نرملا سیتارمن نے پیش کیا بجٹ، انکم ٹیکس دہندگان کو کوئی راحت نہیں

نئی دہلی:حکومت نے رواں مالی سال میں اقتصادی ترقی کی شرح 9.2 فیصد پر رہنے کا امکان ظاہر کرتے ہوئے انفرادی اور نوکری پیشہ لوگوں کو انکم ٹیکس میں کوئی رعایت نہیں دی اور آئندہ مالی سال کے لیے 39.45 لاکھ کروڑ روپے کے خرچ کا عام بجٹ پارلیمنٹ میں پیش کیا ۔
وزیر مالیات نرملا سیتارمن نے تقریباً ایک گھنٹہ چالیس منٹ تک پڑھے اپنے بجٹ تقریر میں متعدد نئے منصوبوں کی بھی تجویز پیش کی اور ٹیکس محصول میں اضافہ کیے جانے کے بھی اقدامات کا اعلان کیا۔ رواں مالی سال کا بجٹ تخمینہ 34.83 لاکھ کروڑ روپے تھا جو اب ترمیم کے بعد 37.70 لاکھ کروڑ روپے ہوگیا ہے۔
وزیر مالیات نے کہا کہ ہندستان آزادی کا امرت مہوتسو منارہا ہے اور اس کے ساتھ ہی ہمارا ملک اب ’امرت دور‘ میں داخل ہوگیا ہے جو ہندستان کی آزادی کے 100 برس تک پہنچنے میں 25 برسوں کی طویل مدت کو ظاہر کرتاہے۔ حکومت نے یوم آزادی کے اپنے خطاب میں وزیر اعظم کے ذریعہ ذکر کیے گئے ویژن کی تکمیل کا ہدف مقرر کررکھا ہے۔

محترمہ سیتا رمن نے کہا کہ یہ بجٹ مسلسل ترقی کو نئی رفتار دے رہا ہے۔ انہوں نے بجٹ کو’ ‘امرت دور‘ کے لیے ایک بلیو پرنٹ قرار دیا، جو جدید ترین اور جامع ہے اور اس سے ہمارے نوجوانوں، خواتین، کسانوں، درج فہرست ذاتوں اور درج فہرست قبائل براہ راست مستفید ہوں گے۔
انہوں نے کہا کہ پی ایم گتی شکتی اقتصادی ترقی اور پائیدار ترقی کے لیے تبدیلی کا نقطہ نظر ہے۔ اس نقطہ نظر کو سات انجنوں جیسے سڑکوں، ریلوے، ہوائی اڈوں، بندرگاہوں، بڑے پیمانے پر نقل و حمل، آبی گزرگاہوں اور لاجسٹکس کے ذریعے تقویت دی جارہی ہے۔ ملک کی معیشت کو آگے بڑھانے کے لیے ساتوں انجن مل کر کام کریں گے۔ ان انجنوں کو انرجی ٹرانسمیشن، آئی ٹی کمیونیکیشن، پانی اور سیوریج، اور سماجی انفراسٹرکچر میں تکمیلی کرداروں سے بہت زیادہ ضروری تعاون حاصل ہو رہا ہے۔
انہوں نے کہا کہ سال 2022-23 میں ایکسپریس وے کے لیے پی ایم گتی شکتی ماسٹر پلان تیار کیا جائے گا تاکہ تیز رفتار نقل و حرکت ممکن ہوسکے۔ سال 2022-23 میں، قومی شاہراہوں کے نیٹ ورک کو 25,000 کلومیٹر تک پھیلایا جائے گا اور 20,000 کروڑ روپے عوامی وسائل کی تکمیل کے لیے فنانسنگ کے اختراعی ذرائع سے اکٹھے کیے جائیں گے۔ انہوں نے کہا کہ پی پی پی موڈ کے ذریعے چار مقامات پر ملٹی ماڈل لاجسٹک پارکس کے قیام کے لیے ٹھیکے دیے جائیں گے۔
زراعت کے شعبے کا ذکر کرتے ہوئے وزیر خزانہ نے کہا کہ کیمیکل سے پاک قدرتی کھیتی کو پورے ملک میں فروغ دیا جائے گا، جس کے تحت پہلے مرحلے میں دریائے گنگا کے کنارے پانچ کلومیٹر کے دائرے میں کسانوں کی زمینوں پر توجہ مرکوز کی جائے گی۔ فصلوں کے تخمینہ لگانے، زمینی ریکارڈ کی ڈیجیٹلائزیشن، اور کیڑے مار ادویات کے چھڑکاؤ کے لیے کسان ڈرون کے استعمال کو فروغ دیا جائے گا۔ تیل کے بیجوں کی درآمدات پر انحصار کم کرنے کے لیے ایک معقول اور جامع منصوبہ بندی کی جائے گی تاکہ ملک میں تیل کے بیجوں کی پیداوار میں اضافہ کیا جا سکے۔

