تینوں زرعی قانون کی واپسی کے لئے جو کسان شہید ہوئے، کیاان کی زندگیاں بھی واپس لائیں گے مودی؟

وزیراعظم نریندر مودی نے جمعہ کی صبح قوم کے نام خطاب کے دوران یہ اعلان کیا کہ تینوں زرعی قانون واپس لئے جائیں گے اور اس کے لئے پارلیامنٹ کے سرمائی اجلاس میں قانون کی واپسی کی کارروائی کی جائے گی۔اس اعلان کے ساتھ ہی انہوں نے تحریک کار کسانوں سے اپیل کیا کہ وہ اپنے گھروں کو لوٹ جائیں۔ وزیراعظم نے اپنے خطاب کے دوران کسانوں سے معافی بھی مانگی ہے۔
وزیر اعظم نریندر مودی کے تین زرعی قوانین کو واپس لینے کے اعلان کا حکمراں بی جے پی اور اس کی اتحادی جماعتوں نے خیرمقدم کیا ہے۔ جب کہ کانگریس اور اپوزیشن سیاسی جماعتوں نے ان قوانین کی مخالفت کررہے کسانوں کو ان کی تحریک کی کامیابی پر مبارکباد دی ہے۔

از قلم: ساجد پرویز

ان قوانین کے خلاف تحریک کی قیادت کرنے والے بھارتیہ کسان یونین کے رہنما راکیش ٹکیت نے کہا ہے کہ کسانوں کا احتجاج فوری طور پر واپس نہیں ہوگا۔ انہوں نے ٹویٹ کیا اور کہا کہ تحریک فوری طور پر واپس نہیں لیا جائے گا۔ ہم اس دن کا انتظار کریں گے جب پارلیمنٹ میں زرعی قوانین کو منسوخ کیا جائے گا۔ حکومت ایم ایس پی کے ساتھ ساتھ کسانوں کے دیگر مسائل پر بھی بات کرے۔
مرکز کے تین زرعی قوانین کو واپس لینے کے فیصلے پرسنیوکت کسان منچ نے کہا کہ اگر یہ فیصلہ پہلے لیا جاتا تو 666 کسانوں کی جانیں ضائع نہیں ہوتیں۔ منچ کے کنوینر ہریش چوہان اور شریک کنوینر سنجے چوہان نے ایک بیان میں کہا کہ حکومت نے بہت بڑی غلطی کی ہے۔ چوہان برادران نے کہا کہ حکومت کا یہ فیصلہ تحریک کے ایک سال مکمل ہونے کے بعد لیا گیا ہے، جس سے بی جے پی حکومت کا کسان مخالف چہرہ واضح ہو گیا ہے۔
دہلی کے وزیر اعلی اروند کیجریوال نے زراعت کے تینوں قوانین کی منسوخی کو اچھی خبر قرار دیتے ہوئے کہا کہ تحریک کے دوران جانیں گنوانے والے کسانوں کی شہادت ہمیشہ زندہ رہے گی۔وزیر اعظم نریندر مودی کی طرف سے تینوں زرعی قوانین کو منسوخ کرنے کے اعلان کے بعد کیجریوال نے ٹویٹ کیا”آج پرکاش دیوس کے دن کتنی اچھی خبر ملی ہے۔ تینوںزرعی قوانین منسوخ ۔ 700 سے زائد کسان شہید ہوگئے۔ ان کی شہادت لازوال رہے گی۔ آنے والی نسلیں یاد رکھیں گی کہ کس طرح اس ملک کے کسانوں نے اپنی جان کی بازی لگاکر کسانوں اورزراعت کو بچایا تھا۔ میرے ملک کے کسانوں کو میرا سلام۔
کانگریس کے سابق صدر راہل گاندھی نے تینوں زرعی قوانین کو واپس لینے کے حکومت کے اعلان کو ناانصافی کی شکست قرار دیا اور کسانوں کو جیت کی مبارکباد دیتے ہوئے کہا کہ اَن داتا(کسانوں)کے ستیہ گرہ کے سامنے تکبر کا سر جھک گیا ہے۔ گاندھی نے ٹویٹ کیا”ملک کے اَن داتا نے ستیہ گرہ سے تکبر کا سر جھکا دیا۔ ناانصافی کے خلاف یہ جیت مبارک ہو! جئے ہند، جئے ہند کا کسان۔
