دوحہ (قطر): اپنے معاشرے کو اگر ہمیں بدلنا ہے اور بہتر تبدیلی چاہتے ہیں تو تعلیم سے بڑا کوئی ہتھیار نہیں ہے۔ اردو زبان کے چاہنے والوں کا یہ فریضہ ہے کہ سماج کو تعلیم کی روشنی سے مالا مال کریں اور سب سے بڑھ کر کتابوں کی تصنیف اور تالیف کے ساتھ اُن کی اشاعت پر خصوصی توجہ دیں۔ ہر طبقے اور ہر کام کے لیے ہماری زبان میں کتابوں کا ایک سلسلہ ہونا چاہیے۔ بزمِ صدف نے یہ اچھا کام کیاکہ مشاعروں کے ساتھ سے می نار، عوامی فلاحی کاموں کے ساتھ کتابوں کی اشاعت کا ایک سلسلہ دراز کیا ہے۔ اِس کے اثرات دیر پا ہوں گے اور سماج کو اِس سے بڑا فایدہ حاصل ہوگا۔ یہ باتیں قطر کی معروف سماجی اور تعلیمی شخصیت جناب حسن عبد الکریم چوگلے نے افتتاحی جلسے کی صدارت کرتے ہوئے کہیں۔
- تعلیم اور کتابیں معاشرے میں زندگیِ نَو اور تبدیلی کا ذریعہ بنیں گی: حسن چوگلے
- بزمِ صدف اردو کی عالمی شناخت کے لیے ہمہ وقت کوشاں: شہاب الدین احمد
- بزمِ صدف انٹرنیشنل کے عالمی سے می نار میں مختلف ممالک کے ماہرین کی شرکت اور اظہارِ خیال
عالمی سے می نار کا موضوع متعین تھا: ’اردو ادب: عالمی تہذیب و ثقافت کا نقیب‘ ۔ اِس موضوع کے حوالے سے کلیدی خطبہ پیش کرتے ہوئے بزمِ صدف کے ڈائرکٹر اور معروف نقّاد پروفیسر صفدر امام قادری نے تاریخی اور تہذیبی حوالہ پیش کرتے ہوئے یہ بتایا کہ زبانوں اور مذاہب کے درمیان ہم آہنگی کا طَور اردو کے آغاز کے زمانے سے ہی ملتا رہا ہے۔ ساتویں صدی سے بارہویں صدی کے دَوران ہندستان میں جو لسانی اشتراک اور لین دین کا ماحول تیّار ہوا، اُسی کا ایک خوش گوار نتیجہ اردو کی پیدایش بھی ہے۔ اِس سے پہلے سنسکرت یا پراکرت یا دراویڈی زبانوں میں اشتراک کا کوئی عمومی سلیقہ نظر نہیں آتا تھا۔ زبانیں عوامی اور سیاسی یا مذہبی جاگیروں کی طرح خانہ بندی میں اُس زمانے تک نظر آتی ہیں مگر جس زمانے میں اردو کی تشکیل ہو رہی ہے، اُس عہد میں ایک خاص روادارانہ شعور پیدا ہوتا ہوا نظر آتا ہے جسے پوری علمی دنیا نے امیر خسرو کی شخصیت اور شکل میں پہچانا۔
پروفیسر قادری نے بتایا کہ برطانوی کالونی کے زمانے میں اِس روادارانہ شعور میں مزید اضافہ ہوا۔ پہلے عربی ، فارسی، ترکی، سنسکرت، پراکرتیں اور دیگر ہندستانی زبانوں سے اردو کا بہ راہِ راست واسطہ پڑتا تھا مگر اٹھارہویں صدی سے ہی اہالیانِ یورپ سے علمی رابطے کی گنجایشیں پیدا ہونی شروع ہوتی ہیں۔ یورپ کے افراد نہ صرف یہ کہ اپنی یونی ور سٹیوں میںاردو تعلیم و تدریس کا انتظام کرتے ہیں بلکہ ہندستان میں بھی اِس زبان کے سہارے انتطامی امور کے ساتھ ساتھ علمی کاموں میں بھی مشغول نظر آتے ہیں۔ انیسویں صدی کے آغاز میں فورٹ ولیم کالج جیسے ادارے سے اردو کی بین الاقوامیت اور تصنیف و تالیف کے نئے اور کار و باری آفاق جس طرح روشن ہوئے، اِس سے یہ بات بھی ثابت ہوئی کہ اردو کسی ایک تہذیب یا کسی ایک زبان کی طرف دار بننے کی مجرم نہیں۔اُنھوں نے بتایا کہ اردو کی تشکیل اور ارتقا کے ہر مرحلے میں غیر مذہبی اور ہر ماحول میں خود کو شیر و شکر کر لینے کا انداز ہی وہ سب سے بڑا حربہ رہا جس نے ۱۸۵۷ء کے بعد بدلی ہوئی دنیا میں اردو کو پھیلنے کے مواقع عطا کیے۔ برِ صغیر ہند و پاک سے باہر یہ زبان نکلی اور دیکھتے دیکھتے یو رپ اور امریکا کے مختلف گوشوں تک پھیلتی چلی گئی۔ غیر اردو آبادی کے سیکھنے اور استعمال میں لانے کی اصل وجہ یہی رہی ہے کہ یہ زبان تہذیبی اور معاشرتی سطح پر یک رُخا انداز نہیں اپناتی بلکہ ایک ہمہ گیر، مشترک اور روادار ماحول کی ترجمانی کرنے میں ہمہ تن مصروف رہتی ہے۔
بزمِ صدف کے چیر مین شہاب الدین احمد نے اپنے افتتاحی خطاب میں کہا کہ بزمِ صدف اپنے علمی و ادبی اور ترویج و اشاعت کے کام میں کل وقتی طَور پر لگی ہوئی ہے۔ بزمِ صدف کی ہمیشہ یہ کوشش رہی ہے کہ اردو زبان کی عالمی حیثیت کے شواہد ہر محفل میں پیش کیے جائیں۔ زبانوں سے قوموں کامزاج سمجھ میں آتا ہے۔ اردو برِّ صغیر ہی نہیں عالمی طَور پر امن اور اخوت کے اوصاف کو عام کرنے کے لیے کوشاں رہی ہے۔ یہ مذاکرہ بھی اِسی طَور پر منعقد کیا گیا تاکہ اردو سے متعلق مختلف ملکوں اور تہذیبوں کے افراد ایک دوسرے کے ساتھ تبادلۂ خیالات کریں اور سماجی و علمی رواداری کا پیغام عوام تک پہنچایا جا سکے۔
کلیدی خطبے کے بعد معروف افسانہ نگار داکٹر شکیل کی صدارت میں پینل ڈسکشن کا سلسلہ شروع ہوا اور ناظمِ مجلس نے ماہرین سے گزارش کی کہ وہ اپنے تجربات و مشاہدات کے حوالے سے مذاکرے کے علمی دایرۂ کار میں توسیع کریں۔ بزمِ صدف بین الاقوامی ایوارڈ یافتہ معروف شاعرہ شاہدہ حسن نے پاکستان اور کینیڈا میں اردو کی مجلسوں کے حوالے سے اپنی گفتگو کے دَوران ایک خوش آیند منظر نامے کو واضح کرنے میں کامیابی پائی۔ اُنھوں نے بتایا کہ اردو سے دُور کے علاقے کے باوجود ذاتی کوششوں سے نئی نسل کو اردو کی طرف راغب کرنے کی ہماری کوششیں بار آور ہو رہی ہیں۔ اُنھوں نے یہ بھی کہا کہ جغرافیائی اعتبار سے برِّ صغیر سے مختلف علاقوں میں جو ادب تخلیق ہو رہا ہے، وہ اپنے انوکھے پن کی وجہ سے قابلِ اعتنا ہے۔ بزم ِصدف نئی نسل ایوارڈ یافتہ شاعرہ اور نقّاد ڈاکٹر عنبرین صلاح الدین نے اوّلاً تانیثی ترجیحات کو موضوعِ بحث بنایا اور یہ واضح کرنے میں کامیابی پائی کہ ایک عالمی ماحول میں ہی اِس انداز کا نیا ادب تخلیق پا سکتا ہے جیسا فی زمانہ ہے۔ پاکستان اور دوسرے ملکوں میںجوکچھ لکھا پڑھا جا رہا ہے، اس کا احتساب لازم ہے۔
جرمنی سے تشریف فرما محترمہ امۃالمنّان طاہر نے اپنی طویل تدریسی زندگی کے تجریبات پر روشنی ڈالتے ہوئے کہا کہ جرمنی میں مختلف تعلیمی اداروں میں اردو کی تدریس کے لیے ہر طرح کی سہولیات موجود ہیں۔ حرف شناسی سے لے کر ترجمہ اور تنقید و تحقیق کا سلسلہ دیکھنے کو ملتا ہے۔ ایک بڑی تعداد میں جرمن نژاد طالب علم اور استاد بھی اِس میدان میں کامیاب ہوتے نظر آ رہے ہیں۔ اُنھوں نے اپنی تقریر کے دوران درجنوں ایسی کتابوں کا تذکرہ کیا جس سے یہ ثابت ہوا کہ اردو کے شہ کار جرمن زبان میں اور جرمن کے شہ کار اردو میں منتقل ہو رہے ہیں۔اُنھوں نے اپنی برسوں کی مشقّت کے نتیجے میں اردو سیکھنے کے لیے جرمن کے طلبہ کے لیے جو کورس تیّار کیا، اُس کی شایع شدہ کاپی پیش کرتے ہوئے اطمینان ظاہر کیا کہ اِ س سے کوئی بھی جرمن نژاد ابتدائی اردو کی مشقیں مکمّل کر سکتا ہے۔
ممتاز مزاحیہ شاعر جناب خالد عرفان جو امریکا سے تشریف لائے ہوئے تھے، اُنھوں نے امریکا میں اردو کی مجلسوں، تدریسی مراکز اور آئے دن ہونے والے مشاعروں کے سلسلے سے اطلاعات فراہم کرتے ہوئے بتایا کہ امریکا میں یہ زبان برِّ صغیر کے تارکینِ وطن کے لیے اوّلین ترجیح کا باعث ہے۔ انھوںنے ادبا و شعرا کے درمیان سرگرم علمی رابطے کی اہمیت کا اقرار کیا اور یہ بات بھی بتائی کہ امریکا میں اردو والے آپس میں ملتے جلتے اور اپنی تخلیقات کو ایک دوسرے کو سناتے رہتے ہیں۔ معروف شاعر حسن کاظمی نے ہند و پاک میں اردو شاعری کی مقبولیت اور ذرائع ترسیل کے سہارے بڑے حلقے تک پہنچنے کے معاملات پر غور کرتے ہوئے بتایا کہ اردو کے مستقبل سے مایوسی کی ضرورت نہیں کیوںکہ اس کا روایتی دائرۂ کار اچھا خاصا بدل چکا ہے اور اس کے مطابق نئے چاہنے والے بھی پیدا ہوتے رہے ہیں۔
