ناموسِ رسالت پر حملہ اور اس کے تدارک کی صورتیں

علامہ اقبال کا ایک مشہور شعر ہے، ستیزہ کار رہا ہے از ل سے تا امروز۔ چراغِ مصطفوی سے شرارِ بولہبی۔ یعنی پہلے دن سے آج تک جو اسلام دشمن قوتیں ہیں وہ حضورؐ کی مخالفت کرتی رہی ہیں اور آپ کے ناموس پر حملہ کرتی رہی ہیں۔ لہٰذا ان دنوں ناموسِ رسالت پر جس طرح کے حملے ہورہے ہیں وہ نہ نئی بات ہے اور نہ تعجب خیزک بات ہے۔ یہ اہلِ کفر اور منافقین و معاندین کا پرانا طرزِ عمل ہے جو الگ الگ روپوں میں ہمارے سامنے آتا ہے۔ اس کی وجہ کیا ہے؟ اس کی وجہ صرف یہ ہے کہ اسلام کی سادگی اور سچائی کے سامنے ان کی تمام تر فلسفیانہ اور علم کلام کی موشوگافیاں جب بے معنی ثابت ہوتی ہیں اور لوگ حضورؐ کی سیرت و سنت سے متاثر ہوکر حلقہ بگوش اسلام ہونے لگتے ہیں تو ان کا غصہ ساتویں آسمان پر ہوتا ہے اور وہ پاگل پن میں نہ جانے کیا کیا بکنے اور کرنے لگتے ہیں۔ کوئی آپ کے خلاف شعر کہتا ہے، کوئی ناول لکھتا ہے، کوئی کارٹون بناتا ہے، کوئی ڈرامے اسٹیج کرتا ہے ، کوئی فلم بناتا ہے ۔ یہ سب ایک اعلیٰ اور محلاتی سازش کے تحت ہوتا ے۔ مشہور انگریزی صحافی سعید نقوی کے بقول جس ناشر نے سلمان رشدی کی بدنام زمانہ کتاب شیطانی آیات چھاپیہے اس نے رشدی کو اس کتاب کو لکھنے کے لیے ۹ کروڑ روپئے بطورِ ایڈوانس دیے تھے۔ اس سے اس سازش کا اندازہ لگایا جاسکتا ہے۔ اس کا مقصد صرف یہ ہے کہ لوگ آپ کی اصل دعوت، شخصیت، سیرت و کردار، اخلاق اور معاملات سے واقف نہ ہوں بلکہ ان کے ذریعے عام انسانوں اور حضورؐ کے درمیان ایک ایسا پردہ کھینچ دیا جائے تاکہ لوگ آپ کی اصل سیرت و شخصیت سے نا آشنا ہوکر غلط فہمی کے شکار رہیں اور آپ کی دعوت سے دور رہیں۔ آپ نے سنا نہیں زمانہ جاہلیت میں عرب کے ایک مشہور شاعر جب حج کرنے آئے تو لوگوں نے ان کے دل میں حضورؐ سے ایسی نفرت بھر دی تھی کہ وہ حرم مکہ میں طواف کے وقت کانوں میں روئی ٹھونس کرجاتے تھے کہ مبادا کہیں حضورؐ کی زبان سے کلامِ الٰہی نہ سن لیں۔ مگر قدرت کو کچھ اور ہی منظور تھا۔ ایک دن جیسے ہی انھوںنے حضورؐ کی زبانی کلامِ الٰہی سنا گرویدہ ہوکر ایمان لے آئے۔ اہلِ کفر کو یہ بات اچھی طرح معلوم ہے کہ اگر وہ شوروغوغا نہیں کریں گے تو یہ منظر ہر جگہ دیکھنے کو ملے گا۔ وہ چونکہ اندر سے بے حد ڈرے ہوئے ہیں اور خود کو غیر محفوظ محسوس کرتے ہیں۔ اس لیے وہ اپنے اندرونی خوف کو اپنی ظاہری خباثت سے دبانے کی کوشش کرتے ہیں۔ ہم جانتے ہیںکہ جب کوئی بدبخت ناموسِ رسالت پر حملہ کرتا ہے تو ہمارے دل چھلنی ہوجاتے ہیں اور جذبات پر قابو رکھنا مشکل ہوجاتا ہے۔ مگر آپ کو معلوم ہونا چاہیے کہ یہ جو کچھ ہورہا ہے وہ اچانک نہیں ہوتا بلکہ ایک سوچی سمجھی سازش کے تحت ہوتا ہے۔ جس کا مقصد آپ کو مشتعل کرکے آگ اور خون کی ہولی کھیلنا ہے تاکہ آپ کو دبادیا اور ڈرایا جاسکے اور آپ کو تباہ و برباد کیا جائے۔ لہٰذا حکمت اور مومنانہ فراست کا تقاضہ یہ ہے کہ اپنے زبان و جذبات پر قابو رکھا جائے اور اپنا ہاتھ باندھے رکھا جائے۔ اگر ہوسکے تو ایسے لوگوں کو نادان سمجھ کر معاف کردیا جائے، یا پھر پُرامن، جمہوری اور قانونی طریقے سے چارہ جوئی کرکے ایسی شرارتوں کا مقابلہ کیا جائے۔ جوابی تشدد ہلاکت خیز ہوگا اس سے ہر حال میں بچنا ہے۔

صلح حدیبیہ کے موقع پر جب صلح نامہ لکھا جارہا تھا تو لکھا گیا کہ یہ صلح نامہ محمدرسول اللہ کی طرف سے اور اہلِ قریش کے ساتھ کیا جارہا ہے۔ قریش کے وفد کے سردار عروہ بن سہیل نے کہا کہ یہ صلح نامہ محمد بن عبداللہ کی طرف سے لکھا جائے کیونکہ اگر ہم آپ کو رسول مانتے تو آپ سے لڑتے کیوں؟

