جنتا کے دربار میں وزیراعلیٰ “ پروگرام میں 195 لوگوں کے مسائل سے روبر ہوئے نتیش

پٹنہ:وزیر اعلیٰ نتیش کمار آج 4دیش رتن مارگ واقع وزیر اعلیٰ سکریٹریٹ احاطہ می منعقد ’جنتا کے دربار میں وزیر ا علیٰ‘پروگرام میں شامل ہوئے ۔ جنتا کے دربار میں وزیر اعلیٰ پروگرام میں وزیر اعلیٰ نے ریاست کے متعدد اضلاع سے پہنچے 195 لوگوں کے مسائل کو سنا اور متعلقہ محکموں کے افسران کو حل کے لیے مکمل کارروائی کی ہدایت دی ۔
آج کے ”جنتا کر دربار میں وزیر اعلیٰ“ پروگرام میں جنرل ایڈمنسٹریشن محکمہ ، داخلہ محکمہ ، ریوینو محکمہ اور اصلاحات اراضی محکمہ ، شراب بندی ،ایکسائز اور رجسٹری محکمہ ، نگرامی محکمہ ، کان کنی محکمہ کے معاملوں پر سماعت ہوئی ۔
وزیر اعلیٰ نتیش کمار نے جنتا کے دربار میں حاضر ہو کر لوگوں کی شکایات سنیں ، مونگیر سے آئے ایک فریادی نے کہا کہ جرائم پیشہ افراد کے خوف سے وہ پریشان ہیں ۔آگے انہوں نے کہا کہ ہم نے دکان لوٹنے والوں کے خلاف معاملہ درج کرایا تو بد معاشوں نے دومرتبہ فائرنگ کر دی ، میرے بیٹے کوزدو کوب کیا گیا ۔سی آئی ڈی میں معاملہ چل رہا ہے ۔ اس بارے میں ہم نے اے ڈی جی ،سی آئی ڈی سے فریاد کی تو جان بچی ۔ اس طرح سے کتنا دن کام چلے گا ، ہمیں انصاف چاہئے ۔ شکایت سننے کے بعد وزیر اعلیٰ نے درخواست دہندہ کو ڈی جی کے پاس بھیجا اور کہا کہ پورے معاملہ کو دیکھ کر مناسب قد م اٹھا یا جائے ۔
والمیکی نگر سے آئی متاثرہ خاتون نے ممبر اسمبلی رنکو سنگھ پر الزام لگا تے ہوئے کہا کہ اس کے شوہر کے قتل کے سلسلہ میں مقامی ممبر اسمبلی رنکو سنگھ کو ملزم بنا یا گیا تھا ۔ لیکن پولیس نے اب تک کوئی کارروائی نہیں کی ۔ اس شکایت کے بعد وزیر اعلیٰ نے متاثرہ خاتون کو ڈی جی پی کے پاس بھیج کر جانچ کر انے کو کہا ۔
بیگو سرائے کے بھگوان پور کے ارون کمار سنگھ نے اپنی شکایت میں کہا کہ غیر مزروعہ زمین پر دبنگوں نے تجاوزات کر کے عوامی کنویں کو بھر دیا اور اس پر قبضہ کر لیا ہے ۔ وہیں ڈہری روہتاس کے کمار مہندر پڑتاپ نے ان کی نجی زمین پر غیر سماجی عناصر کے ذریعہ قبضہ کر نے کے بارے میں شکایت کی ۔شکایت سننے کے بعد وزیر اعلیٰ نے مکمل کارروائی کی ہدایت دی ۔

