جھارکھنڈکے باشندوں کے چہروں پر مسکان ہوگی ، تبھی حکومت کے منصوبے کامیاب ہوں گے : ہیمنت

دمکا : جھارکھنڈ کے وزیراعلیٰ ہیمنت سورین نے ریاست کے موجودہ حالات کیلئے سابقہ حکومتوںکو ذمہ دار ٹھہراتے ہوئے آج کہاکہ ان کی حکومت اس زخم کو بھرنے کا کام کر رہی ہے جس سے ترقیات کے معاملے میں جھارکھنڈ آئندہ کچھ سالوں میں پورے ملک میں صف اول کی ریاستوں میں آسکے ۔
مسٹر سورین بدھ کو سنتال پرگنہ کے ڈویژنل ہیڈکوارٹر دمکا میں ”آپ کی سرکار ۔ آپ کے ادھیکار آپ کے دوار “پروگرام کے منعقد میگا کیمپ میں کثیر تعداد میں موجود مستفیدین کو خطاب کرتے ہوئے کہاکہ ریاست کی 80 فیصد آبادی کا تعلق دیہی علاقوں سے ہے ۔ ایسے میں جب گاﺅں مضبوط ہوں گے ، تبھی بلاک ، ضلع اور ریاست مضبوط ہوگی ۔ اسی مقصد سے ریاست کے باشندوں کی امیدوں ، توقعات اور ضرورتوں کے حساب سے ایکشن پلان تیار کئے جارہے ہیں۔
وزیراعلیٰ نے کہاکہ مفاد عامہ سے جڑے منصوبوں سے کوئی محروم نہ رہے ، اسی لئے ” آپ کے ادھیکار آپ کی سرکار آپ کے دوار“ پروگرام چلائے جارہے ہیں۔
اس کے توسط سے گاﺅں ۔ گاﺅں اور پنچایت سطح پر کیمپ لگا کر آپ کے مسائل کا حل اور منصوبوں سے جوڑا جارہاہے ۔ وزیراعلیٰ مسٹر سورین نے آج دمکا میں’آپ کے ادھیکار آپ کی سرکار آپ کے دوار پروگرام“ کے تحت ڈویژنل سطحی میگا کیمپ کو خطاب کرتے ہوئے کہا۔ انہوں نے لوگوں سے کہاکہ وہ اس پروگرام کا ضرور حصہ بنیں، کیونکہ جب آپ کے چہرے پر مسکان ہوگی ، آپ کو عزت وحترام ملے گا ، تبھی حکومت کے منصوبے کامیاب ہوں گے ۔

مسٹر سورین نے کہاکہ جھارکھنڈ کی جغرافیائی ساخت قدرے پیچیدہ ہے ۔ دور دراز کے علاقوں میں رہنے والے دیہی باشندوں کو سرکاری کام یا منصوبوں کا فائدہ لینے کیلئے بلاک یا ضلع ہیڈکوارٹر میں آنا پڑتاہے ۔ یہاں آنے کے بعد بھی اگر ان کاکام نہیں ہو پاتاہے تو انہیں کافی ذہنی اذیت ہوتی ہے ۔ وہ منصوبوں کا فائدہ لینے سے متعلق سوچنا بھی چھوڑ دیتے ہیں۔ اسی بات کو دھیان میں رکھ کر حکومت آپ کے دروازے پر آکر فلاحی منصوبوں سے آپ کو جوڑ رہی ہے ۔
وزیراعلیٰ نے کہاکہ جھارکھنڈ کو ملک کی صف اول ریاستوں میں شامل کرنے کے لئے حکومت پابند عہد ہے ۔ آپ سبھی کے تعاون سے ریاست کی ترقی کو رفتار دی جارہی ہے ۔ ہم ایک ایسا نظام تیار کر رہے ہیں ، جہاں کسی کے سامنے روزی روٹی کا مسئلہ نہیں ہوگا۔
مسٹر سورین نے کہاکہ حکومت کی تشکیل کے کچھ ہی مہینے ہوئے تھے کہ کوویڈ۔19 وبا نے ہم سبھی کو اپنی گرفت میں لے لیا۔ لاک ڈاﺅن لگا اور لوگ اپنے گھروں میں قید ہوگئے ۔ سارا نظام ٹھپ ہوگیا۔ تارکین وطن اپنے گھروں کو لوٹ آئے ۔ ایسے میں حکومت کے سامنے ایک بڑا مسئلہ کھڑا ہوا ۔ لیکن ہماری حکومت نے بہتر انتظام کے ذریعہ لاک ڈاﺅن کے دوران بھی ریاست کے باشندوں کے معاش کیلئے مسلسل کام کرتی رہی ۔ کئی منصوبے زمین پر اتارے گئے اور آج جب زندگی معمول پر آرہی ہے ، تب بھی اس کا فائدہ دیکھنے کو مل رہا ۔ آئندہ بھی غریب قبائلیوں ، خواتین ، بزرگوں ، اقلیتوں اور پسماندہ طبقات سمیت سماج کے تمام ضرورت مند لوگوں کیلئے منصوبے بنائے جارہے ہیں۔

