اقلیتی اداروں اور اقلیتوں سے متعلق بورڈ سے آنکھیں بند نہیں کی جاسکتیں:امارت شرعیہ

پھلواری شریف: مجھے خوشی ہورہی ہے کہ آج کی نشست کا تعلق اس ایجنڈہ سے ہے جس ایجنڈہ پر امارت شرعیہ نے ہمیشہ کام کیاہے، ابھی جس ایکٹ کی خوبصورتی اورمضبوطی کی بات کی جارہی ہے مجھے خوشی ہے کہ اسے بہتر اور موثر بنانے کی میں امارت شرعیہ کے امیر شریعت مفکراسلام حضرت مولانا محمد ولی رحمانی نوراللہ مرقدہ کا خون پسینہ لگا ہے ان کی قربانیاں ہیں اورامارت شرعیہ کے دوسرے امراء اور ذمہ داروں نے ہمیشہ اس پر توجہ دی ہے،یہ باتیں ،امارت شرعیہ کے قائم مقام ناظم  مولانا محمد شبلی القاسمی نے حج بھون میں وقف ویلفیئر فورم کی اہم نشست منعقدہ ۵؍ دسمبر میں کہی انہوں نے کہاکہ کل مجھے حضرت امیر شریعت مولانا احمد ولی فیصل رحمانی صاحب نے حکم دیاکہ کل ہونے والی میٹنگ میں آپ ضرور شریک ہوں، ظاہر ہے کہ آپ اس خانوادہ کے چشم وچراغ ہیں جن کی اس میں بڑی قربانی رہی ہے اور لمبی فکر اوقاف کے تعلق سے رہی ہے ۔ سبھوں کو یاد رکھنا چاہئے ،ہمیں تو اپنی ڈیوٹی یاد ہے اورامارت شرعیہ کے امیر شریعت سمیت دیگر ذمہ داران کی یہ واضح پالیسی ہے کہ ہم اقلیت سے متعلق اداروں سے آنکھیں نہیں بند کرسکتے ،چاہے وہ شیعہ سنی وقف بورڈ ہو، مدرسہ بورڈ ہو، حج کمیٹی ہویا طبیہ کالج ،مدرسہ شمس الہدی ہو۔یااردو کے تحفظ کے ادارے ہوں،یا دوسرے اس طرح کے ادارے ہوں، ان سب کی بہتری میں ہاتھ بٹانا ہمارا فرض ہے، اورامارت شرعیہ کے کاموں میں ایک بڑا کام ہے، پہلے ان کی جو کمیٹیاں ہوتی تھیں اس میں امارت شرعیہ، خانقاہ مجیبیہ، ادارہ شرعیہ اور جمعیۃ علماء ہند کے علاوہ دوسری ریاست کی بڑی تنظیموں کی نمائندگی ہوتی تھی۔ ظاہر ہے کہ ان تنظیموں کے افراد ہرضلع ،بلاک اورپنچایت میں ہیں، ان کے جذبات اورمسائل ان اداروں کے ذریعہ حکومت اورحکومتی اداروں تک پہونچتے تھے، اوران سماجی اور فلاحی اداروں کے ذریعہ  حکومتی اداروں کے پروگرام اور مسائل عوام تک پہونچتے تھے،کاموں کو آگے بڑھانے میں تعاون کا اشتراک ضروری ہے، اگر نیک نیتی سے مشورے دیئے جائیں تواس کے اچھے اثرات ہوں،وزیراعلیٰ بہار ریاست کے تمام طبقات کی ترقی کے لئے فکر مند رہتے ہیں،اقلیتی اداروں کی ترقی بھی وہ چاہتے ہیں اوراس کے لئے منصوبے بناتے ہیں۔ محترم وزیر اعلیٰ سے گذارش ہے کہ مذہبی سماجی اورفلاحی اداروں کے سربراہان کے ساتھ آپ کی سال میں ایک دوبار میٹنگ ہو۔اس میں جناب عامر سبحانی صاحب فیضی صاحب اہم ارول ادا کرسکتے ہیں۔ماضی میں خاص طور سے سبحانی صاحب نے ریاست کی ہمہ جہت ترقی اورتمام طبقات کی بہتری کے لئے قابل قدر خدمات انجام دیں ہیں، اس وقت اقلیتی فلاح سے متعلق جو بھی بورڈ ہیں ان کے ذمہ د اروں کو چاہئے کہ اپنی کمیٹی کے ساتھ مشورے ضرور کریں، ان کی میٹنگ حسب ضابطہ ہوتی رہے، لیکن گاہئے بگاہے ملی جماعتوں اور فلاحی اداروں کے ساتھ آپ کی آپ کے شعبہ سے متعلق مشاورتی نشست ہو اس سے کام میں بہتری آئے گی، ہم لوگ آپس میں نیک نیتی کے ساتھ ایک دوسرے کے تعاون کے لئے تیار ہیں، حکومت کے عزائم اچھے ہیں ،ہمیں ان کے ان عزائم سے پبلک کو روشناس کرانا چاہئے اور ان کے درمیان جتنا جائیں گے ، اتنا ہی بہتر ہوگا اورہمیں مل جل کر اوقاف کے بھی تعلق سے وہ کام کرنا چاہئے جو واقف کی منشاء کے مطابق ہو،تاکہ قوم وملت کے فائدے کے ساتھ ساتھ واقف کی آخرت ا چھی بنی رہے اوریہ کام ان کے لئے صدقہ جاریہ ہوں۔

