اک شہر فن کو حکمران کی ضد اڑا کر لے گئی

 ہندستان کے دارلحکومت نئی دہلی میں فنون لطیفہ اور دستاویزات کے شیدائیوں کیلئے اندرا گاندھی نیشنل سینٹر فار آرٹ، نیشنل آرکائیوز اور نیشنل میوزیم کی شاندار عمارات و اسکے وسیع و عریض احاطے کسی جنت سے کم نہیں تھے۔ ان کا وجود میرے لئے بھی ایک نعمت تھی۔یہ تینوں عمارتیں دہلی کے وقار میں اضافہ کرتی تھیں اور ان ہی کی وجہ سے میں بھی بطور دہلی کے
مکین ہونے کے ناطے فخر محسوس کرتی تھی۔ نیشنل آرکائیوز میں تو پورے جنوبی ایشیاء کی تاریخ سمیٹی ہوئی ہے۔ خلجی، تغلق، پٹھان، مغل اور برطانوی دور حکومت کے تمام تر دستاویزات اور فرامین یہاں محفوظ ہیں اور محقیقین کی راہ دیکھتے رہتے ہیں۔ مگر اس وقت جب دہلی میں کرونا وائرس کی وبا ء نے پوری آبادی کو ہراسان کیا ہوا ہے اور اموات کی وجہ سے خاندان ٹوٹ پھوٹ کا شکار ہو رہے ہیں، بلکل اسی طرح وزیر اعظم نریندر مودی کی طرف سے نیا دارلحکومت اور نئے سرکاری دفاتر و رہائش گاہیں بنانے کی ضد نے اس شہر کی روح کو زخمی کرکے رکھ دیا ہے۔

دہلی کا وسطی علاقہ، یعنی پارلیمنٹ ہاوس سے انڈیا گیٹ تک اسوقت جیسے کوئی جنگ زدہ علاقہ لگتا ہے۔ ہر طرف کھدائی، اور بڑے بڑے گڈھے۔ نیا شہر بسانے کے نام پر اندرا گاندھی نیشنل سینٹر آرٹ۔ نیشنل آرکائیوز اور نیشنل
میوزیم سمیت کئی عمارات ڈھائی جا رہی ہیں۔ دہلی کی ثقافت و تہذیب ملبے کے ڈھیروں میں تبدیل ہوکر ہماری آنکھوں کے سامنے اس طرح ملیا میٹ ہو رہی ہے، جو شاید نادر شاہ یا تیمور لنگ کے حملوں کے وقت بھی نہ ہوئی ہو۔ ہندستان
کے افسرشاہی نظام میں،  ایک اسکول یا اسپتال بنانے کے لئے زمین کا ایک ٹکڑا حاصل کرنے میں ماہ و سال لگ جاتے ہی۔ مگر تین کلومیٹر پر محیط اور 200 بلین روپے کی لاگت والے اس پروجیکٹ کو بس چند روز میں ہی پاس کیا
گیا۔ ایسے وقت میں جب طبی سہولیات کے فقدان کی وجہ سے لوگ وباء سے ہلاک ہو رہے ہیں، حکومت کی نیا دارلحکومت بنانے کی ترجیح سے عوام بے حال ہیں۔ لاک ڈان کے دوران بھی اس منصوبہ پر کام زور و شور سے جاری ہے۔اس  سائٹ پر
روزانہ 300 سے زیادہ افراد کام کرتے ہیں جو سپر سپریڈر ہوسکتے ہیں اور ان کو لاک ڈاون سے مسنثیٰ رکھا گیا ہے۔
اس آرٹ سینٹر کے ساتھ کئی میری یادیں وابستہ ہیں۔کھبی اس کے وسیع و عریض احاطہ میں ریختہ فاؤنڈیشن کی طرف سے جشن اردو برپا ہوتا تھا، تو کبھی دور دراز کے صوبوں یا علاقوں کے رقص و موسیقی کا پروگرام منعقد ہوتا تھا۔
کبھی مشاعرہ تو کبھی کوی سمیلین۔ غرض آرٹ اور کلچر کے دیوانوں کیلئے یہ کسی آستانہ سے کم نہیں تھا۔ اس سینٹر نے مجھے ہندستان کے مسحورکن ثقافتی تنوع کو سمجھنے اور اسکی قدردانی سکھائی، جوفی الوقت اضطراب کا شکار ہے۔

