سبھوں کو اردو ۔ ہندی کے استعمال کا حق : نتیش

پٹنہ :وزیر اعلیٰ نتیش کمار نے وزیر اعلیٰ سیکرٹریٹ میں واقع ‘سنواد’ میں اردو مترجمین اور دیگر اردو اہلکاروں کے تقررنامہ تقسیم پروگرام کا شمع روشن کرکے افتتاح کیا۔
اس موقع پر منعقدہ پروگرام کو خطاب کرتے ہوئے وزیر اعلیٰ نے کہا کہ آج کے پروگرام میں آپ سب کا خیرمقدم کرتا ہوں۔ اس پروگرام میں183 اردو مترجمین اور دیگر اردو اہلکاروں کو تقرری لیٹر تقسیم کے گئے ہیں، جن میں اردو مترجمین ، معاون اردو مترجم، نچلے درجے کے اردو کلرک اور نچلے درجے کے ہندی کلرک شامل ہیں۔ میں تمام منتخب لوگوں کو مبارکباد دیتا ہوں۔
وزیراعلیٰ نے کہا کہ جب ہم نے جائزہ لیا کہ کتنے عہدے خالی ہیں اور کتنی بحال کی گئی ہیں تو بتایا گیا کہ کل منظور شدہ عہدے 2247 ہیں جن میں 1294 عہدوں پر تقرری کا عمل آخری مرحلے میں ہے۔ تمام منظور شدہ آسامیاں جلد پ ±ر کر دی جائیں گی۔ ہر کسی کو ہندی اور اردو استعمال کرنے کا حق ہے۔ جس طرح ہندی ہے اسی طرح اردو بھی ہے، دونوں کو یکساں منظوری حاصل ہے۔ حکومت ہندی کے ساتھ اردو کو بھی فروغ دے رہی ہے۔ اگر لوگ ہندی کے ساتھ اردو بھی سیکھیں تو ان کے علم میں اضافہ ہوگا۔ آپ تمام لوگ جن کا تقر کیا گیا ہے، اپنی ذمہ داری کو بہتر طریقے سے نبھائیں اور جہاں بھی رہیں وہاں کے لوگوں کو اردو سکھائیں۔ اگر آپ ہندی کے ساتھ اردو سیکھیں گے تو آپ کی زبان مزید بہتر ہوگی۔

انہوں نے کہا کہ سال 2008 میں ہی ہم نے کہا تھا کہ ہر جگہ اردو اساتذہ کے علاوہ تمام منظور شدہ اسامیوں کو بحال کیا جائے تاکہ زیادہ سے زیادہ لوگ اردو جان سکیں۔ ہم چاہتے ہیں کہ سماج میں تنازع نہ ہو، محبت، بھائی چارے کا جذبہ ہمیشہ قائم رہے۔ ہم باہمی ہم آہنگی اور ہم آہنگی کی بات کرتے ہیں۔ اردو جاننے والوں کے علاوہ ان لوگوں کو بھی اردو سکھائیں جو اردو جاننا چاہتے ہیں۔ نئی نسل کو ہندی، اردو اور انگریزی کا علم ہوگا تو ان کے علم میں اضافہ ہوگا۔ آپ سب جانتے ہیں کہ پہلے مدارس کا کیا حال تھا؟ پہلے منظور شدہ 1128 مدارس تھے، اب 1942 مدارس منظور ہو چکے ہیں۔مدرسوں میں صرف اردو ہی نہیں بلکہ تمام چیزوں کی معلومات ڈی جائے۔ مدرسہ کے اساتذہ کی تنخواہوں کی ادائیگی کے ساتھ ساتھ حکومت مدارس میں انفراسٹرکچر کی ترقی کے لیے بھی مدد فراہم کر رہی ہے۔ مدرسہ کے اساتذہ کو پہلے بہت کم تنخواہ ملتی تھی۔ اب مدارس میں بھی تسلیم شدہ اساتذہ کے برابرتنخواہ دی جا رہی ہے۔ وزیر اعلیٰ نے کہا کہ حکومت میں آنے کے بعد ہم نے ایک سروے کیا تھا اور پتہ چلا کہ سب سے زیادہ اقلیتی سماج اور مہادلت طبقے کے بچے اسکول نہیں جا پا رہے ہیں۔ اس کے بعد مہادلت کے لیے ترقی مرکز اور اقلیتی سماج کے لیے "تعلیمی مرکز”شروع کیا گیا کہ تمام بچے بچیاں اسکول جانے لگیں۔ اب نصف سے بھی کم بچے اسکول سے باہر ہیں۔ ہم نے اقلیتی خواتین کی بہتری کے لیے” ہنر” پروگرام شروع کیا۔ اس میں حکومت نے سیکھنے والی خواتین کے لیے ٹول کٹس خریدنے کے لیے فنڈفراہم کیے ہیں۔ اس کے تحت اب تک 1 لاکھ 13 ہزار اقلیتی خواتین کو کام سکھایا جا چکا ہے۔
وزیر اعلی نے کہا کہ ہم نے سنی وقف بورڈ اور شیعہ وقف بورڈ کے لئے کام کیا۔ جب ہم پٹنہ یونیورسٹی میں پڑھتے تھے تو انجمن اسلامیہ ہال کی طرف گھومنے جایا کرتے تھے۔ حکومت میں آنے کے بعد بھیہم جاتے رہے ہیں۔ انجمن اسلامیہ ہال کتنا خوبصورت اور کتنا شاندار ہو گیا ہے، آپ سب جا کر دیکھ لیں، شیعہ وقف بورڈ کاپٹنہ سٹی میں ہال بن رہا ہے،اس کا کام بھی تیزی سے کرائیں۔ سنی وقف بورڈ اور شیعہ وقف بورڈ کی زمین پر بہار کے تمام اضلاع میں اقلیتوں کے لیے اقلیتی رہائشی اسکول تعمیر کیا جائے گا۔ جلد از جلد زمین دستیاب کروائیں تاکہ تعمیراتی کام مکمل ہو سکے۔

