مجاہد اْردو حبیب مرشد خاں کے اعزاز میں گیا میں خصوصی نشست کا انعقاد

گیا: انجمن محافظ اْردو بہار گیا کے صدر دفتر کا شانہء وارث آبگلہ گیا(بہار)میں مجاہد اْردو حبیب مرشد خاں کے ا عزاز میں خصوصی نشست۱۳ اکتوبر کو بعد نماز مغرب منعقد کی گئی جس کی صدارت خانقاہ منعمیہ، مظاہریہؓ،وارث امامیہؓ کے سجادہ نشین حاجی سید شاہ نجم امام منعمی نے کی اور نظامت اْردو کے دیرینہ خادم سید فضل وارث نے کی۔

اردو کے فروغ اور محافظت کے لئے زمینی سطح پر جدوجہد ضروری

اس نشست میں جن با شعور اور قابل قدر حضرات نے شرکت کی اورگفتگو میں حصہ لیا اْن کے اسمائے گرامی یوں ہیں۔
ڈاکٹر شرافت علی شرافتؔ،سہراب خاں،عبدالفتاح رشیدی،محمد شہاب الدین،شرف الدین،محمد کامران صلاح الدین،محمد شفیع احمد،ڈاکٹر محمد امیر خاں،کپیل دیو پرساد،شہاب احمداحساس ؔگیاوی،محمد امین اکرم خاں،وسیم احمد مشہدی،ڈاکٹر شاہ نواز،حاجی محمد اسلام قادری،خواجہ انعام الہدیٰ،ڈاکٹر نعیم شاہد وغیرہم۔
سید فضل وارث نے مجاہداْردوحبیب مرشد خان کا تعارف کرتے ہوئے فرمایا کہ میں موصوف کی اردوسے سچی محبت کو1981 ءسے بخوبی واقف ہوں۔اکتوبر1983 ءمیں موصوف اور ان کی اہلیہ بحیثیت اردو ملازم اور آفس سکریٹری کی حیثیت سے بھاگلپور تشریف لے گئے۔اور بہار میں اردو دوسری سرکاری زبان کا تعارف کرانے،قانون اردو کے عمل و نفاذ کے لئے تقریباًدس ہزار ہینڈبل اور اشتہار چھپوا کر ساتھ لے گئے۔بھاگلپور اور اس کے متعلقہ گاؤں ، ٹولوں اور علاقوں کے اردو سماج سے رابطہ کیا۔اپیل اور گزارش کی،ہینڈبل تقسیم اور چسپاں کیا اوریہ کام اب بھی جاری ہے ساتھ ہی سوشل میڈیا،بذریعہ اخبارات اور فیس بک پر یہ مہم اب بھی جاری ہے۔موصوف نے کبھی کسی کی مخالفت اور حوصلہ شکنی نہیں کی موصوف اْردو رابطہ کمیٹی بھاگلپور کے سکریٹری بھی ہیں جس کے ذریعے یہ اردو کی خدمت کر رہے ہیں۔
گیا ضلع انجمن اساتذہ کے جنرل سکر یٹری محمد شہاب الدین نے موصوف کی خدمت میں اظہار تہنیت یوں کیا کہ بذریعہ اخبارات اور فیس بک پر آپ کی اردو تحریک کے سلسلے میں مجھے جانکاری ملتی رہی ہے۔بحیثیت ملازم اْردو سرکاری بندشوں میں رہتے ہوئے اور ملازمت سے سبکددوشی کے بعد آپ نے اردو زبان کے بقاء، اشاعت کے لئے جو کارہائے نمایاں انجام دئے ہیں وہ قابل ستائش ہیں آپ اسی حوصلے کے ساتھ اردو کا چراغ مزید روشن کرتے رہیں۔
اردو کے مستند اور کہنہ مشق شاعر ڈاکٹر شرافت علی شرافتؔ نے تعارف کراتے ہوئے تاثر یوں پیش کیا چند اشعار۔

خادم اردو محب خاص خاصان زباں ،
ساتھ چلتا ہے تیرے اردو زباںکاکارواں
خدمت اردو میں اپنی اہلیہ کے ساتھ ساتھ
کام کی دھن میں نہیں تو دیکھتا ہے دن رات
سرور ؔو مغنی ؔبھی تیرے رہنما ،رہبر رہے
فضل وارث بھی ترے ہمدم ،ترے یاور رہے

