مسلمان ہندوستان کے شہری ہیں، کہیں باہر سے نہیں آئے ہیں: نتیش کمار

پٹنہ: مسلمان یہیں کے ہیں، باہر سے نہیں آئے۔ ۔ کچھ لوگ غیر ضروری پریشانی پیدا کرنے کی کوشش کرتے رہتے ہیں۔ جن باتوں کا آئین میں ذکر نہیں وہ بھی ان دنوں ہو رہا ہے۔ ملک کی تاریخ بدلنے کی کوشش کی جارہی ہے اور آزادی کی باتیں کی جارہی ہیں۔ آپ سب دعاء کریں کہ ملک سلامت رہے۔ وزیر اعلیٰ نتیش کمار نے حج بھون میں منعقد دعائیہ مجلس میں موجود عازمین و عازمات حج سے خطاب کے دوران ان خیالات کا اظہار کیا۔ انہوں نے کہا کہ  بہار سے کثیر تعداد میں خواتین کا حج پر جانا خوشی کی بات ہے۔ میں اپیل کرتا ہوں کہ مقدس سرزمین پر آپ سبھی اپنے خاندان کے ساتھ بہار اور ملک کی ترقی کے لئے بھی دعاء کریں۔

حج بھون میں منعقد دعائیہ مجلس میں وزیراعلی نے کہا- سبھی اپنے خاندان کے ساتھ بہار اور ملک کی ترقی کے لیے دعا کریں

انہوں نے کہا کہ اس موقع پر میں آپ سب کو مبارکباد پیش کرتا ہوں۔ عازمین حج کی روانگی کے لیے پروگرام منعقد ہوتا ہے۔ مجھے کئی مرتبہ اس پروگرام میں شرکت کا موقع ملا۔ میں اس پروگرام کا حصہ بن کر مجھے بہت خوشی ہو رہی ہے۔ گزشتہ دو سالوں 2020 اور 2021 میں لوگ کورونا کی وجہ سے حج پر نہیں جا سکے۔ گذشتہ سال 2022 میں کم لوگ حج پر گئے تھے کیونکہ 65 سال سے زیادہ عمر کے لوگوں کو حج پر جانے کی اجازت نہیں تھی۔ اس مرتبہ 5,638 عازمین حج مقدس حج پر جارہے ہیں جن میں 2,399 خواتین بھی شامل ہیں۔ اس سے پہلے ہم نے اتنی بڑی تعداد میں عازمین حج نہیں دیکھے۔ اس بار بڑی تعداد میں خواتین بھی حج پر جا رہی ہیں، یہ بڑی خوشی کی بات ہے۔ میں تمام عازمین حج کو مبارکباد پیش کرتا ہوں۔ جن لوگوں کو حج پر جانے کا موقع ملتا ہے، انہیں پہلے ہی نیک تمنائیں مل چکی ہیں۔ آپ سب جو حج پر جا رہے ہیں، آپ کو بہت آگے بڑھنے کا موقع ملے گا۔ وہاں آپ سبھی اپنے خاندان کے ساتھ بہار اور ملک کی ترقی کے لیے دعا کریں گے۔

وزیراعلیٰ نے کہا کہ ہم بھی وہاں گئے ہیں۔ یہ الگ بات ہے کہ مجھے اندر جانے کا موقع نہیں ملا۔ آپ سب معاشرے میں بھائی چارے اور امن کے قیام کے لیے دعا کریں۔ کچھ لوگ غیر ضروری پریشانی پیدا کرنے کی کوشش کرتے رہتے ہیں۔ جن باتوں کا آئین میں ذکر نہیں وہ بھی ان دنوں ہو رہا ہے۔ ملک کی تاریخ بدلنے کی کوشش کی جارہی ہے اور آزادی کی باتیں کی جارہی ہیں۔ آپ سب دعاء کریں کہ ملک سلامت رہے۔ ہم تمام معاشرے اور تمام مذاہب کی بہتری کے لیے کام کر رہے ہیں۔ ہم نے شروع سے ہی ایک دوسرے کے درمیان محبت اور بھائی چارے کی فضا کو برقرار رکھنے کے لیے کام کیا ہے۔ آج کل ماحول کو خراب کرنے کی کوششیں کی جا رہی ہیں۔ آپ سب کو ہوشیار رہنا چاہیے، آپس میں تنازعہ اور جھگڑا نہیں ہونا چاہیے۔ آپ سب مل کر آگے بڑھیں۔ مسلم طبقہ کے لوگ بھی یہیں کے ہیں، باہر سے نہیں آئے، یہ بات ہمارے والد نے بچپن میں ہی بتا دی تھی۔ ہم ہندو اور مسلم میں فرق نہیں مانتے۔ سب کو متحد رہ کر اپنے اپنے مذاہب کا احترام کرنا چاہیے، ہم یہی چاہتے ہیں۔

