برق گرتی ہے تو بے چارے مسلمانوں پر

پٹنہ: گذشتہ 27  اپریل کو نصف شب میں ایودھیا کی کئی مساجد کے قریب شرپسند ہندوؤں کے ذریعہ خنزیر کا گوشت اور اشتعال انگیزنعروں پر مبنی پمفلٹ پھینکے گئے۔ یہاں تک کہ قرآن کے نسخے بھی پھینکے گئے۔

جن شرپسندوں نے ان واقعات کو انجام دیا ان لوگوں نے اپنی شناخت چھپانے کے لئے جالی دار ٹوپی پہن لی تھی تاکہ لوگ سمجھیں کہ مسجد کے قریب سے مسلمان گذر رہے ہیں۔ غنیمت یہ رہی کہ ان لوگوں کی حرکات وہاں پر لگے سی سی ٹی وی کیمرے میں قید ہوگئے۔

ملزمان نے ایودھیا میں مسجد کشمیری محلہ، ٹاٹ شاہ مسجد، گھوسیانا رام نگر مسجد، عیدگاہ سول لائن مسجد اور درگاہ جیل کے پیچھے گوشت اور قابل اعتراض پوسٹر پھینکے تھے۔ بعض مقامات پر مذہبی کتابیں پھینک کر فرقہ وارانہ ماحول کو خراب کرنے کی کوشش کی گئی۔

پولس پوچھ گچھ میں سامنے آنے والی کہانی کچھ یوں ہے کہ ماسٹر مائنڈ مہیش کمار مشرا نے اپنے ساتھیوں کے ساتھ مل کر برجیش پانڈے کے گھر پر منصوبہ بنایا تھا۔ مہیش نے یہ پمفلٹ لال باغ کے آشیرواد فلیکس سے چھپوائے تھے۔ یہاں سے کچھ فلیکس بھی خرے۔ ملزم پرتیوش سریواستو چوک کے گدری روڈ پر، محمد۔ رفیق بک اسٹور سے دو قرآن خریدیں۔

پمی نے کیمپ ہاؤس سے ٹوپی خریدی تھی۔ آکاش نے لال باغ سے گوشت خریدا تھا۔ یہ سامان 26 اپریل کی رات 10 بجے ناکا ورما ڈھابہ پر جمع کیا گیا تھا۔ پھر سب برجیش کے گھر پہنچے۔ یہیں فلیکس پر قابل اعتراض تبصرے لکھے گئے۔

اس کے بعد سبھی لوگ چار بائک پر دیوکالی بائی پاس سے ہوتے ہوئے بینی گنج تیراہہ پہنچے۔ پی آر وی (پولیس ریسپانس وہیکل) گاڑی کی موجودگی کی وجہ سے یہاں واردات کو انجام نہیں دے سکے۔ پھر کشمیری محلہ مسجد جا کر قرآن شریف اور گوشت پھینکا گیا۔ اس کے بعد انہوں نے راج کرَن اسکول کے سامنے  ٹاٹ شاہ مسجد پر قابل اعتراض پمفلٹ اور گوشت پھینکا۔ پھر جیل کے پیچھے گلاب شاہ درگاہ پر قرآن شریف اور گوشت پھینک دیا۔ اسی طرح کے قابل اعتراض پمفلٹ عیدگاہ سول لائن، گھوسیانہ رام نگر مسجد میں بھی پھینکے گئے۔

اس پورے معاملے میں مسلم مذہبی رہنماؤں اور عام مسلمانوں نے کافی صبروتحمل سے کام لیا ورنہ ماحول بگڑ سکتاتھا۔

اس معاملے میں ایودھیا پولس نے فوری کاروائی کرتے ہوئے ان شرپسند عناصر کو گرفتار کرلیا۔ اس واقعہ کے تمام ملزمین ایودھیا کے رہنے والے ہیں۔ مہیش مشرا کے خلاف کل 7 ایف آئی آر پہلے ہی درج ہیں۔ مہیش کمار مشرا کھوجن پور میں رہتا ہے۔ پرتیوش سریواستوآواس وکاس کالونی میں، جب کہ نتن کمار ریڈ گنج ہمدانی کوٹھی پر رہتا ہے۔ دیپک کمار گوڑ عرف گنجن ناکہ مروان ٹولہ تھانہ، برجیش پانڈے ہونسیلا نگر، شتروگھن پرجاپتی حمایت گنج، کمہار منڈی، ومل پانڈے کمار گنج کا رہنے والا ہے۔ اس پورے معاملے میں اے سی ایس ہوم اونیش اوستھی نے ایودھیا پولیس کو ایک لاکھ روپے کے انعام کا اعلان کیا ہے۔

