نہیں رہے نیتا جی ملائم سنگھ یادو، صدر اور وزیراعظم کا اظہار تعزیت

نئی دہلی: سماج وادی پارٹی کے بانی اور اتر پردیش کے سابق وزیر اعلی ملائم سنگھ یادو کا پیر کو گروگرام کے میدانتا اسپتال میں انتقال ہوگیا۔
ان کی عمرتقریبا 82 برس تھی۔ وہ گزشتہ ڈیڑھ ماہ سے اسپتال میں داخل تھے۔ ان کے کئی اعضاء نے کام کرنا چھوڑ دیا تھا اور وہ وینٹی لیٹر پر تھے۔
مسٹر یادو کے بیٹے اور اتر پردیش کے سابق وزیر اعلی اکھلیش یادو نے پارٹی کے آفیشل ٹویٹر ہینڈل پر یہ معلومات دی، "میرے قابل احترام والد اور سب کے لیڈر نہیں رہے – مسٹر اکھلیش یادو”۔
مرکزی حکومت میں وزیر دفاع رہ چکے مسٹریادو 22 نومبر 1939 کو اٹاوہ ضلع کے سیفئی میں پیدا ہوئے۔ وہ اس وقت مین پوری سے ایم پی تھے۔

یوپی میں تین دنوں کے سرکاری سوگ کا اعلان، آخری رسومات کی ادائیگی کل سیفئی میں

صدر دروپدی مرمو اور وزیر اعظم نریندر مودی، لوک سبھا اسپیکر اوم برلا نے پیر کو سماج وادی پارٹی کے رہنما ملائم سنگھ یادو کے انتقال پر تعزیت کا اظہار کیا۔
ٹویٹر پر اپنے تعزیتی پیغام میں، محترمہ مرمو نے لکھا، "مسٹر ملائم سنگھ یادو کا انتقال ملک کے لیے ایک ناقابل تلافی نقصان ہے۔ عام ماحول سے آنے والے ملائم سنگھ یادو جی کے کارنامے غیر معمولی تھے۔ ‘دھرتی پتر’ ملائم جی زمین سے وابستہ ایک قدآور رہنما تھے۔ تمام جماعتوں کے لوگ ان کی عزت کرتے تھے۔ ان کے خاندان اور حامیوں کے تئیں میری گہری تعزیت!”
مسٹرمودی نے مسٹرملائم سنگھ یادو کی موت کو ملک کے لیے ناقابل تلافی نقصان قرار دیا۔ انہوں نے کہا، ‘مسٹرملائم سنگھ یادو جی ایک منفرد شخصیت کے مالک تھے۔ انہیں ایک شائستہ اور زمینی رہنما کے طور پر بڑے پیمانے پر سراہا گیا۔ وہ عوام کے مسائل کے تئیں حساس تھے۔ انہوں نے پوری تندہی سے لوگوں کی خدمت کی اور لوک نائک جے پی اور ڈاکٹر لوہیا کے نظریات کو مقبول بنانے کے لیے اپنی زندگی وقف کر دی۔
ایک اور ٹویٹ میں، انہوں نے کہا، "ملائم سنگھ یادو جی نے اتر پردیش (یو پی) اور قومی سیاست میں اپنی الگ شناخت بنائی۔ وہ ایمرجنسی کے دوران جمہوریت کے لیے ایک ممتاز سپاہی تھے۔ وزیر دفاع کی حیثیت سے انہوں نے ایک مضبوط ہندوستان کے لیے کام کیا۔ ان کی پارلیمانی مداخلت عملی تھی اور قومی مفاد کو آگے بڑھانے پر زور دیتے تھے۔
انہوں نے کہا، ’’ہم نے اپنی اپنی ریاستوں کے وزرائے اعلیٰ کے طور پر کام کیا، تب مسٹر ملائم سنگھ یادو جی کے ساتھ میری بہت سی بات چیت ہوئی۔ قربت جاری رہی اور میں ہمیشہ ان کے خیالات سننے کا منتظر رہا۔ میں ان کی موت سے دکھی ہوں۔ ان کے خاندان اور لاکھوں حامیوں سے میری تعزیت۔ اوم شانتی۔”
مسٹر مودی نے مسٹر ملائم کے ساتھ اپنی ملاقات کی کئی تصویریں بھی ٹوئٹر پر شیئر کیں۔
مسٹربرلا نے لکھا کہ ملائم سنگھ سوشلزم کی آواز تھے، وہ ہمیشہ محروم طبقات کی فلاح و بہبود کے لیے وقف رہے۔
بڑھتی عمر- بیماری کے باوجود ملائم جی لوک سبھا میں سرگرم تھے، انہوں نے جے پی اور لوہیا کی روایت کو آگے بڑھایا، ملک کے وزیر دفاع اور اتر پردیش کے وزیر اعلیٰ کی حیثیت سے خدمات انجام دیں، خدا مرحوم کو سکون عطاکرے۔