وزیر اعلیٰ نے کہا کہ بہار میں شراب پر مکمل طور پر پابندی کے نفاذ کے بعد اب جب آپ سب باہر جاتے ہیں تو لوگ آپ کی کتنی تعریف کرتے ہیں۔ میری خواہش ہے کہ آپ سب لوگوں کو اچھے کام کی طرف راغب کرتے رہیں۔ میں بہار اسٹیٹ حج کمیٹی کے چیئرمین اور اراکین کا شکریہ ادا کرتا ہوں۔ ہم ہمیشہ یہاں آتے رہے ہیں۔ اس بار 5,638 لوگ حج پر جا رہے ہیں۔ آپ سب اس قدر بہتر طریقے سے سفر کریں کہ اگلی بار عازمین حج کی تعداد اور بھی بڑھ جائے۔ آپ سب کی زندگی بہتر ہو، آپ کا خاندان خوش رہے۔ آپ سب کو بہار اور ملک کی ترقی کے لیے دعا کرنی چاہیے۔ جن کو وہاں جانے کا موقع ملتا ہے، وہ وہاں بہت زیادہ فائدے حاصل کرتے ہیں۔ آج کل زیادہ سے زیادہ لوگ موبائل کے چکر میں ہیں۔ انہوں نے اسے عبادت میں بھی استعمال کرنا شروع کر دیا ہے۔ میری آپ سب سے گزارش ہے کہ موبائل کے معاملے میں زیادہ نہ پڑیں۔ یہ ایسی چیز ہے جو زمین کو تباہ کر دے گی۔ اسے صرف ضرورت کے مطابق استعمال کریں۔ آپ اپنے الفاظ کو کاغذ پر رکھیں تو بہتر ہوگا۔

وزیر اعلیٰ نے کہا کہ آپ سب حج پر جا رہے ہیں، یہ بہت اہم اور مقدس مقام ہے۔ آپ سب کو کسی قسم کی پریشانی کا سامنا نہ کرنا پڑے اس بات کو مدنظر رکھتے ہوئے باہمی رابطہ کاری کے لیے 15 سرکاری افسران کو تعینات کیا گیا ہے۔ آپ سبھی کو کامیابی ملے۔ انہوں نے کہا کہ حج بھون کافی بہتر ڈھنگ سے بنا ہوا ہے۔ یہاں ہر قسم کے انتظامات کیے گئے ہیں۔ عازمین حج کے لیے یہاں قیام و طعام کا بھی انتظام کیا گیا ہے۔ آپ لوگوں کو گیا ایئرپورٹ سے جانا ہے۔ ہر قسم کے انتظامات کیے گئے ہیں تاکہ آپ لوگوں کو کسی قسم کی تکلیف کا سامنا نہ کرنا پڑے۔ آپ سب صحیح وقت پر پہنچ کر دعاء کریں، یہ ہماری نیک خواہشات ہیں۔ میں ایک بار پھر آپ سب کو مبارکباد دیتا ہوں۔

