بہار میں ایم ایس ایم ای کو فروغ دینے کے لئے بینکوں کا تعاون ضروری:نتیش

پٹنہ وزیر اعلی نتیش کمار نے 1انے مارگ واقع سنکلپ سے ویڈیو کانفرنسنگ کے ذریعے ریاستی سطح کے بینکرس کمیٹی کی 76 ویں میٹنگ میں شامل ہوئے۔
اس موقع پر اپنے خطاب میں وزیر اعلی نے کہا کہ مجھے خوشی ہے کہ آج مجھے ریاستی سطح کی بینکر کمیٹی (ایس ایل بی سی) کے 76 ویں میٹنگ میں شامل ہونے کا موقع ملا ہے۔ ہر سال ہونے وا لی ایس ایل بی سی کی پہلی میٹنگ میں اکثر میں شامل ہوا ہوں۔ گزشتہ سال 15 جون کو ہم نے ایس ایل بی سی کے اجلاس میں بھی شرکت کی تھی ۔ آج کی میٹنگ میں ایس بی آئی کے چیف جنرل منیجر ، جنرل منیجر اور ریزرو بینک کے انچارج ،نابارڈ کے چیف جنرل منیجر نے گفتگو کے دوران بہت سی چیزوں کے بارے میں جانکاری دی ہیں۔
وزیر اعلی نے کہا کہ کورونا کی دوسری لہر پرقابو پایاجارہا ہے۔ ملک اور بہار میں بھی کورونا انفیکشن کی شرح کم ہوئی ہے۔ کورونا انفیکشن کے معاملے میں بہار ملک میں اکیسویں نمبر پر ہے جبکہ آبادی کے لحاظ سے تیسرے نمبر پہ ہے۔ انہوں نے کہا کہ ہم ویکسینیشن کے لئے تیزی سے کام کر رہے ہیں۔ میں خاص طور پر وزیر اعظم کو اس کے لئے مبارکباد دیتا ہوں کہ سب کو مفت ویکسین لگائی جارہی ہے۔ ہم لوگوں نے کل سے ویکسینیشن کے لئے خصوصی مہم کا آغاز کیا ہے۔ انہوں نے کہا کہ کورونا انفیکشن کی روک تھام کے لئے لاک ڈاو ¿ن نافذ کیا گیا تھا ، اس دوران غریب بے سہارا لوگوں کے لئے کھانے وغیرہ کا انتظام کیا گیا۔ ترقیاتی کاموں کے ساتھ ساتھ دیگر ترقیاتی منصوبوں میں بھی بینک کا اہم کردار ہے۔ بہار کی ترقی میں اور بڑھ چڑھ کر حصہ لیں۔

وزیر اعلی نے کہا کہ سال 21-2020 میں ریاست کے کریڈٹ ڈپازٹ کا تناسب 46-40 فیصد رہا ہے۔ جبکہ پورے ملک کا 76.5 فیصد رہا ہے۔ ہم اس ضمن میں ہدف سے بہت پیچھے ہیں۔ سی ڈی کے تناسب کا نشانہ قومی سطح تک لانے کی کوشش کریں۔ یہاں کے لوگوں کا پیسہ یہاں کے بینکوں میں جمع ہوتا ہے۔ جبکہ یہاں کاپیسہ ترقی یافتہ ریاستوں میں چلا جاتا ہے۔ بہار کے لوگوں کو بینکوں پر پورا اعتماد ہے ، جس کی وجہ سے وہ اپنا پیسہ بینکوں میں رکھتے ہیں۔ کچھ ریاستیں ایسی بھی ہیں جن کا سی ڈی تناسب 100 فیصد سے زیادہ ہے۔ بہار کے بہت سے اضلاع میں ، سی ڈی کا تناسب ہدف سے بہت کم ہے۔ ریاست کا دارالحکومت پٹنہ ، جو ایک انتہائی فعال ضلع ہے ، کا سی ڈی کا تناسب 39.22 فیصد ہے۔
