ممبئی: اداکار-ہدایتکار ستیش کوشک انتقال کر گئے، آج صبح سویرے اداکار انوپم کھیر نے ٹویٹ کیااور اسکی معلومات دی۔

"میں جانتا ہوں کہ موت اس دنیا کی آخری سچائی ہے! لیکن میں نے خوابوں میں بھی نہیں سوچا تھا کہ میں یہ بات کسی دن اپنے بہترین دوست کے بارے میں لکھوں گا۔ 45 سال کی دوستی پر ایسا اچانک فل سٹاپ!! آپ کے بغیر زندگی کبھی ایک جیسی نہیں رہے گی ستیش! ” انوپم کھیر نے ٹویٹ کرکے تعزیت کا اظہار کیا۔

ستیش کوشک ایک اداکار، مزاح نگار، اسکرین رائٹر، ہدایت کار اور پروڈیوسر تھے۔ وہ 13 اپریل 1955 کو ہریانہ میں پیدا ہوئے۔ انہوں نے بالی ووڈ میں اپنا کام تلاش کرنے سے پہلے تھیٹروں میں اداکاری کی۔

ایک فلمی اداکار کے طور پر، ستیش کوشک 1987 کی سپر ہیرو فلم مسٹر انڈیا میں کیلنڈر کے کردار، دیوانہ مستانہ (1997) میں پپو پیجر کے طور پر، اور سارہ کی ہدایت کاری میں بنی برطانوی فلم برک لین (2007) میں چانو احمد کے کردار کے لیے مشہور تھے۔ ستیش کوشک نے 1990 میں رام لکھن اور 1997 میں ساجن چلے سسرال کے لیے فلم فیئر بہترین کامیڈین کا ایوارڈ بھی جیتا تھا۔

ستیش کوشک کے پسماندگان میں ان کی اہلیہ اور ایک بیٹی ہے۔

اداکارہ کنگنا رناوت نے بھی اداکار کے انتقال پر اظہار تعزیت کیا۔

ستیش کوشک نے اپنی ہمہ جہت صلاحیتوں سے ناظرین کو مسحور کیا

ستیش کوشک کو بالی ووڈ میں ایک ایسی شخصیت کے طور پر یاد رکھا جائے گا جس نے نہ صرف اپنی پروڈکشن اور ڈائریکشن سے بلکہ اپنی مزاحیہ اداکاری اور تحریری مہارت سے بھی ناظرین کو مسحور کیا۔
ستیش کوشک کی پیدائش 13 اپریل 1956 کو ہوئی تھی۔ بچپن سے ہی وہ اداکار بننے کی خواہش رکھتے تھے۔ انہوں نے دہلی کے مشہور کروڑی مل کالج سے گریجویشن مکمل کیا اور پھر نیشنل اسکول آف ڈرامہ میں داخلہ لیا۔ 1978 میں اداکاری کی تعلیم مکمل کرنے کے بعد انہوں نے پونے فلم انسٹی ٹیوٹ میں داخلہ لیا۔ ستیش کوشک ایک اداکار بننے کے خواب کے ساتھ اسی کی دہائی میں ممبئی چلے گئے۔بطور اداکار انہیں 1983 میں فلم معصوم میں کام کرنے کا موقع ملا۔ سال 1987 میں ریلیز ہونے والی فلم مسٹر انڈیا ستیش کوشک کے سینی کیریئر کی ایک اہم فلم ثابت ہوئی۔ اس فلم میں انہوں نے کیلنڈر نامی باورچی کا کردار ادا کیا اور سامعین کو خوب ہنسایا۔
سال 1989 میں ریلیز ہونے والی فلم رام لکھن ستیش کوشک کی اہم فلموں میں سے ایک سمجھی جاتی ہے۔ اس فلم میں انہوں نے اپنی زبردست اداکاری سے ناظرین کے دل جیت لیے اور انہیں بہترین کامیڈین کے فلم فیئر ایوارڈ سے بھی نوازا گیا۔ دلچسپ بات یہ ہے کہ فلم انڈسٹری کی تاریخ میں یہ پہلا موقع تھا جب ایک ہی کیٹیگری کے لیے دو اداکاروں کو فلم فیئر ایوارڈ دیا گیا۔ سال 1993 میں، ستیش کوشک نے بونی کپور کی پروڈیوس کردہ روپ کی رانی چورو کا راجہ کے ساتھ فلم ڈائریکشن میں قدم رکھا۔ انل کپور، سری دیوی اور جیکی شراف جیسے نامور ستاروں کی موجودگی کے باوجود فلم کمزور اسکرپٹ کی وجہ سے ٹکٹ کھڑکی پرمتوقع کامیابی حاصل نہ کر سکی۔

