ظالم کے سامنے کبھی سر نہ جھکانا محرم کا پہلا پیغام: امانت حسین

پھلواری شریف: الحمد (ادارہ خدمت خلق)، فیڈرل کالونی، پھلواری شریف،پٹنہ کے زیر اہتمام پیغام محرم  کے عنوان سے ایک لکچر کا انعقاد  کیا گیا،جس کی صدارت حضرت مولانا مفتی سہیل احمد قاسمی صدر الحمد نے فرمائی  اور اہم مقرر کے طور پر  مجلس ائمہ خطباء امامیہ، پٹنہ کے جنرل سیکریٹری امانت حسین ،الحمد کے سرپرست اشفاق رحمن شامل ہوئے۔

ماہ محرم الحرام قربانی اورفدائیت کا پیغام:مفتی سہیل احمد قاسمی

پروگرام سے خطاب کرتے ہوئے مقررین نے محرم کے پیغام کو عام کرنے پر زور دیا۔ مفتی سہیل احمد قاسمی صاحب نے ماہ محرم الحرم کی عظمت وفضیلت کے حوالے سے فرمایاکہ یہ اللہ کا مہینہ ہے،اللہ کے رسول صلی اللہ علیہ وسلم نے شہراللہ یعنی اللہ کا مہینہ قراردیا ہے۔محرم الحرام اسلامی سال کا پہلا مہینہ ہے اوراسی محرم الحرام سے ہجری سال کا آغاز ہوتا ہے۔مفتی صاحب نے فرمایاکہ یہ بات ذہن میں رہنی چاہیے کہ عاشورہ  محرم کا تعلق اوراس کی عظمت واہمیت صرف حضرت حسین رضی اللہ عنہ کی شہادت اورواقعہ کربلا سے نہیں ہے،بلکہ تاریخ کے مطالعے سے یہ بات سمجھ میں آتی ہے کہ عاشوراء محرم کا تعلق انبیاء علیہم السلام کی ذات اورتخلیق کائنات سے وابستہ ہے۔اللہ رب العزت نے سارے عالم کی تخلیق یعنی زمین وآسمان،آفتاب ومہتاب،عرش وکرسی،لوح وقلم یوم عاشوراء میں پیدا فرمایا۔ابوالبشر حضرت آدم علیہ السلام کی تخلیق اسی دن ہوئی۔ حضرت نوح علیہ السلام کی کشتی اسی دن جودی پہاڑ پر ٹھہری اورآپ پر ایمان لانے والے اللہ کے نیک بندوں نے اسی دن طوفان عظیم سے نجات پائی۔حضرت موسیٰ علیہ السلام اورآپ کی قوم کو اسی دن فرعون کی ظلم وزیادتی سے نجات دلائی اورقوم فرعون اسی دن بحر قلزوم میں غرق ہوگئی۔ حضرت عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم ہجرت کرکے مدینہ تشریف لائے تو آپ نے یہود کو یوم عاشوراء یعنی دس محرم کو روزہ رکھتے ہوئے دیکھا،آپ نے ان سے دریافت کیا کہ کون سا خاص دن ہے جس کی وجہ سے تم لوگ روزہ رکھتے ہو؟قوم یہود نے کہاکہ یہ دن ہمارے لیے بڑی عظمت والا دن ہے،اللہ رب العزت نے حضرت موسیٰ اوران کی قوم کو اسی دن نجات دی اورفرعون کے لشکر کو غرق کردیا ،حضرت موسیٰ علیہ السلام نے شکرانے کے طور پر اس دن کا روزہ رکھا تھا،اس لیے اس دن ہم لوگ روزہ رکھتے ہیں۔اللہ کے رسول صلی اللہ علیہ وسلم نے فرمایاکہ اللہ کے رسول حضرت موسیٰ علیہ السلام سے ہمارا تعلق تم سے زیادہ ہے اورہم اس بات کے زیادہ حق دار ہیں کہ ہم روزہ رکھیں،چناں چہ آپ نے روزہ رکھا اورامت کو بھی روزہ رکھنے کا حکم دیا۔یہ اتفاق ہے کہ اسی تاریخ میں حضرت امام حسین رضی اللہ عنہ کی شہادت کا واقعہ پیش آیا،جو دراصل اعلیٰ درجہ کی توحید اوراحکام شریعت پر عمل کرنے کا درس دیتا ہے۔