وزیراعلیٰ نے کہا کہ سال 21-2020 میں سالانہ کریڈٹ پلان (اے سی پی) کانشانہ1 لاکھ 54 ہزار 500 کروڑ مقرر کیا گیا تھا ، جس کا87.86 فیصد 1 لاکھ 27 ہزار 161 کروڑ روپے خرچ کیا گیا۔ انہوں نے کہا کہ مرکزی زراعت کے شعبے کے لئے 47 ہزار 778 کروڑ روپئے جبکہ 917 کروڑ روپے زراعت سے وابستہ شعبے میں خرچ ہوئے جوکہ ہدف سے کم ہے۔ انہوں نے کہا کہ آئندہ سال کے لئے اے سی پی کانشانہ 1 لاکھ 61 ہزار 500 کروڑ روپے مقرر کیا گیا ہے۔ زراعت کے شعبے کے لئے 51 ہزار 500 کروڑ اور زراعت سے وابستہ شعبہ کے لیے15 ہزار کروڑ روپے کانشانہ مقرر کیا گیا ہے۔ ہم امید کرتے ہیں کہ ہم اس مقصد کے حصول کی سمت اقدامات کریں گے۔ انہوں نے کہا کہ بہار میں ایم ایس ایم ای (مائیکرو ، چھوٹے اور درمیانے درجے کے کاروباری اداروں) کے میدان میں کافی امکانات ہیں۔ ہم لوگوں کے حکومت میں آنے سے پہلے ریاست میں پلوں ، سڑکوں ، اداروں ، اسکولوں ، کالجوں کی کیا حالت تھی وہ تمام لوگ جانتے ہیں۔ چونکہ ہمیں کام کرنے کا موقع ملا ہے ، بہت سے ترقیاتی کام ہوچکے ہیں۔ ریاست میں اس طرح صنعت کی ترقی نہیں ہوسکی ہے جیساہم لوگ چاہتے ہیں ، لیکن ریاست میں کاروبار میں اضافہ ہوا ہے۔ انہوں نے کہا کہ ایم ایس ایم ای سیکٹر میں فروغ دینے کے لئے آپ کے تعاون کی ضرورت ہے۔ آئندہ سال کے اے سی پی میں ، ایم ایس ایم ای کے لئے 35,000کروڑ روپئے کا ہدف مقرر کیا گیا ہے ، میری درخواست ہے کہ اسے پورا کریں۔ انہوں نے کہا کہ یہاں کے لوگوں کا جوپیسہ یہاں جمع ہے
آپ لوگوں کواسی کا حصہ یہاں لگانا ہے۔ میڈیکل کے میدان اور آکسیجن کی دستیابی کو بڑھانے کے لئے بھی کام کیا جارہا ہے۔ ایتھنال کی پیداوار کے لیے ہم سال 2007 سے ہی کوشاں ہیں۔ بہار میں ایتھنول کی پیداوار کے بہت زیادہ امکانات ہیں ، اس کے لئے بہت ساری تجاویز آ رہی ہیں ، جس میں آپ کے تعاون کی ضرورت ہے۔ ریاست میں صنعتوں کو فروغ دینے کے لئے صنعتی فروغ پالیسی متعارف کروائی گئی۔ انہوں نے کہا کہ لاک ڈاو ¿ن کے دوران باہر سے آنے والے مزدوروں کویہاں پرہی رہ کر کام کرنے کے انتظامات کیے جارہے ہیں۔ ہم اس کی حوصلہ افزائی کر رہے ہیں۔ مغربی چمپارن میں کچھ مزدور اجتماعی طور پر بہتر کام کرکے ایک مثال قائم کر رہے ہیں۔

وزیر اعلی نے کہا کہ بہار میں 10 لاکھ سے زیادہ سیلف ہیلپ گروپس تشکیل دیئے گئے ہیں اور 1 کروڑ 27 لاکھ خاندان اس سے منسلک ہوگئے ہیں۔ جیویکا گروپ کو بینکوں کے ذریعہ مدد کرنے کی ضرورت ہے۔ انہوں نے کہا کہ 5000 ہزار کی آبادی کے لئے بینک برانچ کھولنے کا آپ کا منصوبہ پورا نہیں ہو رہا ہے۔ ہم شروع سے ہی کہتے آرہے ہیں کہ ہر گرام پنچایت میں بینکوں کی برانچ کھولی جائے۔ ہمارے ہاں اوسطا گرام پنچایت آبادی 11 ہزار ہے ، جب کہ یہاں 16 ہزار کی آبادی پر بینکوں کی شاخیں ہیں۔ ہم پنچایت سرکاربھون میں بینکوں کی شاخ کے لئے جگہ دینے کے لئے تیار ہیں۔ انہوں نے کہا کہ ہم آپ کی سیکورٹی کے لئے ہمیشہ فکر مند رہتے ہیں۔ بینکوں کے سکیورٹی انتظامات میں کسی بھی قسم کی کوتاہی نہیں ہو گی۔ اگر کوئی واقعہ پیش آتا ہے تو فوری طور پر پولیس کو آگاہ کریں تاکہ فوری کارروائی کی جاسکے۔ بینکوں میں مسلح محافظ مقرر کریں۔ انہوں نے بتایا کہ حال ہی میں حاجی پور میں جڑوا کی ایچ ڈی ایف سی برانچ سے 1 کروڑ 19 لاکھ 60 ہزار 777 روپے مالیت کی ڈکیتی کی گئی۔ کارروائی کرتے ہوئے پولیس نے اب تک 1 کروڑ 2 لاکھ 72 ہزارروپے برآمد کرلئے ہیں۔ اس معاملے میں متعدد مجرموں کو بھی گرفتار کیا گیا ہے۔ اگر کوئی واقعہ پیش آتا ہے تو اس پر سنجیدہ کارروائی کی جاتی ہے۔ انہوں نے کہا کہ چیف سکریٹری ، ڈی جی پی کی سطح پر بینکوں کے عہدیداروں کے ساتھ ایک میٹنگ کا انعقاد کیا جائے جس میں سیکیورٹی سے متعلق تجاویز پر غور کرنے کے بعدآگے کی کارروائی ہو۔ وزیراعلیٰ نے کہا کہ اس طرح کی میٹنگ کاجو انعقاد کیا جاتا ہے۔اس میں صرف تبادلہ خیال نہ ہو، بلکہ جو اہداف طے کیے گئے ہیں ان پر سنجیدگی سے عمل ہو. بینکوں کی برانچ کھلے گی ، بینکوں کی توسیع ہوگی تو نہ صرف ریاست اور ملک ترقی کرے گا بلکہ بینک بھی ترقی کریں گے۔ انہوں نے کہا کہ بینکوں میں کام کرنے والے افراد اور بینک آنے والے افراد کو کوویڈ پروٹوکول پر عمل کرنا چاہئے اور وقتا فوقتا سب لوگ جانچ کروائیں۔ سب لوگ ویکسین ضرور لیں۔ انہوں نے کہا کہ مجھے خوشی ہوگی کہ اس میٹنگ میں جن چیزوں پر تبادلہ خیال کیا گیا اس پر عمل کیا جائے۔ اس کے ساتھ ہی ، مجھے یقین ہے کہ سب کے باہمی تعاون سے طے شدہ اہداف حاصل کرلیں گے۔

پروگرام کو نائب وزیر اعلی تارکیشور پرساد ، چیف جنرل منیجر ایس بی آئی مسٹر کمار رانا ، جنرل منیجر اور انچارج ریزرو بینک آف انڈیا مسٹر برجراج ، چیف جنرل منیجر نیبارڈ ڈاکٹر سنیل کمار نے بھی خطاب کیا۔
پروگرام میں وزیر اعلی کے پرنسپل سکریٹری مسٹر دیپک کمار وزیر اعلی کے پرنسپل سکریٹری مسٹر چنچل کمار ، وزیر اعلی کے سکریٹری مسٹر انوپم کمار اور وزیر اعلی کے او ایس ڈی مسٹر گوپال سنگھ موجود تھے ، جبکہ نائب وزیر اعلی تارکیشور پرساد ، وزیر صنعت شاہنواز حسین ، وزیر زراعت مسٹر امرندر پرتاپ سنگھ ، وزیر برائے دیہی ترقیات شرون کمار ، کوآپریٹو کے وزیر سبھاش سنگھ ، مویشی اور ماہی وسائل کے وزیر مکیش سہنی ،بہار ریاستی اقلیتی کمیشن کے چیئرمین پروفیسر محمد یونس حکیم ، چیف سکریٹری مسٹر تریپوراری شرن ، ڈویلپمنٹ کمشنر مسٹر عامر سبحانی ، پرنسپل سیکرٹری فائننس مسٹر ایس سدھارتھ ، جوائنٹ سکریٹری مالیاتی خدمات مرکزی حکومت مسٹر بھوشن کمار سنہا ، چیف جنرل منیجر ، ایس بی آئی مسٹر سریندر کمار رانا ، جنرل منیجر اور انچارج ریزرو بینک آف انڈیا مسٹربرجراج ، چیف جنرل منیجر نابارڈ سنیل کمار ، جنرل منیجر اور کنوینر ریاستی سطح کے بینکر کمیٹی مسٹر منوج کمار جنرل منیجر ایس بی آئی مسریگن جین ، اسسٹنٹ جنرل منیجر ایس بی آئی ، پٹنہ کمار مشرا ، ایڈیشنل چیف سکریٹری ، پرنسپل سکریٹری ،متعلقہ محکموں کے سکریٹری ، افسران ، تمام اضلاع کے ڈی ایم اور بینکوں کے سینئر عہدیدار ن ویڈیو کانفرنسنگ کے ذریعہ شامل ہوئے۔