محترمہ سیتا رمن نے کہا کہ کین-بیتوا کنیکٹیویٹی پروجیکٹ 44,605 ​​کروڑ روپے کی تخمینہ لاگت سے لاگو کیا جائے گا جس کا مقصد کسانوں کی 9.08 لاکھ ہیکٹر اراضی کو آبپاشی کی سہولیات فراہم کرنا، 62 لاکھ لوگوں کو پینے کے پانی کی فراہمی اور 103 میگاواٹ پن بجلی اور 27 میگا واٹ شمسی توانائی فراہم کرنا ہے۔اس پروجیکٹ کے لیے ترمیم شدہ بجٹ تخمینہ 2021-22 میں 4300 کروڑ روپے اور سال 2022-23 میں 1400 کروڑ روپے الاٹ کیے گئے ہیں۔ اس کے علاوہ دمن گنگا۔ پن جال، پارتاپی۔ نرمدا، گوداوری۔ کرشنا، کرشنا۔ پینار اور پینار۔ کاویری کو جوڑنے کا مسودہ ڈی پی آر کو آخری شکل دے دی گئی ہے اور مستفید ریاستوں کے درمیان اتفاق رائے ہونے کے ساتھ ہی مرکزی حکومت اس کے نفاذ کے لیے ضروری امداد دے گی۔
انہوں نے مزید کہا کہ مائیکرو اور چھوٹے کاروباری اداروں کی طرف سے فراہم کی جانے والی مہمان نوازی اور متعلقہ خدمات ابھی وبائی مرض سے پہلے کی سطح تک نہیں پہنچی ہے۔ ان پہلوؤں پر غور کرنے کے بعد ای سی ایل جی ایس کی مدت مارچ 2023 تک بڑھا دی جائے گی۔
انہوں نے کہا کہ اس کے گارنٹی کور کو 50,000 کروڑ روپے سے بڑھا کر مجموعی طور پر 5 لاکھ کروڑ روپے کردیا جائے گا۔ اس کے تحت خاص طور پر مہمان نوازی اور متعلقہ اداروں کے لیے اضافی فنڈز رکھے جا رہے ہیں۔اسی طرح ضروری فنڈز فراہم کرکے مائیکرو اور اسمال انٹرپرائزز کے لیے کریڈٹ گارنٹی ٹرسٹ (سی جی ٹی ایم ایس ای) اسکیم میں ترمیم کی جائے گی۔ اس سے مائیکرو اور چھوٹے کاروباری اداروں کو 2 لاکھ کروڑ روپے کا اضافی قرضہ ملے گا اور روزگار کے مواقع بڑھیں گے۔
انہوں نے کہا کہ کورونا وبا کی وجہ سے اسکولوں کے بند ہونے کے نتیجے میں تقریباً دو سال کی رسمی تعلیم کا نقصان ہوا ہے خاص طور پر دیہی علاقوں کے بچوں اور درج فہرست ذاتوں اور درج فہرست قبائل اور دیگر پسماندہ طبقات سے تعلق رکھنے والے بچوں کا خاصا تعلیمی نقصان ہوا ہے۔ ان میں سے زیادہ تر بچے سرکاری اسکولوں میں پڑھتے ہیں۔ وزیر خزانہ نے کہا کہ اس بات کو ذہن میں رکھتے ہوئے ’پی ایم ای ودیا‘کے پروگرام ‘’ون کلاس ون ٹی وی چینل‘ کو 12 ٹی وی چینلز سے بڑھا کر ضمنی تعلیم فراہم کرنے کے ساتھ ساتھ اسے تعلیم کے لیے ایک مضبوط نظام بنایا گیا ہے۔ اسے 200 ٹی وی چینلز تک بڑھایا جائے گا اور اس کے ساتھ تمام ریاستیں کلاس 1 سے کلاس 12 تک علاقائی زبانوں میں سپلیمنٹری تعلیم فراہم کر سکیں گی۔ ملک بھر کے طلباء کو ان کی دہلیز پر عالمی معیار کی قابل رسائی تعلیم فراہم کرنے کے لیے ایک ڈیجیٹل یونیورسٹی قائم کی جائے گی۔ اسے مختلف ہندوستانی زبانوں اور آئی سی ٹی فارمیٹس میں دستیاب کرایا جائے گا۔
