انوارالحق تبسم کی کتاب نئی نسل کو ماضی سے جوڑے گی

پٹنہ: اردو میڈیا فورم بہار پٹنہ اور سیمانچل میڈیا منچ فاؤنڈیشن کے زیر اہتمام بدھ کو بہار اردو اکادمی کےسمینار ہال میں پروفیسر انوارلحق تبسم (سبکدوش صدر شعبہ تاریخ اورینٹل کالج پٹنہ سیٹی) کی کتاب "عالمی تہذیب کو اسلام کا عطیہ ” کی رسم اجراء ادا کی گئی. تقریب کی صدارت جناب شفیع مشہدی (سابق چئیرمین ،اردو مشاورتی کمیٹی نے کی اور نظامت کا فریضہ اردو میڈیا فورم بہار کے جنرل سکریٹری ڈاکٹر ریحان غنی نے انجام دیا.

"عالمی تہذیب کو اسلام کا عطیہ ” کے اجرا کے موقع پر شفیع مشہدی اور کئی دوسرےدانشوروں کا اظہار خیال

 اپنی صدارتی خطبے میں جناب شفیع مشہدی نے امید ظاہر کی کہ انوار الحق تبسم کی یہ کتاب نئی نسل کو اپنے ماضی سے جوڑے گی. انہون نےکہا کہ ہم اپنے ماضی پر فخر وناز کرتے ہیں لیکن صرف فخر کرنے سے کام نہیں چلے گا بلکہ ماضی کی طرح ہمیں بھی تلاش وجستجو اور تحقیق کے کام میں لگنا ہوگااور اس بات پر غور کرنا ہوگا کہ ہمارا ماضی جب تابناک تھا تو ہمارا حال تاریک کیوں ہے. انہوں نے کہا کہ اس بات پر بھی سنجیدگی سے غور کرنے کی ضرورت ہے کہ جس تہذیب نےیورپ میں تاریکی دور کی وہ تہزیب آج تاریکی کا شکار کیوں ہو گئی. انہوں نے کہا کہ اس کتاب کا ہندی ایڈیشن بھی آنا چاہئیے تا کہ برادران وطن تک بھی ہمارا پیغام پہنچ سکے.

ہمیں اپنے حال پر سنجیدگی سے غور کرنا چاہئے:علیم اللہ حالی

اپنے کلیدی خطبے میں مشہور ادیب اور شاعرڈاکٹر علیم اللہ حالی نےکہا ہمیں اپنے حال پربھ کہ ماضی کے کارناموں کا ذکر کرنے اور اپنی شاندار خدمات پر خوش ہو نے کے ساتھ ہی ایک زندہ قوم کی حیثیت سے ہماری یہ بھی زمہ داری بنتی ہے کہ ہم اپنے حال پر غور کریں جو ماضی کے مقابلے میں افسوسناک حد تک پست نظر آتا ہے. انہوں نے کہا کہ منبر ومحراب کے سائے میں رہنے والا طبقہ مسلمانوں کے امراض کا بہتر علاج کر سکتا ہے.

انوارالحق تبسم نے فکر وتحقیق کی دنیا بسائی ہے: مفتی ثناءاالہدی قاسمی

اس سے قبل اپنے خطبہ استقبالیہ میں اردو میڈیا فورم بہار کے صدر مفتی محمد ثناء الہدی قاسمی نے اس کتاب کی تصنیف پر پروفیسر انوار تبسم کو مبارک باد دی اور اس کتاب کو” ٹو ان ون” قرار دیا. مفتی ثناء الہدی قاسمی نے کہا کہ پروفیسر انوارلحق تبسم نے فکر وتحقیق کی دنیا بسائی ہے اور اس موضوع سے جنون کی حد تک تعلق قائم کیا ہے.

اس کتاب میں قارئین کے لئے کافی معلومات ہیں:امتیاز احمد

ڈاکٹر امتیاز احمد سابق ڈائریکٹر خدا بخش اورینٹل لائبریری نے کہا کہ یہ کتاب مجموعی طور پر بہت اچھی ہے اور اس میں قارئین کے لیے کافی معلومات ہیں. انہوں نے کہا کہ عالمی تہذیب پر اسلام کے بڑے احسانات ہیں اور اسلام کے تعلق سے جان بوجھ کر غلط فہمیاں پیدا کی گئی ہیں. اس لئے اس کے ازالے کے لئے اس کتاب کا انگریزی اور ہندی ایڈیشن بھی آنا چاہیئے.

تجارت کے شعبہ میں ہم حضرت خدیجہ کو فراموش نہیں کر سکتے: توقیر عالم

مولانا مظہرالحق عربی فارسی یونیورسٹی کے سابق پرووائس چانسلر پروفیسر توقیر عالم نے پروفیسر انوارلحق تبسم کو مشورہ دیا کہ ماضی میں  جن خواتین کے بڑے کارنامے رہے ہیں ان پر وہ الگ سے کتاب تیار کریں. انہوں نے کہا کہ تجارت کے شعبے میں ہم حضرت خدیجہ کو فراموش نہیں کر سکتے.

