اسرائیلی قیدیوں کی رہائی تک غزہ میں بجلی کی فراہمی بحال نہیں کی جائے گی: اسرائیل

یروشلم: اسرائیل نے کہا ہے کہ جب تک اسرائیلی مغوی گھر واپس نہیں آتے، نہ تو بجلی کا سوئچ آن کیا جائے گا اور نہ ہی واٹر پمپ کھولا جائے گا۔
اسرائیل کے وزیر توانائی اسرائیل کاٹز نے جمعرات کو ایک بیان میں یہ اطلاع دی۔
مسٹر کاٹز نے کہا کہ اسرائیل نے حماس کا نام ونشان مٹانے کا وعدہ کیا ہے اور گزشتہ ہفتے کے حملے کے جوابی کارروائی کے بعد غزہ کی پٹی کا "مکمل محاصرہ” کیا گیاہے۔ اسرائیلی حکام کا کہنا ہے کہ حماس کے حملے میں 1300 سے زائد افراد ہلاک اور 3000 کے قریب زخمی ہوئے۔
دوسری جانب فلسطینی حکام کے مطابق انکلیو پر اسرائیلی فضائی حملوں میں 1200 سے زائد افراد ہلاک اور 5000 سے زائد زخمی ہوئے۔ انہوں نے کہا کہ غزہ کا واحد الیکٹرک پاور اسٹیشن بند کر دیا گیا ہے اور زیادہ صلاحیت والے اسپتالوں میں ایندھن تقریباً ختم ہو رہا ہے۔
بین الاقوامی کمیٹی آف ریڈ کراس کے علاقائی ڈائریکٹر، فیبریزیو کاربونی نے جمعرات کو کہا، "اس کشیدگی سے پیدا ہونے والی انسانی تکالیف قابل نفرت ہیں اور میں دونوں فریقوں سے شہریوں کی تکالیف کو سمجھنے کی اپیل کرتا ہوں۔” انہوں نے کہا، ’’ جیسے ہی غزہ میں بجلی کی سپلائی ختم ہو جائے گی، اسپتالوں میں بھی اس کی سپلائی میں خلل پڑے گا، جس سے انکیوبیٹرز میں نوزائیدہ بچوں اور آکسیجن پر رہنے والے معمر مریضوں کی زندگیاں خطرے میں پڑ جائیں گی۔ گردے میں مبتلا مریضوں کا ڈائیلاسز بند ہو جائے گا اور ایکسرے مشینیں کام نہیں کر سکیں گی۔ بجلی کے بغیر اسپتالوں میں داخل مریضوں کے مردہ خانے میں تبدیل ہونے کا خطرہ بڑھ گیا ہے۔
وزیر توانائی نے کہا کہ غزہ پر ممکنہ زمینی حملے کی تیاری کے لیے ہزاروں اسرائیلی ریزرو فوجیوں کو بلایا گیا ہے۔
اسرائیلی فوج کے ترجمان لیفٹیننٹ کرنل رچرڈ ہیچٹ نے آج کہا، ’’حملے کے لیے ابھی کوئی فیصلہ نہیں کیا گیا ہے، لیکن ہم اس کے لیے تیاری کر رہے ہیں‘‘۔
فوجی ترجمان نے صحافیوں کو بتایا کہ فلسطینی شدت پسند اب بھی سمندری راستے سے اسرائیل میں داخل ہونے کی ہر ممکن کوشش کر رہے ہیں اور فوج غزہ میں داخلی دروازے کو محفوظ بنانے کی کوششیں جاری رکھے ہوئے ہے۔
اس سے قبل بدھ کے روز وزیر اعظم بینجمن نیتن یاہو اور اپوزیشن لیڈر بینی گینٹز نے حکومت کی حمایت پر اتفاق کیا۔ حزب اختلاف کے لیڈر گینٹز نے کہا، اس وقت، ہم سب اسرائیل کے فوجی ہیں، انہوں نے کہا کہ یہ وقت سیاست کرنے کا نہیں بلکہ اظہار یکجہتی کا ہے۔
دریں اثنا، امریکی وزیر خارجہ انٹونی بلنکن یکجہتی کا اظہار کرنے اور جنگ کو بڑھنے سے روکنے اور قیدیوں کی رہائی پر زور دینے کے لئے آج اسرائیل پہنچنے والے ہیں۔