وزیر اعلیٰ نے کہا کہ انٹرپرینیورشپ کو فروغ دینے کے لیے بھی کئی اقدامات کیے گئے ہیں۔ اقلیتی روزگار قرض اسکیم سال13 -2012 میں شروع کی گئی تھی۔ وزیر اعلی انٹرپرینور منصوبہ کے تحت درج فہرست ذات اور درج فہرست قبائل سے تعلق رکھنے والے کاروباریوں کو 2018 سے 10 لاکھ روپے تک کی امداد دی جا رہی ہے۔ اس میں 5 لاکھ روپے کی گرانٹ اور 5 لاکھ روپے تک بلاسود قرض فراہم کیے جا رہے ہیں۔ سال 2020 میں انتہائی پسماندہ اور تمام طبقات کی خواتین کو بھی اس اسکیم کا فائدہ دیا جا رہا ہے۔ پسماندہ طبقے اور عام زمرے کے نوجوان کاروباریوں کو 10 لاکھ روپے کی امداد دی جا رہی ہے، جس میں سے 5لاکھ روپے کی سبسڈی اور 5 لاکھ روپے 1 فیصد سودپر قرض دیا جا رہا ہے۔ اس اسکیم کا فائدہ سب کو مل رہا ہے۔ حکومت انٹرپرینیورشپ کو فروغ دینے کے لیے کئی اقدامات کر رہی ہے۔ اس سے روزگار بھی پیدا ہوگا اور لوگوں کی آمدنی میں بھی اضافہ ہوگا۔ انہوں نے کہا کہ ہم ایک پسماندہ ریاست ہیں۔ اگر ہم لوگوں کوخصوصی ریاست کا درجہ مل گیا ہوتاتو بہارکتنا آگے بڑھ چکا ہوتا۔ تمام پسماندہ ریاستوں کو خصوصی درجہ ملنا چاہیے۔
اس موقع پر وزیر اعلیٰ نے اپنے ہاتھوں سے محترمہ صالحہ کائنات، مسٹر سنتوش کمار، محترمہ کرن کماری، نورالسلام ، محترمہ بی ذکرہ خاتون، محمد یحی، محترمہ شبنم پروین، کو ٹوکن دیا۔ مسٹر اویناش کمار، محترمہ بشریٰ حبیب اور جسیم الدین کو علامتی طور پر تقرری لیٹردیا۔
اس پروگرام کونائب وزیر اعلیٰ تیجسوی پرساد یادو، مالیات، کمرشیل ٹیکس اور پارلیمانی امور کے وزیر وجے کمار چودھری، اقلیتی فلاح کے وزیر زماں خان، وزیر اطلاعات و ٹکنالوجی اسرائیل منصوری، چیف سکریٹری عامر سبحانی اور کابینہ سیکرٹریٹ و فائنس محکمہ کے ایڈیشنل چیف سکریٹری ڈاکٹر ایس سدھارتھ نے بھی خطاب کیا۔
اس موقع پر وزیراعلی کے پرنسپل سکریٹری مسٹر دیپک کمار، محکمہ اطلاعات ورابطہ عامہ کے سکریٹری مسٹر انوپم کمار، وزیراعلی کے اوایس ڈی مسٹر گوپال سنگھ، بہار ریاستی سنی وقف بورڈ کے چیئرمین ارشاد اللہ،بہار اسٹیٹ شیعہ وقف بورڈ کے چیئرمین سید افضل عباس، بہار اسٹیٹ حج کمیٹی کے چیئرمین عبدالحق، بہار اسٹیٹ حج کمیٹی کے سابق چیئرمین الیاس حسین عرف سونو بابو ،مولانا مظہر الحق عربی فارسی یونیورسٹی کے وائس چانسلر عالمگیر، مولانا مظہر الحق عربی فارسی یونیورسٹی کے پرو وائس چانسلر محمد بی انصاری، اردو محمد مشاورتی کمیٹی کے سابق صدر شفیع مشہدی، مشہور مورخ وخدا بخش اورینٹل پبلک لائبریری کے سابق ڈائریکٹر پروفیسر امتیاز احمد،مولانا مظہرالحق عربی فارسی یونیورسٹی کے سابق وائس چانسلر محمد اعجاز علی ارشد، مگدھ یونیورسٹی کے شعبہ اردو کے سابق صدر شعبہ علیم اللہ حالی۔اردو ڈائریکٹوریٹ کے ڈائرکٹر احمد محمود، تقرر نامہ پانے والے اردو مترجمین اوردیگر ملازمین موجود تھے۔