دستور ہند میں ہر شہری کو برابر کے حقوق حاصل ہیں

پھلواری شریف:کسی بھی سماج کو صحیح زندگی عطا کرنے کے لیے ایک نظام کی ضرورت ہوتی ہے،جس کے دائرے میں اس سماج کے لوگ اپنا شب وروز گزارتے ہیں،اسی نظام زندگی کو دستور کہاجاتا ہے۔تاریخی دور سے پہلے بھی انسانی سماج کا کوئی نہ کوئی قانون اوردستور تھا،جسے روایت یا رواج کے نام سے جانا جاتا تھا۔یہی رواج اوررسم اس دور کا آئین یا دستور تھا۔انسانی شعور نے ترقی کی،نظام زندگی آگے بڑھا،انسانوں نے لکھنا پڑھنا سیکھا تو اسے متعین ضابطہ کی ضرورت محسوس ہوئی،جس کی حد بندیوں میں انسانوں کو اپنی زندگی گزارنے پر مجبور کیا جاسکے،یہی ضابطے دھیرے دھیرے دستور کی شکل اختیار کرگیا۔

جمعہ کی تقریروں میں ائمہ کرام دستور ہند کو اپنا موضوع بنائیں:مولانا انیس الرحمن قاسمی

رومن لا،پرشین لا انہی قدیم ریتی رواج اوررسم وروایت کا نام ہے،جس میں زمانہ قدیم سے آرہے طریقہ کار کو قانونی شکل میں پیش کیا گیا ہے۔اللہ تعالیٰ نے انسانوں پر رحم فرمایا اورانہیں ریتی رواج کے قید وبند اورتوہمات کے بندھنوں سے آزاد کرنے کی غرض سے انبیاء کرام کو مبعوث فرمایا،پھر ان انبیاء کے ذریعہ انسانوں کو کتاب ہدایت دی گئی،جس کا آخری ایڈیشن قرآن کریم ہے۔اسی دستور وقانون کو اسلامی اصطلاح میں شریعت سے تعبیر کرتے ہیں۔دین میں اتحاد کے باوجود تمام انبیاء کی شریعتیں الگ الگ رہی ہیں اورآخری شریعت نبی اکرم صلی اللہ علیہ وسلم کی ہے۔یہی وہ جامع دستور اورنظام زندگی ہے،جس میں اللہ تعالیٰ نے دنیا وآخرت کی کامیابی رکھ دی ہے۔شریعت اسلامی کے بنیادی مقاصد میں پانچ چیزیں شامل ہیں،جن پر احکام اسلامی کا مدار ہے:حفظ دین،حفظ نفس،حفظ عقل،حفظ نسب اورحفظ مال۔اسی طرح اللہ تعالیٰ نے شریعت میں یا یوں کہیے کہ اسلامی قانون میں عدل کو بڑی اہمیت دی ہے اورتمام معاملات میں خواہ اس کا تعلق زندگی کے کسی بھی شعبہ سے ہو،عدل کا حکم دیا ہے،بظاہر انصاف،عدل اورمساوات ایک دوسرے کے مترادف سمجھے جاتے ہیں؛لیکن حقیقی طور پر مساوات اورعدل میں بنیادی فرق ہے۔

مساوات کا ترجمہ آپ برابری سے کر سکتے ہیں؛یعنی ہرشخص کو برابر کے حقوق دیئے جائیں،اس میں جنس،ضرورت وغیرہ کا کوئی فرق ملحوظ نہ رکھا جائے۔آپ اس کی مثال یوں سمجھ سکتے ہیں کہ بھارت کے ہرشہری کو آئین ہند میں برابر کے حقوق حاصل ہیں اورعدل کا مطلب یہ ہوتا ہے کہ جس شہری کو جتنی ضرورت جس چیز کی ہو،اتنی چیز اسے فراہم کی جائے،مثلا مساوات یہ ہے کہ بڑے،چھوٹے مردوعورت ہر ایک کو دو روٹی دی جائے؛لیکن عدل یہ ہے کہ جس کو جتنی روٹی کی بھوک ہو،اسے اتنی روٹی فراہم کی جائے،مثلا ایک بچے کا پیٹ آدھی روٹی میں بھر جاتا ہے تو اسے آدھی ہی روٹی دینا عدل ہے اورہر ایک کو صرف ایک روٹی دینا خواہ اس کا پیٹ بھرے یا نہ بھرے مساوات ہے؛اسی لیے اسلامی قانون کی بنیاد عدل پر ہے۔
ہمارا ملک بھارت ایک آزاد ملک ہے۔آزادی کے بعد ہماراملک انگریزی قانون کی پیروی کرتا رہا اوراسی انگریزی قانون کے تحت ہمارا تمام تر نظام چل رہاتھا،جس سے ہم نے ملک کی آزادی کی جنگ لڑی تھی۔پھر ایک دستور ساز کمیٹی بنائی گئی،جس کے سربراہ ڈاکٹر بھیم راؤ امبیڈکر تھے۔انہوں نے طویل گفت وشنید اوربحث ومباحثہ کے بعد بھارت کا آئین مرتب کیا اوراسے پارلیمنٹ میں منظوری کے لیے پیش کیا۔26نومبر1949ء کو ہمارا دستور پارلیمنٹ سے منظور ہوا اور26جنوری1950کو ہم نے اسے اپنے اوپر نافذ کیا۔