اللہ کے فضل وکرم اوراس کی عنایت سے تین سال کے توقف کے بعدپھرسے گیاامبارکیشن پوائنٹ سے بہارکے عازمین حج کاسلسلہ شروع ہوگیاہے۔عازمین وعازمات کے اعزازمیں حج بھون کے احاطہ میں شاندارافتتاحی دعائیہ مجلس کاانعقاد ہوا۔گیاایرپوٹ سے سوئے حرم روانہ ہونے والے پہلے قافلے سے خطاب کرتے ہوئے مہمان خصوصی عزت مآب وزیراعلیٰ بہارجناب نتیش کمار افتتاحی دعائیہ مجلس میں تشریف لائے ،تمام معززمہمانان کرام اورعازمین وعازمات کاخیرمقدم کرتے ہوئے مبارک سفرپرروانہ ہونے والے عازمین حج کودل کی اتھاہ گہرائیوں سے مبارکبادی پیش کرتے ہوئے کہا کہ میں کئی سالوں سے یہاں آرہاہوں صرف کروناکی وجہ سے دوسال لوگ سفرِ حج پرروانہ نہیں ہوسکے ،مجھے اس با ت کی خوشی ہے کہ بڑی تعدادمیں لوگ اس مقدس سفرپرروانہ ہورہے ہیں۔اس سے زیادہ خوشی اس بات کی ہے کہ بڑی تعدادمیں خواتین عازمات سفرِ حج پرروانہ ہورہی ہیں یہ بہارکے لئے بڑے فخرکی بات ہے۔آپ وہاں جاکراپنے لئے جوبھی دعاء کریں اس کے ساتھ ساتھ ملک اوربہارکی ترقی وخوشحالی اوربھائی چارے کی دعاء ضرورکریں اوریہ بھی دعاء کریں کہ ہم سب مل کراپنے ملک اورریاست کوبلندی تک پہونچائیں گے۔

دعائیہ مجلس سے خطاب کرتے ہوئے نائب وزیراعلیٰ جناب تیجسوی پرسادیادونے کہاکہ ہم آپ تمام لوگوں کودل سے مبارک بادپیش کرتے ہیں اس مقدس سفرپر آپ اپنے ملک اوراپنے صوبہ کی ترقی ،خوشحالی اورامن وشانتی کی دعاء ضرورکریں،ہمارے والدمحترم جناب لالوپرسادجی نے بھی اس مقدس سفرپرروانگی کے لئے آپ کومبارک بادی پیش کی ہے۔

حاجیوں کا مقصد صرف انسانیت کی بھلائی اور خیرخواہی ہو :انجینئر شمیم

آج کی افتتاحی دعائیہ مجلس میں اپنے خصوصی خطاب کے ذریعہ انجنیرشمیم صاحب نے فرمایاکہ حج کاسفرکیوں ہوتاہے ؟اورجانے کامقصدکیاہے۔یہ دراصل عالمی اجتماع ہے جہاں ساری دنیاکے لوگ ،بلاتفریق کے پہونچتے ہیں ،اس لئے سب کاپہناواایک ہی ہوتاہے۔وہاں ہرنسل ورنگ اورزبان کے لوگ ہوتے ہیں ؛لیکن مقصدسب کاایک ہی ہوتاہے۔اوروہ انسانیت کی بھلائی ۔ہمارے نبی کاآخری پیغام بھی یہی تھا۔اللہ کے نبی صلی اللہ علیہ وسلم نے ۱۰ھ میں حج کیااورآپ نے مختلف مقامات پررہتی دنیاتک کے انسانوں کوجوپیغام دیاوہ خطبہ حجۃ الوداع کے نام سے معروف ہے۔آپ علیہ السلام نے انسانی عزت وحرمت پربہت زورڈالا،ایک دوسرے کے حقوق کویاددلایااورہرطرح کی اونچ نیچ اورتفریق کواپنے قدمے تلے روندڈالا،آپ علیہ السلام نے سوالاکھ سے زیادہ صحابہ کومخاطب کرتے ہوئے فرمایاکہ سب لوگ آدم علیہ السلام کی اولادہیں جوکہ مٹی سے پیداکئے گئے تھے،کسی کوکسی پرکسی بھی طرح کی کوئی فضیلت وبرتری حاصل نہیں ،نہ عربی کوعجمی پر،نہ عجمی کو عربی پر،نہ کالے کوگورے پراورنہ اس کے برعکس ہاں تم میں سب سے قابل عزت وہ شخص ہے جواللہ کاڈرپیداکرے۔

