کیا 2022 میں ہندوستان کے سات کپتانوں کا ہونا ایک عالمی ریکارڈ ہے؟

نئی دہلی: ویسٹ انڈیز کے خلاف 22 جولائی سے شروع ہونے والی ون ڈے سیریز میں شکھر دھون اس سال ہندوستانی ٹیم کی قیادت کرنے والے ساتویں کھلاڑی بن جائیں گے۔
گزشتہ دو دہائیوں میں کئی بار بین الاقوامی ٹیموں کو ایک سال کے اندر کپتانی میں تبدیلی کرنی پڑی ہے۔ آئیے نظر ڈالتے ہیں مردوں کی پانچ بین الاقوامی ٹیموں پرجنہوں نے ایک سال میں پانچ سے زیادہ کپتانوں کا استعمال کیا۔
ہندوستان، 2022: سات کپتان
پیٹھ کی چوٹ کی وجہ سے وراٹ کوہلی کے میچ سے باہر ہونے کے بعد کے ایل راہل نے جوہانسبرگ ٹیسٹ میں ٹیم کی کپتانی کی تھی۔ سیریز 1-2 سے ہارنے کے بعد کوہلی ٹیسٹ کپتانی سے دستبردار ہوگئے تھے جس کے بعد روہت شرما کو تینوں فارمیٹس میں ٹیم کا کپتان بنایا گیا۔ حالانکہ ون ڈے سیریز میں زخمی روہت کی جگہ راہل کو ٹیم کی کمان سونپی گئی تھی۔
روہت گھر پر سری لنکا اور ویسٹ انڈیز کے خلاف ٹیم کے کپتان تھے اور ٹیم نے لگاتار 11 میچوں میں جیت درج کی۔ تاہم، آئی پی ایل کے بعد، ہندوستان کو ایک نئے کپتان کی طرف دیکھناپڑا جب روہت اور راہل دونوں غیر حاضر تھے۔ اس کے بعد رشبھ پنت کو جنوبی افریقہ کے خلاف ٹی 20 سیریز کے لیے کپتان بنایا گیا تھا۔
اس کے بعد ہندوستانی ٹیم کو آئرلینڈ میں ٹی 20 سیریز کے ساتھ ساتھ انگلینڈ میں ٹیسٹ میچ کی تیاری کرنی تھی۔ ایسی صورتحال میں ہاردک پانڈیا کی قیادت میں ایک ٹیم آئرلینڈ گئی جبکہ کورونا سے متاثرہ روہت کی جگہ جسپریت بمراہ نے ایجبسٹن میں ٹیسٹ ٹیم کی کپتانی کی۔ ون ڈے اور ٹی 20 آئی سیریز کے لیے روہت نے ٹیم میں واپسی کی لیکن اب انہیں ویسٹ انڈیز کی ون ڈے سیریز کے لیے آرام دیا گیا ہے۔ ان کی جگہ دھون کپتانی کریں گے۔ اس سے قبل دھون نے گزشتہ سال سری لنکا میں ایک نوجوان ہندوستانی ون ڈے ٹیم کی قیادت کی تھی۔

سری لنکا، 2017: سات کپتان
اس سال ہندوستان سے پہلے صرف ایک مرد ٹیم نے ایک سال میں سات مختلف کپتانوں کا تقرر کیا تھا۔ سری لنکا نے پانچ سال پہلے ایسا کیا تھا۔
جنوبی افریقہ کے دورے پر ٹیم کے باقاعدہ کپتان اینجلو میتھیوز نے دو ٹیسٹ اور دو ٹی ٹوئنٹی میچوں میں کپتانی کی جس کے بعد ہیمسٹرنگ انجری نے انہیں پانچ مہینوں کے لئے درکنارکردیا۔ دنیش چندیمل نے ایک ٹی ٹوئنٹی میچ میں کپتانی کرتے ہوئے سیریز 2-1 سے جیتی، لیکن ون ڈے سیریز میں کمان اپل تھرنگا کو سونپ دی گئی۔
جہاں محدود اوورز کے میچوں میں تھرنگا کپتانی کر رہے تھے، رنگنا ہیراتھ نے تین ٹیسٹ میچوں میں کپتانی کا کردار ادا کیا۔ جب چیمپئنز ٹرافی میں سست اوورریٹ کی وجہ سے تھرنگا پرپابندی لگائی گئی تو میتھیوز نے ٹیم کی کپتانی کی لیکن گھرپرزمبابوے کے خلاف ون ڈے سیریز ہارنے کے بعدانہوں نے اس عہدے سے استعفیٰ دے دیا۔ چندیمل کو ٹیسٹ کپتان بنایا گیا اور تھرنگا ون ڈے اور ٹی ٹوئنٹی ٹیموں کی ذمہ داری سنبھال رہے تھے۔ تاہم، اس دوران لاستھ ملنگا اور چمارا کاپوگیدرا نے ایک ایک ون ڈے میں کپتانی کی تھی۔
اکتوبر میں، تھیسارا پریرا ایک سال میں سری لنکا کے ساتویں کپتان بنے جب کئی کھلاڑیوں نے یو اے ای میں پاکستان کے خلاف ہونے والی ٹی ٹوئنٹی سیریز سے نام واپس لے لیاتھا۔ اس کی وجہ یہ تھی کہ سیریز کا آخری میچ لاہور میں کھیلا جانا تھا۔
زمبابوے، 2001: چھ کپتان
2001 میں اپنی بہترین کرکٹ کھیلنے والے زمبابوے کو قیادت کے بحران سے گزرناپڑا۔ سال کے ابتدائی چھ مہینے میں ہیتھ اسٹریک ٹیم کے کپتان تھے اور ٹیم نے نیوزی لینڈ کے خلاف ون ڈے سیریزکے ساتھ ساتھ ہندوستان کے خلاف تاریخی ٹیسٹ جیت درج کی تھی۔ تاہم تنخواہ اور کوٹے پر بورڈ سے اختلاف کے بعد انہوں نے عہدہ چھوڑ دیا۔ اسٹریک کے اچانک استعفیٰ کے متنازعہ حالات کی وجہ سے، گائے وہٹل نے شروع میں ہندوستان اور ویسٹ انڈیز کے خلاف ہوم سہ فریقی سیریز کے لیے ٹیم کی قیادت کرنے سے انکار کر دیا۔ گرانٹ فلاور نے ابتدائی میچ میں کپتانی کی لیکن اسٹریک دوسرے میچ کے لئے کپتانی میں واپس آگئے۔ اس کے بعد وائٹل بالآخر تین میچوں میں زمبابوے کے تیسرے کپتان بنے۔
اسٹریک کو جولائی میں دوبارہ کپتان مقرر کیا گیا لیکن تین ماہ بعد انہوں نے اپنی باؤلنگ پر توجہ مرکوز کرنے کے لیے دوبارہ استعفیٰ دے دیا۔ لیگ اسپنر برائن مرفی نے شارجہ میں سہ فریقی سیریز کے لیے ان کی جگہ لی، جب کہ سال کے آخر تک ایلسٹر کیمبل اور اسٹورٹ کارلائل نے بھی ٹیم کی کپتانی کی۔