۱۔ حضرت امیر شریعت مولانا احمدولی فیصل رحمانی کی خواہش ہے کہ وقف سے متعلق امور کو دیکھنے کے لئے امارت شرعیہ میں ایک آفس قائم ہو جس میں وقف بورڈ کی مدد اورآپسی اشتراک  سے کاموں کو آگے بڑھایاجائے گا،انشاء اللہ جلدآفس قائم ہوگی،قائم مقام ناظم نے فرمایاکہ اسٹیٹ سے لیکر ضلع تک کام کی نگرانی کی ضرورت ہے، ضلع میں ایک بڑی پریشانی کی طرف ہمارے نوشاد صاحب نے اشارہ کیاکہ چوں کہ اس کمیٹی کو ہم تنخواہ نہیں دیتے،اس لئے ان کی د لچسپی میں کمی ہوتی ہے، اس سلسلے میں میری عرض یہ ہے کہ ایسے لوگوں کا کمیٹی  میں انتخاب ہو جن کا پچھلا رکارڈ خدمت خلق اوردینی ملی کاموں سے دلچسپی کا ہو اوروہ رضاکارانہ خدمت میں جذبہ رکھتے ہوں۔

مولانانے اپنے خطاب میں کہاکہ ابھی بتایاگیاکہ بہت سی وقف کی زمینیں ایسی ہیں جس کی جانکاری بورڈ کو نہیں ہے، میری رائے یہ ہے کہ بورڈ کو ضلع کے اعتبارسے رجسٹرڈ وقف املاک کی فہرست جاری کرنی چاہئے اورضلع میں معتبرتعلیمی اورفلاحی اداروں کو بھی وہ فہرست دینی چاہئے،اس نوٹ کے ساتھ کہ مذکورہ وقف املاک کا تحفظ آپ کی بھی ذمہ داری ہے، اس میں کہیں کوئی پریشانی کی بات سمجھ میں آئے تو ضلع میں اورضلع کے فلاں فلاںوقف کی کمیٹی میں فلاں فلاں حضرات ہیں، جن کے نمبرات یہ ہیں، ان کو مطلع کریں ،ریاستی بورڈکے دفتر اوربعض فکرمند ارکان کے بھی نمبراس میں درج ہوں اسی طرح اس میں یہ بھی لکھاجائے کہ اگر آپ کے علم میں وقف کی کوئی جائداد ہو جو اس میں درج نہیں ہے، توبراہ کرم اس سے مطلع فرمائیں۔

مولانا نے کہاکہ اوقاف کی زمین کے سروے کاکام چل رہاہے، اس پر توجہ کی بات وقف کے وکیل صاحب نے کہی ہے ۔اس سلسلے میں الحمد للہ امارت شرعیہ کام کررہی ہے، کئی ضلع سے سروے افسر کا بھی میرے پاس فون آیاکہ لوگوں کا تعاون نہیں مل رہاہے، امارت شرعیہ  کی پہلی ضرورت ہے، میں نے فورا امارت شرعیہ  کے ضلع اوربلاک کے ذمہ داروں اوروہاں کے قاضی حضرات کو دفتر سے فون کرکے اس پر توجہ کی گذارش کی، اردو کے اخبارات میں عام لوگوں سے اس پر توجہ کی اپیل جاری کی، وہ بیس اضلاع جہاں کام ہورہے ہیں، ان تمام اضلاع کی فہرست بھی ان کو بتائی گئی، الحمدللہ امارت شرعیہ اس پر کام کررہی ہے اورکرتی رہے گی، آپ حضرات کے مشورے سے اس میں مزید بہتری لائی جائے گی، شیعہ اورسنی وقف بورڈ کے لوگوں اوران کے چیرمین حضرات کے رابطہ اورباہمی تعاون سے بورڈ کے کاموں کو بہتر بنانے کی راہ ہموار کی جائے گی۔

۲۔ سرکار نے جو اقلیتی ہاسٹل قائم کیے ہیں ان کی تفصیلات کیا ہیں ، ان میں رہائش کے کیا شرائط ہیں، اس کے ذمہ دارکو ن لوگ ہیں، اس کی جانکاری عوام کو ہونی چاہئے۔

۳۔جلد ہی امارت شرعیہ اوقاف کی زمین کے تعلق سے ایک کانفرنس حضرت امیر شریعت کی ہدایت کے مطابق بلائے گی جس کی ابتداپورے بہار سے کی جائے گی اورتمام اضلاع سے ضلعی اورلوکل وقف کمیٹی کوچھوڑ کر وہاں کے اوقاف کی صحیح واقفیت رکھنے والے اوروہاں کے مسائل کے جانکار افراد کے ساتھ ایک میٹنگ مرکزی دفتر امارت شرعیہ میں ہوگی،جب ان کے ذریعہ مسائل سامنے آجائیں گے پھر ضلعی وقف کمیٹی اوروقف بورڈ کے ذمہ د اران کے ساتھ ان مسائل کے حل کے لئے ایک نشست ہوگی اگر ضرورت محسوس کی جائے گی تو بہار کی دوسری ملی جماعت کے ساتھ مل کر وزیر اعلیٰ حکومت بہار سے بھی ملاقات کرکے مسائل رکھے جائیں گے۔