اس سے پہلے خطبہ ٔ استقبالیہ پیش کرتے ہوئے بہارریاستی حج کمیٹی کے معززچیرمین الحاج عبدالحق صاحب نے افتتاحی دعائیہ مجلس میں مہمان خصوصی معززوزیراعلیٰ بہارکاشکریہ اداکیاکہ اپنی تمام ترمصروفیات کے باوجود عازمین وعازمات کے اعزازاورہم لوگوں کی محبت میں تشریف لاکردعائیہ مجلس کوزینت بخشی ،آج ہم لوگوں کے لئے بہت خوشی کادن ہے کہ تین سال کے لگاتارتوقف کے بعد اس بارپھرسے گیاامبارکیشن پوائنٹ سے بہارکے عازمین حج کے سفرِحج کاسلسلہ شروع ہواہے۔اس کے لئے ہم تمام لوگ معززوزیراعلیٰ بہارکے بے حد ممنون ومشکورہیں،کیوں کہ آپ ہی کی کوششوں سے گیاامبارکیشن پوائنٹ سے عازمین حج کی روانگی کاسلسلہ برقراررکھاگیاہے۔

چیف سکریٹری بہارجناب عامرسبحانی صاحب نے اظہارِ تشکرکرتے ہوئے کہاکہ ہم اپنے معز وزیراعلیٰ اورنائب وزیراعلیٰ کے بے حدشکرگزارکے مصروفیتوں کے باوجود ہمارے بیچ تشریف لائے ۔افتتاحی تقریب کی نظامت جناب پروفیسرارشدقادری نے کی۔ آج کی اس افتتاحی دعائیہ مجلس میں عازمین وعازمات کے علاوہ کثیرتعدادمیں نے فرزاندان توحید شریک ہوئے۔

میڈیاانچارج جناب صغیراحمدنے بتایاکہ فلائٹ نمبر:SG-5307سے سوئے حرم روانہ ہونے والے عازمین کی تعداد76اورعازمات کی تعداد65ہے جنکی مجموعی تعداد 141ہے جوپٹنہ ،دربھنگہ ،مدھوبنی،نالندہ ،مشرقی چمپارن،سیوان اورپورنیہ ضلع سے تعلق رکھتے ہیں۔فلائٹ صبح ۸بجے مکہ کے لئے روانہ ہوگی۔

نائب وزیر اعلیٰ تیجسوی پرساد یادو، اقلیتی بہبود کے وزیر محمد زماں خان، چیف سکریٹری عامر سبحانی اور بہار اسٹیٹ حج کمیٹی کے چیئرمین عبدالحق نے بھی دعائیہ مجلس سے خطاب کیا۔ رکن اسمبلی جناب چوہدری محبوب علی قیصر نے شکریہ کی تجویز پیش کی۔

اس سے قبل اس دعایہ مجلس پروگرام میں اقلیتی بہبود کے وزیر محمد زماں خان اور بہار اسٹیٹ حج کمیٹی کے چیرمین عبدالحق نے وزیراعلی کو پھولوں کا گلدستہ، ٹوپی اورشال پیش کر ان کی عزت افزائی کی۔ اس موقع پر انفارمیشن اینڈ ٹکنالوجی کے وزیر اسرائیل منصوری، وزیر قانون شمیم ​​احمد، ڈیزاسٹر مینجمنٹ کے وزیر جناب شاہنواز، ارکان اسمبلی شکیل احمد خان، اختر الاسلام شاہین، رکن قانون ساز کونسل خالد انور، بہار اسٹیٹ سنی وقف بورڈ کے چیئرمین محمد ارشاد اللہ بہار اسٹیٹ شیعہ وقف بورڈ کے چیرمین سید افضل عباس، محکمہ اقلیتی بہبود کے سکریٹری محمد سہیل، بہار اسٹیٹ حج کمیٹی کے سابق چیئرمین محمد الیاس حسین عرف سونو بابو، بہار اسٹیٹ حج کمیٹی کے سابق رکن ای شمیم ​​احمد  سمیت اراکین قانون سازیہ،، سابق اراکین اسمبلی، سابق اراکین کونسل، دیگر معززین، عازمین حج اور بہار اسٹیٹ حج کمیٹی سے وابستہ لوگ موجود تھے۔