خاندانی سیاسی جماعتیں جمہوریت کے لیے خطرہ : مودی

نئی دہلی: وزیر اعظم نریندر مودی نے خاندان پرمبنی سیاسی جماعتوں کو جمہوریت کے لیےایک بڑا خطرہ قرار دیتے ہوئے جمعہ کے روز کہا کہ بدعنوانی میں ملوث لوگوں کی عزت افزائی نوجوانوں کو غلط راستے پر چلنے کے لئے اکساتی ہے مسٹر مودی نے یہاں پارلیمنٹ ہاؤس کے سنٹرل ہال میں یوم آئین کے موقع پر منعقد ایک تقریب سے خطاب کرتے ہوئے کہا کہ کشمیر سے کنیا کماری تک ہندوستان کے ہر حصے میں خاندان پر مبنی سیاسی جماعتوں کا غلبہ بڑھ رہا ہے انہوں نے کہا کہ یہ جمہوریت کے لیے بہت بڑا خطرہ ہے ۔ اس کے لیے ملک کے باشندوں کو بیدارکرنے کی ضرورت ہے۔

وزیراعظم نے کہا کہ وہ ایک ہی خاندان کے کئی افراد کی سیاست میں شمولیت کے خلاف نہیں ہیں لیکن یہ قابلیت کی بنیاد پرہونا چاہیے۔ انہوں نے کہا کہ یہ خاندانی سیاسی جماعتیں اپنا جمہوری کردار کھو چکی ہیں ،اس لیے ان سے جمہوری نظام کے تحفظ کی امید نہیں کی جا سکتی۔ خاندان پر مبنی سیاسی جماعتیں نسل در نسل چلتی ہیں اور یہ جمہوریت کی حفاظت نہیں کر سکتیں ۔ ایسی سیاسی جماعتیں جمہوریت کے لیے بڑا خطرہ ہیں ۔ انہوں نے کہا کہ ایسی سیاسی جماعتیں انتہائی تشویش کا باعث ہیں۔

مسٹر مودی نے جاپان کی مثال دیتے ہوئے کہا کہ وہاں بھی ایسا ہی نظام تھا ، جس میں بہتری لانے کے لئے کام شروع کیا گیا ۔ اس سارے عمل میں 30-40 سال کا وقت لگا ۔ انہوں نے کہا کہ ہندوستان میں بھی ایسی ہی کوششیں کرنے کی ضرورت ہے۔ ملک کے باشندوں کو اس بارے میں بیدار کیا جانا چاہئے ۔ اس سے جمہوریت کے تحفظ کو یقینی بنایا جائے گا ۔
وزیراعظم نے کہا کہ بدعنوانی میں ملوث لوگوں کی عزت افزائی کرنا افسوسناک ہے ۔ انہوں نے کہا کہ سیاسی جماعتیں اپنے مفادات کے حصول کے لیے اصولوں کی حدیں پارکرتے ہوئے بدعنوانی میں ملوث افراد کی عزت افزائی کرتی ہیں، جوعدلیہ کی جانب سے مجرم ثابت ہو چکے ہیں ۔ اسی عزت افزائی نوجوانوں کو بھی غلط کرنے کے لئے اکساتی ہے۔ نوجوانوں کو لگتا ہے کہ کرپشن بہتر طریقہ ہے۔ دو چار سال میں لوگ انہیں قبول کر ہی لیں گے۔
مسٹرمودی نے کہا کہ آزادی کے بعد کے حکومتی نظام میں حقوق پر زور دیا گیا جبکہ فرائض کو بھلا دیا گیا ۔ آزادی کے 75ویں سال میں فرض شناسی پر زور دینے کی ضرورت ہے۔ حقوق خود ہی ملتے جائیں گے۔ انہوں نے کہا کہ تحریک آزادی کے دوران مہاتما گاندھی نے جن فرائض پر زور دیا تھا انہیں فراموش کر دیا گیا ہے۔ اگر ان پر زور دیا جاتا تو آج ملک کی تصویر مختلف ہوتی۔ انہوں نے کہا کہ فرض کی ادائیگی ہی حقوق کی ضمانت ہے۔

