سیلاب متاثرین کو تمام قسم کی امداد فراہم کی جارہی ہے : نتیش

پٹنہ:وزیر اعلیٰ نتیش کمار نے آج سیلاب متاثرہ علاقوں کا فضائی معائنہ کیا اور پورنیہ ضلع کے رپولی بلاک واقع بنیادی ہائی اسکول ، سپہا میں سیلاب راحت کیمپ کا معائنہ کیا ۔ معائنہ کے دوران وزیر اعلیٰ نے کمیونٹی کچن ، سیلاب راحت ہیلتھ سینٹر ، مفت مویشی دوا تقسیم سینٹر وغیرہ کے انتظام کا جائزہ لیا ۔وہاں رہ رہے لوگوں سے وزیراعلیٰ نے بات کر کے کمیونٹی کچن انتظامات اور راحت کیمپ میں فراہم کرائی جارہی سہولتوں کے بارے میں بھی پوری معلومات حاصل کی ۔ جائزہ کے دوران وزیر اعلیٰ نے حکام کو ضروری ہدایات دیں ۔
جائزہ کے بعد میڈیا اہلکاروں سے بات کر تے ہوئے وزیر اعلیٰ نے کہا کہ یہاں کاجو علاقہ متاثرہوا ہے اس کا فضائی سروے کر کے سب کچھ ہم نے دیکھ لیا اور یہاں آکر لوگوں سے بات کرکے راحت کے لیے جوکام ہو رہے ہیں ان کی جانکاری لی۔تمام متاثرہ لوگوں کو راحت دینے کے سبھی انتظامات کیے جارہے ہیں۔ یہاں کھانے کے انتظام کے ساتھ ساتھ رہنے کا بھی انتظام کیا گیا ہے ۔جو بھی متاثر کنبہ ہے ان کوالگ سے ہم لوگ راحت دیتے ہیں ۔ سیلاب کے سبب جو کھیتی برباد ہوتی ہے ان کو بھی راحت دی جاتی ہے ۔ اس کو پور ی طرح سے دیکھا جا رہا ہے ۔ آفات مینجمنٹ محکمہ ایک ایک چیز کو دیکھ رہا ہے۔

وزیر اعلیٰ نتیش کمار نے سیلاب متاثرہ علاقوں کا فضائی معائنہ کیا

دریں اثناءوزیراعلیٰ نتیش کمار نے آج سیلاب متاثرہ علاقوں کے فضائی معائنہ کے دوران کٹیہار ضلع کے براری بلاک واقع بھگوتی مندرکالج (بی ایم کالج)لکشمی پور میں سیلاب راحت کیمپ کا معائنہ کیا ۔ معائنہ کے دوران وزیر اعلیٰ نے سیلاب راحت کیمپ میں سیلاب راحت ہیلتھ سینٹر ،سیلاب متاثرہ حاملہ خواتین کے رہنے کی جگہ ، آنگن باڑی سینٹر میں متاثر کنبوں کے بچوں کو پڑھنے کی سہولت ، کورونا جانچ ، ٹیکا کاری کے انتظامات ، مفت دوا تقسیم سینٹر،مویشیوں کے رہنے کی جگہ کمیونٹی کچن کے انتظام کا جائزہ لیا ۔وزیر اعلیٰ نے سیلاب راحت کیمپ میں رہ رہے لوگوں سے کمیونٹی کچن میں ملنے والے کھانے کے معیار کے بارے میں پوری جانکاری لی ۔
معائنہ کے دوران وزیر اعلیٰ نے ڈی ایم کو ہدایت دیتے ہوئے کہا کہ سیلاب راحت کیمپ میں رہنے والے ہر شخص کی کورونا جانچ کرائیں ۔ کورونا انفیکشن سے متاثر پائے جانے والے اشخاص کو آئی سو لیشن میں رکھا جائے ۔ سیلاب راحت کیمپ میں رہ رہے لوگوں کو کوئی دشواری نہ ہو اس کا مکمل خیال رکھیں ۔
میڈیا اہلکاروں سے بات کر تے ہوئے وزیر اعلی نے کہا کہ سیلاب متاثرہ علاقوں کا ہوائی سروے کر نے کے بعد زمین پر جاکر متاثرہ لوگوں کے لیے چلائے جارہے راحت اور بچاﺅ کے کام کا جائزہ لے رہے ہیں ۔ گنگا ندی کے پانی کی سطح میں اضافہ کے سبب کٹیہار کا علاقہ بھی متاثر ہوا ہے ۔ سال 2016 میں بھی گنگا کے پانی کی سطح بڑھنے سے بہت سے علاقے متاثر ہوئے تھے ۔ اس مرتبہ گنگا کے پانی کی سطح 2016 سے تھوڑا کم ہے ،لیکن علاقے کم متاثرنہیں ہوئے ہیں ۔ انہوں نے کہا کہ سال 2016 میں بھی ہم یہاں آئے تھے ۔ کٹیہار میں لوگوں کو کھانا دینے کے ساتھ ساتھ ان کے الگ سے رہنے کا انتظام کیا جارہا ہے ۔ تمام لوگوں کو ہر طرح سے مدد دینا ہے ۔ متاثرہ کنبوں کو ہر طرح سے مدد دی جارہی ہے ۔ 6ہزار روپے ہرکنبے کو دیا جاتا ہے ساتھ ہی کھیتی میں جو بھی نقصان ہوا ہے اس کا بھی ہم لوگ تخمینہ لگاکر ان کی مدد کر تے ہیں ۔ ابھی تمام لوگوں کو محفوظ رکھنے کے ساتھ ساتھ، ان کی مدد کی جارہی ہے ،لوگوں کی کورونا کی جانچ اور ٹیکا کار ی کا کام کیا جارہا ہے ۔ تمام راحت کیمپوں میں یہ کام کیا جا رہا ہے ۔ اگر خواتین حاملہ ہیں تو ان کا بھی خیال رکھا جاتا ہے ۔

