شب قدر کی فضیلت

شب قدر کو عربی میں "لیلۃ القدر "کہا جاتا ہے امام نووی رحمۃ اللہ علیہ فرماتے ہیں: قال العلماء و اِنّما سُمّیتْ بِذالکَ ای لیلہُ القدرِ لِمَا یَکتُبُ فیھا الملائکہُ ِمن‌َالأًقْدارِ و الاَرزاقِ و الآجالِ الَّتی تکونُ فی تلکَ السَّنہِ بعض علماء کہتے ہیں کہ شب قدر کو "لیلہ القدر”اس لیے کہا جاتا ہے کہ اس عظیم رات کو ملائکہ اللہ کے حکم سے اس سال ہونے والی موتوں لوگوں کے رزق اور تقدیروں کو لکھتے ہیں اور دلیل میں قرآن کی یہ آیت پیش کرتے ہیں فیھا یُفرَقُ کُلُّ امرٍ حکیمٍ (الدخان:٤) یہ ایسی عظیم رات ہے جس میں ہر مہتم باالشان کام کا فیصلہ کیا جاتا ہے جس سے معلوم ہوتا ہے کہ سب قدر کی فضیلت کی وجہ یہ ہے کہ اللہ تعالیٰ کو اس رات اپنے اہم امور کا فیصلہ کرنا ہوتا ہے۔ اس کے علاوہ اس رات کی فضیلت اس لیے بھی ہے کہ اسی رات حضرت جبرائیل علیہ السلام کا دنیا میں ورود مسعود ہوتا ہے سورۃ القدر میں ارشاد باری ہے "تنزل الملائکہ و الروح فیھا باذن ربھم من کل امر سلام ھی حتیٰ مطلع الفجر ( سورہ القدر :٤-٥) ترجمہ: جبرائیل علیہ السلام اور فرشتے اپنے رب کے حکم سے تمام امور کے ساتھ اترتے ہیں سلامتی ہے طلوع فجر تک حضرت جبرائیل علیہ السلام جیسے جلیل القدر فرشتے کا فرشتوں کے ہمراہ اس آسمان دنیا سے روئے زمین پر نازل ہونا اور سلامتی کی دعا کرنا سے اس رات کی عظمت و قدر کا اندازہ ہوتا ہے یہی نہیں وہ ہر خاص و عام جو اس رات عبادت میں مشغول ہوتا ہے کے لئے سلامتی کی دعا کرتے ہیں انوار و برکات اور تجلیات کی یہ برسات طلوع فجر تک ہوتی رہتی ہے۔ دیگر روایتوں اور اثار سے یہ بات بھی ثابت ہوتی ہے کہ باری تعالی اس رات کو کثیر تعداد میں جہنمیوں کو جہنم سے خلاصی کا پروانہ عطا کرتے ہیں۔ اس رات کی فضیلت کا اندازہ اس بات سے بخوبی لگایا جا سکتا ہے کہ صرف اس رات کو عبادت کرنا ایک ہزار مہینوں کی عبادت سے افضل ہے و "ماادراک مالیلہُ القدرِ لیلہُ القدرِ خیرٌ من الفِ شھرِ "ترجمہ :اور تم کیا جانو کہ لیلۃ القدر کا مقام کیا ہے لیلۃ القدر ہزار مہینوں سے بہتر ہے۔

شب قدر کی تعین میں علماء کے مابین اختلاف پایا جاتا ہے قاضی عیاض رحمۃاللہ علیہ فرماتے ہیں :”قد اختلفَ الناسُ فقال بعضُھم :”ھِیَ تکونُ منتقلہً فی سنہٍ فی لَیْلَہٍ و فِی سنہٍ اُخریٰ فی لیلہ اُخریٰ” ترجمہ: لوگوں کا اس میں اختلاف ہے بعض علماء کا کہنا ہے کہ شبِ قدر کسی سال کسی ایک رات کو ہوتی ہے تو دوسرے سال کسی اور رات کو ہوتی ہے بعض دیگر علماء