مسٹر سورین نے کہاکہ ریاست کے نوجوانوں کو روزگار دینے کی سمت میں حکومت تیزی سے کام کر رہی ہے ۔ پہلی مرتبہ مختلف محکموں میں تقرری کیلئے ضابطہ بنایا گیا ۔ اس میں قبائلیوں ۔ اصل باشندوں کو سرکاری نوکریوں میں ترجیح دینے کا نظم ہے ۔ وہیں ، ریاست میں واقع پرائیوٹ کمپنیوں میں بھی آپریٹروں کو 75 فیصد نوکری مقامی لوگوں کو دینے کانظم کیا گیاہے ۔
وزیراعلیٰ نے کہاکہ پولیس تقرری ضابطہ میں تبدیلی کی گئی ہے ۔ اب پہلے فیزیکل امتحان ہوگا پھر تحریری امتحان ۔ انہوں نے کہاکہ آئندہ چھ ماہ کے اندر 30 ہزار افراد کو روزگار فراہم کرائے جائیں گے ۔ وزیراعلیٰ نے کہاکہ ’مکھیہ منتری روزگار سرجن یوجنا“ کے تحت خود روزگار کیلئے سبسیڈی پر 25 لاکھ روپے تک قرض حکومت فراہم کر رہی ہے ۔
مسٹر سورین نے کہاکہ ریاست میں صنعتی سرمایہ کاری کو فروغ دینے کیلئے نئی صنعتی اور حوصلہ افزا پالیسی بنائی گئی ہے ۔ اس پالیسی کو صنعتی دنیا کی جانب سے کافی پذیرائی مل رہی ہے اور وہ یہاں صنعت لگانے کی خواہش کا اظہار کر رہے ہیں۔ ہماری کوشش ہے کہ زیادہ سے زیادہ صنعت یہاں قائم ہوں اور مقامی لوگوں کو وسیع روزگار کے مواقع مل سکیں۔

وزیراعلیٰ نے کہاکہ خواتین کے ذریعہ جو مصنوعات بنائے جارہے ہیں ، اس کے پرموشن اور بازار کیلئے حکومت ہرممکن کوشش کر رہی ہے ۔ اس کے تحت پلاش برانڈ کو کمرشیل شکل دی جارہی ہے ، جس میں ان کی تمام مصنوعات کو حکومت خریدنے کا کام کر رہی ہے ۔ اس سے خواتین مضبوط اور خود کفیل بنیںگی ۔
وزیراعلیٰ نے اپنے خطاب کے دوران حکومت کے مختلف فلاحی منصوبوں سے لوگوں کو باخبرکرایا ۔
تقریب میں سنتھال پرگنہ ڈویژن کے تحت آنے والے 6 اضلاع کے 28 لاکھ 45 ہزار 759 مستفیدین کے مابین 11 ارب 27 کروڑ 52 لاکھ 91 ہزار 884 روپے کی املاک کی تقسیم کی گئی ۔ کیمپ میں 1423 نوتقرر ملازمین کو تقرری نامہ دیا گیا ۔ اس دوران وزیراعلیٰ اور دیگر معزز مہمانوں کے ذریعہ ہوڑ سومباد سنتھالی میگیزین کا اجرا کیا گیا ۔
اس موقع پر دیہی ترقیات کے وزیر عالمگیر عالم ، وزیر زراعت بادل ، وسائل محنت کے وزیر ستیہ نند بھوکتا ، رکن اسمبلی پروفیسر اسٹیفن مرانڈی ، نلین سورین ، پردیپ یادو ، بسنت سورین ، وزیراعلیٰ کے چیف سکریٹری راجیو ارون ایکا ، سکریٹری منیش رنجن ، سکریٹری راجیش شرما اور ڈویژنل کمشنر کے ساتھ دمکا ، گڈا ، پاکوڑ ، صاحب گنج ، دیوگھر اور جامتاڑہ اضلاع کے ڈپٹی کمشنر اور پولیس سپرنٹنڈنٹ سمیت دیگر افسران موجود تھے ۔