فلورٹسٹ میں نتیش حکومت کامیاب، حمایت میں پڑے 129 ووٹ، اپوزیشن کا واک آؤٹ

پٹنہ: نتیش کمار کی قیادت میں این ڈی اے حکومت نے سوموار کو بہار اسمبلی میں فلور ٹیسٹ میں کامیابی حاصل کرلی۔ اپوزیشن نے ووٹنگ سے قبل ہی واک آؤٹ کیا۔ حکمراں جماعت کے مطالبے پر ووٹنگ کرائی گئی۔ اس کی حمایت میں 129 ووٹ ڈالے گئے۔ مخالفت میں ایک ووٹ بھی نہیں پڑا۔ اس طرح وزیر اعلیٰ نتیش کمار نے فلور ٹیسٹ پاس کیا۔

بہار میں وزیر اعلیٰ نتیش کمار کی حکومت برقرار رہی۔ نتیش کمار حکومت کے اپنی اکثریت ثابت کرنے سے پہلے ہی اس کی تصدیق ہو چکی۔ اودھ بہاری چودھری جو راشٹریہ جنتا دل کے کوٹے سے اسمبلی کے اسپیکر تھے، اپنی کرسی کھونے کے بعد، ان کے خلاف تحریک عدم اعتماد کے نام پر فلور ٹیسٹ کرایا گیا۔ اس میں نتیش کمار حکومت کے 125 ایم ایل اے تھے، جب کہ اپوزیشن میں صرف 112 ایم ایل اے موجود تھے۔ اکثریت کے امتحان کے نام پر آر جے ڈی کو براہ راست تین ایم ایل اے کا نقصان اٹھانا پڑا ہے۔ تیجسوی یادو نے بھی نتیش کو مبارکباد دی۔

فلورٹسٹ کے دوران وزیر اعلیٰ نتیش کمار نے اپنے خطاب میں کہا کہ خریدنے کی کوشش کی گئی، لیکن کوشش کامیاب نہیں ہوئی۔ حکومت کے پاس پہلے 128 ایم ایل اے تھے۔

اعتماد کی تحریک پر بحث کے دوران جب وزیر اعلیٰ نتیش کمار خطاب کرنے کے لیے کھڑے ہوئے تو آر جے ڈی اراکین نے ہنگامہ کرنا شروع کر دیا۔ وزیر اعلیٰ نتیش کمار نے غصے میں آکر کہا کہ یہ لوگ مجھے بولنے نہیں دینا چاہتے، آپ ووٹ کروالیں۔ اس کے بعد تیجسوی یادو اپنے اراکین اسمبلی کے ساتھ ایوان سے واک آؤٹ کر گئے۔

وزیراعلی نتیش کمار نے ایوان میں صاف طور پر کہا کہ راجد کے لوگوں نے کمانا شروع  کردیا تھا۔ اس کی جانچ کرائی جائے گی۔ انہوں نے کہا کہ پہلے کتنے ہندو مسلم فسادات ہوتے تھے لیکن جب سے میں حکومت میں آیا فسادات بند ہوگئے۔ انہوں نے کہاکہ وہ پہلے بھی مسلمانوں کے مفاد میں کام کرتے رہے ہیں اور آگے بھی کرتے رہیں گے۔

نتیش کمار نے کہا کہ سال 2005 قبل بہار کی یہ حالت تھی کہ لوگ شام کے بعد گھروں سے نکلتے نہیں تھے۔ آج خواتین بھی بارہ بجے رات تک آرام سے نکلتی ہیں۔

اسمبلی میں وزیراعلی نتیش کمار نے ایوان میں اعتماد کا ووٹ پیش کیا۔ اس کے بعد تیجسوی یادو نے وزیراعلی نتیش کمار سے کہا کہ میں آپ (نتیش کمار) کو 9ویں بار وزیراعلیٰ کے طور پر حلف لینے پر مبارکباد دیتا ہوں۔ آپ ہی میرے پاس آئے اور کہا کہ میرا من نہیں لگ رہا ہے۔ میری پارٹی کو توڑی جا رہی ہے۔ اس کے بعد ہم نے آپ کا ساتھ دیا اور آپ کو وزیراعلیٰ بنایا۔ لیکن، آپ نے پھر دھوکہ دیا۔ اس کے بعد ہماری حکومت 17 ماہ تک اقتدار میں رہی۔ ہم نے 17 مہینوں میں جو کچھ کیا اور جتنی بھی نوکری دی وہ پورے ملک میں ایک ریکارڈ بن گئی۔ تیجسوی یادو نے سوال کیا کہ اے بی جے پی والوں، بتاؤ کیا مودی جی اس بات کی ضمانت دیں گے کہ نتیش کمار دوبارہ نہیں پلٹیں گے؟