ایک خاتون مکھیانے وزیر اعلیٰ سے شکایت کر تے ہوئے کہا کہ ان کے شوہر کا قتل کر دیا گیا ، شکایت کر نے کے بعد بھی تھانیدار ملزم کو بچانے میں لگے ہیں ۔ ملزم کی گرفتاری بھی ہوئی اور 17دنوں میں ضمانت مل گئی ۔ اب وہ ملزم مسلسل دھمکی دے رہا ہے ۔ وزیر اعلیٰ نے ایڈیشنل چیف سیکریٹری داخلہ اور ڈی جی پی کو اس معاملہ میں کارروئی کی ہدایت دی ۔
سیوان کے سسواں کے گوتم یادو نے ایس پی اور تھانہ انچارج کے خلاف شکایت کر تے ہوئے کہا کہ ہمارے ذریعہ شراب فروخت کر نے والے کے خلاف کی گئی تحریری خفیہ اطلاع کو واٹس اپ پر ان لوگوں نے عام کر دیا ۔ وزیر اعلیٰ نے اس پر نوٹس لیتے ہوئے متعلقہ محکمہ کو اس پرجلد کارروائی کر نے کی ہدایت دی ۔
سپول سے آئے ایک فریادی نے وزیر اعلیٰ کے سامنے 51ایسے معاملوں کی فہرست سونپی ہے جو بد عنوانی سے متعلق تھے ۔ فریادی نے الزام عائد کیا کہ یہ معاملے ان کے ذاتی نہیں ہیں بلکہ ضلع سے متعلق ہیں ۔سپول ضلع میں زبر دست بد عنوانی ہے ،ضلع کے ڈی ایم بد عنوانی کو فروغ دے رہے ہیں ۔ان کے خلاف کئی طرح کی شکایتیں وہ ایک سال سے کررہے ہیں۔چیف سیکریٹری کے سامنے بھی شکایت کی گئی اور وزیر اعلیٰ دفتر میں بھی ،لیکن ڈی ایم صاحب کے اور پر کوئی ایکشن نہیں لیا جارہا ہے ۔ ضلع میں اقلیتی واسکالر شپ سے متعلق منصوبوں میں گھپلہ کیا جار ہا ہے ۔ صحت محکمہ کے منصوبوں میں بھی ضلع میں زبر دست خامی کا الزام فریاد ی نے لگا یا ۔ اتنا ہی نہیں تعلیمی مرکز گھپلے کا بھی الزام ڈی ایم کے اوپر لگا یا گیا ہے ۔ اس معاملہ میں جانچ کمیٹی کی تشکیل تو ہو تی ہے لیکن نتیجہ کچھ نہیں نکلتا ۔ وزیر اعلیٰ نے اس معاملہ کو سنجیدگی سے لیتے ہوئے کہا کہ متعلقہ محکمہ اس پر مناسب کارروائی کرے ۔

پورنیہ کے ڈگروا کے صہیب عالم نے اپنی فریاد میں کہا کہ عدالت کے حکم کے باوجود میری دخل زمین کو سی او کے ذریعہ میرے پڑوسی کے ذریعہ قبضہ کیے جانے میں مدد دی جاتی ہے ۔ وہیں ویشالی کی سہدئی بزرگ کی مسز پرینکا کماری عدالت کے ذریعہ گرفتاری وارنٹ جاری رہنے کے باوجود اب تک ملزم کو تھانہ کے ذریعہ گرفتار نہیں کیے جانے کی شکایت کی ۔ وزیر اعلیٰ نے متعلقہ محکمہ کو کارروائی کر نے کرنے کو کہا ۔
کیمور کے بھبھوا کے پرما نند کیسری نے شکایت کر تے ہوئے کہا کہ دھارمک نیاس پریشد ، پٹنہ کے ذریعہ بھبھوا واقع آنجہانی کنی رام دھرم شالا کو چالو کیا جارہا ہے ۔ اس میں متعدد بدعنوانی برتی جارہی ہے۔ وہیں ٹیکاری ،گیا کے امرجیت داس نے شری رام جانکی بیلون ٹھاکر واڑی کی زمین پر دبنگو ںکے ذریعہ غیر قانونی طور سے قبضہ کیے جانے اور جان سے مارنے کی دھمکی کی شکایت کی ۔وزیر اعلیٰ نے متعلقہ محکمہ کو مناسب کارروائی کرنے کی ہدایت دی ۔
مشرقی چمپارن کی روچی بھارتی نے شکایت کر تے ہوئے کہا کہ میرے والد جو کہ ’دینک جاگرن ‘اخبار میں صحافی ہیں ان کو تنگ تباہ کیے جانے کی نیت سے پھنسایا جارہا ہے ، وزیر اعلیٰ نے نوٹس لیتے ہوئے متعلقہ محکمہ کو کارروائی کر نے کی ہدایت دی ۔
”جنتا کر دربار میں وزیر اعلیٰ“ کے پروگرام میں ریوینو واصلاحات اراضی کے وزیر رام صورت رائے ، کان کنی کے وزیر جنک رام ، شراب بندی ، ایکسائز اور رجسٹری کے وزیر سنیل کمار ، وزیر اعلیٰ کے پرنسپل سیکریٹری دیپک کمار ، چیف سیکریٹری مسٹر تریپوراری شرن ، ڈی جی پی مسٹر ایس کے سنگھل ، ڈیولپمنٹ کمشنر عامر سبحانی ، ایڈیشنل چیف سیکریٹری ریوینو ،اصلاحات اراضی وویک کمار سنگھ ، ایڈیشنل چیف سیکریٹری داخلہ مسٹر چیتنئے پرساد، متعلقہ محکموں کے پرنسپل سیکریٹری ، سیکریٹری ، وزیر اعلیٰ کے سیکریٹری مسٹر انوپم کمار ، وزیر اعلیٰ کے او ایس ڈی مسٹر گوپال سنگھ ، پٹنہ ڈی ایم مسٹر چندر شیکھر سنگھ اور ایس ایس پی مسٹر اوپندر شرما موجودتھے ۔