سال 1995 میں ستیش کوشک کی ایک اور فلم پریم بطور ہدایت کار ریلیز ہوئی، سنجے کپور اور تبو کی اس فلم کو بننے میں تقریباً سات سال لگے، جس کی وجہ سے یہ فلم اپنا اثر دکھانے میں ناکام رہی اور ٹکٹ کھڑکی پر بری طرح سے مسترد کردی گئی۔ ستیش کوشک کے کیریئر کا ستارا 1999 میں ریلیز ہونے والی فلم ’ہم آپ کے دل میں رہتے ہیں‘ سے چمکا۔ ایک فیملی ڈرامہ جس میں انل کپور اور کاجول اداکاری کر رہے تھے، اس کی کہانی ایک امیر صنعتکار کے گرد گھومتی ہے جو ایک سال کے معاہدے پر اپنی سیکرٹری سے شادی کر لیتا ہے۔ ایک نئے موضوع پر بننے والی اس فلم کو شائقین نے پسند کیا۔ اس فلم کی کامیابی کے بعد ستیش کوشک بطور ہدایت کار اپنی شناخت بنانے میں کامیاب ہوگئے۔
سال 2000 میں بونی کپور کے بینر تلے بننے والی فلم ’ہمارا دل آپ کے پاس ہے‘ بطور ہدایت کار ستیش کوشک کی ایک اہم فلم شمار کی جاتی ہے۔ اس فلم میں انہوں نے ایک بار پھر اپنے پسندیدہ اداکار انیل کپور کے ساتھ کام کیا۔ خاندانی پس منظر پر مبنی اس فلم میں انیل کپور کے ساتھ ایشوریہ رائے کی جوڑی کوشائقین نے بے حد پسند کیا اور یہ فلم ٹکٹ کھڑکی پر سپر ہٹ ثابت ہوئی۔ سال 2001 میں باسو بھگنانی کے بینر تلے بننے والی، مجھے کچھ کہنا ہے، ہدایت کار ستیش کوشک کی سپرہٹ فلموں میں سے ایک ہے۔ جوانی کی محبت کی کہانی پر مبنی یہ فلم اداکار جیتندر کے بیٹے تشار کپور کی پہلی فلم تھی۔ تشار کپور اور کرینہ کپور کی جوڑی کو شائقین نے بے حد پسند کیا۔
سال 2003 میں ریلیز ہونے والی فلم تیرے نام ہدایتکار ستیش کوشک کی سپرہٹ فلموں میں سے ایک ہے، اس فلم کے ذریعے انہوں نے اداکار سلمان خان کو ایک نئے انداز میں متعارف کرایا اور ان سے سنجیدگی اداکاری کراتے ہوئے شائقین کو خوش کیا۔ ناظرین کی دلچسپی کو دیکھتے ہوئے انہوں نے چھوٹی اسکرین کا بھی رخ کیا اور فلپس ٹاپ ٹین میں میزبان کے طور پر کام کر کے ناظرین کو خوب محظوظ کیا۔ سال 2007 میں انہوں نے اپنے دوست انوپم کھیر کے ساتھ مل کر قرول باغ پروڈکشن کمپنی کی بنیاد رکھی جس کے بینر تلے تیرے سنگ بنائی گئی۔ ستیش کوشک کو دو بار فلم فیئر ایوارڈ سے نوازا جا چکا ہے۔ ستیش کوشک نے دو دہائی کے اپنے سنی کرئیر میں تقریبا 100فلموں میں اداکاری کی۔