کی رائے ہے کہ "اِنَّما تَنْتَقِلُ فِی العَشْرِ الاَوَاخِرِ مِنْ رَمْضَانَ مطلب یہ ہے کہ یہ رات رمضان کے اخیر عشرہ میں منتقل ہوتی رہتی ہے ایک روایت اخیر عشرہ کی طاق راتوں کی بھی ہے پھر طاق راتوں کی تعین میں بھی اختلاف ہے کسی کے یہاں طاق راتیں اکیسویں بائیسیویں تیسویں پچسویں ستائیسویں اور انتیسویں کو ہوتی ہیں تو کوئی بایسویں چوبیسویں چھبیسویں اور اٹھایسویں کو طاق رات تسلیم کرتا ہے۔ غرض کہ اس رات کی تعین میں شدید اختلاف پایا جاتا ہے اس بارے میں ایک روایت یہ بھی ہے کہ "اِنَّھَا مُعَیّ٘نَہٌ لا تَنْتَقِلُ اَب٘داً” کہ یہ رات معین ہوتی ہے جب آنی ہوتی ہے اسی وقت معین پر ہر سال آتی ہے ادھر سے ادھر یعنی دیگر راتوں میں منتقل نہیں ہوتی۔ مذکورہ تمام وضاحتوں سے یہ بات متفقہ طور پر معلوم ہوتی ہے کہ یہ رات متعین نہی ہے نہ ہی کسی کو اس کا تعین معلوم ہے مگر اسی کے ساتھ اس کا وجود برحق ہے یہ رات ضرور آتی ہے یہ بھی واضح طور پر اندازہ لگایا جا سکتاہے کہ یہ ایک عظیم و بابرکت رات ہے
رحمتوں برکتوں اور عظمتوں والی اہم رات ہے جو اس امت کے ساتھ خاص ہے ہم سے پہلی امتوں کو یہ رات نصیب نہیں ہوئی اس رات کے متعلق کئی احادیث وارد ہوئی ہیں ایک حدیث میں ارشاد ہے کہ اس رات کی تلاش اخیر عشرہ کی طاق راتوں میں کیا کرو اور اس میں کثرت سے عبادت کیا کرو
1- عن عائشۃ رضی اللہ عنہا قالت : قال رسول اللّٰہ صلی اللہ علیہ وسلم "تَحَرُّوا لیلہَ القَدْرِ فِی الْوِتْرِ مِنَ الْعَشْرِ الاَوَاخِرِ مِنْ رَمْضَانَ” (صحیح البخاری /فتح الباری (259)کتاب فضل لیلۃ القدر (32)باب تحری لیلہ القدر فی الوتر من‌العشر الاواخر( 2) رقم الحدیث ۔2017) ترجمہ: حضرت عائشہ رضی اللہ عنہ سے مروی ہے وہ فرماتی ہیں کہ رسول اللہ صلی اللہ علیہ وسلم نے ارشاد فرمایا شب قدر کو رمضان کے اخیرعشرہ کی طاق راتوں میں تلاش کیا کرو۔
ایک بار تو نبی اکرم صلی اللہ علیہ وسلم کو اس رات کی تعین خواب کے ذریعے بتا بھی دی گئی تھی اور کئی صحابہ نے بھی اس قسم کا خواب دیکھا تھا حضور صلی اللہ علیہ وسلم کے خواب سے سب کی خواب موافق تھے چنانچہ نبی اکرم ﷺ اس اتفاق کو یقینی تسلیم کرتے ہوئے اس رات میں عبادت کرنے اور خصوصی عبادت کرنے کا حکم دیا حدیث یوں ہے۔