وزیر اعلیٰ نے کہا کہ تمام ندیوں کے پانی کی سطح کی ہر روز رپورٹ لیتے ہیں ۔پانی کی سطح کتنی بڑھی ،کتنے علاقے متاثر ہوئے ، کتنی آبادی متاثر ہوئی ان تمام چیزوں کی جانکاری لی جاتی ہے ، اس کے باوجود جگہ پر جاکر دیکھنے سے مجھے اطمینان ہو تا ہے ۔لوگوں سے بات کر تے ہیں ، ان کی بات سنتے ہیں اور انتظامات کی جانکاری لیتے ہیں ۔ ان کے حالات کو دیکھ کر جو بھی مدد کی ضرورت ہو تی ہے اس پر فوری کام کیا جاتا ہے ۔ کوئی ایسا سال نہیں ہے جب ہم کٹیہار نہیں آئے ہوں ، ہم ہمیشہ کٹیہارآتے ہیں ۔ انہوں نے کہا کہ ہم لوگ پوری کو شش کر تے ہیں کہ مسائل کا حل ہو ۔ سیلاب ایسی چیز ہے جس کے بارے میں آپ دعویٰ نہیں کر سکتے کہ آپ ہر مر تبہ ہر چیز محفوظ کر لیں گے ۔ آبی وسائل محکمہ سے مسلسل ہم اس کا جائزہ لیتے رہتے ہیں ۔ مستقبل طور سے جن علاقوں کا حل ہو سکتا ہے اس کے لیے بھی ہم کام کر تے ہیں ۔
اس موقع پر نائب وزیر اعلیٰ تارکشور پرساد ، خوراک و صارفین تحفظ کی وزیر لیشی سنگھ ، ممبر اسمبلی مسز بیما بھارتی ، ممبر اسمبلی وجئے سنگھ ،ممبر قانون ساز کونسل اشوک اگروال ، وزیر اعلیٰ کے پرنسپل سیکریٹری چنچل کمار، آبی وسائل کے سیکریٹری مسٹر سنجیوکمارہنس ، آفات مینجمنٹ محکمہ کے او ایس ڈی مسٹر سنجے کماراگر وال ، کمشنر پورنیہ پریم سنگھ مینا ، آئی جی پورنیہ رنج سریش پرساد چودھری ، ڈی ایم ، ایس پی اور سنیئر افسران موجود تھے ۔