سڑکوں اور پلوں کا مین ٹننس محکمہ جاتی سطح سے ہو ، اس سے خرچ میں آئے گی کمی :نتیش

پٹنہ :بہار کے وزیراعلیٰ نتیش کمار نے4 اسٹیٹ ہائیوے کی افتتاحی تقریب سے خطاب کرتے ہوئے کہا کہ سڑکوں اور پلوں کا رکھ رکھاﺅ محکمہ کے ذریعہ ہی کرایا جائے ، اس سے مسلسل نگرانی بھی ہو گی اور خرچ بھی کم ہو گا ۔ سڑکوں اور پلوں کے بہتر طریقہ سے رکھ رکھاﺅ رہنے پر ریاست کا وقار بڑھے گا۔ مجھے یقین ہے کہ محکمہ کے انجینئر پوری محنت کے ساتھ اس پر کام کریں گے۔ اگر سڑکوں کی تعمیر اور اس کے مینٹننس میں انجینئر سنجیدگی دکھائیں گے تو لوگوں کے درمیان ان کا وقا ربڑھے گا ۔
وزیر اعلیٰ مسٹر کمار نے کہا کہ آج 4 اسٹیٹ ہائیوے کا افتتاح کرانے کے لیے سڑک تعمیرات محکمہ کو خصوصی طور پر مبارکباد دیتا ہوں ۔ سڑک تعمیرات محکمہ کے ذریعہ کئی دیگر منصوبوں پر بھی تیزی سے کام کیا جارہا ہے ۔ ہم لوگوں کے اقتدار سنبھالنے سے قبل سال 2005 تک سڑکوں کی کیا حالت تھی ، آمدو رفت میںکتنی دشواری تھی یہ سب لوگ جانتے ہیں ۔ ہم لوگوں نے سال 2006 میں سڑکوں کی حالت پر سروے کرایا ۔ انہوں نے کہا کہ جب سے ہم لوگوں کو بہار میں کام کر نے کا موقع ملا ہے تب سے کئی سڑکوں اور پل پولیوں کی تعمیر کرائی گئی ہے ۔ مرکز میں جب آنجہانی اٹل بہار ی واجپئی جی کی حکومت تھی ، ہم بھی ان کی حکومت میں وزیر تھے ، اس دوران بھی مرکزی حکومت کے ذریعہ ریاست میں کئی سڑکوں کی تعمیرکرائی گئی ۔ سڑک تعمیرات محکمہ کے ذریعہ کئی منصوبوں پر تیزی سے کام کیا جارہا ہے ۔مرکزی حکومت کی مدد سے ریاستی حکومت کے ذریعہ کئی سڑکوں ،پل پولیوں کی تعمیر ہو نے سے ریاست کی عوام کو آمدو رفت میں بہت سہولت ہو رہی ہے ۔ شروع میں ہم لوگوں نے ریاست کے دوردراز علاقوں سے 6 گھنٹے میں راجدھانی پٹنہ پہنچنے کا نشانہ طے کیا تھا جو مکمل کر لیا گیا ۔ اب 5گھنٹے میں راجدھانی پٹنہ پہنچنے کے نشانہ پر کام کیا جارہا ہے ۔ گاڑیوں کی بڑھتی تعداد کے مدنظر سڑکوں کی تو سیع کی جارہی ہے ۔

وزیر اعلیٰ نے کہا کہ اسٹیٹ ہائیوے کو بہتر طریقہ سے بنا یا گیا ہے ، اس کی 7-10 میٹر توسیع کی جارہی ہے ۔ کئی اسٹیٹ ہائیوے کو فورلین میں بدلا گیا ہے ۔ آج اسٹیٹ ہائیوے 84,85,102اور 91کا اجرا کیا گیا ہے ، اس سے لوگوں کو آمدو رفت میں سہولت ہو گی ۔ انہوں نے کہا کہ باہر کے لوگ جب بہار سے گزرتے ہیں تو یہاں کی سڑکوں کی تعریف کر تے ہیں ۔ یہاں کے لاءاینڈ آرڈر کی بھی تعریف کر تے ہیں ۔سات عزائم 2 کے تحت آسان رابطہ دینے کے لیے شہری علاقوں میں بائپاس کی تعمیر کی جارہی ہے ۔جن شہری علاقوں میں زمین کی فراہمی میں کمی ہو گی وہاں فلائی اوور کی تعمیر کرائی جارہی ہے ۔ سڑک تعمیرات محکمہ نے ایسے 120 مقامات کو نشانزد کیا ہے ، جہاں بائپاس کی تعمیر کا منصوبہ ہے ۔