عن ابن عمر قال : ان رِجالاً مِن اَصحابِ النَّبِّی اُرُوا لیلہَ القَدْرِفِی الْم٘ن٘امِ فِی السَّبْعِ الاَوَاخِرِ فقال رسولُ اللہ اَریٰ رُؤی٘اکُم قد تواطاتْ فی السَبْعِ الاَواخرِ فَمَن کان مُتَحَرِّیْھَا فَلْیَتَحَرِّھَا فِی الس٘بْعِ الاَواخرِ ۔(صحیح البخاری /فتح الباری ،کتاب فضل لیلہ القدر (32)باب التماس لیلہ القدر فی السبع الاَوَاخِرِ ( 2) رقم الحدیث-2015 و مسلم(882-883) کتاب الصیام (13) باب فضل لیلہ القدر (40)رقم الحدیث ۔(1165)
ترجمہ حضرت ابن عمر رضی اللہ تعالی عنہ سے روایت ہے کہ نبی اکرم صلی اللہ علیہ وسلم کے کتنے ہی صحابہ کرام کو شب قدر( رمضان المبارک کی) خواب میں دکھائی گئی نبی اکرم صلی اللہ علیہ وسلم نے ارشاد فرمایا کہ تمہارے خوابوں کو دیکھ رہا ہوں جو اخیر کے سات راتوں پر متفق ہیں پس جو کوئی اس کو یعنی شب قدر کو تلاش کرنا چاہے اس کو چاہیے کہ وہ اسے رمضان المبارک کی اخیر کی سات راتوں میں تلاش کرے۔ جس سے معلوم ہوتا ہے یہ رات غالب طور پر اخیر کے سات راتوں میں پائی جاتی ہے ۔
اس رات کی فضیلت کا اندازہ ایک دوسری حدیث سے بھی بخوبی لگایا جا سکتا ہے جس میں نبی اکرم صلی اللہ علیہ وسلم نے اس شب عظمت کی تلاش میں شروع عشرہ کا اعتکاف کیا پھر درمیان عشرے کا پھر اخری دس دنوں کا اس سے اندازہ ہوتا ہے کہ ہر مومن کو اس رات کی تلاش اور جستجو اور اس میں عبادت کا اہتمام کرنا چاہیے اس رات میں کچھ تو ایسی بات تھی کہ جناب نبی اکرم صلی اللہ علیہ وسلم نے تینوں عشروں کا اعتکاف کیا تاکہ اسے تلاش کر سکیں اور اس میں اللہ کی عبادت کر سکیں
3-عن ابی سعیدالخدری رضی اللہ عنہ اَن رسولَ اللہِ صلی اللہ علیہ وسلم اِعْت٘کَفَ الْعَْشرَ الْاَوَاخِرَ منْ رَمض٘انَ ثُمَّ اِعْت٘ک٘فَ الع٘شر٘ الاوسطَ فی قُبَّہٍ تُرکیِّہٍ ثم اَطلعَ رأسَہٗ فقال اِنّی اعتکفُ العشر الاول اَلتمِسُ ھذہ اللیلہَ ثم اعتکفَ العشر الاوسط‌ ثم اُتیْتُ فقیل لی انھا فی العشر الاواخر فمن‌کان اعتکف معی فلیعتکف العشر َالاواخر َ فقد اُرِیْتُ ھذہ اللیلہَ ثم اُنسیتُھا و قد رَاْیتُنی اَسجُدُ فی ماءٍ و طینٍ من صَبِیْحَتِھا فالتمسوھا فی العشر الاواخر فالتمسوھا فی العشر الاواخر فالتمسوھا فی کل وترٍ -صیح البخاری 4/260کتاب فضل لیلہ القدر (32)باب التماس لیلہ القدر فی السبع الاَوَاخِرِ (2) رقم الحدیث 2016 مسلم 824 کتاب الصیام ( 13) باب فضل لیلہ القدر (40)رقم (189)و(215)