سوال یہ اٹھتا ہے کہ پولس نے ان ملزمان کو گرفتار تو کرلیا ہے لیکن جس طرح گذشتہ دیگر معاملات میں دیکھا گیا ہے کہ ملزمان کے گھروں اور دکانوں پر بلڈوزر چلائے گئے اسی طرح ان ملزمان کے گھروں پر بلڈوزر کیوں نہیں چلائے گئے؟

اس معاملے پر ‘نوکرشاہی ڈاٹ کام’ کے ارشاد الحق فرماتے ہیں کہ” ذرا سوچئے اگر کسی مندر کے پاس قابل اعتراض گوشت اور قابل اعتراض نعرے لکھ کر اگر پھینک دیئے جائیں اور اگر وہ لوگ پکڑےجائیں تو پورے ملک میں کہرام مچ جائے گا۔ میڈیا کے پرائم ٹائم ڈیبیٹ میں چاروں طرف اس کی بحث ہوتی رہے گی اور جس ریاست میں یہ واقعہ پیش آئے گا اس ریاست کے وزیراعلی یقینا بلڈوزر لے کرنکل پڑیں گے۔ لیکن ایودھیا میں چار پانچ مسجدوں میں خنزیر کا گوشت پھینکے جاتے ہیں۔ اور سی سی ٹی وی فوٹیج میں وہ نظرآتے ہیں کہ کون ہیں۔ ان کے سروں پر ٹوپی ہےاور کرتا پائجامہ میں ملبوس ہیں۔ اسے دیکھنے سے بظاہر یہ لگتا ہے کہ یہ لوگ مسلمان ہوسکتے ہیں۔ لیکن جب سی سی ٹوی فوٹیج کو کھنگالا جاتا ہے اور یہ لوگ پکڑے جاتے ہیں مہیش مشرا، ویمل مشرا جیسے گیارہ لوگوں کے نام سامنے آتے ہیں۔ انہیں گرفتار تو کرلیا جاتا ہے لیکن ملک کے زیادہ تر لوگوں کو یہ پتہ بھی نہیں چلتا ہے کہ اس طرح کی واردات ہوئی ہے۔ "

ارشادالحق آگے کہتے ہیں کہ ” یہ کس طرح کے سماج کو ہم دیکھ رہے ہیں کہ اسی اترپردیش میں جہاں کے وزیراعلی یوگی آدتیہ ناتھ ہیں۔ ان کے ٹویٹر ہینڈل کو آپ جاکر دیکھیں گے تو وہاں خاموشی ہے۔ گذشتہ دودنوں سے انہوں نے کوئی ٹویٹ نہیں کیا ہے۔ یہاں تک کہ انہوں نے اس اہم معاملے پر کوئی بات نہیں کہی ہے۔”

ارشادالحق کہتے ہیں کہ ” اگریہی معاملہ الٹا ہوتا تو آج یوگی آدتیہ ناتھ کے چہرے لال ہوگئے ہوتے۔ وہ چیخ رہے ہوتے، چلا رہے ہوتے۔ اور یہاں تک کہ بلڈوزر لے کر خود نکل گئے ہوتے کہ ان لوگوں کے گھروں کو منہدم کردیا جائے۔ جیسا کہ آپ نے دہلی کے جہانگیرپوری میں دیکھا۔ مسجد کو منہدم کیا گیا اس کی عمارت کے ایک حصے پر بلڈوزر چلایا گیا۔ لیکن اترپردیش میں اس طرح کے واقعہ کو انجام دینے والا مہیش مشرا، ویمل پانڈے اور اس کے گیارہ ساتھیوں میں سے سات کو گرفتار تو کرلیا گیا ہے لیکن پورے ملک میں خاموشی ہے۔ ٹی وی چینلوں پر چیخنے والے گودی میڈیا کے صحافی چپ ہیں۔ اس پر کوئی بحث نہیں کررہے ہیں۔”

انہوں نے آگے کہا کہ ” اس طرح کے معاملے اگر ہمارے سماج میں ہوتے ہیں اور حکومت چپ ہوتی ہے تو کیا اندازہ لگایا جاسکتا ہے۔”

ارشادالحق کا سوال اترپردیش حکومت کے لئے ایک چبھتا ہوا اور حق بجانب سوال ہے۔ اس سے یہ واضح ہوجاتا ہے ملزمین کے ایک خاص مذہب سے تعلق رکھنے کی وجہ کر حکومت سرد مہری سے کام لے رہے ہی۔

اس طرح کے معاملوں میں اگر حکومتوں کا دوہرا رویہ رہتا ہےتو نہ صرف اپوزیشن پارٹیوں کو ملک کی ہم آہنگی اور اتحاد وسالمیت کی بقاء کے لئے پرزور طور پر آواز بلند کرنی چاہئے بلکہ عدلیہ کو بھی اس طرح کے معاملوں میں از خود نوٹس لیتے ہوئے لوگوں کو انصاف دینا چاہئے۔