اتر پردیش کانگریس کی انچارج و جنرل سکریٹری پرینکا گاندھی واڈرا نے کہا کہ کسانوں پر ایک سال کے مظالم اور جبر کے بعد مودی حکومت کو حالیہ ضمنی انتخابات میں عبرتناک شکست کے بعد کسانوں کی طاقت کا اندازہ ہوگیا ہے۔ اس لیے اس جابر حکومت کی نیت پر ابھی یقین نہیں کیا جاسکتاہے۔
کانگریس نے کہا کہ وزیر اعظم نریندر مودی نے گزشتہ ایک سال سے تحریک چلارہے کسانوں کے ساتھ جو ناانصافی کی ہے اسے انہوں نے آج قبول کرلیا ہے اور اب مودی کو ملک کے کسان سے اس جرم کے لیے عوامی طورپر معافی مانگنی چاہئے۔
کانگریس شعبہ موصلات کے سربراہ رندیپ سنگھ سرجے والا نے جمعہ کو کہا کہ ملک کے کسان گزشتہ سال 26 نومبر سے تین زراعت مخالف قوانین کو واپس لینے کے لیے احتجاج کر رہے ہیں لیکن حکومت نے ہٹ دھرمی اور متکبرانہ موقف اختیار کرتے ہوئے کوئی توجہ نہیں دی۔ ان کے مطالبات اور ان کی تحریک کو غیر حساس طریقے سے کچلنے کی کوشش کی گئی۔انہوں نے اسے سنگین جرم قرار دیتے ہوئے کہا کہ اس تحریک کے دوران 700 سے زائد کسانوں نے اپنی شہادتیں دیں، کسانوں پر تشدد کیا گیا، لاٹھی چارج کیا گیا اور انہیں دہشت گرد، انتہا پسند اور خالصتانی کہہ کر ذلیل و خوار کیا گیا اور کئی بار مظاہرین کے ساتھ زبردستی کرنے کی کوششیں بھی کی گئی ہیں۔
سوال یہ اٹھتا ہے کہ وزیراعظم یہ اعلان اس وقت بھی کرسکتے تھے جب کسانوں ان تینوں قانون کی واپسی کے لئے شدید سردی و گرمی میں ستیہ گرہ کررہے تھے۔اس کے برعکس انہوں نے کسانوں کی تحریک کو کچلنے کے لئے طرح طرح کے ہتھکنڈے اپنائے۔ سڑکیں کھودی گئیں، کیلیں بچھائی گئیں اور نہ جانے کتنی اذیتیں دی گئی۔سینکڑوں کسانوں نے اپنی جانیں گنوادیں۔
میگھالیہ کے گورنر ستیہ پال ملک نے قانون کی منسوخی کے اعلان سے ایک دن قبل جمعرات کو این ڈی ٹی وی کو دیئے خاص انٹرویو میں کہا تھا کہ ملک کے اندر ابھی جو ماحول ہے اس سے نہ صرف اترپردیش میں بلکہ پورے ملک سے بی جے پی کا صفایا ہوجائے گا۔ انہوں نےواضح طور پر یہ بھیکہ پارلیمنٹ میں بی جے پی کے ارکان ڈھونڈے نہیں ملیں گے۔انہوںنے کہا کہ میں کسانوں سے ملتا ہوں اور میرا فیڈ بیک بالکل ہی صحیح ہے۔جمعہ کوپھر انہوںنے این ڈی ٹی وی کےدیئے انٹرویو میں واضح طورپر کہا کہ مودی جی کو یہ کام بہت پہلے ہی کردینا چاہئے۔ستیہ پال اس سے قبل بھی زرعی قانون کی واپسی کی وکالت کرچکے ہیں۔لیکن ان کی باتوں کا کوئی اثر نہیں ہوا۔
یہ سبھی جانتے ہیں کہ نریندرمودی نے تینوں زرعی قانون کی منسوخی کا فیصلہ ایسے وقت میں لیا ہے جب پنجاب اور اترپردیش میں انتخاب سر پر ہے۔اور اگر یہ واپس نہیں لیتے ہیں تو دونوں ریاستوں کے انتخاب میں اس کا خمیازہ انہیں بھگتنا پڑ سکتا ہے۔انہوں نے زرعی قانون کی منسوخی کے اعلان کے دن کا انتخاب بھی گرونانک جینتی کے دن کا کیا جس سے پنجاب کے کسان اور عوام خوش ہوجائیں۔
سب سے بڑا سوال یہ ہے کہ اگر وزیراعظم کو کسانوں سے اتنی ہی ہمدردی ہے تو کیا وہ ان کسانوں کی زندگیاں واپس لا سکتے ہیں جنہوں نے ان تینوں قانون کی واپسی کے لئے جدوجہد کرتے ہوئے اپنی جانیں گنوادیں؟