صحافت مشکل ترین پیشہ ہے لیکن یہاں جدو جہد کرنے والاہی کامیاب ہوتا ہے:ریحان غنی

پٹنہ : ریاست بہار میں ایسے دو سپوتوں کو آج خراج عقیدت پیش کیا گیا جن کی صحافتی خدمات کا اعتراف ہر کس و ناکس کو ہے ۔ نئی نسل کو آگے آکر صحافتی خدمات کے ذریعہ تیز و تند ہواؤں کے سامنے نئی شمع جلا نی ہوگی تب ہی اردو صحافت کا کاررواں بام عروج پر پہنچےگا یہ باتیں مشہور و معروف صحافی ڈاکٹر ریحان غنی نےاردو بھون میں ’’اردو میڈیا‘‘ کے زیر اہتمام منعقد ممتاز و بیباک صحافی ریاض عظیم آبادی و نسیم پھلواری کی تعزیتی نشست میں صدارتی خطاب میںکہیں۔انہوں نےکہا کہ صحافت کسی کی جاگیر نہیں ہے جو محنت کرکے آگے آئے گا وہی کامیاب و کامران ہوگا۔ انہوں نے کہا کہ ریاض عظیم آبادی نہ صرف ایک صحافی تھے بلکہ اردو تحریک کے مضبوط ستون تھے۔ مختلف تحریکوں میں شامل ہونا اور اس کو کامیاب کرانے کا ہنر جانتے تھے ۔ انہوں نے مزید کہا کہ صحافت مشکل ترین پیشہ ہے لیکن یہاں جدو جہد کرنے والاہی کامیاب ہوتا ہے اخبارات کے اپنے مسائل ہیں کارکن صحافیوں کے بھی اپنے مسائل ہوتے ہیں جس پر اخبار کے مالکان کو خاص توجہ دینی ہوگی۔ ملازمین کےحق میں پالیسی بنانی ہوگی ۔

ریاض عظیم آبادی کی تحریر سے ایوان کے اراکین و افسران خوفزدہ رہتے تھے اور ان کو دیکھتے ہی تھرا جاتے تھے: مشتاق نوری

انہوں نے بہار کے ایک قدیم اخبار کا تذکرہ کرتے ہوئے کہا کہ اس اخبار نے اپنی طاقت سے ایوان حکومت میں زلزلہ پیدا کردیا تھا اور یہ ثابت کیا تھا کہ اخبارات حکومت بنانے اور گرانے کا پورا ہنر جانتے ہیں اور اس کی صلاحیت رکھتے ہیں۔ ریاض عظیم آبادی اور نسیم پھلواری نے پوری جد وجہد کرتے ہوئے اپنے بچوں کو بہتر ین تعلیم سے آراستہ کیا اور بہتر زندگی گزارنے کا موقع فراہم کردیا ۔موصوف نے اعتراف کیا کہ صحافت ایک ایسا پیشہ جو زیادہ سود مند نہیں ہے یہی وجہ ہے کہ کارکن صحافیوں کی نئی نسل اخبارات کی جانب متوجہ ہیں نہیں ہوتی۔ وہیں تعزیتی نشست سےخطاب کرتے ہوئے مشہور افسانہ نگار و بہار اردو اکادمی کے سابق سکریٹری مشتاق احمد نوری نے کہا کہ ریاض عظیم آبادی میرے ہم عصر صحافی تھے ان سے دیرینہ تعلقات بھی رہے ہیں ۔ ریاض عظیم آبادی نے آخری عمر تک سچائی و حقائق سے سمجھوتہ نہیں کیاجس طرح انہوں نے میدان صحافت میں اپنا لوہا منوایا وہ کسی سے خفیہ نہیں ہے ۔بہار میں ابھی تک کوئی ایسا صحافی پیدا نہیں ہواجو ان کے نقش قدم پر چل رہا ہو۔ بہار کی صحافت کا المیہ ہے کہ زندگی میںجو صحافیوں کی مدد نہیں کر سکتے وہ مرنے کے بعد کیا کریں گے؟۔ ریاض عظیم آبادی کی بیباکی نے ہی انہیں اعلیٰ مقام پر پہنچنے سے روک دیا۔انہوں نے کئی بڑے اخبارات کوپروان چڑھانے میں اہم رول ادا کیا لیکن اخبار نے انہیں حصول مقصد کے بعد باہر کا راستہ دکھادیاان کی تحریر سے ایوان کے اراکین و افسران خوفزدہ رہتے تھے اور ان کو دیکھتے ہی تھرا جاتے تھے ۔

