد میں شامل ہونے کی حیثیت سے وزیراعلی نتیش کمار کو بھی موجود رہنا تھا ۔ وزیراعلی ہر سال اپنی اہلیہ کی برسی کے  موقع پر منعقد کئے جانے والے پروگرام میں خاص طور سے شریک ہوتے ہیں اور کنکڑ باغ میں ان کے مجسمے پر گلپوشی کرتے ہیں۔ اتنے اہم پروگرام کو منسوخ کئے جانے سے بھی کئی اہم سوالات پیدا ہوگئے ہیں۔

ایسا دیکھا گیا ہے کہ جب بھی وزیراعلی کوئی اہم سیاسی فیصلہ کرنا چاہتے  ہیں تو یا تو ان کے علیل ہونے کی خبر آتی ہے یا پھر وہ راجگیر میں تنہائی میں چلے جاتے ہیں۔

وزیراعلی عام طور پر اپنی صحت کا خاص خیال رکھتے ہیں۔ جب وہ وزیر ریل تھے تو ان کے ساتھ مجھے بھی خصوصی ٹرین میں سفر کرنے کا موقع ملا تھا ۔ اس موقع پر میں نے دیکھا کہ کھگڑیا ریلوے اسٹیشن پر کپکپاتی ہوئی سردی کے موسم میں صبح سویرےٹرین رکتی ہے اور وزیراعلی پلیٹ فارم پر ہی تقریبا ایک گھنٹے تک تیز قدموں سے مارننگ واک کرتے ہیں۔

وزیراعلی کے علیل ہونے کی خبر سے لوگوں نے یہ محسوس کیا کہ وہ شاید وزیراعظم کے پرچہ نامزدگی میں شامل ہونے سے گریز کر رہے ہیں۔ کیونکہ ایک دن کی علالت کے بعد آج ہی وہ آنجہانی سوشیل کمار مودی کی رہائش گاہ پر گئے اور ان کے اہل خانہ سے مل کر تعزیت کا اظہار کیا اور  انہیں دلاسہ بھی دیا۔ سب لوگ جانتے ہیں کہ وزیراعلی نتیش کمار موجودہ سیاست کے چانکیہ کہے جاتے ہیں ۔ کہا یہ بھی جاتا ہے کہ جب وہ کوئی اہم  فیصلے کرنے والے ہوتے ہیں ہوتے ہیں تو ان کے قریب سے قریب ترین لوگوں کو بھی اس کی بھنک نہیں لگتی ہے اور ان کا فیصلہ اچانک ہی منظر عام پر آجاتا ہے۔ یہی وجہ ہے کہ وزیراعلی کی علالت کے سیاسی معنی نکالے جارہے ہیں اور کہا جارہا ہے کہ وزیراعظم نریندر مودی کو عوامی جلسوں میں کبھی ساتھ نہ چھوڑنے کا وعدہ کرنے کے باوجود ایک مرتبہ پھر وہ پرانے اتحاد میں واپس آسکتے ہیں۔ ان کے پھر سے ادھر سے ادھرہونے کی پیشن گوئی کرتے ہوئے سینئر صحافی اور نوکر شاہی ڈاٹ کام کے ڈائرکٹر ارشادالحق کہتے ہیں کہ اپوزیشن لیڈر تیجسوی یادو نے مدھوبنی میں ایک انتخابی تشہیر کے دوران کہا کہ ہمارے چچا بھلے ہی تن سے اُدھر ہیں لیکن من سے ہمارے ساتھ ہیں۔ وہ کہتے ہیں کہ تیجسوی کے بیان سے کئی اشارے ملتے ہیں۔ ارشادالحق کہتے ہیں کہ اگر تھوڑا پیچھے جاکر دیکھیں تو نتیش کمار اسی سال جنوری میں این ڈی اے میں اچانک شامل ہوئے اور بی جے پی کے ساتھ مل کر اپنی حکومت برقرار رکھ لی ۔لیکن اس معاملے میں تیجسوی نے کبھی بھی نتیش کمار کی نکتہ چینی نہیں کہ نہ ہی کبھی کوئی شکایت کی۔ بلکہ وہ بار بار یہی کہتے رہے کہ وہ ہمارے چچا ہیں ہمارے گارجین ہیں۔ ہم کل بھی ان کا احترام کرتے تھے اور آج بھی کرتے ہیں۔

ارشادلحق کہتے ہیں کہ نتیش کمار کے بارے میں کوئی بھی اندازہ لگانا کافی مشکل کام ہے لیکن فی الوقت ایسا لگ رہا ہے کہ وزیراعلی اور تیجسوی کے درمیان کچھ کچھڑی پک رہی ہے۔

سیاسی گلیاروں میں ایسی خبر بھی ہے کہ بہار میں ہوئے چارمرحلوں کے انتخابات میں نہ صرف بہار میں بلکہ دیگر ریاستوں میں بھارتیہ جنتا پارٹی کی پوزیشن بہتر  نظر نہیں۔آرہی ہے۔ یہی وجہ ہے کہ وزیراعظم نریندر مودی خود انتخابی جلسوں میں ہندو- مسلم موضوع پر تقریرکرر ہے ہیں اور انڈی اتحاد کو مسلم حمایتی بتا رہے ہیں۔ حالانکہ دو روز قبل وزیراعظم نے وارانسی  میں واضح طور پر کہا تھا ک وہ اگر ہندو مسلم کروں گا تو عوامی زندگی کے لئے فٹ نہیں ہوں گا۔ پھر اگلے ہی دن اپنے بیان سے انحراف کرتےہوئے ناسک میں مسلمانوں کے خلاف بیان دیا اور کہا کہ کانگریس بجٹ کا 15 فیصد حصہ مسلمانوں پر خرچ کرنا چاہتی ہے۔ وزیراعظم کی تقریروں سے ایسا لگ رہا ہے کہ ان کو پارٹی کی شکست کا اندازہ ہوگیا ہے۔ کیونکہ کچھ دنوں قبل انہوں نے دو اہم صنعت کاروں کا عوامی طور پر نام لیتے ہوئے کہا تھا کہ اڈانی اور امبانی ٹیمپو میں بھر کر کانگریس کو پیسے پہنچارہے ہیں جس پر راہل گاندھی کا بھی ردعمل آیا تھا کہ اس کا آپ کو بخوبی تجربہ ہے۔

سمجھا جاتا ہے کہ بی جے پی کو کمزور ہوتے ہوئے دیکھ کر شاید وزیراعلی نتیش کمار یہ ذہن  بنا چکے ہیں کہ وہ پھر سے انڈی اتحاد میں واپس آجائیں ۔ بقول ارشا دالحق  4 جون کے بعد نتیش کمار وزیر اعلی کے طو رپر تیجسوی یادو کی تاجپوشی کردیں گے۔دیکھنا یہ ہے انتخابات کے نتائج کے بعد اونٹ کس کروٹ بیٹھتا ہے ۔