بھارت:منشی پریم چند کا مجبورکسان آج بھی زندہ ہے

ریاست ہریانہ میں کسانوں پر جس طرح کا  شدید لاٹھی چارج کیا گیا، اس سے لگتا ہے کہ مشہور و معروف افسانہ اور ناول نگار منشی پریم چند کی کہانیوں اور ناولوں میں جس دیہی زندگی اور کسان کا کرب بیان کیا گیا ہے، وہ آج بھی بدقسمتی سے اسی طرح زندہ و جاوید ہے۔

ہفتہ کی سہ پہر ہریانہ کے ضلع کرنال میں وزیر اعلیٰ منوہر لال کھترآئندہ بلدیاتی انتخابات کے سلسلے میں اجلاس کیلئے علاقے میں آئے ہوئے تھے کہ بڑی تعداد میں کسان احتجاج کیلئے پہنچ گئے، پولیس کسانوں پر ٹوٹ پڑی، بدترین لاٹھی چارج کیا، بزرگ کسانوں کو بھی نہ بخشا گیا۔ کرنال میں ایک سرکاری افسر کی ویڈیو سوشل میڈیا پر وائرل ہوگئی جو پولیس کو کہا رہا تھا کسانوں کے سر پھاڑ دو۔ایسے وقت کسانوں پر لاٹھیاں برسائی جا رہی تھیں، جب وزیراعظم نریندر مودی امرت سر میں جلیانوالہ باغ میں منعقد ایک تقریب میں شرکت کر رہے تھے۔

بھارت میں آج بھی کسان اسی طرح قرضوں کے جال میں ڈوبا ہوا ہے۔ مانا کہ ملک میں اب قحط نہیں پڑتے ہیں۔ 1943کے بنگال کے قحط میں دو ملین افراد ہلاک ہو گئے تھے۔ 1960کی دہائی میں آئے سبز انقلاب نے ملک کو خوراک میں خود کفیل بنا دیا۔ سرکاری گودام اب اس قدر بھرے ہوئے ہیں، کہ مزید اناج کیلئے جگہ ہی نہیں ہے۔ مگر پھر بھی 46.6ملین بچے قلت تغدیہ کا شکار ہیں اور افراط اناج کے باوجود کسان قرضوں کے شکنجہ میں اسی طرح جکڑا ہے، جس طرح منشی پریم چند کی کہانیوں میں ہوتا تھا۔

نیشنل کرائم ریکاڈ بیور وکے مطابق 1995سے 2016تک تقریباً تین لاکھ کسانوں نے قرضوں کے جال سے تنگ آکر خودکشیاں کرلی۔ ماحولیات سے متعلق موخر جریدے ڈاون تو ارتھ Down To Earthکے اعداد وشمار کے مطابق 2019میں ہی10,281کسانوں نے خود کشی کرلی۔ حیرت تو یہ ہے کہ ان میں سب سے زیادہ یعنی 3,927کسانوں کا تعلق ملک کے سب سے ترقی یافتہ صوبہ مہاراشٹر سے تھا، جس کا دارلحکومت ملک کی اقتصادی راجدھانی عروس البلاد کہلانے والا شہر ممبئی ہے۔

بھارت میں صنعتوں کے ایک وسیع  جال کے  بچھنے کے باوجود ابھی بھی ملک کی 60 فیصد سے زیادہ آباد ی کا دارومدار زراعت پر ہی ہے۔برطانوی راج سے لے کر وزیر اعظم نریندر مودی کی حکومت تک، کسان کی حالت میں شاید ہی کوئی فرق پڑا ہو۔ہاں ایک فرق ہے منشی پریم چند کا کسان قحط اور اناج کی کمی جھیلنے کے باوجود خود کشی نہیں کرتا تھا۔ اب تو کسانوں کو مستقل طور پر کاشتکاری ترک کرنے، شہروں کی طرف ہجرت کرنے اور فیکٹریوں میں کام کرنے پرمجبور کیا جارہا ہے، جس کا فائدہ براہ راست کارپوریٹ سیکٹر اور بڑے صنعتکاروں کو پہنچتا ہے۔ اس طرح لاکھوں نوجوان فیکٹریوں  اور ملوں کے باہر دو وقت کی روٹی کے لئے کم سے کم اجرت پرکام کرنے کے لئے لمبی قطار میں کھڑے ہونے پر مجبور ہو جاتے ہیں۔ ماہرین کا خیال ہے کہ یہ ایک سوچی سمجھی حکمت عملی کا ایک حصہ ہے، تاکہ صنعتوں کیلئے کم اجرت والے مزدور مہیا ہوں۔ستم ظریفی تو  یہ ہے کہ یہ روایت برطانوی دور سے ہی چلی آ رہی ہے۔ بنگال کے قحط کے بعد، بہت سے کسان مجبوراً برطانوی فوج میں شامل ہوگئے تھا، تاکہ بھکمری سے بچاجاسکے۔ دو وقت کی روٹی کیلئے ان مجبوراور بے کس کسانوں نے عالمی جنگ میں برطانیہ کی فوجی نفری ضرورت پوری کی۔

