مودی حکومت نفرت اور خوف پیدا کر رہی ہے: راہل

نئی دہلی: کانگریس کے سابق صدر راہل گاندھی نے مودی حکومت پر سخت حملہ کرتے ہوئے کہا کہ گزشتہ آٹھ برسوں میں بے روزگاری اور مہنگائی اپنے عروج پر پہنچ گئی ہے اور اسے روکنے کی کوشش کرنے کے بجائے حکومت نے مخالفانہ اقدامات کرکے خوف اور نفرت پھیلانے کا کام کیا ہے اتوار کو یہاں رام لیلا میدان میں حکومت کی پالیسیوں کے خلاف پارٹی کی "ہلا بول” ریلی سے خطاب کرتے ہوئے مسٹر گاندھی نے کہا کہ آج ملک کے حالات بہت خراب ہو چکے ہیں۔ جب سے بھارتیہ جنتا پارٹی کی حکومت آئی ہے، ملک میں نفرت اور غصہ بڑھتا جا رہا ہے۔
انہوں نے کہا کہ مودی حکومت کے آنے کے بعد نفرت مسلسل پھیل رہی ہے لیکن حکومت اسے روک نہیں رہی ہے۔ اسی طرح ملک میں خوف کی فضا ہے اور اس میں مسلسل اضافہ ہورہا ہے۔ انہوں نے کہا کہ اس حکومت کے آنے کے بعد سے ایک نہیں کئی خدشات پیدا ہوئے ہیں۔ حکومت کی غلط پالیسیوں کی وجہ سے لوگ اپنے مستقبل سے خوفزدہ ہیں، مہنگائی اور بے روزگاری کا خوف ہے۔
کانگریس کے لیڈر نے کہاکہ مشکل یہ ہے کہ یہ خوف کم نہیں ہو رہا ہے، یہ خوف بڑھتا جارہا ہے، اس کی وجہ سے ہندوستان میں نفرت بڑھ رہی ہے۔ نفرت سے لوگ تقسیم ہوتے ہیں، ملک تقسیم ہوتا ہے، ملک کمزور ہوتا ہے۔انہوں نے کہا کہ آج ملک میں مہنگائی اور بے روزگاری نے سب سے زیادہ مشکلات پیدا کر دی ہیں۔ ملک جن مشکلات سے گزر رہا ہے اس کا سارا کریڈٹ بی جے پی کی غیر ذمہ دار حکومت کو جاتا ہے۔ آج ملک چاہ کر بھی اپنے نوجوانوں کو روزگار نہیں دے سکے گا۔ جو بے روزگاری آج آپ دیکھ رہے ہیں، آنے والے وقتوں میں مزید بڑھے گی۔

طارق انورسمیت 17 لیڈروں نے ہلا بول ریلی سے خطاب کیا

کانگریس کی بدعنوانی اور مہنگائی کے خلاف ‘ہلا بول ریلی’ میں پارٹی کے سابق صدر راہل گاندھی سمیت 17 لیڈروں نے اجلاس سے خطاب کیا اور سبھی نے مسٹر گاندھی کی قیادت کی تعریف کرتے ہوئے مودی حکومت پر تنقید کی کانگریس کی اتوار کو یہاں رام لیلا میدان میں منعقدہ ’ہلا بول ریلی‘ میں ملک کے مختلف حصوں سے بڑی تعداد میں شامل ہوئے کانگریس کارکنان سے مسٹر گاندھی سمیت 17 مقررین نے خطاب کیا  لوگ 10 بجے سے پہلے ہی ریلی کے مقام پر پہنچ چکے تھے جبکہ مسٹر گاندھی تقریباً 1 بجے ریلی کے مقام پر پہنچے۔
ریلی کو سب سے پہلے آسام کے نوجوان ایم پی گورو گوگوئی نے خطاب کیا اور کہا کہ صرف ایک لیڈر یعنی مسٹرراہل گاندھی ہی ملک کے لیے لڑ رہے ہیں۔ ریلی میں آنے والے لوگوں کی بھیڑ ثابت کرتی ہے کہ حکومت کے خلاف کانگریس کی یہ تحریک اب رکنے والی نہیں ہے۔
کانگریس کے جنرل سکریٹری طارق انور نے کہا کہ مودی حکومت سماج کو تقسیم کرنے کا کام کر رہی ہے اور اس ریلی کے ذریعے حکومت کو سخت پیغام جائے گا۔ اشوک چوہان نے کہا کہ حکومت مہنگائی سے غریبوں کوماررہی ہے اور ملک کے غریبوں کی آواز مرکزی حکومت تک پہنچانے کے لیے اس ریلی کا انعقاد کیا گیا ہے۔
راجستھان سے کانگریس کے نوجوان لیڈر سچن پائلٹ نے کہا کہ اس حکومت نے مہنگائی میں زبردست اضافہ کرکے عوام پرجو حملہ کیا ہے اس کے تعلق سے حکومت کو اب بیدار کرکے ہی رہیں گے۔ مکل واسنک نے کہا کہ مودی حکومت نے ملک کے عوام کے ساتھ جو کھلواڑ کیا ہے اسے برداشت نہیں کیا جائے گا۔ اس ریلی کے ذریعے حکومت کے خلاف جنگ کا آغاز ہوچکا ہے۔
لوک سبھا میں کانگریس کے لیڈر ادھیر رنجن چودھری نے سینئر لیڈر غلام نبی آزاد کا نام لئے بغیرپارٹی سے ان کے استعفیٰ پر کہا کہ کانگریس ایک دریا ہے اور لوگ اس میں آتے جاتے رہتے ہیں۔ انہوں نے کہا کہ کانگریس لیڈر عوام سے جڑے ہوئے ہیں اور یہی وجہ ہے کہ مسٹر گاندھی نے ملک کے لوگوں سے جڑنے اور ہندوستان کو جوڑنے کے لئے بھارت جوڑو ریلی کا انعقاد کیا ہے۔