صاف بات ہے جو حضورؐ کو رسول نہیں مانتے ان پر آپ کا احترام واجب نہیں ہے۔ تب یہ معاملہ محض اخلاق و شرافت کا رہ جاتاہے کہ ایک آدمی کتنا مہذب ہے اور دوسروں کے ساتھ کتنا احترام سے پیش آتا ہے۔ حضورؐ کا احترام مسلمانوں پر واجب ہے اور آپ کی شان میں ذرا سی گستاخی تلف ایمان کاسبب بن سکتی ہے۔ لہٰذا مسلمانوں کو بہت محتاط رہنے کی ضرورت ہے۔ رہے غیر مسلم تو وہ اگر وہ رسمی احترام کرتے ہیں تو اچھی بات ہے ورنہ ان سے ایسی توقع رکھنا فضول ہے۔ سوال یہ ہے کہ ایسے موقعوں پر ہمار ردِ عمل کیا ہونا چاہیے اور کیسے ہم اس کا تدارک کرسکتے ہیں۔ میں یہاں پوری امت اور اسلامیانِ ہند کے سامنے چند نکات پیش کرنا چاہتا ہوں۔ امید ہے کہ اس پر غور کیا جائے گا اور اگر قابلِ عمل لگے تو اس پر عمل بھی کیا جائے۔

(۱) جب کبھی ناموسِ رسالت پر حملہ ہو ،ہمارا سب سے پہلا ردِ عمل یہ ہونا چاہیے کہ ہم دوڑ کر اپنے خدا اور اس کے رسول کے ساتھ چمٹ جائیں اور کثرت سے حضور پاک کی خدمت میں درودوسلام کا نذرانہ پیش کریں۔ صحابہ کرام کا یہی طرزِ عمل تھا۔ جب کبھی کفار مشرکین، منافقین و معاندین اور یہود و نصاریٰ حضورؐ کی شان میں گستاخیاں کرتے یا آپ کو ایذا دینے کی کوشش کرتے صحابہ کرام کی فدائیت اسی درجہ میں بڑھ جاتی تھی اور وہ اپنا سب کچھ نچھاور کرکے آپ کی دفاع کرتے تھے۔ صحابہ کا یہی وہ امتیاز ہے جس کی وجہ سے وہ تمام قطب و ابدال، پیرو ولی سے اعلیٰ مقام رکھتے ہیں۔ آج کے دور میں ہمیں قرآن و سنت اور حضورﷺ کے سیرت و اخلاق سے زیادہ سے زیادہ واقف ہونے کی ضرورت ہے اورسماج میں اس کا چلتا پھرتا نمونہ پیش کرنا ہے۔ یہ وہ طریقہ ہے جس سے دشمنوں کے دل جیتے جاسکتے ہیں۔ اپنے پڑوسیوں اور دیگر ابنائے وطن کے سامنے حضورﷺ کی سیرت و سنت کا چلتا پھرتا نمونہ پیش کرکے ہم اس طوفانِ بدتمیزی کا کارگر ڈھنگ سے مقابلہ کرسکتے ہیں۔

(۲) ہمیں چاہیے کہ سیرت پاک پر سو صفحات پر مشتمل ایک کتاب جس میں تمام اہم سوالات کا جواب موجود ہو اس کو بھارت کے تمام ۲۳ دستوری زبان میں ایک ایک لاکھ کی تعداد میں چھپوا کر اس زبان کے اپنے ادبی اور لسانی خصوصیات اور محاورات کو ملحوظ رکھ کر مرتب کرایا جائے اور ان زبانوں کے جاننے والوں کے درمیان مفت تقسیم کرایا جائے۔ اس طرح زیادہ سے زیادہ لوگوں کو حضور کی ذات، سیرت و سنت سے واقفیت ہوگی۔

(۳) نبی کتھا کے نام سے لوک کتھا کے طرز پر حضورؐ کی ذات و سیرت کو عام عوام کے سامنے پیش کیا جائے جیسے مگہی، بھوجپوری، میتھلی، بندیل کھنڈی، اودھی، راجستھانی، ہریانوی، پنجابی وغیرہ۔ تاکہ عام آدمی بھی حضورﷺ کی سیرت و سنت سے واقف ہوسکے۔ ان زبانوں میں ہمارے جو شاعر حضرات ہیں ان کو خاص طور سے سیرت کو موضوع بناکر طبع آزمائی کرنی چاہیے۔

(۴) ہمارے یہاں میلاد کی مجلسیں، سیرت کے جلسے ہوتے رہتے ہیں۔ اس کا اہتمام خوب خوب کرنا چاہیے۔ اختلافی باتوں سے گریز کرتے ہوئے سیرت پر زیادہ زور دیا جائے کہ یہ ایک اہم ادارہ ہے جس کے ذریعے سیرت کے پیغام کو گھر گھر عام کرنے میں مدد ملے گی۔ یہ چند امور ہیں اگران پر توجہ دی جائے تو اس کا بہت فائدہ ہوگا۔ نہ صرف ہم موجودہ فتنوں کا مقابلہ کرپائیں گے بلکہ سماج پر اس کے مثبت اثرات مرتب ہوں گے۔ ہم موجودہ شر کو ایسے ہی خیر سے دور کرسکتے ہیں۔

(کالم نگار اردو کی بیسٹ سیلر بک’اکیسویں صدی کا چیلنج اور ہندوستانی مسلمان- بند گلی سے آگے کی راہ‘ کے مصنف ہیں)