اگر عتیق احمد اور اسد نے  ظفر سریش والا کی نصیحت مان لی ہوتی تو شاید اس انجام کو نہیں پہنچتے

ممبئی: عتیق احمد نے سال 2019 میں معروف شخصیت ظفر سریش والا سے سابرمتی جیل جانے سے قبل فون پر جیل کے اندر ظلم سے نجات کے لئے مدد مانگی تھی۔ حالانکہ ظفر سریش والا نے عتیق احمد کو ظلم کے راستے سے یوٹرن لینے کی اپیل کی تھی۔ ساتھ ہی یہ بھی کہا تھا کہ بیٹے اسد کو اپنے سائے سے بھی دور رکھیں کیونکہ اسد کافی ہونہار لڑیا ہے اور یہ تعلیم حاصل کر بہت اچھا کرسکتا ہیں۔ انہوں نے عتیق احمد کو اس راستے کے بھیانک انجام سے آگاہ کیا تھا۔ عتیق کی اہلیہ کو بھی فون پر ظفر سریش والا نے بیٹے کو عتیق کے سائے سے دور رکھنے کی گذارش کی تھی۔

جب اسد نے جیل میں بند عتیق سے فون ظفر سریش والا کی بات کرائی

ٹی وی چینل آج تک و ایک دیگر نیوز چینل کو دیئے گئے ایک انٹرویو میں ظفرسریش والا نے یہ انکشاف کیا ہے۔ انہوں نے کہا کہ سال 2019 کی بات ہے جب تعلیم و تربیت مشن سے جڑے ایک غیر مسلم نے ہم سے کہا کہ الٰہ آباد کے کچھ لوگ ملنا چاہتے ہیں۔ میں نے ملاقات کی حامی بھردی اور دو دنوں کے بعد وہ تقریبا 19 سال کے ایک خوبرونوجوان کے ساتھ میرے پاس آئے۔ اس نوجوان نے الٰہ آباد کی خاص مٹھائی بھی میری خدمت میں پیش کی۔ جب اس نوجوان سے میں نے کام کے سلسلے میں دریافت کیا تو اس نوجوان نے مجھے اپنا تعارف کراتے ہوئے کہا کہ میرا نام اسد ہے اور میں ایمیٹی یونیورسٹی میں قانون کا طالب علم ہوں اور میرا فرسٹ ایئر ہے۔ میں نے فرسٹ ایئر میں تقریبا 85 فیصد نمبر حاصل کئے ہیں۔ اس نے کہا کہ میرے والد کا نام عتیق احمد ہے۔ جب میں نے یہ نام سنا تو چونک گیا۔ میں نے کہا کہ وہ عتیق احمد جو انڈرورلڈ ڈان ہیں؟ تو اس نے کہا کہ ہاں۔ یہ کہتے ہوئے اس نے اپنے والد کو فون لگادیا۔ میں حیرت زدہ ہوگیا کہ وہ جیل میں ہیں تو بات کیسے کر سکتے ہیں۔

ظفر سریش والا نے عتیق احمد، بیوی شائستہ اور بیٹے اسد کو بھیانک انجام سے کیا تھا آگاہ

عتیق احمد نے فون پر مجھے کہا کہ ظفر بھائی میں آپ کی بڑی عزت کرتا ہوں۔ میں آپ سے کبھی ملا نہیں لیکن آپ کو ٹی وی پر آپ کی عدالت کے علاوہ کئی پروگروگراموں میں آپ کو دیکھا ہے۔ آپ بہت سنجیدگی کی بات کرتے ہو۔ آپ بڑے آدمی ہو۔ پھر میں ان سے کہا کہ میں تو آپ کے کسی کام کا نہیں ہوں بتائیے۔ پہلی بات تو میں جیل میں کسی سے پہلی مرتبہ بات کررہا ہوں۔ اس کے بعد عتیق احمد نے کہا کہ ظفر بھائی میں آپ سے بس اتنا چاہتا ہوں کہ آپ احمد آباد کے ہو اور احمد آباد کے آپ مانی ہوئی شخصیت ہو۔ پھر میں نے کہا کہ بھائی میرا جیل سے تو کوئی تعلق نہیں ہے۔ اس پر عتیق احمد نےکہا کہ میں بس اتنا چاہتا ہوں کہ جب مجھے سابرمتی جیل شفٹ کر رہے ہیں تو میرے ساتھ ظلم و زیادتی نہ ہو۔ میں شوگر کا مریض ہوں مجھے وقت پر سب کچھ مل جائے۔ اس پر میں نے کہا کہ احمد آباد سنٹرل جیل کے لوگ بہت سنجیدہ ہیں اور آپ کے ساتھ ایسا کوئی معاملہ نہیں کریں گے۔