مذاکرے کی نظامت مشترکہ طور پرمعروف شاعر اور بزمِ صدف دوحہ شاخ کے صدر ڈاکٹر ندیم ظفر جیلانی اورجناب احمد اشفاق،پروگرام ڈائرکٹر: بزمِ صدف کر رہے تھے۔ اُنھوں نے جستہ جستہ پینل کے سامنے سوالات بھی پیش کیے۔ اُنھوں نے زبان کے معیاری اور غیر معیاری ہونے کی مثالیں پیش کرتے ہوئے ان کے استعمالات کی علمی اور عوامی جہات پر افراد کی واضح راے جاننا چاہا۔ عنبرین صلاح الدین نے کہا کہ زبان میں تبدیلیوںکا تصوّر ہمیشہ عوام کے سبب اپنی شکل واضح کرتا ہے، اِس لیے اُس زبان کو غیر معیاری سمجھ کر چھوڑ دینا معقول بات نہیں۔ صفدر امام قادری نے اِس موضوع کے دیگر پہلوؤں کا احاطہ کرتے ہوئے بتایا کہ کوئی بھی زبان صرف ایک سطح پر استعمال میں نہیں لائی جاتی۔ ادبی زبان بھی مختلف طرح کی ہوتی ہے۔ شاعری کے لیے جو لفظ چاہیے، افسانے کے لیے اُس سے مختلف آداب درکار ہیں۔ اُسی طرح تنقید اور صحافت کے لیے بھی انداز و اسالیب کی ضرورت ہے۔ تخلیقی سطح پر اُنھوں نے میر کے اشعار سے مثال دیتے ہوئے یہ بتایا کہ کس طرح گرے پڑے اور عرفِ عام میں غیر معیاری زبان میں میر ایسی روح پھونک دیتے ہیں کہ وہ ہمارے لیے زندۂ جاوید شعر ہو جاتے ہیں۔ اُنھوں نے عنبرین صلاح الدین کی باتوں کی تائید کرتے ہوئے اِس بات پر خوشی کا اظہار کیا کہ اُنھوں نے زبان کے استعمال کے معاملے میں خالص پن کو سکّۂ رایج الوقت نہیں قرار دیا۔
مذاکرے میں تکنیکی علوم کے لیے اردو میں کیسی سہولیات ہیں اور اِس سے ہماری زبان کس قدر ہماری ضرورتوں کو پوری کرنے میں کامیاب ہے، اِس پر ڈاکٹر ندیم ظفر جیلانی نے مثالوں کے ساتھ بتایا کہ یورپ کے مختلف ملکوں میں وہاں کی مقامی زبانوں میں میڈیکل کی تعلیم کا انتظام کیا جا رہا ہے۔ ڈاکٹر شکیل نے ہندستان میں ہندی میں میڈیکل کی تعلیم کے سلسلے سے تیّار کی جارہی کتابوں کا تذکرہ کیا۔ اِسی مرحلے میں صفدر امام قادری نے بتایا کہ جامعہ عثمانیہ، حیدرآباد میں کس طرح میڈیکل، انجینیرنگ اور وکالت کے تعلق سے اردومیڈیم سے تعلیم دینے کا انتظام تھا مگر تقسیمِ ملک کے ساتھ ساتھ اُس عظیم ادارے کو اُس کے حقیقی مقاصد سے دُور کر دیا گیا۔ اُنھوں نے اِس بات کی وکالت کی کہ مادری زبان میں اعلا تعلیم اور تکنیکی تعلیم کا انتطام اہالیانِ اردو کا پہلا نشانہ ہونا چاہیے جس کے بغیر نئی دنیا کے ہزاروں دروازے کھلنے سے رہ جائیں گے۔ صدارتی خطبہ پیش کرتے ہوئے ڈاکٹر شکیل نے کہاکہ اردو کے بین الاقوامی تناظر پر جو اطلاعات مذاکرے میں حاصل ہوئیں، وہ خو ش آیند ہیں۔ اُنھوں نے یہ مشورہ دیا کہ اردو کو آج کے مشکل سیاسی اور سماجی ماحول میں زبان کو یک رُخا اور بنیاد پرستانہ رجحان سے الگ کرکے ایک سیکولر اور کھلے سماج میں رکھنے کی مہم کا حصّہ ہونا چاہیے۔ اُنھوں نے کہا کہ نئے عہد کے تقاضوں سے جب تک ہم اپنی زبان کو ہم کنار نہ کریں گے، ہماری قبولیت اورشناخت میں رُکاوٹیں بھی آتی رہیں گی۔ اِس لیے جدید سماج اور عہد کی ضروریات کے مطابق اپنی زبان کو حسبِ ضرورت بدلنا چاہیے۔