انگلینڈ، 2011: چھ کپتان
انگلینڈ نے اینڈریو اسٹراس کی کپتانی میں آسٹریلیا میں 3-2 سے ایشز سیریز جیت کر سال کا آغاز کیاتھا۔ ایک سال قبل ٹیم کو پہلی بار ٹی 20 ورلڈ چیمپئن بنانے والے پال کولنگ ووڈ نے دو ٹی ٹوئنٹی میچوں میں ٹیم کی کپتانی کی اور پھر اسٹراس ون ڈے سیریز کے لیے واپس آئے۔
اسٹراس نے ون ڈے ورلڈ کپ کے سیمی فائنل میں جگہ بنانے سے محروم ہونے کے بعد ون ڈے ٹیم کی کپتانی سے استعفیٰ دے دیا۔ انگلینڈ کے سلیکٹرز نے اسٹراس کو ٹیسٹ کپتان کے طور پر برقرار رکھا اور ون ڈے اور ٹی ٹوئنٹی ٹیم کی کمان بالترتیب ایلسٹر کک اور اسٹورٹ براڈ کو سونپ دی۔ جب آئرلینڈ کے خلاف ون ڈے میں کک کو آرام دیا گیا تو ڈبلن میں پیدا ہونے والے اوئن مورگن نے کپتانی سنبھالی۔ اس کے بعد گریم سوان کو زخمی مورگن اور براڈ کی جگہ تین ٹی ٹوئنٹی میچوں میں کپتانی کا موقع ملا۔
آسٹریلیا، 2021: چھ کپتان
گزشتہ سال جنوری میں آسٹریلیا کو ہندوستان کے ہاتھوں بارڈر گواسکر ٹرافی میں شکست کا سامنا کرنا پڑا۔ یہ ٹیسٹ کپتان ٹم پین کے لیے آخری سیریز ثابت ہوئی۔ ایشز سے قبل ان کے ایک خاتون ساتھی کو بھیجے گئے فحش پیغامات میڈیا میں سامنے آئے اور انہوں نے کپتانی سے استعفیٰ دے دیا۔ پیٹ کمنز نئے ٹیسٹ کپتان بنے اور اپنی پہلی سیریز میں انہوں نے 4-0 سے جیت درج کی۔ تاہم ایڈیلیڈ ٹیسٹ سے قبل ایک کورونا سے متاثرہ شخص کے قریبی رابطے کے طور پر شناخت ہونے کی وجہ سے انہیں میچ سے باہر بیٹھنا پڑا۔ جس کی وجہ سے اسٹیو اسمتھ کو تین سال بعد ٹیم کی کپتانی کا موقع ملا۔
ریگولر کپتان ایرون فنچ کوگھٹنے کی انجری کے باعث ایلکس کیری کو ویسٹ انڈیز کے خلاف ون ڈے سیریز کے لیے کپتان مقرر کیا گیا۔ اگست میں، جب پہلی پسند کے کئی کھلاڑیوں کو ٹی 20 کی جانب سے آرام دیا گیا تومیتھیو ویڈ نے بنگلہ دیش سیریز میں ٹیم کی قیادت کی۔ آخر میں، فنچ نے ٹیم میں واپسی کرتے ہوئےانہیں پہلا ٹی20 ورلڈ کپ کا خطاب دلایا۔