بیباک صحافی ریاض عظیم آبادی، نسیم پھلواروی کی یاد میں "اردو میڈیا” کی تعزیتی نشست

سابق رکن اسمبلی و نامور صحافی ڈاکٹر اظہار احمد نے کہا نسیم پھلواری بہت نیک فعال پر مزاح کاپی ایڈیٹر تھے انہوں نے تاحیات اردو سے وابستہ رہے اور اپنے بچوں کو اپنی کاوشوں کی بنیاد پر اعلیٰ تعلیم سے آراستہ کیا وہ ہم سبھوں کے لئے ایک سبق ہے۔سینئر صحافی سید شہباز نے کہا کہ ریاض عظیم آبادی نے جو اردو و ہندی صحافت کارہائے نمایاں انجام دیا ہے اس کی مثالیں کم ملتی ہیں ۔ ممتاز صحافی راشد احمد نے کہا کہ ریاض عظیم آبادی کی بیباکی اظہر من الشمس ہے ان کی خدمات کا احاطہ ابھی مشکل ترین امر ہے وہ ہمیشہ حقائق کی بنیاد پر صحافتی خدمات انجام دیتے رہے ان کی تحریرنہ صرف ایک تحریک کی شکل اختیا رکرتی رہی بلکہ نئی نسل کے صحافیوں کیلئے ایک سبق بھی ہے۔ معروف ادیب و افسانہ نگارفخر الدین عارفی نے کہا کہ اردو تحریک کے ذریعہ ہی بہار اردو سرکاری زبان کا درجہ ملا جس میں ریاض عظیم آبادی بھی شامل تھے انہوں نے کہا کہ موجودہ دور میں چونکہ اردو حلقہ تحریک سے دور ہوگیا ہے اسی وجہ کر اردو دوسری سرکاری زبان ہونے کے باوجود آج کسم پرسی کے شکار ہے اور اردو کو اس کا جائز حق بھی نہیں مل پارہاہے ۔سماجی تحریک کار و معروف صحافی انوار الہدیٰ نے کہا کہ نئی نسل کے لوگوں کو بزرگ صحافیوں کے نقش قدم پر چلتے ہوئے اردو کیلئے تحریک چلانی ہوگی ساتھ ہی سماجی میل جول سے لوگوں میں اتحاد پیدا کرکے آگے بڑھنا ہوگا۔ نسیم پھلواری کافی عرصے تک ہمارے اخبار سے جوڑے رہے وہ قوت جانفشانی کے ساتھ کام کرتے رہے وہ ہم سب کے لئے گارجین کی صورت ہمیشہ ساتھ رہے ۔صحافی ضیاء الحسن حمیدی نے کہا کہ اردواخبار کے مالکان کو کارکن صحافیوں پر خاص توجہ دینی چاہیے تاکہ صحافی اپنی خدمات بہتر طریقے سے انجام دے سکیں۔انہوں نے کہا کہ دوسری ریاستوں میں جس طرح سے اردو صحافیوں کی تنظیمیں پھل پھول رہی ہیں بہار میں اس کی شدید ضرورت ہے ۔ نوجوان صحافی انوار اللہ نے ریاض عظیم آبادی کی بیباک صحافتی خدمات ایک مختصر جائزہ پیش کرتے ہوئے کہا کہ ریاض عظیم آبادی کی تحریریں آج بھی نئی نسل کو نڈراور بیباک بناتی ہے۔اس تعزیتی نشست سے صحافی ارشاد الحق ‘ سینئر صحافی سید شہباز ‘سرفراز احمد ‘ انجم عالم‘ ناشاد اورنگ آبادی ‘ امتیاز کریم ‘ راجیش کمار‘ محمد حسین نے بھی خطاب کیا۔ واضح رہے کہ نشست کا آغاز امین قاسمی کی تلاوت قرآن پاک سے ہوا جبکہ نظامت کے فرائض مشترکہ طور پر صحافی اسحاق اثر و یعقوب اشرفی نےبحسن و خوبی انجام دیا۔اس موقع پر عتیق الرحمان شعبان ‘ کمال الدین پروزی ‘ مبین الہدیٰ ‘ محمد افضل‘ امجد علی‘ محمد وجاہت ‘ محمد عمران‘ محمد ابرار‘ سید مصباح ‘ محمد ارشاد ‘ عظیم اقبال ‘ظفر احسن‘ واصف اقبال و دیگر افراد شامل تھے۔
قرار داد:ریاض عظیم آباد ی اور نسیم پھلواروی پر اردو ڈائریکٹوریٹ منو گراف شائع کرے ساتھ زبان ادب کاخاص شمارہ ریاض عظیم آبادی کے نام پر شائع کیا جائے ۔