وزیر اعلیٰ نے کہا کہ سڑکوں اور پل پولیوں کی تعمیر کے ساتھ ساتھ ان کا مینٹننس ضرور ہو ۔ اسے لوک شکایت حل ایکٹ میں بھی شامل کیا گیا ہے تاکہ مینٹننس نہیں ہو نے کی شکایت آنے پر قصورواروں پر کارروائی ہوسکے ۔مجھے خوشی ہوئی ہے کہ آج پروگرام کے دوران اسٹیٹ ہائیوے پروجیکٹ سے متعلق نقشے میں سڑکوں کے کنارے شجر کاری کے بارے میں بھی جانکار ی دی گئی ہے ۔سڑکوں کے دونوں کنارے زیادہ سے زیادہ تعداد میں نہ صرف شجر کاری ہوبلکہ ان کی نگرانی بھی ضرورہو ۔بہار سے جھارکھنڈ کے الگ ہونے کے بعد ریاست کا گرین کوور علاقہ بہت کم رہ گیا ہے ۔ریاست کے گرین علاقہ کو بڑھانے کے لیے بڑے پیمانے پر شجر کاری کی گئی ہے ۔جل ،جیون ہریالی مہم کے تحت بھی ہریالی کو فروغ دینے کے لیے کام کیے جارہے ہیں ۔ انہوں نے کہا کہ سرک تعمیرات محکمہ کے ذریعہ کئی اور سڑکوں کی تعمیر تیزی سے کی جارہی ہے ۔ بہٹا ،سرمیرا سڑ ک بہت بہتر بنی ہے ۔ اس کے مغرب سے مشرقی بہار کا رابطہ بہتر ہوا ہے ۔ اٹل پتھ اور پاٹلی پتھ بھی بہتر بنا ہے ۔ انہوں نے کہا کہ گھو گھا ،پنجوارا روڈ،اکبر نگر ،امر پور روڈ ، بہیا ،جگدیش پور ، پیرو ، بہٹاروڈ اور بہاری گنج ،بائپاس کی تعمیر سے علاقہ کے لوگوں کو آمدو رفت میں سہولت ہو گی ۔
واضح رہیکہ وزیر اعلیٰ نتیش کمار نے آج 1انے مارگ واقع سنکلپ میں ویڈیو کانفرنسنگ کے توسط سے 1,121کروڑ روپے کی لاگت کے 130 کیلومیٹر طویل چار اسٹیٹ ہائیوے کا اجرا کیا ۔ اس کے تحت 332.00 کروڑ روپے لاگت کی 41.1 کیلو میٹر طویل اسٹیٹ ہائیوے نمبر 84(گھوگھا پنجوارہ روڈ) 220.72 کروڑ روپے کی لاگٹ کا 29.55 کیلو میٹر طویل اسٹیٹ ہائیوے نمبر 85 (اکبر نگر ،امر پور روڈ) ،504 کروڑ روپے کی لاگت کا55 کیلو میٹر طویل اسٹیٹ ہائیوے 102(بہیاں ،جگدیش پور ، پیرو ،بہٹا روڈ)اور 64.60کروڑ روپے کی لاگت کا 4.55 کیلو میٹر طویل اسٹیٹ ہائیوے نمبر 91(بیر پور ، ادا کشن گنج روڈ) کے تحت بہار گنج بائپاس شامل ہیں ۔
پروگرام کے دوران اسٹیٹ ہائیوے کے پروجیکٹ سے متعلق نقشہ کی نمائش کی گئی ۔
پروگرام کو نائب وزیراعلیٰ تارکیشورپرساد، نائب وزیر اعلیٰ مسز رینو دیوی، سڑک تعمیرات کے وزیر نتن نوین اور سڑک تعمیرات کے اڈیشنل چیف سیکریٹری مسٹر امرت لال مینا نے بھی خطاب کیا ۔
اس موقع پر وزیر اعلیٰ کے پرنسپل سیکریٹری مسٹر دیپک کمار ، وزیر اعلیٰ کے پرنسپل سیکریٹری مسٹر چنچل کمار ، وزیر اعلیٰ کے سیکریٹری مسٹر انوپم کمار اور وزیراعلیٰ کے او ایس ڈی موجود تھے ۔ جبکہ ویڈیو کانفرنسنگ کے توسط سے بجلی کے وزیر بجندر پرساد یادو ، رورل ورک کے وزیر جینت راج ، ممبر پارلیمنٹ دنیش چندر یادو ، ممبر پارلمینٹ گردھاری یادو ، ممبر اسمبلی رام نارائن منڈل ، ممبر اسمبلی بھودیو چودھری ، ممبر اسمبلی رام وشنو سنگھ ، ممبر اسمبر سداما پرساد سمیت دیگر ممبرن اسمبلی ، عوامی نمائندگان ، چیف سیکریٹری مسٹر تریپوراری شرن ، ڈیولپمنٹ کمشنر عامر سبحانی ، بہار اسٹیٹ روڈ کنٹرکشن لمیٹیڈ کے مینجنگ ڈائریکٹر مسٹر پنکج کمار ، متعلقہ اضلاع کے ڈی ایم سمیت سڑک تعمیرات محکمہ کے دیگر افسران ،انجینئر اور دیگر اہم شخصیات موجود تھیں۔