اردو کے مسائل پر اشرف استھانوی کی گہری نگاہ تھی، وہ بے باک اور نڈر صحافی تھے

پٹنہ: سینئرصحافی اشرف استھانوی گوناگوں خوبیوں کے مالک تھے۔اردو کے مسائل پر ان کی گہری نگاہ تھی وہ بے باک اور نڈر صحافی تھے۔ یہ باتیں جمعرات کو گورنمنٹ اردو لائبریری کے چئیر مین ارشد فروز سمیت اردو کے کئی صحافیوں نے جلسہ خراج عقیدت سے خطاب کرتے ہوئے کہیں۔اس کا اہتمام اردو میڈیا فورم نے گورنمنٹ اردو لائبریری میں کیا تھا۔ جلسے کی نظامت فورم کے سکریٹری اسحاق اثر نے کی۔

معروف صحافی اشرف استھانوی کے انتقال پر اردو میڈیا فورم کے زیر اہتمام تعزیتی نشست کا انعقاد

اپنی صدارتی تقریب میں ارشد فروز نے کہا کہ اشرف استھانوی سے ان کے ذاتی تعلقات تھے۔ انہوں نے اردو کی بنیادی باتیں انہیں سے سیکھیں وہ قابل قدر با اثر اور باوقار صحافی تھے وہ اردو والوں کے دلوں کے بستے تھے۔انہوں نے کہا کہ ان کے انتقال کے بعد ان کے وارثوں کی خبر گیری کی ضروت ہے۔ ہمیں ان کے بارے میں سوچنا چاہیے۔اس موقع پر اپنے خیالات کا اظہار کرتے ہوئے اردومیڈیا فورم کے نائب صدر ڈاکٹر اظہار احمد نے اشرف استھانوی کو خراج عقیدت پیش کرتے ہوئے ان سے وابستہ کئی یادیں تازہ کیں اور کہا کہ اردو صحافیوں کو نذر انداز کرنے کی روایت ختم ہونی چاہئے۔سینئرصحافی راشد احمد نے کہا جلسہ خراج عقیدت میں شرکت ضروری ہوتی ہے لیکن اس میں شرکت مشکل بھی ہے۔اشرف استھانوی کے انتقال کے بعد بہار کی اردو صحافت میں ایک خلا پیدا ہوگیا ہے۔اس موقع پر فورم کے سکریٹری انوار اللہ نے اردو میڈیا فورم کے صدر مفتی محمد ثناءالہدی قاسمی کا تعزیتی پیغام پڑھ کر سنایاوہ بہار سے باہر رہنے کی وجہ سے جلسے میں شریک نہیں ہوسکے۔
اقبال احمد (نمائندہ بی بی سی مقیم دہلی) اپنے تاثر کا اظہار کرتے ہوئے کہا کہ دوسروں کو فراموش کرنا ہماری اجتماعی کمزوری ہے جن کے شکار اشرف استھانوی بھی ہوئے۔ ہم اردو میڈیا فورم کے شکر گذار ہیں کہ انہوں نے بخل سے کام نہیں لیا اور اشرف استھانوی کو یاد کرنے کے لئے یہ جلسہ آراستہ کیا۔ سچ کی آواز کے ریزیڈینٹ ایڈیٹر ڈاکٹر سید شہباز عالم نے کہا کہ اشرف استھانوی میں قومی جذبہ بدرجہ اتم موجود تھا۔ وہ ہوا کے مخالف چلتے تھے، سماج کے مسائل پر ان کی نظر رہتی تھی وہ دوسروں کی مدد بھی کیا کرتے تھے۔ اردومیڈیا فورم کے سکریٹری ڈاکٹر انوار الہدی نے کہاکہ اشرف استھانوی کے انتقال سے اردو اور اردو صحافت کو ناقابل تلافی نقصان پہنچا ہے۔ اشرف استھانوی نے 1979-80 میں ہمارا نعرہ سے صحافت شروع کی وہ بے باک صحافی تھے۔ مسائل پر ان کی گہری نگاہ تھی ہمیں ان کے وارثوں کی خبر گیری کرنی چاہئے۔ فورم کے سکریٹری ضیاء الحسن نے قرآن وحدیث کے حوالے سے کہا کہ جو لوگ دنیا سے چلے جائیں انہیں اچھے نام سے یاد کیاجائے۔ وہ سچائی کے علمبردار تھے۔ انہوں نے کارکن صحافیوں کی مالی امداد کے لئے فنڈ اکٹھا کرنے کی ضرورت پر بھی زور دیا۔ سینئرصحافی عتیق الرحمن شعبان اظہار تاثر کے دوران جذباتی ہوگئے۔ ان کی آنکھوں سے آنسو نکل پڑے ، انہوں نے کہا اشرف استھانوی سے بڑا صحافی بہار میں کوئی نہیں تھا وہ بااثر صحافی تھے اور اپنی باتیں پورے اعتماد اور مضبوطی کے ساتھ رکھنا جانتے تھے۔
ممتاز صحافی، شاعر اور ادیب ڈاکٹر عطا عابدی نے کہا کہ اشرف استھانوی سے بہار قانون سازیہ کے اجلاس کے دوران اکثر ملاقات ہوتی تھی۔ ان کی بنیادی پہچان مسائل پر ان کی پختہ فکر تھے۔ ان میں بیباکی اور جرات کوٹ کوٹ کر بھری ہوئی تھی۔اردومیڈیا فورم کے میڈیا سکریٹری ساجد پرویز نے اشرف استھانوی کو خراج عقیدت پیش کرتے ہوئے کہا وہ بہت سرگرم صحافی تھے۔ اسلم جاویداں نے کہا کہ ہم نے بے شمار صحافیوں کو فراموش کردیا ہے۔یہ اردو میڈیا فورم کے لوگوں کا جذبہ اخوت ہے جس کے تحت ہم اشرف استھانوی کو یاد کررہے ہیں۔ملی اور قومی مسائل ان کی ترجیحات میں شامل تھے۔
 سینئر صحافی اور اردومیڈیا فورم کے جنرل سکریٹری ڈاکٹر ریحان غنی نے کہا کہ جب کسی صحافی کا انتقال ہوجاتا ہے تو ہم انہیں جلسہ خراج عقیدت پیش کرکے کچھ دیر کے لئے آنسو بہالیتے ہیں لیکن زندگی میں انہیں کبھی نہیں پوچھتے۔ بہار کے ایسے ایک درجن صحافی ہیں جو گذشتہ برسوں کے دوران ہم سے ہمیشہ کے لئے جدا ہوگئے لیکن ہم نے انہیں کبھی یاد نہیں کیا۔ ہمارا فرض بنتا ہے کہ ہم ان فراموش کردہ صحافیوں کی خدمات کو یاد کریں۔ انہوں نے یہ بھی شکوہ کیا کہ ہمارے ملی اور مذہبی ادارے کارکن صحافیوں کوصرف استعمال کرتے ہیں اور ان کی خبر گیری نہیں کرتے۔ اس افسوسناک رجحان کو ختم کرنے کے لئے ان اداروں کے ذمہ داروں پر ہمیں دباﺅ بنانا چاہئے۔
جلسے کے دوران صحافیوں خاص طور پر کارکن صحافیوں کوتعاون دینے اور ان کی خبر گیری کے لئے فنڈ جمع کرنے کے مشورے بھی دیئے گئے اور اردومیڈیا فورم سے یہ توقع کی گئی وہ اس سلسلے میں عملی قدم اٹھائے گا۔اس موقع پر ڈاکٹر افضل حسین، عارف اقبال،پرویز عالم،نیشنل اردو کونسل کے صدرشوکت علی رضوی،نیئر وارثی(حقیقت ٹائمس) نواب عتیق الزماں(روشنی جدید)سمیت کئی دوسرے صحافی نے بھی اپنے خیالات کا اظہار کیا اور اشرف استھانوی کو پرخلوص خراج عقیدت پیش کیا۔جلسے کے دوران تحریک اردو کے سکریٹری مظہر عالم مخدومی،ڈاکٹر آئی اے خان اور سنگم کے ایڈیٹر محمد راشد احمد نے جلسے میں شرکت عدم شرکت کے لئے معذرت کا اظہار کیا اور اشرف استھانوی کے لئے دعائے مغفرت کی۔