آیوشمان بھارت ڈیجیٹل مشن کے تحت ‘نیشنل ڈیجیٹل ہیلتھ ایکو سسٹم کے لیے ایک کھلا پلیٹ فارم شروع کیا جائے گا۔ یہ ڈیجیٹل طور پر طبی سہولیات اور صحت کی سہولیات کی دستیابی، صحت کی منفرد شناخت، متفقہ فریم ورک اور سب کے لیے رسائی کی سہولت فراہم کرے گا۔ وزیر خزانہ نے کہا کہ اس وبا نے ہر عمر کے لوگوں میں ذہنی صحت کے مسائل کو بڑھا دیا ہے۔ معیاری ذہنی صحت کی کاؤنسلنگ اور دیکھ بھال کی خدمات تک بہتر رسائی فراہم کرنے کے لیے ایک ‘نیشنل ٹیلی منٹل ہیلتھ پروگرام شروع کیا جائے گا۔
محترمہ سیتا رمن نے کہا کہ ہر گھر، نل کا جل کے لیے 2022-23 میں 3.8 کروڑ خاندانوں کا احاطہ کرنے کے لیے 60,000 کروڑ روپے مختص کیے جا رہے ہیں۔ اس وقت 8.7 کروڑ گھرانوں کا احاطہ کیا گیا ہے ۔

1.5 لاکھ ڈاکخانوں کو کور بینکنگ سسٹم سے 100 فیصد منسلک کرنے کا اعلان کرتے ہوئے انہوں نے کہا کہ اس سے مالیاتی شمولیت ممکن ہوگی اور اکاؤنٹ نیٹ بینکنگ، موبائل بینکنگ، اے ٹی ایم اور پوسٹ آفس اکاؤنٹ کے ذریعے چلائے جاسکیں گے۔ بینک کھاتوں کے درمیان رقوم کی آن لائن منتقلی ہوگی۔ یہ خاص طور پر دیہی علاقوں میں رہنے والے کسانوں اور بزرگ شہریوں کے لیے ‘ انٹر آپریبی لیٹی اور مالی شمولیت کی سہولت فراہم کرے گا۔
ملک کی آزادی کے 75 سال کا جشن منانے کے لیے حکومت نے شیڈول کمرشل بینکوں کے ذریعے ملک کے 75 اضلاع میں 75 ڈیجیٹل بینکنگ یونٹس قائم کرنے کی تجویز پیش کی ہے۔ مقصد اس بات کو یقینی بنانا ہے کہ ڈیجیٹل بینکنگ ملک کے تمام حصوں تک قابل رسائی ہو۔
2022-23 میںای پاسپورٹ جاری کیے جائیں گے جن میں ایمبیڈڈ چپ اور مستقبل کی ٹیکنالوجی استعمال کی جائے گی تاکہ شہریوں کے بیرون ملک سفر کو بہتر بنایا جا سکے۔
وزیر خزانہ نے اعلان کیا کہ شہری منصوبہ بندی، علم کو فروغ دینے اور مختلف شعبوں میں تربیت فراہم کرنے کے لیے موجودہ پانچ تعلیمی اداروں کو سنٹرز آف ایکسیلنس کے طور پر نامزد کیا جائے گا۔ ان مراکز میں سے ہر ایک کو 250 کروڑ روپے کا فنڈ فراہم کیا جائے گا۔
محترمہ سیتا رمن نے کہا کہ عام طور پر ٹیلی کمیونیکیشن اور خاص طور پر 5G ٹیکنالوجی ترقی کو قابل بنا سکتی ہے اور روزگار کے مواقع فراہم کر سکتی ہے۔ انہوں نے کہا کہ ا سپیکٹرم کی نیلامی 2022 میں کی جائے گی تاکہ 2022-23 کے اندر 5G موبائل خدمات کے آغاز کو آسان بنایا جا سکے۔ 5G کے لیے ایک مضبوط ماحولیاتی نظام بنانے کے لیے ایک اسکیم شروع کی جائے گی۔
انہوں نے کہا کہ دفاعی محاذ پر ہماری حکومت برآمدات کو کم کرنے اور مسلح افواج کے لیے ساز و سامان میں خودکفالت کو فروغ دینے کے لیے پرعزم ہے۔