حال ہی میں، بھارتی پارلیمنٹ نے ایک ایسا قانون منظور کیا، جس کی رو سے اب صنعت کاروں اور کارپوریٹ سیکٹر کاشتکاروں سے براہ راست غلہ یا  اناج خرید سکیں گے۔ سطحی طور پر لگتا ہے کہ کسانوں کے پاس موجود غلہ کے خریدنےکا سامان مہیا ہو گیا ہے۔ مگر بین السطور جب اس قانون کا جائزہ لیا جائے، تو پتہ چلتا ہے کہ کسانوں کے اناج خریدنے کیلئے پہلے جو منیمم اسپورٹ پرائس Minimum Support Price  حکومت مقرر کرتی تھی، جس سے کوئی بیوپاری غریب کسان کا استحصال کرکے کم دام میں اس سے اناج نہ خریدسکتا تھا، اس شق کو ہی ختم کر دیا گیا ہے۔ میں نے جب اس سلسلے میں کئی  زرعی ماہرین سے بات کی تو معلوم ہوا کہ کم سے کم اسپورٹ قیمت طے نہ کرنے سے آئیندہ چند سالوں میں، کسان اپنی پیداوار صنعتکاروں کو کم قیمت پر بیچنے پر مجبور ہوجائیں گے۔ دوسری طرف حکومت نے جس طرح سے یہ بل بغیر کسی بحث و مباحثے کے، اپوزیشن جماعتوں کی رائے لئے بغیرپاس کرایا، اس سے  مزید شکوک و شبہات پیدا ہو رہے ہیں۔
آب پاشی کے بہتر نظام کی وجہ سے کئی دہائیوں سے صوبہ پنجاب، بھارت کیلئے اناج کے پیالہ کے طور پر مشہور ہے۔ اس صوبہ کا کسان باقی ملک کے مقابلے کسی حد تک خوشحال بھی ہے۔ اس نئے کسان قانون کے خلاف سب سے زیادہ  بلندآواز بھی اسی صوبہ سے اٹھی ہے۔ ہوتا یہ تھا کہ اناج کی پیداوار کے بعد کسان اپنے ٹریکٹر یا بیل گاڑی پر گندم یا چاول لاد کر نزدیک کی منڈی میں جاکر آڑھتی کو بیچ کر رقم وصول کرتا تھا۔ چھوٹے کسانوں کیلئے آڑھتی ایک زندگی کی لکیر کی طرح کا کام کرتا تھا۔ ایک تو وہ فصل حکومت کے طے کردہ دام سے کم قیمت میں نہیں خرید سکتا تھا، دوسرا چونکہ اس کا کسان کے ساتھ  چولی دامن کا ساتھ ہوتا تھا، وہ اس کی خوشی اور غمی کے اوقات میں بھی مدد کرتا تھا۔ اب اس قانون میں تو ان منڈیوں کو ہی ختم کر دیا گیا۔ ماہرین سوال کرتے ہیں کہ جو رشتہ آڑھتی اور کسان کا ہوتا تھا، کیا اسی طرح کوئی رشتہ کارپوریٹ سیکٹر کا منیجر یا ملازم بنا پائے گا؟  اور کیا کسان ان بڑے صنعتی گھرانوں اور ڈیپارٹمنٹل اسٹوروں کے مالکان کے ساتھ قیمتوں کےسلسلے میں تکرار کر سکتا ہے؟  منشی پریم چند کے افسانوں کے برعکس آج کے کسان کا مسئلہ قلت اناج کا نہیں بلکہ فاضل مقدار کا ہونا ہے۔ دیہی علاقوں میں کولڈ اسٹوریج نہ ہونے سے اسکو ہر دم اناج، پھل اور سبزیوں کے خراب ہونے کا اندیشہ لگا رہتا ہے۔ کارپوریٹ سیکٹر کا ملازم اس کا فائدہ اٹھا کر نہایت ہی کم دام میں یہ چیزیں خریدے گا۔
اسلئے بطور احتجاج پنجاب کی سیاسی پارٹی  اکالی دل، جو دو دہائیوں سے زیادہ عرصہ سے بھارتیہ جنتا پارٹی یعنی بی جے پی کی زیرقیادت نیشنل ڈیموکریٹک الائنس کا حصہ رہی، نے بھی اس معاملے پرحکومت سے اپنی حمایت واپس لے لی۔ اگرچہ وزیر اعظم نریندر مودی کی حکومت کو اس سے کوئی خطرہ لاحق نہیں ہے،مگر  اس سے دو چیزیں ثابت ہوتی ہیں۔ پہلی یہ کہ کارپوریٹ سیکٹر کے مفاد کے لئے، بی جے پی نے پارلیمانی جمہوریت کے تمام اصولوں کو نظرانداز کردیا، اپوزیشن تو دور کی بات، اپنے اتحادیوں اور وزیروں سے بھی صلاح مشورہ نہیں کیا  اور دوسری طرف بھولے بھالے کسانوں کو کارپوریٹ سیکٹر کے مگر مچھوں کے سامنے بطور چارہ ڈال دیا ہے۔