ترجمہ: سعید خدری رضی اللہ عنہ سے مروی ہے کہ رسول اکرم صلی اللہ علیہ وسلم نے رمضان کے اخیر عشرہ کا اعتکاف فرمایا پھر درمیان کے دس دنوں کا اعتکاف کیا پھر ترکی خیمہ مں اعتکاف کیا پھر خیمہ سے باہر سر نکالا‌ پھر فرمایا کہ میں نے پہلے عشرے میں اعتکاف کیا تھا تا کہ شب قدر کو تلاش کروں پھر میں نے اعتکاف کیا درمیانی عشرہ کا پھر میرے پاس فرشتہ آیا اور مجھے کہا شب قدر تو آخری عشرہ میں ہے پس جو شخص اعتکاف کا ارادہ کرے تو اس کو چاہیے کہ اخری عشرے کا اعتکاف کرے پس تحقیق کے مجھے شب قدر کی تعین خواب میں دکھائی گئی ہے پھر مجھے بھلا دیا گیا یعنی جبرائیل علیہ السلام نے خبر دی کہ فلاں شب ؛ شب قدر ہے لیکن میں بھول گیا اور تحقیق کے میں نے اپنے آپ کو خواب میں دیکھا کہ میں شب قدر کی صبح کو کیچڑ میں سجدہ کرتا ہوں پس میں بھول گیا کہ وہ کون سی رات ہے لہذا تم اسے رمضان کے اخیر عشرہ میں تلاش کرو پھر مجھ سے کہا گیا کہ وہ رات اخیر عشرہ میں ہے تحقیق کے میں نے اس رات کو پا لیا تھا پھر مجھ سے بھلا دیا گیا اور تحقیق میں نے اس رات کو کیچڑ میں سجدہ کرتے ہوئے دیکھا تھا تو تم اس کو لازم پکڑو اخیرعشرہ میں اور ہر طاق رات میں تلاش کرو۔
شب قدر کی تعین میں اس قدر اختلاف دراصل یہ باری تعالی کی طرف سے ہی ہے اور اس میں بھی اللہ رب العزت کی ایک بڑی مصلحت ہے اللہ تعالی نے اس رات کی تعین کو نبی اکرم صلی اللہ علیہ وسلم کے ذہن و دماغ سے مٹا دیا تاکہ امت صرف ایک دن ایک ماہ اور ایک رات کی عبادت پر ہی منحصر نہ ہو کر رہ جائے بلکہ اس رات کی تلاش میں مزید راتوں کی عبادتیں بھی ان کو نصیب ہو اور ان میں زیادہ سے زیادہ عبادت کر کے اپنے دامن میں نیکیوں کو سمیٹ لیں اور مغفرت اور جہنم سے چھٹکارا پالیں اپنے رب کو راضی کر لیں اپنی کھوٹی قسمت کو سدھار لیں سنوار لیں بنا لیں ان میں عبادات کا شوق ہو لگن ہو چاہت ہو شب قدر کی تعین کا ابہام اور اس میں شریعت کے اسرار و رموز بھی ایک روایت سے ہی معلوم ہوتی ہے
عن زِرِّبن حُبَیْشٍ قال سالت ابی بن کعب فقلت ان اخاک بن مسعود یقول من‌یقم الحولَ یُصِب لیلہَ القدر فقال رحمت اللہ اراد ان لا یتکلَّ الناسُ اما اَنّہ قد علم انھا فی رمضان وانھا فی العشر َالاواخر و انھا لیلہ سبع و عشرین ثم حلف لا یستثنی انھا لیلہ سبع و عشرین فقلت بای شئی تقول ذالک یا ابا لمنذر ؟؟قال باالعلامہ او بالایہ _التی اخبرنا رسولُ اللہ صلی اللہ علیہ وسلم انھاتطلع یومئذ لا شعاع لھا شعاع لھا رواہ مسلم
,(صحیح سلم 1/525کتاب صلاہ المسافرین (6)باب الترغیب فی قیام رمضان( 25)رقم الحدیث _179
غرض کہ شب قدر بہت ہی بابرکت رات ہے مغفرت والی رات ہے ہمیں اس رات کی تلاش میں رہنا چائیے اور عبادات میں مشغول ہونا چاہیے خوش نصیب ہیں وہ لوگ جو شب قدر کی تلاش میں اخیر عشرے کا اعتکاف کرتے ہیں ۔