معروف دانشور محمد اسد پر آئی او ایس کا دوروزہ سمینار

نئی دہلی۔: معروف تھنک ٹینک ادارہ انسٹی ٹیوٹ آف آبجیکٹیو اسٹڈیزکی جانب سے معروف مفکر ، صحافی اور دانشور محمد اسد کی حیات وخدمات پر دوروزہ بین الاقوامی سمینار کا آج پہلا دن ہے ۔ افتتاحی اجلاس میں دنیا کے مختلف ممالک سے دانشوران اور اہل علم نے ویڈیو کانفرنسنگ کے ذریعہ شرکت کی اور ان کی خدمات کا اعتراف کرتے ہوئے کہاکہ انہیں نظر انداز کردیاگیاتھا جس پر آئی او ایس نے سمینار منعقد کرکے ایک تاریخی کارنامہ انجام دیا ہے ۔

مرحوم محمداسد آسٹریا کے ایک یہودی خاندان میں سال 1900 میں پیدا ہوئے تھے ، اعلی تعلیم حاصل کرنے کے بعد انہوں نے مختلف ممالک کا دورہ شروع کیا ۔ عرب مماک کا دورہ کرنے کے بعد انہوں نے اسلام کا گہرائی سے مطالعہ شروع کیا اور جرمنی کی راجدھانی برلن میں انہو ں اپنے قیام کے دوران اسلام قبول کیا ، طویل عرصہ تک انہوں نے سعودی عر ب میں وہاں کے باشاہ سلطان عبد العزیز کے ساتھ ان کے مشیر کے طور پر کام کیا ۔انہوں نے ہندوستان کا بھی دورہ کیا جہاں ان کی ملاقات علاقہ اقبال سے ہوئی ۔ان کے مشورہ سے انہوں نے اسلامی ریاست کیلئے قوانین پر کام کیا ، اقوام متحدہ میں پاکستان کی جانب سے نمائندہ بھی مقرر کئے گئے ۔ زندگی کا آخر ی حصہ انہوں نے امریکہ میں گزارا ۔
پروفیسر عمر حسن کسولے سکریٹری جنرل آئی آئی آئی ٹی امریکہ نے اپنے صدارتی خطاب میں آئی او ایس کی تعریف کرتے ہوئے کہاکہ محمد اسد کی عظیم خدمات رہی ہیں لیکن انہیں نظر انداز کردیاگیاتھا تاہم آئی او ایس نے ان پر سمینار منعقد کرکے تاریخی کارنامہ انجام دیا ہے ۔ وہ نئی نسل اور نوجوانوں کیلئے مشعل راہ تھے ۔ زندگی کے متعدد شعبوں میں انہوں نے اپنے علم اور فکر سے دنیا کو فائدہ پہونچایاہے ۔ملیشیا کے سابق نائب وزیر اعظم ڈاکٹر انور ابراہیم نے اپنے خطاب میں کہاکہ محمد کی ولادت یورپ میں ہوئی تھی لیکن انہوں نے اپنی پوری زندگی اسلام افکار وتعلیمات کو فروغ دینے میں گزاری اور ہمیشہ اسی نہج پر انہوں نے غور و فکر کیا ، اپنے افکار سے انہوں نے یورپ ، عرب اور ایشیا سبھی خطہ کے مسلمانوں کو فائدہ پہونچایا ۔امریکہ کے معروف دانشور ڈاکٹر جوسیف لینہوف نے اپنے خطاب میں کہاکہ محمد اسد ذہین ، زمانہ شناس اور عالمی افکار کے حامل تھے ، ان کی سوچ میں اعتدال کے ساتھ گہرائی کا عنصر پایا جاتھا ، انہوں نے اسلام قبول کرنے کے بعد عالمی پیمانے پر مسلمانوں کے فلاح وبہبود کیلئے کام کیا تھا۔
قطر کے معروف عالم دین ڈاکٹر علی محی الدین القرہ داغی نے اپنے خطاب میں کہاکہ سب سے پہلے میں ڈاکٹر محمد منظور عالم اور آئی او ایس کو مبارکباد پیش کرتاہوں کہ انہوں اس اہم شخصیت پر عالمی کانفرنس کا اہتمام کیا ہے ۔انہوں نے کہاکہ محمد اسد نے جب عالم عرب کا دورہ کیا ، فلسطین کے مسلمانوں اور برطاینہ کے استعمار اور انگریزوں کی سازشوں کو دیکھاتو اس پر انہوں نے مضمون لکھنا شروع کیا جو برطاینہ کے اخبارات اور میگزین میں شائع ہوئے ۔ اسی دوران انہوں نے اسلام سے متاثر ہوکر قرآن وحدیث کا مطالعہ شروع کیا ، وہ قرآن کریم کی اس آیت سے بیحد متاثر ہوئے جس میں کہاگیا ہے کہ ہم جس کو ہدایت دیتے ہیں اس کو دنیا و آخر ت کی بھلائی سے نوازتے ہیں۔انہوں نے توریت میں نبی کریم صلی اللہ علیہ وسلم کے بارے میں بیان کردہ صفات کا مطالعہ کیا اور نبی کریم کی سیرت سے موازنہ کیا اور پھر نبی کریم صلی اللہ علیہ وسلم کی رسالت پر ان کو شرح صدر ہوا ۔توریت میں انہوں نے یہ بھی دیکھاکہ آخری نبی صلی اللہ علیہ وسلم کے تعلق سے یہ پیشن گوئی کی گئی تھی کہ وہ صحرا سے آئیں گے جسے انہوں نے سچ پایا اور پھر اسلام قبول کرلیا اور زندگی بھراہل اسلام کی خدمت کی ۔
آئی او ایس کے چیرمین ڈاکٹر محمد منظور عالم نے کہاکہ مرحوم اسد کی شخصیت نئی نسل کیلئے مشعل رہ ہے ۔ وہ عظیم مفکر ، دانشور اور ہمت جہت خوبیوں کے پیکر تھے ۔ انہوں نے کئی ساری کتابیں تصنیف کی ہیں جسے دنیا بھر کے اہل علم میں مقبولیت حاصل ہے ۔انہوں نے مزید کہاکہ آئی او ایس کی جانب سے ہر سال دو شخصیت پر دو سمینار منعقد کیا جاتاہے ۔ ایک قومی سمینار اور ایک بین الاقوامی سمینار۔ بین الاقوامی سمینار کیلئے مرحوم محمد اسد کا انتخاب کیاگیا جس کی تجویزملیشیا کے سابق نائب وزیر اعظم ڈاکٹر محمد انور ابراہیم نے پیش کی تھی ۔
نئی دہلی میں بوسینیاکے سفیر جناب محمد کینگ نے اپنے خطاب میں مرحوم محمد اسد کی زندگی کے متعدد پہلوﺅں کا تذکرہ کرتے ہوئے کہاکہ انہوں نے انگریزوں کے مظالم اور اسلام خلاف بڑھتی ہوئی نفرت کو جب دیکھا تو خود اسلام کا مطالعہ کیا ، توریت کا بھی مطالعہ اور انہوں نے محسوس کیا توریت اور دیگر آسمانی کتابوں میں جو پیشن گوئی کی گئی تھی وہ سچ ثابت ہورہی ہیں چناچہ انہوں نے اسلام قبول کرلیا ۔ انہوںنے مزیدکہاکہ مجھے بیحد خوشی ہوئی کہ آئی او ایس ایسی عظیم شخصیات پر سیمنار منعقد کرکے نوجوانوں کوو اقف کرانے کام کررہاہے جن کو فراموش کردیاگیاتھا ۔ افتتاحی اجلاس میں پروفیسر عبد الماجد خان نے بھی اپنے خیالات کا اظہار کیا ۔
شروع میں آئی او ایس کے سکریٹری جنرل پروفیسر زیڈ ایم خان نے سمینار اور آئی او ایس کا تعارف پیش کیا ۔ پروفیسر افضل وانی نے پہلے سیشن کی نظامت کا فریضہ انجام دیا ، مولانا شاہ اجمل فاروق ندوی کی تلاوت سے آغاز ہوا اور پروفیسر سید جمال الدین نے شکریہ ادا کیا ۔ اس موقع پر معروف دانشورفوات سیزگین پر آئی او ایس کی جانب سے شائع ہونے والی کتاب کا رسم اجراءبھی عمل میں آیا ۔ واضح رہے کہ آئی او ایس کا یہ سمینار آئی او ایس کے آڈیٹوریم میں منعقد ہوا جس میں زیادہ شخصیات نے ویڈیو کانفرنسنگ کے ذریعہ شرکت کی ۔ یہ کانفرنس افتتاحی اور اختتامی اجلاس کے علاوہ کل پانچ بزنس سیشن پر مشتمل ہے جس میں ملک اور بیرون ملک کے اسکالرس ، دانشور اپنا مقالہ پیش کررہے ہیں ۔یہ سمینار آئی آئی آئی ٹی امریکہ کے اشتراک سے منعقد ہورہاہے ۔