ستیش کوشک کے انتقال پر بالی ووڈ ستاروں کا اظہارغم

بالی ووڈ ستاروں نے اداکار، پروڈیوسر اور ہدایت کار ستیش کوشک کے انتقال پر تعزیت کا اظہار کیا ہے۔
ستیش کوشک کا آج انتقال ہوگیا۔ ان کی موت پر بالی ووڈ ستاروں نے سوگ کا اظہار کیا۔ بالی ووڈ کے کئی ستاروں نے سوشل میڈیا کے ذریعے انہیں خراج عقیدت پیش کیا ہے۔
ستیش کوشک کے قریبی دوست اداکار انوپم کھیر نے اپنے ٹویٹ کے ذریعے ستیش کوشک کی موت کی اطلاع دی۔ انوپم کھیر نے اپنے ٹوئٹر ہینڈل سے ستیش کوشک کے ساتھ ایک تصویر شیئر کی۔ اس تصویر کو شیئر کرتے ہوئے انہوں نے لکھا، میں جانتا ہوں ‘موت اس دنیا کی آخری سچائی ہے’۔ لیکن میں نے کبھی خوابوں میں بھی نہیں سوچا تھا کہ میں جیتے جی اپنے بہترین دوست ستیش کوشک کے بارے میں یہ لکھوں گا۔ 45 سال کی دوستی کا ایسا اچانک اختتام۔ ستیش تمہارے بغیر زندگی پہلے جیسی نہیں ہوگی۔ اوم شانتی۔
کنگنا رناوت نے ٹویٹ کیا، میری صبح اس خوفناک خبر کے ساتھ ہوئی۔ وہ میرے سب سے بڑے چیئر لیڈر تھے۔ ایک کامیاب اداکار اور ہدایت کار ستیش کوشک جی بہت ہی مہربان اور سچے انسان ہیں۔ ‘ایمرجنسی’ میں ان کی ہدایت کاری کرکے مجھے کافی اچھا لگا۔ انہیں ہمیشہ یاد رکھا جائے گا۔ اوم شانتی
ستیش کوشک کی موت پر خراج عقیدت پیش کرتے ہوئے نیہا دھوپیا نے لکھا، "سینما کے لیے آپ کا شکریہ۔ جو مسکراہٹ آپ نے دی، اس کے لئے شکریہ۔ آپ کی روح کو سکون حاصل ہو۔ آپ کے خاندان سے میری محبت۔” خراج عیقدت پیش کرتے ہوئے مدھر بھنڈارکر نے لکھا، "میں نے اداکار-ہدایتکار ستیش کوشک جی کے انتقال کے بارے میں سن کرحیران ہوں۔ وہ ہمیشہ سے پرجوش تھے، انہیں ہمیشہ یاد رکھا جائے گا۔ ستیش کوشک کے خاندان سے میری تعزیت۔”
تعزیت کا اظہار کرتے ہوئے رتیش دیش مکھ نے بھی ٹویٹ کیا ‘یقین نہیں آرہا کہ آپ چلے گئے ہیں۔ آپ کی ہنسی اب بھی کانوں میں گونجتی ہے۔ ایک مہربان اور فیاض شریک اداکار ہونے کا شکریہ، ایک خاموش استاد ہونے کے لیے آپ کا شکریہ۔ آپ کو یاد کیا جائے گا، آپ کی میراث ہمارے دلوں میں زندہ رہے گی۔