شری کپیل دیو پرساد نے ہندو مسلم اتحاد بھائی چارگی اور ٓاپسی میل جول پر زور دیتے ہوئے کہا کہ اردو زبان ہندو مسلم ایکتا کی دین ہے۔اسی زبان نے ہمیں آزادی کا پرجوش نعرہ دیا مثلاََ

سرفروشی کی تمنا اب ہمارے دل میں ہے
دیکھنا ہے زور کتنا بازوئے قاتل میں ہے

کپیل دیو پرساد نے حبیب مرشد خاں کی اردو سے محبت اور اس کی بقا کے لیئے ان کی بے پناہ کوششوں کو سراہا۔ڈاکٹر محمد امیر خاں اور شمیم احمدنے حبیب مرشد خاں کا خیر مقدم کرتے ہوئے کہا کہ اردو زبان کی بقاء اور اشاعت کے لیے اپنی جیب خاص سے کام کرنا بہت بڑی بات ہے۔ ہمیں اعتراف ہے کہ مرشد خاں اردو کے بے لوث خادم ہیں۔اردو ہماری مادری زبان ہے۔لیکن کیا ہم روزمرہ کی زندگی میں اردو کا استعمال کرتے ہیں اردو کی تعلیم سے کیا ہم اپنے بچوں کو محروم نہیں کر رہے ہیں، ہمارا رجھان انگریزی تعلیم کی طرف زیادہ ہے اس لئے ہم اپنے بچوں کی اردو تعلیم پر خصوصی توجہ دیں۔
مہمان خصوصی حبیب مرشد خاں نے اپنی تقریر ر میں فرمایا کہ ’’اْردو کے پرستاروں کو بنا کسی کی پرواہ کئے کام کرتے رہنا چاہئے ہمیں مخالفت کی فکرے کئے بغیرآگے بڑھنا ہے کچھ ایسے بھی لوگ ہیں جو اردو تحریک کے قدموں میں زنجیر ڈالنا چاہتے ہیں۔ لیکن اردو کے خادموں کو اس طرف توجہ دینے کی ضرورت نہیں ہے۔ حکومت سے اردو کے آئینی و جمہوری حقوق طلب کا اختیار ہے لیکن مطالبہ سے قبل ہمیں اپنا فرض ادا کرنا نہایت ضروری ہے۔موصوف نے انجمن محافظ اردو گیا اور انجمن اساتذہ کی کارگزاریوں کا ذکر کرتے ہوئے فرمایا کہ ان انجمنوں کے ذریعے زمینی سطح پر جو کام ہوئے اور ہو رہے ہیں بہار کے اردو سماج کے لئے بہترین مثال ہے ۔برادرم فضل وارث کی اطلاع پر اتنے محافظین اْردو کا جمع ہونا بہت بڑی بات ہے جو گیا والوں کی اْردو سے محبت کا ثبوت ہے۔‘‘
جناب صدر حاجی سید شاہ نجم امام منعمی نے صدارتی خطبہ میں فرمایا کہ ’’اردو دن بہ دن اپنی مقبولیت لوگوں سے منوا رہی اور زمین ہند سے جہاں اس کی پیدائش ہوئی ہے نکل کر دیار غیر میں لوگوں کے دلوں پر اپنا سکہ جما رہی ہے اور وہ لوگ جن کی مادری زبان اردو نہیں ہے وہ بھی اسے گلے لگا رہے ہیں۔ چنانچہ جب اپنے دیار سے آدمی قدم باہر نکالتا ہے تو اس کی افادیت اور اہمیت کا اندازہ لگاتا ہے، زمین کا وہ خطہ جہاں اس کی رسائی نہیں ہوئی ہے یا جنہوں نے اس سے گلے نہیں لگایا ثقافتی اعتبار سے ان میں کمی کا احساس ہوتا ہے خواہ و مسلم ہی کیوں نہ ہوں۔ حبیب مرشد خاںموصوف جن کی کار گزاریوں سے زمانہ واقف ہے ۔اخبارات و رسائل کے ذریعہ بھی ان کی بے لوث خدمت سے آگاہی ہوتی رہتی ہے جناب صدر نے ان کی کار گزاریوں اور اردو زبان کی بقا اور اسکی ترویج کی کوششوں کو سراہااور اپنے ہاتھوں سے جناب مرشد خاں کو شال پیش کیا اور محمد شفیع احمد نے بوکے پیش کیا ساتھ ہی موصوف کو بہت ساری دعائیں دیں۔