اہم مسئلہ یہ ہے کہ دوسرے صنعتوں کی طرح کسان بھی اپنی پیداوار کی قیمت کا فیصلہ خود کیو ں نہیں کرسکتے ہیں؟ایک طرف جہاں بڑے صنعتکار بینکوں سے کئی  بلین روپے کا قرض ادا کرنے میں ناکام ہوتے ہیں، تو حکومت اسکو ناقابل وصول قرضہ قرار دیکر نظر انداز کرتی ہے۔ مگرکسان کے پاس ایسی کوئی سہولت موجود نہیں ہے۔اگر وہ قرضہ ادا کرنے میں ناکام ہوجاتا ہے تو اس کا گھر، کھیت و کھلیان ضبط ہو جاتے ہیں۔ لاکھوں کسانوں نے  ملک کے طول و عرض میں خو د اپنی جانیں لیں ہیں۔ کیا ہم نے کبھی یہ سنا ہے کہ قرض کے بوجھ سے ڈوبے کس صنعتکار نے خود کشی کی ہو؟  یہ الگ بات ہے کہ صنعتکار قرض واپس کرنے سے اگر  قاصر ہوتے ہیں، تو  وہ  بیرون ملک پناہ لیتے ہیں۔ پھرحکومت کی ان کو واپس لانے کی لاکھ کوشیشیں ان ملکوں کی عدالتی غلام گردشوں کی نظر ہو جاتی ہیں۔

اسکے علاوہ، وقتا فوقتا پر حکومت کارپوریٹ سیکٹر کو قرضوں سے نجات دلانے کے لئے سبسڈی دینے کا بھی  کا اعلان کرتی  رہتی ہے، جس  کو گروتھ مراعات کا  خوبصورت لباس  پہنایا  جاتا ہے۔ ایک طرف، 1997 سے، حکومت کی طرف سےطے شدہ بنیادی تنخواہ (Basic Pay)   میں 120 سے 150 گنا اضافہ ہوا ہے۔ مہنگائی الاؤنس (Dearness Allowance) میں 220 فیصد کا  اضافہ ہوا ہے۔کسانوں کی آمدنی میں صرف 19 گنا اضافہ ہوا ہے۔اکنامک سروے  کے مطابق، 17 ریاستوں کے کسانوں کی اوسطاً سالانہ آمدنی محض بیس ہزار روپے یعنی 270 امریکی ڈالر ہے۔ اس رقم سے، کسان کو نہ صرف اپنے کنبے کی پرورش کرنا ہوگی، بلکہ اگلی فصل کے لئے وسائل بھی اکٹھا کرنا ہوں گے۔ ایسی صورتحال میں کسان کے پاس صرف دو ہی متبادل باقی رہ جاتے ہیں۔ یا تو وہ خود کشی کرکے زندگی سے آزاد ہو یا کھیتی سے توبہ کرکے اپنی نوجوان نسل سرمایہ داروں کے حوالے کردے۔ یعنی منشی پریم چند کے کہانیوں کے کردار آج بھی زندہ ہیں۔ بس سود خور مہاجن کا کردار اب حکومت خود ادا کر رہی ہے۔