تیجسوی یادو نے مزید کہا کہ سمراٹ جی اور وجے سنہا جی، ہم آپ سے پوچھتے ہیں کہ کیا جو کام کرے گا وہ اس کا کریڈٹ نہیں لے گا۔ اگر ہم نے اتنی نوکریاں دی ہیں تو کریڈٹ کیوں نہیں لیں؟ لیکن، نتیش کمار کہتے ہیں کہ کریڈٹ نہ لیں۔ تیجسوی یادو نے سابق وزیر اعلی جیتن رام مانجھی پر تنقید کی۔ اس کے بعد مانجھی بھی جوابی حملہ کرنے کے لیے کھڑے ہوئے لیکن کرسی نشیں نے انہیں بٹھا دیا۔ تیجسوی یادو نے کہا کہ جب تک حکومت میں استحکام نہیں ہوگا، کوئی بھی ریاست ترقی نہیں کرے گی۔ مجھے اس بات کی فکر ہے کہ نتیش جی کے ایم ایل اے کس چہرے کے ساتھ اپنے حلقوں میں جائیں گے۔ آپ کیا کہیں گے کہ ہم نے آپ کو نوکری دی؟ یہ کس منہ سے کہو گے؟ افسرشاہی حاوی ہے یہ ہم نہیں بی جے پی والے بولتے تھے۔ عظیم اتحاد کی حکومت میں بی جے پی بہت خوفزدہ تھی۔ بی جے پی پورے ملک میں اتنی خوفزدہ نہیں تھی جتنی آپ کی اور ہماری حکومتوں میں تھی۔

تیجسوی یادو نے ان تینوں ایم ایل اے سے بھی مخاطب ہوئے جو جے ڈی یو کیمپ میں چلے گئے۔ انہوں نے کہا کہ پرہلاد جی، آپ اتنے سالوں سے آر جے ڈی کے ساتھ ہیں، میں آپ کا شکریہ ادا کرتا ہوں۔ چیتن آنند چھوٹے بھائی کی طرح ہیں۔ جب کوئی پارٹی انہیں ٹکٹ نہیں دے رہی تھی تو آر جے ڈی نے انہیں ٹکٹ دیا اور وہ ایم ایل اے منتخب ہوگئے۔ ہم نے انہیں ان کے والد کی خوبیوں کی بنیاد پر نہیں بلکہ ان کی خوبیوں کی بنیاد پر ساتھ لایا تھا۔ نیلم جی، آپ ایک عورت ہیں، ہم آپ کی عزت کرتے ہیں۔ جو بھی باتیں ہوئی ہیں، وہ پورا نہ ہوا تو ہمیں یاد کیجیئے۔ تیجسوی یادو نے کہا کہ پرانی پنشن پالیسی کو لاگو کیا جانا چاہیے۔ انہوں نے سمراٹ چودھری سے کہا کہ آپ اس پر عمل درآمد کرائیں ہم آپ کو کریڈٹ دیں گے۔ یہ کہہ کر تیجسوی یادو ایوان سے چلے گئے۔

کانگریس لیجسلیچر پارٹی لیڈر شکیل احمد خان نے ایوان سے باہر نکلتے ہوئے کہا کہ ایسا موقع بھی آتا ہے جب جیت میں بھی ہار نظر آتی ہے۔ آپ جیت تو گئے لیکن آپ کی آنکھیں شرم سے جھکی ہوئی ہیں۔ این ڈی اے حکومت محض تضادات سے بھری ہوئی ہے۔ بی جے پی کی تاریخ کے بارے میں نتیش کمار کئی بار کہہ چکے ہیں کہ اس سے ملک بدل جائے گا۔ لیکن، آپ ہمیشہ بدلتے رہے ہیں، تاریخ آپ کو یاد رکھے گی۔