نائب صدر جگدیپ دھنکھڑ نے سماج وادی پارٹی کے بانی، سرپرست اور اتر پردیش کے سابق وزیر اعلی اور سابق وزیر دفاع ملائم سنگھ یادو کے انتقال پر گہرے رنج و غم کا اظہار کرتے ہوئے کہا کہ ملک میں ایک سیاسی باب کا خاتمہ ہو گیا ہے۔
پیر کو یہاں جاری ایک پیغام میں مسٹر دھنکھڑ نے کہا کہ انہوں نے زندگی بھر عام آدمی کی خدمت کی۔
نائب صدرجمہوریہ نے کہا، "ایک سینئر سوشلسٹ سیاست دان، اتر پردیش کے سابق وزیر اعلیٰ، سابق وزیر دفاع اور سینئر رکن پارلیمنٹ مسٹرملائم سنگھ یادوجی کے انتقال سے ملک کی سیاسی تاریخ کا ایک اہم باب ختم ہو گیا ہے۔ وہ ہمیشہ سماج کے محروم طبقات اور کسانوں کے مفادات کے لیے آواز بلند کرتے رہے۔
انہوں نے کہا کہ سماجی انصاف کے لئے مسٹرملائم سنگھ جی کے تعاون کو ہمیشہ یاد رکھا جائے گا۔
انہوں نے کہا، "غم کی اس گھڑی میں، میں ان کے سوگوار خاندان اور ساتھیوں سے تعزیت کا اظہار کرتا ہوں۔ خدا مرحوم کو اپنے قدموں میں جگہ دے۔ اوم شانتی۔

اتر پردیش کے وزیر اعلی یوگی آدتیہ ناتھ نے اہم اپوزیشن پارٹی سماج وادی پارٹی (ایس پی) کے بانی ملائم سنگھ یادو کے انتقال پر تعزیت کا اظہار کیا ہے۔
یوگی نے مسٹر یادو کے انتقال پر ریاست میں تین دن کے سرکاری سوگ اور ان کی آخری رسومات پورے سرکاری اعزاز کے ساتھ ادا کیےجانے کا اعلان کیاہے۔
پیر کو وزیر اعلیٰ کی طرف سے جاری ایک تعزیتی پیغام میں یوگی نے مسٹر یادو کے بیٹے اکھلیش یادو اور ان کے بھائی رام گوپال یادو سے فون پر بات کر کے تعزیت کا اظہار کیا۔ یوگی نے کہا، ”اتر پردیش کے سابق وزیر اعلیٰ اور سماج وادی پارٹی کے بانی مسٹرملائم سنگھ یادو جی کا انتقال انتہائی تکلیف دہ ہے۔ ان کی موت سے سوشلزم کا بنیادی ستون اور جدوجہد کا دور ختم ہوا ہے۔
یوگی نے کہا، ’’خدا سے دعا ہے کہ مرحوم کی روح کو سکون عطا کرے، سوگوار خاندان و حامیوں کے تئیں میری تعزیت۔ مسٹرملائم سنگھ یادو جی کے انتقال پر اتر پردیش حکومت تین دن کے سرکاری سوگ کا اعلان کرتی ہے۔ ان کی آخری رسومات پورے سرکاری اعزاز کے ساتھ ادا کی جائیں گی۔