ہمیں اپنی حالت بدلنے کے لئے مضبوط لائحہ عمل بنانا چاہئے: اشرف فرید

قومی تنظیم کے مدیر اعلیٰ، اردو میڈیا فورم بہار کے سرپرست اور اردو ایکشن کمیٹی بہار کے صدر ایس ایم اشرف فرید نے کہا کہ حضرت محمد کی بعثت سے پہلے عرب کی کیا حالت تھی اس پر ہم سب کو غور کرنا چاہیے او ر ہمیں اپنی حالت بہتر بنانے کے لئے وہی لائحہ عمل بنانا چاہئے جو نبی کریم صل اللہ علیہ وسلم نے بنایا تھا. انہوں نے کہا کہ اسلام پر جتنا یلغار ہو رہا ہے اتنا ہی تیزی سے اسلام دنیا میں پھیل رہا ہے.

اسلام نے عالمی تہذیب کو بہت کچھ دیا:عبدالواحدانصاری

بہار اردو اکادمی کے سابق نائب صدر ڈاکٹر عبدالواحد انصاری نے کہا کہ اسلام نے عالمی تہذیب کو بہت کچھ دیا جس کا بہت حد تک ذکر پروفیسر انوارلحق تبسم نے اپنی کتاب میں کیا ہے. انہوں نے کہا کہ اسلام پر گفتگو کرتے ہوئے ہم دفاعی انداز اختیار کر لیتے ہیں. یہ ہمارا کمزور پہلو ہے. اردو کونسل ہند کے ناظم اعلیٰ ڈاکٹر اسلم جاوداں نے کہا کہ اس کتاب میں بیش قیمت معلوماتی باتیں اکٹھا کی گئی ہیں اور اسے پڑھنے سے بصیرت کا احساس ہوتا ہے. ادیب اور محقق ڈاکٹر نسیم اختر نے کہا کہ یہ کتاب تازگی کا احساس دلاتی ہے.

اورینٹل کالج پٹنہ سیٹی کے پرنسپل ڈاکٹر اقبال افضل نے کہا کہ اسلام نے عالمی تہذیب کو جو کچھ دیا ہے اسے اس کتاب میں بہت خوبصورتی کے ساتھ پیش کیا گیا ہے. انہوں نے اس کتاب کے مطالعہ کے لئے سنجیدگی کی ضرورت ہے. 

سیمانچل میڈیا منچ فاؤنڈیشن کی سکریٹری تسنیم کوثر نے کہا کہ اس کتاب کو مولویانہ نظریے نہ دیکھیں. انہوں نے کہا کہ جب کسی کتاب کے تعلق سے ڈائس پر سوالات کئے جائیں تو اس کا مطلب ہے قارئین کتاب پڑھنا چاہتے ہیں. انہوں نے پٹنہ میں اس کتاب کے اجرا کو فال نیک قرار دیا.

عالمی تہذیب کو سمجھنے کے لئے عربی اور فارسی جاننا ضروری ہے:عید محمد انصاری

مولانا مظہر الحق عربی فارسی یونیورسٹی کے پرو وائس چانسلر پروفیسر عید محمد انصاری نےکہا کہ عالمی تہذیب کو سمجھنے کے لئے عربی اور فارسی کتابوں کا مطالعہ کرنا ضروری ہے. انہوں نے کہا کہ یہ بہت قیمتی کتاب ہے اور محنت سے لکھی گئی ہے.

تقریب کا آغاز مفتی محمد ثناء الہدی قاسمی نے تلاوت قرآن پاک سے کیا.اس کے بعد الحرا ٹیوٹوریل، شریف کالونی کی درجہ نہم کی طالبات اقصٰی زماں، ماہرا اختر اور مبشانفیس نے بہت ہی خوبصورت انداز میں علامہ اقبال کی رعائیہ نظم پیش کی. تقریب کی نظامت کرتے ہوئے اردو میڈیا فورم بہار کے جنرل سکریٹری ڈاکٹر ریحان غنی نے پروفیسر انوارلحق تبسم سے اپنے دیرینہ تعلقات کا زکر کیا اور کہا کہ تعلقات میں اگر تہذیب، متانت او رشائستگی کا پاس ولحاظ رکھا جائے تو رشتوں میں کبھی کبھی تلخی پیدا نہیں ہوگی. انہوں نے کہا کہ پروفیسر انوارلحق تبسم کی کتاب ہمی غور وفکر کی دعوت دیتی ہے کہ ہم پوری دنیا میں معتوب اور ذلیل کیوں ہو رہے ہیں. پروگرام میں کافی تعداد میں اہل ذوق حضرات نے شرکت کی جن میں الحرا پبلک اسکول کے ڈائ نذیر احمد، ڈاکٹر عبدالباسط حمیدی، اردو میڈیا فورم بہار کے سکریٹری ڈاکٹر انوارالہدی، ضیاء الحسن، انواراللہ، اردو ایکشن کمیٹی بہار کے رکن شاہ فیض الرحمن اور ڈاکٹر ثریا جبیں، مظہر عالم مخدومی ،محمد ارمان الدین، سلمان غنی، محمد جعفر امام، سید امتیاز کریم، ڈاکٹر عطا عابدی ،ناشاد اورنگ آبادی ،اثر فریدی سیف السلام غزالی، ارشادالحق ، عبدالواحد رحمانی ،مولانا غلام اکبر قاسمی، یعقوب اشرفی ،عمران صغیر، حسن رضا امجدی، اقبال احمد، ذہین حیدری، شرف الہدی ،سلطان آزاد اور ابصار بخیر کے نام خاص طور پر قابل ذکر ہیں۔