مولانا امانت حسین جنرل سکریٹری مجلس ائمہ خطباء امامیہ، پٹنہ نے کہاکہ اسلامی سال کا پہلا مہینہ محرم الحرام بابرکت اورمقدس مہینہ ہے۔ رمضان المبارک کے بعد افضل روزے محرم الحرام کے ہیں۔ حضرت امام حسین علیہ السلام کی شہادت ہمیں اسلام کے لیے ہرقسم کی قربانی دینے کے لیے تیاررہنے کا درس دیتاہے۔انہوں نے مزید کہاکہ امام حسین کی ایسی شخصیت ہے،جس کو ہر مذہب،ملک کے لوگ مانتے ہیں،ان کے بارے میں صرف سنیں نہیں، بلکہ ان کی شخصیت کو اپنے دل میں اُتارلیں۔کسی بھی منظر کا پس منظر ہوتا ہے۔ محرم زخم بھی ہے مرہم بھی ہے۔ کبھی ظالم کے سامنے سر نہیں جھکانا۔ امام حسین نے سر نہیں جھکایا ۔ محرم کے پیغام میں ایک یہ بھی ہے۔ مدینہ میں لوگوں کی کمی نہیں تھی لیکن امام حسین نکل پڑے کیونکہ بات شریعت پر آ گئی تھی ،مذہب پر بات آ گئی تھی۔ سارے نظام بگڑے ہوئے تھے۔آج بھی منظر نامہ کچھ اسی طرح کا ہے۔امام حسین جنگ یا تخت و تاج کے لئے کربلا نہیں پہنچیں تھے۔ ان کی قربانی بے مثال ہے۔ ایک معجزہ ہے۔ سبھی کا مقصد ایک ہے ۔انہیں یاد کرنا ۔ یہ بتانا کہ اس وقت ہم موجود نہیں تھے،اگر ہوتے تو یقیناً ہم بھی ساتھ ہوتے۔ ہم 15 اگست کو ہر مذہب کے لوگ ملک کی خاطر شہید ہونے والوں کو یاد کرتے ہیں ،ان کے جذبہ کو سلام کرتے ہیں تو جس امام حسین نے اپنی شہادت پیش کر پوری انسانیت کو بچا لیا ،اسے یاد کیوں نہ کریں ۔

تعزیہ داری ،اکھاڑہ ،ڈی جے ،ناچ -گانا اسلام کا طریقہ نہیں :اشفاق رحمن

اس موقع پر اپنی مختصر تقریر میں اشفاق رحمن نے کہا کہ پیغام محرم کو عام کرنا موجودہ انسانیت پر لازم ہے۔محرم کا مہینہ اسلامی تاریخ سے منسلک ہے ۔امام حسین کی شہادت باطل کے آگے نہیں جھکنے اور حق کے لئے مر مٹنے کا پیغام ہے لیکن آج مسلم اُمّہ تعزیہ داری ،اکھاڑہ، ڈی جے، ناچ – گانا اور طرح طرح کی بیہودگیوں سے پیغام محرم کو مجروح کرنے پر آمادہ ہے اور علماء حضرات اس پر کچھ نہیں کہتے،المیہ یہ ہے۔ 

آل انڈیا ملی کونسل کے کارگزار جنرل سکریٹری مولانا محمد نافع عارفی نے کہاکہ سال کا آغاز قربانی سے ہے اورسال کا اختتام قربانی پر ہے،یہ تقاضہ ہے کہ دین کے لیے مسلمانوں کو قربانی دینے کے لیے تیار رہنا چاہیے۔

پروگرام میں شہر عظیم آباد   کے اہل علم ودانش کے علاوہ ساجد پرویز،خورشید انور،محمد نعمت اللہ شیخ،شمیم آروی، مولانامحمد جمال الدین قاسمی، مولانامحمد اقبال سعادتی امام کربلا مسجد، پھلواری شریف،محمد حسنین،حافظ مہتاب عالم،مولانا محمد رضاء اللہ قاسمی،خورشید عالم،،انواراللہ، ضیاء الحسن، نواب عتیق الزماں،عرفان بخشی، شمیم عالم، ڈاکٹر انوارالہدیٰ وغیرہ شریک ہوئے۔

سراج انور نے پروگرام کی نظامت کی ۔ مفتی محمد امام الدین قاسمی سکریٹری الحمد ادارہ خدمت خلق نے الحمدکے مشن اورپروگراموں کو آگے بڑھانے کی لوگوں سے اپیل کی۔