ان خیالات کا اظہار کرتے ہوتے آل اندیا ملی کونسل کے قومی نائب صدر مولانا انیس الرحمن قاسمی نے کہاکہ ہمارے ملک کا پورا ڈھانچہ اس کے دستور پر کھڑا ہے،اگر دستور کی پامالی ہوئی تو ملک کے لیے یہ چیز مہلک ثابت ہوگی۔ہمارے دستور کے تمہید میں یہ بات لکھی ہوئی ہے کہ ہم بھارت کے لوگ سماج وادی،غیر مذہبی اورعوامی جمہوریت بنائے رکھنے اوراس کے تمام شہریوں کے لیے انصاف،افکار،اظہار رائے،عقیدہ اوردین وعبادت نیز مساوات اوراخوت کی ترقی کے لیے پوری سنجیدگی سے کوشش کرتے رہیں گے۔لہذا ہر بھارتی شہری کے لیے لازم ہے کہ وہ دستور کے ان بنیادی عناصر کی حفاظت اوراس کے مطابق نظام حکومت چلانے پر حکمرانوں کو مجبور کریں اورجہاں کہیں بھی ان بنیادی چیزوں کی مخالفت ہورہی ہو،اس کے خلاف اپنا احتجاج درج کرائیں اوردستور کی بالادستی کو ہر حال میں یقینی بنائیں۔مولانا قاسمی نے مزید کہاکہ 26نومبرکو حکومت ہند ”یوم دستور“مناتی ہے۔ہمیں بھی چاہیے کہ اس موقع پر چھوٹے بڑے پروگرام کریں اوربھارت کے دستور سے عام لوگوں کوواقف کرائیں۔نیز دستور میں دیئے گئے ہر شہری کے حقوق سے بھی انہیں باخبر کیا جائے؛تاکہ وہ اپنے حق کی لڑائی دستور کے دائرے میں رہ کر لڑ سکیں۔مولانا قاسمی نے مساجد کے ائمہ سے یہ اپیل کی کہ26نومبر کو اپنی تقریروں اورخطبے کا موضوع دستور ہند کو بنائیں اوربطور خاص دستور کی تمہیدPreamble(”ہم بھارت کے عوام متانت وسنجیدگی سے عزم کرتے ہیں کہ بھارت کو ایک مقتدر،سماجوادی،غیر مذہبی،عوامی جمہوریہ بنائیں اوراس کے تمام شہریوں کے لیے حاصل کریں:
انصاف: سماجی،معاشی اورسیاسی آزادی:افکار،اظہار،عقیدہ،دین اورعبادت مساوات:بہ اعتبار حیثیت اوران سب میں اخوت کو ترقی دیں،جس سے فرد کی عظمت اورقوم کے اتحاد اورسالمیت کا تیقن ہو، اپنی آئین ساز اسمبلی میں آج26نومبر1949کو یہ آئین ذریعہئ ہذا اختیار کرتے ہیں اوراپنے آپ پر نافذ کرتے ہیں“۔)پر گفتگو کریں اورلوگوں کو دستور کو پڑھنے کی تلقین کریں؛تاکہ مسلمانوں کو دستور ہند میں دیئے گئے اپنے حقوق کا علم ہوسکے اوراحساس کمتری کا ازالہ ہو۔بھارت ایک جمہوری ملک ہے،جہاں کے ہرشہری کو برابر کے حقوق حاصل ہیں۔یہ ایک غیر مذہبی ملک ہے،جس میں ہر مذہب کے ماننے والے کو اپنے عقیدے،افکار ونظریات اورطریقہ عبادت کے مطابق عمل کرنے کا مکمل اختیار ہے۔اسی طرح انہیں یہ حق حاصل ہے کہ وہ اپنے عقیدے کی تبلیغ کریں۔یہ حق اورآزادی افکار ونظریات دستور ہند کے بنیادی حقوق میں شمار کئے گئے ہیں،اس لیے اس کے خلاف کسی طرح کی قانون سازی جائز نہیں ہے۔