بہار میں صنعت لگانے والوں کو نہیں ہوگی کوئی دشواری : نتیش

پٹنہ: وزیر اعلیٰ نتیش کمار نے آج وزیر اعلیٰ سکریٹریٹ واقع’سنواد ‘میں شمع روشن کرکے’ بہار سرمایہ کاروں کی ملاقات 2022‘(بہار انوسٹرس میٹ2022) کا افتتاح کیا۔ اس موقع پر منعقد پروگرام سے خطاب کرتے ہوئے وزیر اعلیٰ نے کہا کہ بہارسرمایہ کاروں کی ملاقات(بہار انوسٹرس میٹ) میں آپ سب خیر مقدم کر تاہوں۔ بہار انوسٹرس میٹ کا انعقاد ہوا یہ خوشی کی بات ہے۔ آج کے اس پروگرام میں تمام لوگوں نے اپنی اپنی باتیں رکھی ہیں۔ سرمایہ کاروں نے بھی اپنے تجربات بتائے ہیں۔ جن نکات کی طرف توجہ مبذول کرائی گئی ہے ان کو حل کرنے کی کوشش کی جائے گی۔ انہوں نے کہا کہ صنعت کے شعبہ میں ترقی کے لیے بہت سے کام کیے جا رہے ہیں۔ جو لوگ کورونا کے دور میں باہر تھے ان کو لانے کے ساتھ ساتھ ہم نے ان کی مدد کے لیے مسلسل ہم لوگوں نے کام کیا۔ جو لوگ کورونا کے دوران یہاں واپس آئے وہ اچھا کام کر رہے ہیں۔ مغربی چمپارن کے چنپٹیا میں ان کے ذریعہ کئے گئے کام کو ہم نے جا کر دیکھا ہے۔ نئی صنعتی فروغ پالیسی 2022 بنائی گئی، اس میں کئی دیگر چیزیں شامل کی گئی ہیں۔ صنعت کے فروغ کے لیے مختلف سہولیات فراہم کی جا رہی ہیں۔ ٹیکسٹائل اور چمڑے کی صنعت کو فروغ دیا گیا ہے۔ سال 2007 میں ہی ایتھنول کی پیداوار کے لیے اس وقت کی مرکزی حکومت کو ایک تجویز بھیج کر اجازت مانگی گئی تھی، لیکن اسے نا منظور کر دیا گیا تھا۔ اگر اس وقت اس تجویز کو منظور کر لیا جاتا تو ایتھنول کی پیداوار کے شعبے میں ایک بڑے سرمایہ کار 24 ہزار کروڑ روپے کی سرمایہ کاری کرنے کو تیار تھے۔

انہوں نے کہا کہ سڑک، تعلیم، صحت سمیت تمام شعبوں میں ترقی کے لیے کام ہم لوگوں نے کام کیا ہے۔ لا اینڈ آرڈرکو بہتر کیا گیا ہے۔ پولیس کی بڑی تعداد کو بھی بحال بھی کیا گیا ہے۔ لا اینڈ آرڈرکو بہتر بنائے رکھنے کے لیے پولیس اور انتظامیہ پوری طرح چوکس ہے۔ اس سلسلے میں ڈی جی پی نے آپ سب کو تفصیلی جانکاری دی ہے۔ ریاست میں کاروبار میں نمایاں اضافہ ہوا ہے۔ ہم صنعت کی ترقی کے لیے مسلسل کوشاں ہیں۔ ایتھنول کی پیداوار کی تجویز کی منظوری کے بعد ریاست میں ایتھنول کی تیاری کا کام شروع ہو گیا ہے۔ کئی سرمایہ کاراور آ رہے ہیں۔ اس سے روزگار کے مواقع مزید بڑھیں گے۔ انہوں نے کہا کہ اگر آپ لوگوں کو یہاں کام کرنے میں کوئی دشواری آئے تو ڈی ایم، ایس پی کوفوری طور پر بتائیں، مسائل کو حل کیا جائے گا۔ اگرکوئی ہراساں کرے،کوئی پریشان کرے تو ان کے خلاف سخت کارروائی ہو گی۔ اس معاملے میں کسی کوبھی بخشا نہیں جائے گا۔ صنعت لگا نے والوں کو اگر مقامی سطح پر کوئی پریشان کر تا ہے تو ان کے خلاف کارروائی کی جائے گی۔گڑبڑکر نے والوں کو چھوڑا نہیں جائے گا۔ ہم لوگ کسی قسم کی دشواری نہیں ہونے دیں گے، انتظامی تعاون ہمیشہ فراہم رہے گا۔ ہم نے حکام سے کہا ہے کہ کوئی بھی کہیں اگر انڈسٹری لگائے تو انہیں کسی قسم کی کوئی پریشانی کا سامنا نہ کرنا پڑے، اس بات کا پورا خیال رکھا جائے۔