مسٹرمودی نےملک کے موجودہ سیاسی ماحول پر تشویش کا اظہار کرتے ہوئے کہا کہ اگر آج آئین تیار کرنا پڑ جائے تو شاید ہی یہ ممکن ہو پائے ۔ انہوں نے کہا کہ بعض سیاسی جماعتیں ملکی مفادات کے اپنے مفادات کو ترجیح دیتی ہیں۔
انہوں نے کہا کہ ایسی سیاسی جماعتوں کے لیے قوم پرستی پیچھے چھوٹ جاتی ہے۔ موجودہ سیاسی ماحول میں آئین کے جذبات مجروح ہو رہے ہیں ۔ اس کی ہر شق اور آرٹیکل کو نظر انداز کیا جا رہا ہے۔
مسٹر مودی ڈاکٹر بھیم راؤ امبیڈکر، مہاتما گاندھی اور ڈاکٹر راجیندر پرساد اور تحریک آزادی میں تعاون کرنے والے دیگر لوگوں کو سلام کرتے ہوئے کہا کہ آئین ہند ہندوستان کی ہزاروں سال پرانی روایات علامت ہے ۔
وزیر اعظم نے 26/11 ممبئی دہشت گردانہ حملے میں اپنی جانیں قربان کرنے والے جوانوں کو بھی سلام پیش کیا۔

آئین کی 72 ویں سالگرہ پر یوم آئین پارلیمنٹ میں منایا گیا

آئین ہند کی 72 ویں سالگرہ کے موقع پر جمہوریت کے اعلیٰ ترین ادارے پارلیمنٹ کے سنٹرل ہال میں صدرجمہوریہ رام ناتھ کووند کی قیادت میں یوم آئین کا اہتمام کیا گیا۔

مسٹرکووند کے پارلیمنٹ ہاؤس میں پہنچنے پر نائب صدر ایم وینکیا نائیڈو، وزیر اعظم نریندر مودی، لوک سبھا اسپیکر اوم برلا، راجیہ سبھا کے ڈپٹی چیئرمین ہری ونش، پارلیمانی امور کے وزیر پرہلاد جوشی، مرکزی وزراء اور دیگر معززین نے ان کا استقبال کیا۔

پروگرام کا آغاز کرتے ہوئے پارلیمانی امور کے وزیر مسٹر جوشی نے آئینی شخصیات کو مبارکباد پیش کی اور کہا کہ 26 نومبر 1949 کا ملک کی تاریخ میں بہت اہم مقام ہے کیونکہ اس دن ملک کے لوگوں نے دنیا کے سب سے بڑے تحریری آئین آئین ہند کو اپنایا تھا۔ مودی حکومت نے آئین کے معمار کہے جانے والے باباصاحب امبیڈکرکی 125ویں سالگرہ پر سال 2015 میں پہلا یوم آئین منانے کا اعلان کیا تھا۔ مسٹر مودی نے اپنے خطاب میں کہا کہ آزادی کے بعد ملک کو چلانے والی حکومتوں نے 26 نومبر کی اہمیت کو ترجیح نہیں دی اور یوم آئین کو منانے کی روایت شروع نہیں کی ۔ انہوں نے کہا کہ نئی نسل کو اس دن کی اہمیت سے آگاہ کرنے کے لیے یوم دستور منانا ضروری ہے۔

اس موقع پر مسٹر کووند نے دستور ساز اسمبلی کی بحث کا ڈیجیٹل ایڈیشن بھی جاری کیا ۔ انہوں نے آئین کی اصل کاپی کا ڈیجیٹل ایڈیشن بھی جاری کیا۔ اس کے ساتھ انہوں نے ہندوستان کےموجودہ آئین کو بھی جاری کیا ۔ اس کے علاوہ انہوں نےآئین پرایک آن لائن کوئز پورٹل بھی لانچ کیا ۔