اس وقت میرے دل میں یہ خیال آیا کہ انہیں آگاہ کرنا چاہئے۔ پھر میں نےان سے کہا کہ عتیق بھائی آپ نے ایک بات کی۔ لیکن میں بھی آپ کو ایک بات کہنا چاہتا ہوں۔ پتہ نہیں مجھے زندگی میں پھر آپ سے بات کرنے کا موقع ملے یہ نہ ملے۔ آپ نے ایک راستہ چنا ہے اور میں ایک بات کہوں گا کہ جس راست پر آپ ہو اس راستے کی منزل بہت بھیانک ہے۔ اس کا اینڈ جو ہے وہ بہت ہی بھیانک ہے۔ آپ کتنے آگے ہو، واپس مڑسکتے ہوا یا نہیں مڑ سکتے ہو یہ میری کہنے کی کوئی حیثیت نہیں ہے لیکن یہ بھیانک راستہ ہے میں آپ سے ایک التجا کرتا ہوں کہ آپ کا جو یہ بیٹا ہے اسد جس سے ابھی میری بات چیت ہوئی ہے۔ مجھے لگا کہ یہ بہت ہی ہونہار بچہ ہے۔ اتنے اچھے مارکس ہیں۔ کس کو ملتے ہیں اتنے مارکس۔ تو آپ اپنی پرچھائی سے اس بچے کو دور رکھنا۔ آپ نے ایک راستہ چن لیا ہے۔ وہ آپ کا بیٹا ہے۔ مگر بیٹے پر آپ کی چھینٹ بھی نہیں پڑنی چاہئے۔ آپ اسے پڑھنے دو۔ آپ خود سے اس کو بالکل الگ رکھنا۔ یہ میری آپ سے اتنی التجا ہے۔ اس کے بعد فون رکھ دیا۔

اس کے بعد میں نے اسد کو بھی سمجھایا کہ میرا بھی بیٹا تمہاری عمر کا ہے۔ میں آپ کو ایک باپ کی حیثیت سے کہنا چاہتا ہوں کہ ابھی آپ کا اس دنیا سے کوئی واسطہ نہیں ہے۔ آپ نے جس طرح سے پڑھائی کی ہے۔ آپ میں آپ کے باپ کا کوئی اثر نہیں آیا ہے۔ یہ راستہ بڑا خطرناک ہے۔ جس راستے پر آپ کے والد چل رہے ہیں اس کا انجام بہت ہی برا ہے۔ آپ تاریخ اٹھاکر دیکھ لو۔ پھر میں اسے ایک مثال دی۔ کچھ دن قبل ایک فلم آئی تھی رئیس ۔ اس میں شاہ رخ خان نے احمد آباد کے ڈان لطیف کا کردار ادا کیا تھا۔ میں نے کہا کہ میں نے لطیف کو بچپن سے دیکھا تھا۔ ان کا بڑا سکہ تھا۔ گجرات میں ان کے نام کے بغیر پرندہ پر نہیں مارسکتا ہے۔ ان کےجوئے خانے چلتے تھے۔ ٹرکیں بھر بھر کر ان کی چاندی اترتے ہوئے میں نے دیکھا تھا۔  ان کا انجام بہت خطرناک ہوا اور آج ان کے بچے پائی پائی پائی کو محتاج ہیں۔ ان کا کوئی نام لینے والا نہیں ہے۔ ان کو کوئی پوچھنے والا نہیں ہے۔ یہی ہوتا ہے۔ میں جب اسد کو دروازے تک چھوڑنےگیا تھا میں نے اس سے ہاتھ جوڑ کر کہا کہ اس راستے سے دور رہو۔ پھر اس نے اپنی والدہ کو فون لگادیا تو میں نے ان سے بھی یہی کہا کہ آپ کے بچے سے ہماری ملاقات ہوئی۔ میں آپ سے یہی التجا کروں گا کہ اپنی اولاد عتیق احمد سے دور رکھنا۔ یہ بہت آگے نکلے گا۔ کئی مرتبہ بیٹے باپ سے الگ ہوتے ہیں۔ میں نے تینوں کو یہی بات کہی کہ اس راستے کا انجام بہت بھیانک ہے۔ اور یہ حقیقت بھی ہے۔ مبئی سمیت دنیاکے بڑے بڑے سورما جن کا بڑا دبدبہ تھا آج ان سے مکھی بھی نہیں اڑتی۔