افتتاحی جلسے سے خطاب کرتے ہوئے دوحہ قطر کی معروف شخصیت پروفیسر صوفیہ بخاری نے اردو زبان سے اپنی محبت کا اظہار کرتے ہوئے کہا کہ دوحہ قطر میں اُن کے شوہر مرحوم محمد صبیح بخاری نے جن کاموں کی بنیادیں رکھی ہیں، اُنھیں وہ آگے بڑھاتی رہیں گی۔ مادری زبان کی اہمیت پر زور دیتے ہوئے انھوںنے اپنے بچوں کو اردو زبان سے واقف کرانے پر زور دیا اور سرپرستوں پر یہ ذمہ داری عاید کی کہ وہ چاہے کہیں بھی رہیں، اپنی زبان کی خدمت کا طور اپنا سکتے ہیں۔ افتتاحی جلسے کی نظامت جناب احمد اشفاق نے کی۔ معروف سائنسی محقق پروفیسر سید جاوید زیدی نے اپنی تقریر کے دوران یہ بات کہی کہ برِ صغیر سے دور رہتے ہوئے اگر ہم خصوصی توجہ نہ کریں تو اپنے گھروں میں اردو کا چراغ روشن نہ ہو سکے گا۔ اس میں اپنی کمائی کا ایک حصہ بھی خرچ کرنا لازم ہے ورنہ ہماری اولاد سب کچھ سیکھ جائے گی مگر اپنی تہذیب اور ثقافت سے ہمیشہ کے لیے بے پروا بھی ہوتی چلی جائے گی۔ روزنامہ تاثیر کے چیف ایڈیٹر ڈاکٹر محمد گوہر نے اردو زبان کی بقا اور ترقی کے لیے اردو اخبارات کی خدمات کا ذکر کرتے ہوئے بتایا کہ مشکل حالات کے باوجود ہم اردو اخبارات شائع کررہے ہیں اور طرح طرح سے اپنی زبان کے پرچم کو بلند کرنے کی کوششیں کررہے ہیں۔بزم صدف کویت شاخ کے صدرجناب مسعود حساس نے کویت اور خلیج کے دوسرے ممالک میںاردو کی موجودہ سرگرمیوں پر اختصار کے ساتھ روشنی ڈالی۔ دوحہ شاخ کے صدر ڈاکٹر ندیم ظفر جیلانی نے استقبالیہ خطاب کیا اور بزمِ صدف کی پچھلی کارکردگیوں کا تذکرہ کرتے ہوئے موجودہ پروگرام اور تقریبِ انعامات کی اہمیت پر روشنی ڈالی۔ اس عالمی سے می نار میں دوحہ، قطر کی تمام نئی پرانی ادبی تنظیموں کے نمایندگان کے بشمول محبانِ اردو کی ایک کثیر تعداد شریکِ محفل تھی۔ تقریب میں ہندستان ، پاکستان، کناڈا، امریکا، ابوظہبی، کویت، جرمنی جیسے ممالک سے مقبول ادبی شخصیات جمع ہوئی تھیں جس کی وجہ سے سے می نار کے معیار اور وقار میں چار چاند لگ گئے۔ برِّصغیر سے باہر اردو زبان و ادب کے حوالے سے اتنی کثیر تعداد میں دانش وروں کی شرکت خال خال ہوتی ہے۔ گولڈن اوشین ہوٹل کے ہال میں منعقد اس سے می نار کا اختتام پُرتکلف عشائیے پر ہوا۔