ترکیہ نے حماس – اسرائیل جنگ پر بڑے پیمانے پر سفارتکاری کا سلسلہ شروع کردیا

انقرہ:ترکیہ، اسرائیل فلسطین کشیدگی کو خطے کے دیگر ممالک تک پھیلنے سے پہلے ختم کرنے اور فریقین کے درمیان مذاکرات شروع کرنے کے لیے کثیر جہتی سفارت کاری جاری رکھے ہوئے ہے۔
اس تناظر میں وزارت خارجہ اور انٹیلی جنس یونٹس نے ثالثی اور قیدیوں کے تبادلے پر اپنا کام تیز کر دیا ہے۔
صدر رجب طیب ایردوان نے تنازعات کے شروع ہونے کے پہلے ہی لمحے سے کئی رہنماؤں سے مذاکرات کیے ہیں۔انہوں نے حال ہی میں اردن کے شاہ عبداللہ دوم، الجزائر کے صدر عبدالمصد تبن اور سعودی عرب کے ولی عہد محمد بن سلمان سے ٹیلی فون پر بات چیت کی۔
صدر نے ان رہنماوں سے مذاکرات کے دوران کہا ہے کہ ترکیہ کشیدگی کو خطے کے دیگر ممالک تک پھیلنے سے پہلے ختم کرنے اور مذاکرات کے ذریعے منصفانہ امن تک پہنچنے کی ہر ممکن کوشش جاری رکھے گا۔
حماس کے عسکری ونگ، قسام بریگیڈز نے ہفتے کے روز اعلان کیا کہ اس نے اسرائیل پر "اقصیٰ طوفان ” کے نام سے ایک جامع حملہ کیا اور غزہ سے اسرائیل کی طرف ہزاروں راکٹ فائر کیے گئے اور مسلح گروپ علاقے کی بستیوں میں داخل ہوئے۔
اسرائیلی فوج نے یہ بھی اعلان کیا کہ اس نے جنگی طیاروں سے غزہ کی پٹی کے خلاف آہنی تلواروں کا آپریشن شروع کیا ہے۔

غزہ کو ہنگامی بنیادوں پر ایندھن،طبی سامان اور خوراک پہنچائی جائے:گوٹیرش

اقوام متحدہ:اقوام متحدہ کےسیکرٹری جنرل انتونیو گوٹیرش نے غزہ کی پٹی میں طبی سازوسامان، خوراک، ایندھن اور دیگر امداد پہنچانے کی ضرورت پر زور دیا اور کہا کہ امدادی کارکنوں کی علاقے میں رسائی یقینی بنائی جانی چاہیے۔
انہوں نے کہا کہ اقوام متحدہ غزہ میں امداد کی فراہمی کے لیے اپنی کوششیں جاری رکھے گا۔
سیکرٹری جنرل نے تنازعے کے تمام فریقین سے کہا کہ وہ غزہ کی پٹی میں بے یارومددگار فلسطینیوں کو ہنگامی مدد فراہم کرنے کے لیے اقوام متحدہ سے تعاون کریں۔انہوں نے عالمی برادری سے اس کوشش کے لیے فوری طور پر امداد جمع کرنے کی اپیل بھی کی ہے۔
انتونیو گوتیرش نے کہا کہ وہ خود اور مشرق وسطیٰ امن عمل کے لیے اقوام متحدہ کے رابطہ کار اور خطے کے رہنماؤں سے رابطے میں ہیں تاکہ تنازعے کو خطے میں وسیع پیمانے پر پھیلنے سے روکا جا سکے۔
گوتیرش نے کہا ہے کہ انہیں فلسطینی لوگوں کی جائز شکایات اور اسرائیل کے اپنی سلامتی کے حوالے سے خدشات کا احساس ہے تاہم فریقین شہریوں کا تحفظ یقینی بنائیں اور خونریزی، نفرت اور تقسیم کا خاتمہ کریں۔
سیکرٹری جنرل نے مسلح گروہوں کی جانب سے اسرائیل کے 100 سے زیادہ شہریوں اور فوجیوں بشمول خواتین، بچوں اور بوڑھوں کو حراست میں لیے جانے کی اطلاعات کا حوالہ دیتے ہوئے ان کی رہائی کا مطالبہ کیا۔ انہوں نے حملوں کے جواب میں اسرائیل کی جانب سے غزہ پر فضائی بمباری میں خواتین اور بچوں سمیت 1200 سے زیادہ فلسطینیوں کی اموات اور 5000 سے زیادہ لوگوں کے زخمی ہونے کی اطلاعات پر گہری تشویش کا اظہار کیا۔
سیکرٹری جنرل نے تنازعے کے فریقین سے ایسے اقدامات سے باز رہنے کو کہا جہاں سے واپسی نہ ہو سکے اور جن سے انتہاپسند مضبوط ہوں اور پائیدار امن کے حصول کے امکانات ختم ہونے کا اندیشہ ہو۔