حکومت بہارحاجیوں کی بہترسہولیات کے لئے پابند عہد: زماں خان

پٹنہ: ترغیب حج مہم کے سلسلے سے حج بھون پٹنہ میں تمام ائمہ مساجد،اساتذہ ٔ مدارس ،دینی تنظیموں اورملی اداروں کے ذمہ داران علمائے کرام ومفتیانِ عظام ،ضلع کے ذمہ دار،وٹرینرس حضرات اورخادم الحجاج کی خصوصی نشست بروزمنگل بوقت دس بجے دن منعقد ہوئی۔بہار ریاستی حج کمیٹی کے چیئر مین الحاج عبد الحق نے جاری پریس اعلانیہ کے ذریعہ اس کی جانکاری دیتے ہوئے بتایا کہ آج کی اس خصوصی نشست میں سبھی اضلاع سے آئے دینی و ملی اداروں کے ذمہ دار ، علماء کرام ، ائمہ مساجداور بڑی تعداد میں علماء وسماجی کارکنان نے شرکت کی اور ترغیب حج مہم کی کامیابی کے لئے سبھی شرکاء نے اپنی مکمل معاونت کا یقین دلایا۔ مقررین نے اظہار ِخیال کرتے ہوئے فرمایا کہ پورے بہار میں جمعہ کے خطاب میں ترغیب ِحج کو موضوع بنانے سے اس کے اچھے نتائج ہوں گے۔علماء کرام نے یہ بھی کہا کے اس مہم کو پنچایت ، بلاک اورسب ڈویژن سطح پر چلاتے ہوئے لوگوں کو حج کا پیغام دیا جائے۔یہ سلسلہ لگاتار جاری رہے تو بہار کے حجاج کرام کے تعداد میں خاطر خواہ اضافہ کاقوی امکان ہے۔

حج بھون پٹنہ میں ترغیبِ حج مہم کے بڑے اجتماع سے علماء کرام اور وزیر اقلیتی فلاح کا خطاب