فنون لطیفہ کے دیوانوں کیلئے اس احاطہ میں وقت جیسے تھم جاتا تھا۔ اسکی لائبریری میں تقریباً تین لاکھ سے زیادہ کتب موجود  تھیں۔ سامنے نمائش گاہ،جہاں ہر وقت ملک کے کسی نہ کسی گوشے کے کسی مصور کے شہ پاروں کی
نمائش لگی ہوتی تھی۔ اس کے متصل آڈیٹوریم، جہاں آرٹ و کلچر سے وابستہ کسی شخصیت کے لیکچر سے آپ محفوظ ہوسکتے تھے۔ اس کی ریفرنس لائبریری میں آچاریہ ڈاکٹر ہزارہ پرساد دویدی، اور کرشنا کرپلانی جیسے ممتاز شہریوں کا
ذاتی ذخیرہ موجود تھا۔ بد قسمتی سے حکمرانوں کی بے حسی اور ضد کی وجہ سے یہ جگہ اب تاریخ بن رہی ہے اوراسکے ذخیروں کے ضائع ہونے کا اندیشہ ہے۔

مورخین و آرٹ اور کلچر کے شیدائی، اس اہم جگہ کے ضائع ہونے پر ہلکان ہیں۔ تقسیم سے قبل کے پنجاب اور سکھ ازم  کے موضوع پر جب میں تحقیق کر رہی تھی، تو مجھے اکثر نیشنل آرکائیوز جانا پڑتا تھا۔ یہ پورے جنوبی ایشیاء کی تاریخ کے علاوہ نایاب اور انمول میراث کو سمیٹے ہوئے ہے۔ 1947میں برصغیر کی تقسیم کے وقت نئی مملکتوں ہندستان اور پاکستان کی افسر شاہی نے دفتری فرنیچر، خزانہ، فوج ودیگر ساز سامان کو آپس میں بانٹ تو لیا، مگر کتب اور آرکائیوز کا بٹوارہ نہیں ہوا۔ اسی لئے آرکائیوز سے متعلق سبھی دستاوئزات ہندستان  میں ہی رہی۔ مثال کے طور مغلیہ دور پر تحقیق کرنے والے کسی بھی محقق کو اگر شہنشاہ اکبر یا کسی دیگر فرنانروا  کے کسی تحریری فرمان کا مطالعہ کرنا ہو، تو وہ اسی بلڈنگ میں موجود ہے۔ برطانوی دور کے جاسوسوں کی رپورٹیں، اس بلڈنگ کے خزانے میں موجود ہیں۔ نیشنل آرکائیوز کے دہلی میں موجود ہونے اور اسکو 1947کے بٹوارہ کی مار سے بچانے کی وجہ سے ہندستان میں ہمیشہ، پاکستان اور بنگلہ دیش کی نسبت بہتر مورخ پیدا ہوئے ہیں۔ چند برس قبل پاکستان کے دارلحکومت اسلام آباد میں موجود قائد اعظم یونیورسٹی کے ایک پروفیسر نے
مجھے بتایا کہ بھارتی حکومت، پاکستانی یا بنگلہ دیش کے محققین یا مورخین کو اس آرکائیوز سے مستفید ہونے کی اجازت نہیں دیتی ہے۔ پہلے تو مجھے لگا کہ پروفیسر صاحب کسی پروپگنڈہ کا شکار ہوگئے ہیں۔ ایسا کیسے ہوسکتا ہے کہ ان ممالک کے محقیقین کو اس مشترکہ وراثت سے دور رکھا جائے۔ مگر دہلی واپس آکر معلوم ہو اکہ یہ بلکل سچ ہے۔ پاکستان اور بنگلہ دیش کے محقیقن اپنی تاریخ کے ماخذ اور اصل اور بنیادی دستاویزات کے مطالعہ اور ان پر اپنی رائے قائم کرنے کے حق سے پچھلے 75سالوں سے محروم ہیں۔ زیادہ حیرت تو اسپر ہوئی، کہ ابھی تک کسی نے اس پر آوا ز بھی نہیں اٹھائی ہے اور بنگلہ دیش یا پاکستان کے وزراء اعظم یا دیگر حکمرانوں یا افسران نے اسکو کبھی ہندستان کے ساتھ گفت و شنید کا بھی موضوع نہیں بنایا ہے۔

صرف ایک بار پاکستانی اخبار ڈیلی ٹائمز کے دہلی کے نمائندے نے ہندستان اور پاکستان کے افسران کی ایک میٹنگ کے حوالے سے اس ایشو کو اٹھایا تھا، بعد میں مگر کسی نے بھی اسکو فالو نہیں کیا۔ اسی طرح کا خزانہ نیشنل میوزیم میں بھی موجود ہے۔ چند برس قبل یہاں کوڑی سے کریڈٹ کارڈ تک پر ایک نمائش کا اہتمام کیا گیا تھا۔ دریائے سندھ کی تہذیب سے لے کر اب تک کی کرنسی کا سفر اس نمائش میں دکھایا گیا تھا۔  یہ تصور کرنا  ہی مشکل تھا کہ ایک ہی چھت کے نیچے کرنسی کی تاریخ کا اس قدر نایاب خزانہ موجود ہوسکتا ہے۔ تب ایک افسر نے مجھے بتایا کہ یہ تو صرف ان کے پاس موجود خزانہ کا صرف 20 فیصد ہے۔