وزیر اعلیٰ نے کہا کہ یہ بڑی خوشی کی بات ہے کہ آپ لوگ بہار میںصنعتیں لگانے آ رہے ہیں۔ آپ کو کسی قسم کی پریشانی کا سامنا نہیں کرنا پڑے گا، بہار میں جو بھی یونٹ پیداوار کرے گی، اسے سرکاری خریداری میں ترجیح ملے گی۔ اس کے لیے پالیسی بنائی جا رہی ہے۔ ایتھنول کے لیے 17 یونٹ لگانے کی اجازت ملی ہے، ہم لوگ چاہتے ہیں کہ اس میں مزید اضافہ کیا جائے۔ یہاں کا تیار کردہ سامان باہر بھی جا رہا ہے، فروخت ہو رہا ہے۔ یہ بڑی خوشی کی بات ہے کہ نہ صرف ملک کے مختلف حصوں میں بلکہ بیرون ممالک بھی یہاں کا سامان جا رہا ہے۔ انہوں نے کہا کہ بیاڈا کی زمین پر گریڈ اے وئر ہا ¶س آپ لگا سکیں گے۔ ریاستی حکومت لاجسٹک پالیسی لائے گی۔ زمین کی شرح کم کی گئی ہے ۔ وہاں تک ٹرانسپورٹ کی سہولت بھی آسان بنائی جائے گی۔ آپ کو کسی طرح کی دشوار ی نہ ہو اس کے لیے ہم لوگ ہر ممکن مدد کریں گے۔ اگر آپ کو کسی قسم کی پریشانی ہو گی تو ڈی ایم اورایس پی آپ کے ساتھ رابطے میں رہیں گے۔ ہم لوگ آپ کی تجویز پر بھی کام کریں گے۔ جب ضرورت پڑے گی تو آپ کے مشوروں پر محکمہ صنعت غور کرے گا اور اس طرح کے انعقاد میں جہاں میری ضرورت ہو گی وہاں موجود رہوں گا۔آپ مطمئن ہو کر یہاں کام کریں۔ ہم آپ کواتنا یقین دلاتے ہیں کہ آپ کا کوئی بھی مسئلہ ہو حل ہو جائے گا۔ آپ جہاں بھی انڈسٹری لگائیں گے وہاں بھی جا کرہم اسے دیکھیں گے۔ میں آپ سب کا پھر خیر مقدم کر تا ہو۔
پروگرام میں وزیر اعلیٰ کومحکمہ صنعت کے پرنسپل سکریٹری مسٹر سندیپ پونڈرک نے جوٹ سے بناہوا گلدستہ پیش کر کے استقبال کیا۔
پروگرام کے دوران صنعت محکمہ کے پرنسپل سکریٹری مسٹر سندیپ پونڈرک نے ایک پرزنٹیشن کے ذریعے بہار میں سرمایہ کاری کے مواقع کے موضوع پر تفصیلی جانکاری دی۔ بہار میں سرمایہ کاری کی پالیسی پر مبنی ایک مختصر فلم بھی دکھائی گئی۔
پرو گرام میں نائب وزیر اعلیٰ تیجسوی پرساد یادو، وزیر خزانہ اور کمر شیل ٹیکس کے وزیر وجئے کمار چودھری ، صنعت کے وزیر میر کمار مہاسیٹھ چیف سکریٹری عامر سبحانی، ڈی جی پی مسٹر ایس کے سنگھل، ڈیولپمنٹ کمشنر مسٹر وویک کمار سنگھ، ایڈیشنل چیف سکریٹری، فینانس ڈاکٹر ایس سدھارتھ، پرنسپل سکریٹری صنعت مسٹر سندیپ پونڈرک، لیبر روسائل ، ماحولیات، جنگلات اور موسمیاتی تبدیلی محکمہ کے پرنسپل سیکریٹری مسٹر اروند کمار چودھری، پرنسپل سکریٹری محکمہ توانائی مسٹر سنجیو ہنس، کمرشل ٹیکس ڈیپارٹمنٹ کی سکریٹری ڈاکٹر پرتیما ایس ورما، سکریٹری سڑک تعمیرات محکمہ مسٹر سنجیو پڈوکلکٹی، ڈائرصنعت مسٹر پنکج دکشت، جیویکا کے سی ای او مسٹر راہل کمار، مائیکرو میکس بائیو فیولز پرائیویٹ لمیٹڈ کے ایم ڈی مسٹر راجیش اگروال، اڈانی لاجسٹکس کے سی ای او اور ایم ڈی مسٹر وکرم جئے سنگھانی، اوسوال گروپ کے ایگزیکٹو ڈائریکٹر مسٹر رشبھ جیسوال، ٹی وی ایس لاجسٹکس اورٹی وی ایس سپلائی چین کے سی ای او مسٹر رام ناتھ سبرامنیم، ہائی اسپیڈ کمرشل وینچرز کے سی ای او مسٹر سدھارتھ مشرا اور بی پی سی ایل مارکیٹنگ ڈائریکٹر مسٹر ایس کے جین نے بھی خطاب کیا۔
اس موقع پر دیگر سینئر افسران اور صنعت دنیا کے نمائندے موجود تھے، جبکہ ویڈیو کانفرنسنگ کے توسط سے ڈی ایم اور ایس ایس پی /ایس پی منسلک تھے۔