ظفر سریش والا نے کہا کہ سیاسی پارٹیاں ایسے لوگوں کو استعمال کرتی ہیں۔ لطیف کا بھی سیاسی استعمال ہوا۔ اس لئے میں نے اسد کو سمجھایا۔ جب اسد چلاگیا تو میں نےسوچھا کہ عتیق اور اسد میں آسمان زمین کا فرق ہے۔ یہ تو عتیق کا بیٹا لگ ہی نہیں رہا تھا۔ وہ بہت ہی شائستہ بچہ تھا لیکن دیکھئے غلط راستہ اختیار کرنے سے انجام کیا ہوا۔

انٹرویو کے دوران ظفر سریش والا نے کہا کہ مسلمانوں کے رول ماڈل رسول اللہ ﷺ ہیں۔ ان کی زندگی ۔ حضرت علی ہیں۔ حضرت عثمان، ابوبکر، حسن حسین ہیں۔ ان کی زندگی میں تھوڑا بھی ایسا عنصر ہے۔ انہیں رول ماڈل بنانا چاہئے۔ عتیق کے ساتھ جو ہوا میں اس پر بولنا نہیں چاہتا۔ لیکن یہ حقیقت ہے کہ اس کے ساتھ جو ہوا بھیانک ہوا۔ کیونکہ اس راستے کا انجام یہی ہے۔ غیرمسلموں کے بھی ہیرو ہوتے ہیں۔ ان سے میں کہوں گا کہ وہ رام چندر اور کرشنا کو ہیرومانیں۔ انہیں اپنا رول ماڈل مانیں۔ ہمارے ہیرو حضرت محمد ﷺ ہیں، صحابہ ہیں، مہاتماگاندھی ہیں۔ ان پر بھی نامساعد حالات آئے۔ ایسے حالات سب پر آتے ہیں۔ ایسا وقت سنبھلنے کا وقت ہوتا ہے۔ اس وقت غلط فیصلہ لینا بھاری پڑجاتا ہے۔

ظفر سریش والا نے کہا کہ اسد کے انجام پر مجھے بہت افسوس ہوا۔ اگر یہ پڑھ رہا ہوتا تو یہ کہاں کا کہاں پہنچ جاتا۔

عتیق احمد و اسد کی انجام  پر افسوس کا اظہار کرتے ہوئے انہوں نے کہا کہ ہمارے ملک کی سب سے بڑی خوبی یہ ہے کہ دشمن کو بھی سہولیات فراہم کرتے ہیں۔ سب نے دیکھا کہ قصاب نے گولی چلائی۔ لیکن کیاہم نے اسے گولی ماری؟ نہیں، اسے پروپر ٹرائل دی گئی، لوور کورٹ، ہائی کورٹ سے لے کر سپریم کورٹ تک۔ ہمارے قانون میں ہے کہ ملک کا دشمن ہے، دہشت گرد ہے، لیکن پھر بھی اسے حکومت ہند نےوکیل بھی دیا۔ اور ریویو پیٹیشن کی بھی سہولت دی۔