ماہرین کا کہنا ہے کہ عجائب گھر یا آرکائیو کی منتقلی خاصا پیچیدہ عمل ہے اور اسکے لئے برسوں کی محنت اور منصوبہ بندی کی  ضرورت ہوتی ہے۔ اس بیش قیمتی وراثت کو صندوقوں میں بھر کر اندھیری کوٹھریوں میں نہیں رکھا جا سکتا ہے۔ انہیں انتہائی احتیاط کے ساتھ سنبھالنا پڑتا ہے تاکہ انہیں کوئی نقصان نہ ہو۔ مزید یہ کہ منتقلی سے قبل نئی سائٹ بھی تیار ہونی چاہئے۔ ان  تین عمارتوں کے علاوہ، آٹھ دیگر عمارات، جن میں سے زیادہ تر آزادی کے بعد تیار کی گئی تھیں، کو بھی مسمار کیا جا رہا ہے، تاکہ وزیر اعظم مودی کیلئے محل اور نئے سرکاری دفاتر تعمیر کرائے جائیں۔ ہندستان کے پہلے وزیر تعلیم اور مجاہد آزادی مولانا ابوالکام آزاد کی دہلی کی رہائش گاہ کو بھی مسمار کیا جا رہا ہے۔ دیگر عمارات جو گرائی جا رہی ہیں، اتفاقاً کسی نہ
کسی صورت میں ہندستان کے پہلے وزیر اعظم جواہر لال نہرو کے ساتھ تعلق رکھتی ہیں اور نہرو کے لئے مودی کی ناپسندیدگی کسی سے پوشیدہ نہیں ہے۔نہرو کے ساتھ یہ نفرت کس قدر شدید ہے کہ بھارتی وزارت خارجہ کا صدر دفتر جو نہرو بھون کے نام سے جانا جاتا ہے اور بس دس سال قبل ہی تعمیر ہوا  اور جدید فن تعمیر کا ایک شاہکار مانا جاتا ہے، اسکو بھی مسمار کیا جا رہا ہے۔ اس سے زیادہ ستم ظریفی کیا ہوسکتی ہے۔

کہتے ہیں کہ آمروں کو آرٹ اور کلچر راس نہیں آتا ہے،کیونکہ ان کے ذریعے کسی نہ کسی صورت میں اظہار رائے اور موجودہ حالات کی عکاسی ہوتی ہے۔ تاریخ گواہ ہے کہ جس کسی بھی حکمران نے دہلی کی از سر نو تعمیر کی ہے، اس
کو اس میں بعد میں بیٹھنا نصبیب نہیں ہوا ہے۔ ما قبل تاریخ اس شہر کواندر پرستھ کے نام سے پانڈوں کے سردار یڈھشٹر نے بسایا۔ یہ شہر آج کے چڑیا گھر اور شیر شاہ سوری کے بنائے گئے پرانے قلعہ کے پاس ہے۔ مگر پانڈوں کو اس شہر میں رہنا نصیب نہیں ہوا۔ نہ صرف وہ ملک بدر ہوگئے، بلکہ  انہوں نے جوئے میں اپنی مشترکہ بیوی دروپدی کو بھی کھو دیا۔ یہی کچھ
واقعات بعد میں پرتھوی راج چوہان،  علاو الدین خلجی، فیروز شاہ تغلق،شیر شاہ سوری، شاہجہان اور بعد میں برطانوی حکمرانوں کے ساتھ پیش آئے۔ مگر یہ بھی ایک حقیقت ہے کہ ماضی میں آٹھ بار جن حکمرانوں دہلی کو ازسر نو تعمیر
کرایا، انہوں نے پرا نا شہر مسمار نہیں کیا۔ دہلی یونیورسٹی کے تاریخ کے پروفیسر سری رام اوبرائے نے مجھے  بتایا کہ دہلی میں اس وقت جو کچھ ہو رہا ہے وہ ماضی میں کبھی نہیں ہوا ہے۔ کہتے ہیں کہ جو قومیں اپنی تاریخ کے ساتھ انصاف نہیں کرتی ہیں، وہ نیست و نابود ہوجاتی ہیں۔

 بقول عین تابش:

اک شہر تھا اک باغ تھا، باد شرط اڑا کر لے گئی

نام و نشاں سارے بہا کر لے گئی

نوحہ کریں،قصہ لکھیں

تقدیر ہست و بود کا،مغموم افسانہ لکھیں