کانگریس کی ریلی سے خطاب کرتے ہوئے مدھیہ پردیش کے سابق وزیر اعلیٰ کمل ناتھ نے کہا کہ ملک کے سامنے بے روزگاری سب سے بڑا چیلنج ہے اور کانگریس لیڈر راہل گاندھی اس ریلی کے ذریعے کسانوں، غریبوں اور عام آدمی کی آواز کو حکومت تک پہنچا رہے ہیں۔ ہریانہ کے سابق وزیر اعلی بھوپیندر سنگھ ہڈا نے کہا کہ ریلی میں بڑی تعداد میں عوام کی شرکت بتاتی ہے کہ مسٹر گاندھی کی قیادت میں ملک میں تبدیلی کی ہوا آنے والی ہے۔
جموں و کشمیر کانگریس کے صدر غلام رسول نے کہا کہ اس حکومت میں غریبوں کا برا حال ہے اور جو غریب ہیں وہ غریب تر ہوتے جارہے ہیں۔ چھتیس گڑھ کے وزیر اعلی بھوپیش بگھیل نے کہا کہ حیران کن بات یہ ہے کہ مودی حکومت صنعت کاروں کے دس لاکھ کروڑ روپے کے قرض معاف کر سکتی ہے، لیکن اس کے پاس مہنگائی کو روکنے کے لیے کوئی اقدامات نہیں ہیں۔
راجیہ سبھا میں اپوزیشن لیڈر ملکارجن کھڑگے نے کہا کہ مودی حکومت مہنگائی سے بہت خوفزدہ ہے۔ وہ اس بارے میں پارلیمنٹ میں بولنے کو تیار نہیں ہے۔ پارلیمنٹ کے اجلاس کے دوران انہیں بحث کرانے کا نوٹس دیا گیا لیکن وہ ملتوی کرتی رہی، آخرکار اسےاجازت دینی پڑی۔ ان کا کہناتھا کہ یہ گونگی بہری حکومت ہے جو اپوزیشن کی آواز اور عوام کی آواز نہیں سنتی۔
راجستھان کے وزیر اعلیٰ اشوک گہلوت نے کہا کہ مودی حکومت مہنگائی کم کرنے میں نااہل ثابت ہو رہی ہے۔ دہلی پردیش کانگریس کے صدر انیل چودھری نے کہا کہ وہ مہنگائی کو لے کر مسلسل ہنگامہ کر رہے ہیں لیکن یہ گونگی بہری حکومت سننے کو تیار نہیں ہے۔
ہماچل پردیش کانگریس لیڈر پرتیبھا سنگھ نے کہا کہ ریاست میں ہوانے والے اسمبلی انتخابات میں مہنگائی اور بے روزگاری فطری طور پرحاوی رہے گی۔ ان کا کہناتھا کہ عوام مہنگائی کا شکار ہیں لیکن حکومت کوئی قدم اٹھانے کو تیار نہیں۔

ہلا بول ریلی میں بہار کی زبردست حصہ داری: انتخاب عالم

آل انڈیا کانگریس کمیٹی کے رکن و سپریم کورٹ کے ایڈوکیٹ انتخاب عالم نے کہا کہ مہنگائی کے خلاف دہلی میں منعقد کانگریس کی ہلا بول ریلی میں بہار سے بھی کانگریس کی زبردست حصہ داری رہی۔ انہوں نے کہا کہ آج بھی کانگریس زمین پر عوام کے مفادات کے لئے موجود ہے۔ ہلا بول ریلی میں ملک کے گوشے گوشے سے آئے ہوئے کانگریس کے جانباز ساتھ اور ان کی موجودگی نے راہل گاندھی کے ہاتھوں کو مزید مضبوط کرے گی۔ انہوں نے کہا کہ تمام ریاستوں سے آئے کانگریس کے ساتھیوں میں بہار کی موجودگی زبردست رہی۔