ریاستی حج کمیٹی کے چیرمین الحاج عبدالحق صاحب نے خطبہ ٔ صدارت پیش کرتے ہوئے فرمایاکہ میں اپنی اور ریاستی حج کمیٹی کی جانب سے ترغیب حج مہم کے پُر رونق جلسے میں شریک تمام شرکاء اور مندوبین کاشکریہ اداکرتاہوںاوریہ امیدکرتاہوں کہ آپ سب کی معاونت سے ہی ریاست گیرترغیب حج مہم کامیابی کی منزلیں طے کرے گی۔ ریاستی حج کمیٹی کی جہاں بھی آپ کوضرورت ہوگی وہاں ہم آپ کے ساتھ ہوں گے۔ موصوف نے حج کے امور میں دلچسپی رکھنے والے قوم و ملت کے دانشور حضرات، خصوصاََ ائمہ مساجد اساتذہ ٔمدارس،دینی تنظیموں اور ملی اداروں کے ذمہ دارعلماء کرام ومفتیان عظام سے مخلصانہ ا پیل کی کہ جمعہ کے خطاب میں حج کے فضائل و برکات اور استطاعت کے باوجودفریضئہ حج کی ادائیگی سے محروم رہ جانے والے افرادکے متعلق احادیث صحیحہ میں وارد وعیدکواپنی تقاریرو خطبات کے ذریعہ اجاگرفرمایاجائے اور زیادہ سے زیادہ صاحبِ استطاعت حضرات کواس عظیم فریضہ کی ادائیگی کی طرف متوجہ کیاجائے۔
ترغیب ِ حج مہم کی خصوصی نشست میں مہمانِ خصوصی کے طورپرتشریف لائے ہوئے اقلیتی فلاح کے وزیر محمدزماں خان نے کہاکہ معززوزیراعلیٰ بہارکی ہمیشہ یہ کوشش رہتی ہے کہ بہارکے حاجیوں کوکسی قسم کی دشواریوں کاسامنانہ کرناپڑے،حاجیوں کے مفادات کے لئے بہارسرکارکا مکمل تعاون شامل حال رہے گا۔
مولانا رضوان احمداصلاحی امیر حلقہ جماعت اسلامی بہار نے اپنے خطاب میں فرمایا کہ یہ کام اولاً دینی ملی اداروں کے ذمہ دار ، علماء کرام اور ائمہ مساجد کا تھا؛ لیکن یہ کام بہار ریاستی حج کمیٹی کر رہی ہے۔ یہ ان کا بہت ہی مستحسن قدم ہے۔اس کے لئے ریاستی حج کمیٹی کے تمام ذمہ دارن مبارک باد کے مستحق ہیں۔سابق چیرمین مولاناانیس الرحمٰن صاحب قاسمی نے فرمایا:ایمان کے بعدچارارکان ہیں دوکاتعلق مالیات ہے جن میں ایک حج ہے جوجامع العبادات ہے،ریاستی حج کمیٹی کی جانب سے ترغیبِ حج مہم کایہ پروگرام نہایت بروقت اورنہایت مستحن اقدام ہے۔ترغیبِ حج پرتقاریرکاسلسلہ بجائے ذی قعدہ وذی الحجہ ماہِ صفروربیع الاول سے کیاجائے تاکہ خاطرخواہ نتائج برآمدہوں۔
مولاناثناء المصطفیٰ نوری نے اپنے جامع اور مختصرخطاب میں اس بات پرزورڈالاکہ اگرہرمسجدکے ائمہ اورعلماء صرف صرف پانچ پانچ افراد کوحج کے لیے تیارکرنے کاذمہ لے لیں توان شاء اللہ بہارکاکوٹہ آسانی سے پوراہوجائے گا۔مفتی محمدثناء الہدیٰ صاحب قاسمی نے فرمایاکہ شوشل میڈیا،پرنٹ میڈیااورالیکٹرونک میڈیاکے ذریعہ ترغیب ِ حج مہم کے پروگرام کوبڑی آسانی سے عام لوگوں تک پہنچایاجاسکتاہے۔ ترغیبِ حج مہم کی اس خصوصی نششت سے خطاب کرتے ہوئے ریاستی حج کمیٹی کے معزز رکن مفتی امجدرضا صاحب نے فرمایا کہ نوجوانوں کواس جانب زیادہ راغب کرنے کی کوشش کی جائے ،حج نہ کرنے کی وعیدیں بارباردہرائی جائیں اورحج کے فوائدومنافع کاذکرکیاجائے ۔ڈاکٹرانیس فیاض اصلاحی نے اپنے بیان میں کہاکہ حجاج کی تعدادمیں کمی کی بنیادی وجہ دین سے بے رغبتی ہے،اس لیے لوگوں میں دینی بیداری لانے کی سخت ضرورت ہے۔ تبلیغی جماعت بہار کے اہم ذمہ دار جناب مفتی قمرنسیم صاحب نے فرمایاکہ جب انسان گہری نیندمیں ہوتوبیدارکرنے کے لیے زوردارآوازکی ضرورت پڑتی ہے۔اس لیے ترغیب ِ حج مہم کے ذریعہ پوری قوت کے ساتھ ہرہرگھرتک پیغام کوعام کرنے کی ضرورت ہے۔سابق چیرمیں حاجی محمدالیاس عرف سونوبابونے اپنے خطاب میں فرمایاکہ آج کی ترغیبِ حج مہم کی اس خصوصی نششت میںتمام ائمہ مساجد،دینی وملی اداروں کے ذمہ داران وعلمائے کرام اورمدارس ِاسلامیہ کے اساتذہ ٔ عظام کے جذبہ وجوش کودیکھ کرایسالگ رہاہے کہ ہماری محنت رنگ لائے گی ۔ان شاء اللہ مولاناعالم قاسمی نے دعائیہ کلمات میں خطاب کرتے ہوئے کہاپورے بہارمیں بیک وقت تمام ائمہ ترغیب حج کے موضوع پرگفتگوفرمائیں تواس کے بہترنتائج سامنے آئیں گے۔
آخر میں مشہور عالم دین اور دریا پور مسجد، پٹنہ کے امام و خطیب مولانا عالم قاسمی صاحب کی دعائوں پر ترغیب حج مہم کی یہ خصوصی نشست اختتام پذیر ہوئی۔ نظامت کے فرائض مولانا ایوب نظامی قاسمی نے انجام دیا اور تلاوت کلام پاک قاری صدیق احمد قاسمی نے پیش کیا۔ آج کے اجتماع کے شرکاء میں امارت شرعیہ، ادارہ شرعیہ، جماعت اسلامی ہند، امارت اہل حدیث ، جمیعت العلمائ، تبلیغی جماعت اور دیگر تمام دینی اور ملی اداروں کے ذمہ داران کے ساتھ ساتھ تمام اضلاع میں حج کے ذمہ دار اور معاون افراد نے شرکت فرمائی اور ریاست گیر ترغیب حج مہم کی کامیاب کے لئے اپنے بھر پور تعاون کا یقین دلایا ۔علاوہ برایں آج کے پُر رونق جلسے میں بڑی تعداد میں حج کے امور میں دلچسپی رکھنے والے افراد اور ذرائع ابلاغ کے احباب نے شرکت فرمائی۔
حج سے متعلقہ مزید معلومات کے لئے ریاستی حج کمیٹی کے دفتر کے فون نمبر- 0612-2203315 اور موبائل نمبر 9709647585(مفتی محمدعبیداللہ ) 8271463343 (اظہاراحمد) 9693638579 (صغیر احمد)، 9308102375 (محمد اختر حسین) ، 7070810696 (صفدرعلی)اور 7488279439 (محمد احسان صدیقی) پر بھی رابطہ کیا جا سکتا ہے۔